Ðɩwɛɛ niye tɔm susuu taa nɛ pɩkɩlɩ—Tɩŋnɩ kaŋgalaafu yɔɔ nɛ ŋsusi tɔm

ƐBƐ YƆƆ PƖCƐYAA: Kaŋgalaafu kɛ nʋmɔʋ kɩbaŋʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩlɩzɩ “aseɣɖe piye piye Ɛsɔ lootiye tɔm kɩbandʋ yɔɔ yɔ.” (Tʋm 20:24)a Nabʋyʋ yɔɔ lɛ, ɖɩɩpɩzɩɣ se ɖiwolo ɛyaa nabɛyɛ tɛ. Kaŋgalaafu sɩɣnɩ-ɖʋ se ɖisusi ɛyaa mba tɔm.

ƐZƖMA ŊPƖZƖƔ NƐ ŊLA YƆ:

• 

  Ñɔɔzɩ ña-tɩ camɩyɛ. Ñɩnɩ tɔm ñʋʋ ŋgʋ kɩmʋnaa yɔ. Pʋwayɩ lɛ, ŋmaɣzɩ tɔm ndʋ ŋcaɣ yɔɔdʋʋ yɔ tɩ-yɔɔ, nɛ ŋma lɩmaɣza sɔsɔna. Ŋpɩzɩɣ ɖɔɖɔ nɛ ŋñɔɔzɩ tɔm ndʋ pɩwɛɛ se ŋyɔɔdɩ, ye répondeur ecosini-ŋ yɔ. Pɩwɛɣ ɖeu se ŋcaɣ taabɩlɩ nakʋyʋ cɔlɔ nɛ ŋsɩɩ kɩ-yɔɔ takayaɣ ŋga kɔ-yɔɔ ŋma lɩmaɣza sɔsɔna yɔ. Pɩwɛɛ se ŋsɩɩ taabɩlɩ ŋgʋ kɩ-yɔɔ ɖɔɖɔ wondu lɛɛtʋ ɛzɩ taabɩlɛɛtɩ yaa pɔrtaabɩlɩ ŋgʋ kɩ-yɔɔ ŋtʋlʋʋ JW Library^® yaa jw.org^® yɔ

• 

  Sɔɔndʋ ɛtaakpa-ŋ. Yɔɔdʋʋ ɛzɩ ɛyʋ ɛnʋ ɛwɛ ñɛ-ɛsɩndaa yɔ. Mʋʋyʋʋ nɛ ŋlakɩnɩ ñe-nesi tʋmɩyɛ ɛzɩ ɛyʋ ɛnʋ ɛwɛɛ nɛ ɛnaɣ-ŋ yɔ. Ye pɩtɩcɛyɩ yɔ, taasɩŋ. Ye ɩwɛ naalɛ nɛ isusuu tɔm mbʋ yɔ, pɩsɩɣnɩ-ŋ. Ye ɖɩɣdʋ ɛpɔzɩ tɔm natʋyʋ yɔ, ɖaɣnɩ pɔzʋʋ tɔm ndʋ nɛ nɔɔ kʋkʋyaɣ nɛ ña nɛ weyi isusuu tɔm yɔ ɛnɩɩ camɩyɛ nɛ ɛsɩnɩ-ŋ nɛ ŋcosi

• 

  Sɩɩ pɩsɩ nɛ ŋna-ɩ tigiɖe. Ye ɖɩɣdʋ ɛwɩlaa se pɩkɛdɩnɩ-ɩ yɔ, ŋpɩzɩɣ nɛ ŋpɔzɩ tɔm natʋyʋ; nɛ pʋwayɩ ŋtasɩɣ-ɩ yaʋ lɛ, ŋcosi tɩ-yɔɔ. Ŋpɩzɩɣ ɖɔɖɔ ŋheyi-i se ŋpɩzɩɣ nɛ ŋtɩŋnɩ e-mail yɔɔ nɛ ŋma-ɩ tɔm, yaa ŋwolo ɛ-tɛ yaa ŋtiyini-i takayaɣ nakɛyɛ. Ŋpɩzɩɣ ɖɔɖɔ ŋma-ɩ message yaa ŋtɩŋnɩ e-mail yɔɔ nɛ ŋtiyini-i ɖa-takayaɣ nakɛyɛ yaa ɖɛ-tɛ video nakʋyʋ. Ye pɩsaŋ yɔ heyi-i Bibl kpɛlɩkʋʋ ɖʋtʋ ndʋ tɩwɛ jw.org yɔɔ yɔ, yaa tɔm lɛɛtʋ ndʋ tɩwɛ ɖɛ-tɛ intɛrnɛɛtɩ lone yɔɔ yɔ tɩ-tɔm