Tɔm ndʋ Bibl wɩlɩɣ-ɖʋ weyi ɛ-cɔlɔ kɩlɩnaa yɔ ɛ-yɔɔ?

1. Ɛbɛ yɔɔ ŋwɛnɩ ɛsɩmɩyɛ Bibl yɔɔ?

ÐƖWƐNƖ ɛsɩmɩyɛ siŋŋ se Yehowa Ɛsɔ ha-ɖʋ Bibl! Ɛtɩŋɩɣnɩ kɩ-yɔɔ nɛ ɛtasɩɣ-ɖʋ lɔŋ kɩbaŋ; lɔŋ ɛnɩ ɩpɩzɩɣ ɩsɩnɩ-ɖʋ nɛ ɖɩlʋbɩnɩ kala wena ɖɩkatɩɣ sɔnɔ yɔ camɩyɛ. Ɛhaɣ-ɖʋ ɖɔɖɔ cee wayɩ lidaʋ kɩbaŋʋ. Kɔzɩ kɔzɩ lɛ, Yehowa tɩŋɩɣnɩ Bibl yɔɔ nɛ ɛwɩlɩɣ-ɖʋ ɛ-wɛtʋ kɩbandʋ. Alɩwaatʋ ndʋ ɖɩmaɣzɩɣ ɖɛ-Ɛsɔ wɛtʋ kɩbandʋ ndɩ ndɩ yɔɔ yɔ, pitukuuni ɖa-laŋɩyɛ siŋŋ nɛ piseɣtiɣ-ɖʋ se ɖɩñɔtɩnɩ-ɩ nɛ ɖɩpɩsɩ ɛ-taabalaa kɩbama.—Keɣa 24:14.

2. Nʋmɔŋ ndɩ ndɩ weyi yɔɔ Yehowa tɩŋnaa nɛ eyele se ɛyaa ɩtɩlɩ-ɩ?

² Yehowa sɔɔlaa se ɛyaa ɩtɩlɩ-ɩ. Caanaʋ taa lɛ, ɛtɩŋnɩ ɖoza, natʋ, nɛ halɩ Ɛsɔ tiyiyaa yɔɔ nɛ eyele nɛ patɩlɩ-ɩ. (Kɩg. 12:6; Tʋma 10:3, 4) Ɛlɛ ye pataama ɖoza, natʋ, nɛ tɔm ndʋ Ɛsɔ tiyiyaa yɔɔdaa yɔ nɛ pasɩɩ yɔ, ɛzɩma ɖɩpɩzaɣ se ɖɩkpɛlɩkɩ-tʋ? Pʋyɔɔ Yehowa yeba nɛ abalaa nabɛyɛ ‘ma takayaɣ taa’ tɔm ndʋ ɛsɔɔlaa se ɖɩtɩlɩ yɔ. (Yer. 30:2) ‘Ɛsɔ nʋmɔʋ wɛ tɩɖɩɖɩ;’ pʋyɔɔ lɛ, ɖa-taa pɩzɩɣ nɛ pɩtɛ se nʋmɔʋ ŋgʋ kɩ-yɔɔ ɛtɩŋɩɣna nɛ ɛyɔɔdʋʋnɩ-ɖʋ yɔ ŋgʋ kɩlɩnɩ ɖeu nɛ kɩwazɩɣ-ɖʋ.—Keɣa 17:31.

3. Ɛzɩma Yehowa kandɩyɩ Bibl yɔɔ nɛ kɩtalɩ-ɖʋ sɔnɔ? (Izaayii 40:8)

³ Kalɩ Izaayii 40:8. Pɩlakɩ pɩnzɩ kudokiŋ sakɩyɛ yɔ, Ɛsɔtɔm wɛʋ nɛ tɩtasɩɣ lɔŋ kɩbaŋ abalaa nɛ halaa siɣsiɣ tɩnaa yɔ. Ɛzɩma pɩɖɔma? Toovenim taa lɛ, pamaʋ Masɩ taa tɔm yɔ pɩlakɩ pɩnzɩ sakɩyɛ yɔ, nɛ wondu ndʋ tɩwɛɛkɩɣ yɔ tɩ-yɔɔ paama-tʋ; pʋyɔɔ lɛ sɔnɔ, wondu ndʋ tɩ-yɔɔ paama tɔm ndʋ kiɖe tɛɛ yɔ, tɩ-taa nakʋyʋ fɛyɩ. Ɛlɛ Yehowa yeba nɛ paɖaɣnɩ maʋ masɩ kiɖeɖesi nzɩ takayɩsɩ lɛɛsɩ yɔɔ. Ɛyaa mba paɖaɣnɩ tɔm ndʋ maʋ nɛ nesi takayɩsɩ lɛɛsɩ yɔɔ yɔ, paa patɩtalɩ pilim yɔ pañaɣ pana siŋŋ se pitaayiɣdi-wɛ. Bibl taa tazɩyʋ nɔɔyʋ yɔɔdaɣ Ebree Masɩ tɔm lɛ, ɛtɔm se: «Papɩzɩɣ nɛ pɔyɔɔdɩnɩ laŋɩyɛ kpayɩ se caanaʋ taa takayɩsɩ taa payɩ lɛ, masɩ nzɩ si-ɖeke sɩtalɩnɩ-ɖʋ nɛ sɩ-taa tɔm tɩlɛɣzɩ.» Ye mbʋ, paa alɩwaatʋ ɛɖɛwa, paa wondu ndʋ palabɩnɩ tʋmɩyɛ yɔ tɩwɛɛkɩɣ, nɛ paa mba paɖaɣnɩ tɔm maʋ nɛ nesi yɔ patɩtalɩ pilim yɔ, ɖa-taa pɩzɩɣ nɛ pɩtɛ se tɔm ndʋ ɖɩkalɩɣ Bibl taa sɔnɔ yɔ, tɩkɛ Yehowa lɩmaɣza; nɛ ɛ-cɔlɔ Bibl lɩnaa.

4. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

⁴ Yehowa cɔlɔ «paa kʋjɔʋ kɩbaŋʋ ŋgʋ nɛ paa haɖɛ pilim ñɩnɖɛ nɖɩ lɛ,» ɖɩlɩɣna. (Yak. 1:17) Kʋjɔŋ weyi Yehowa labɩ-ɖʋ nɛ ɩwɛɛ ɖeu nɛ pɩkpaɖɩ yɔ, ɩ-taa nakʋyʋ lɛ Bibl. Alɩwaatʋ ndʋ nɔɔyʋ lakɩ-ɖʋ kʋjɔʋ nakʋyʋ yɔ, kɩwɩlɩɣ-ɖʋ se ɛsɩm-ɖʋ camɩyɛ nɛ ɛsɩm ɖɔɖɔ ɖa-kɩcɛyɩm. Tɔm ndʋ tɩkɛ toovenim ɖɔɖɔ weyi ɛha-ɖʋ Bibl yɔ ɛ-hɔɔlʋʋ taa. Alɩwaatʋ ndʋ ɖɩtazɩɣ Bibl taa yɔ, ɖɩkpɛlɩkɩɣ tɔm sakɩyɛ Yehowa yɔɔ. Ðɩkpɛlɩkɩɣ se ɛsɩm-ɖʋ nɛ ɛsɩm ɖɔɖɔ ɖa-kɩcɛyɩm camɩyɛ. Tɔm ñʋʋ kʋnɛ kɩ-taa, ɖɩkaɣ naʋ tɔm ndʋ Bibl yɔɔdʋʋ Yehowa wɛtʋ naadozo tʋnɛ tɩ-yɔɔ yɔ: ɛ-lɔŋsɩnɖɛ, e-siɣsiɣ wɛtʋ, nɛ ɛ-sɔɔlɩm. Kajalaɣ taa lɛ, iyele nɛ ɖɩna ɛzɩma Bibl wɩlɩɣ se Ɛsɔ wɛnɩ lɔŋsɩnɖɛ yɔ.

BIBL WƖLƖƔ SE ƐSƆ WƐNƖ LƆŊSƖNÐƐ

5. Hɔɔlɩŋ weyi ɩ-taa Bibl wɩlɩɣ se Yehowa wɛnɩ lɔŋsɩnɖɛ yɔ ɩ-taa nakʋyʋ lɛ ŋgʋ?

⁵ Yehowa nawa se pɩpɔzʋʋ se ɛtasɩ-ɖʋ lɔŋ. Bibl kɛ kʋjɔʋ ŋgʋ ɛlabɩ-ɖʋ yɔ, nɛ ɛ-lɔŋsɩnɖɛ wɛ kɩ-taa. Bibl lɔŋ tasʋʋ wɛnɩ ɖoŋ kɩbaŋ ɛyaa yɔɔ. Kɩlɛɣzɩɣ ɛyaa weziŋ. Alɩwaatʋ ndʋ Moyizi ma Bibl taa takayɩsɩ kajalaɣ ñɩnzɩ taa tɔm yɔ, eheyi Ɛsɔ samaɣ Izrayɛɛlɩ taa mba se: «Pɩtɩkɛnɩ-mɩ tɔm yem, ɛlɛ tɩkɛ mi-wezuu.» (Wp. 32:47) Mba pɔɖɔŋ Masɩ taa tɔm yɔɔ yɔ, pɩɖɔŋnɩ-wɛ camɩyɛ nɛ pehikiɣ koboyaɣ pe-wezuu caɣʋ taa. (Keɣa 1:2, 3) Pamaɣʋ Bibl yɔ, paa pɩlabɩ alɩwaatʋ sakɩyɛ yɔ, kɩkpɛndɩ kɩwɛnɩ ɖoŋ se kɩlɛɣzɩ ɛyaa weziŋ. Ðɩnaɣ jw.org yɔɔ hɔɔlʋʋ Rubriques «La Bible transforme des vies» taa ɛyaa mba tɔm yɔ, pɛcɛzɩ ɛyaa 50; pa-kɩɖaŋ wɩlɩɣ se Bibl wɛnɩ ɖoŋ siŋŋ nɛ ‘kiɖiɣni tʋmɩyɛ labʋ mba pɛwɛnɩ tisuu kɩ-yɔɔ yɔ pa-taa’ sɔnɔ.—1 Tes. 2:13.

6. Ɛbɛ yɔɔ ɖɩpɩzɩɣ nɛ ɖɩyɔɔdɩ se Bibl wɛ ndɩ nɛ takayɩsɩ lɛɛsɩ?

⁶ Bibl wɛ ndɩ nɛ takayɩsɩ lɛɛsɩ. Ɛbɛ yɔɔ? Mbʋ pʋyɔɔ yɔ, Ɛsɔ Yehowa cɔlɔ kɩlɩnaa; nɛ ɛkɛ ɖoŋ tɩŋa tʋ, ɛwɛ tam, nɛ ɛ-lɔŋsɩnɖɛ wayɩ fɛyɩ. Takayɩsɩ lɛɛsɩ lɛ, sɩ-mayaa sɩkɩ nɛ peyeki-sɩ; nɛ alɩwaatʋ wɛɣ nɛ tɩɖɛɣ lɛ, lɔŋ tasʋʋ mbʋ pɩwɛ sɩ-taa yɔ, pɩɩtasɩɣ wɛnʋʋ wazaɣ. Ɛlɛ lɔŋsɩnɖɛ nɖɩ ɖɩwɛ Bibl paɣtʋ kila taa yɔ, ɖɩwɛ tam; ɖɩwazɩɣ ɛyaa paa ɛzɩmtaa. Ye ɖɩkalɩɣ takayaɣ kiɖeɖeɣa ŋga nɛ ɖɩmaɣzɩɣ tɔm ndʋ ɖɩkalɩɣ yɔ tɩ-yɔɔ yɔ, Yehowa tɩŋɩɣnɩ e-fezuu kiɖeɖeu yɔɔ nɛ ɛsɩɣnɩ-ɖʋ nɛ ɖɩna ɛzɩma ɖɩlabɩnɩ kɔ-lɔŋ tasʋʋ tʋmɩyɛ ɖe-wezuu caɣʋ taa yɔ. (Keɣa 118:27; Mal. 3:16; Ebr. 4:12) Toovenim taa lɛ, weyi ɛ-cɔlɔ Bibl lɩnaa yɔ ɛwɛ wezuu nɛ ɛsɔɔlɩ kpem se ɛsɩnɩ-ŋ. Pɩwɛɛ se piseɣti-ɖʋ nɛ ɖɩkalɩɣ Bibl ɖoŋ ɖoŋ!

7. Caanaʋ taa lɛ, ɛzɩma tɩyɛ Bibl kaasɩnɩ Ɛsɔ samaɣ nɛ kɛwɛɛ nɔɔ kʋɖʋmaɣ taa?

⁷ Hɔɔlʋʋ lɛɛkʋ ŋgʋ kɩ-taa Bibl wɩlɩɣ se Ɛsɔ lɔŋsɩnɖɛ wɛnɩ kɩ-taa yɔ, ŋgʋ yɔ: kɩsɩɣnɩ Ɛsɔ samaɣ se kɛwɛɛ nɔɔ kʋɖʋmaɣ taa. Alɩwaatʋ ndʋ Izrayɛɛlɩ mba sʋ Lidaʋ Tɛtʋ taa yɔ, paacaɣ ageeta ndɩ ndɩ taa. Pa-taa nabɛyɛ kaapɩsɩ kpakpasɩ kpayaa, lalaa kpɩna ɖɔyaa, nɛ lalaa ñaakɛ haɖaa. Egeetiye naɖɩyɛ taa Izrayɛɛlɩ mba pɩzaɣ se peyele maɣzʋʋ po-koobiya Izrayɛɛlɩ mba lalaa mba paawɛ ɛjaɖɛ hɔɔlɩŋ lɛɛŋ taa yɔ pɔ-yɔɔ kɛlɛʋ yem. Ɛlɛ, Yehowa labɩ ɖʋtʋ se pɩsa nɛ Izrayɛɛlɩ mba kpeɣliɣ ɖama alɩwaatʋ ndɩ ndɩ taa nɛ pakalɩɣ-wɛ ɛ-Tɔm nɛ palɩzɩɣ-wɛ tɩ-tɔbʋʋ. (Wp. 31:10-13; Neh. 8:2, 8, 18) Alɩwaatʋ ndʋ Izrayɛɛlɩ tʋ nɔɔyʋ talaɣ Yeruzalɛm nɛ ɛnaɣ e-koobiya Ɛsɔ sɛyaa lalaa, pɩtɩla miiliyɔɔwaa sakɩyɛ, palɩnɩ ɛjaɖɛ hɔɔlɩŋ ndɩ ndɩ taa yɔ, maɣzɩ nɛ ŋna ɛzɩma pɩlakaɣ-ɩ yɔ! Yehowa tɩŋnɩ nʋmɔʋ ŋgʋ kɩ-yɔɔ nɛ ɛsɩnɩ ɛ-samaɣ nɛ kowolo pɩ-yɔɔ nɛ kɛwɛɛ nɔɔ kʋɖʋmaɣ taa. Pʋwayɩ alɩwaatʋ ndʋ Krɩstʋ ɛgbɛyɛ ñɔwa yɔ, abalaa nɛ halaa mba paawɛ ɖɩ-taa yɔ, pɔyɔɔdaɣ kʋnʋmɩŋ ndɩ ndɩ nɛ pa-taa nabɛyɛ hɩla kaasɛwa nɛ lalaa hɩla taasɛɛ; nɛ nabɛyɛ kaakɛ ñɩm tɩnaa nɛ lalaa ñɛkɛ kʋñɔndɩnaa. Ɛlɛ pa-tɩŋa paasɔɔlɩ Masɩ; pʋyɔɔ lɛ, pɛkpɛndaɣ nɛ pɛsɛɣ Ɛsɔ toovenim tʋ nɔɔ kʋɖʋmaɣ taa. Mba papɩsaɣ Krɩstʋ mba yɔ, pɩsa nɛ panɩɩ Ɛsɔtɔm taa lɛ, pɩɩwɛɛ se pɛkpɛlɩkɩnɩ pa-taa paa weyi lɛ Bibl nɛ pɩɩwɛɛ ɖɔɖɔ se pekpeɣliɣ nɛ palakɩ kediɣzisi.—Tʋma 2:42; 8:30, 31.

8. Sɔnɔ, ɛzɩma Bibl sɩɣnɩ Ɛsɔ samaɣ se kɛwɛɛ nɔɔ kʋɖʋmaɣ taa?

⁸ Ðɛ-Ɛsɔ lɔŋsɩnɖʋ wɛɛ nɛ ewoki pɩ-yɔɔ nɛ ɛtɩŋɩɣnɩ Bibl yɔɔ nɛ ɛwɩlɩɣ ɛ-samaɣ tɔm nɛ ɛsɩɣnɩ-kɛ se kɛwɛɛ nɔɔ kʋɖʋmaɣ taa. Toovenim tɔm ndʋ payɩ pɩpɔzʋʋ se ɖɩtɩlɩ Yehowa yɔɔ yɔ tɩwɛ Bibl taa. Ðikpeɣliɣ ɖoŋ ɖoŋ ɖa-agbaa taa kediɣzisi taa, kigbeɣliŋ cikpeŋ nɛ kigbeɣliŋ sɔsɔŋ taa nɛ pakalɩɣ Masɩ, palɩzɩɣ sɩ-tɔbʋʋ nɛ patazɩɣ sɩ-taa nɛ ɖiwelisiɣ. Ye mbʋ, Bibl lakɩ tʋmɩyɛ sɔsɔɖɛ Yehowa kaɖʋwa taa. Ɛtɩŋɩɣnɩ kɩ-yɔɔ nɛ ɛsɩɣnɩ ɛ-sɛyaa se «pɛkpɛndɩ palabɩ-ɩ tʋmɩyɛ.»—Sof. 3:9.

9. Pɩsa nɛ ɖɩnɩɩ Bibl taa lɛ, wɛtʋ ndʋ pɩpɔzʋʋ se ɖɩwɛɛna? (Luka 10:21)

⁹ Iyele nɛ ɖɩna mbʋ pɩtasɩɣ wɩlʋʋ se Yehowa wɛnɩ lɔŋsɩnɖɛ yɔ pɩ-taa lɛɛbʋ. Bibl hɔɔlɩŋ sakɩyɛ wɛɛ lɛ, ɛzɩma eyeba nɛ pama-ɩ yɔ, ɛyaa mba pɛwɛnɩ tɩ luzuu yɔ pe-ɖeke papɩzɩɣna nɛ panɩɩ ɩ-taa. (Kalɩ Luka 10:21.) Ɛyaa kalɩɣ Bibl paa le patɩɩwɛɛ yɔ. Bibl taa tazɩyʋ nɔɔyʋ yɔɔdaa se ɛyaa hɔɔlʋʋ sɔsɔʋ kalɩɣ Bibl nɛ pɩkɩlɩ takayɩsɩ lɛɛsɩ, nɛ pakaŋ ñʋʋ nɛ kɩ-kalʋʋ nɛ pɩkɩlɩ takayɩsɩ lɛɛsɩ. Ɛlɛ toovenim taa lɛ, ɛyaa mba poluzuu pa-tɩ yɔ, pe-ɖeke panɩɣnɩ kɩ-taa nɛ pɔɖɔŋ tɔm ndʋ kɩyɔɔdʋʋ yɔ tɩ-yɔɔ.—2 Kɔr. 3:15, 16.

10. Hɔɔlʋʋ lɛɛkʋ ŋgʋ taa ɖɔɖɔ Bibl wɩlɩɣ se Yehowa wɛnɩ lɔŋsɩnɖɛ?

¹⁰ Yehowa lɔŋsɩnɖɛ nɖɩ ɖɩwɛ Bibl taa yɔ, ɖɩnaɣ-ɖɩ ɖɔɖɔ hɔɔlʋʋ lɛɛkʋ taa. Yehowa tɩŋɩɣnɩ Masɩ yɔɔ nɛ ɛwɩlɩɣ ɛ-samaɣ tɔm, ɛlɛ ɛtɩŋɩɣnɩ ɖɔɖɔ sɩ-yɔɔ nɛ ɛwɩlɩɣ tɔm ɖa-taa paa anɩ nɛ ɛhɛzɩɣ ɛ-laŋɩyɛ. Alɩwaatʋ ndʋ ɖɩkalɩɣ ɛ-Tɔm yɔ, ɖɩpɩzɩɣ nɛ ɖɩna se ɛmaɣzɩɣ ɖa-taa paa anɩ lɛ ɛ-yɔɔ. (Iza. 30:21) Alɩwaatʋ ndʋ ŋkatɩɣ kaɖɛ naɖɩyɛ yɔ, tam ɛzɩma ŋkpakɩɣ Bibl nɛ ŋkalɩɣ mayaɣ nakɛyɛ, ŋga pɩlakɩ-ŋ ɛzɩ ña pama-kɛ yɔ? Ɛlɛ pama Bibl se kɩkɛdɩnɩ ɛyaa miiliyɔɔwaa sakɩyɛ. Ɛbɛ yɔɔ kɩ-taa tɔm kpɛndɩ tɩwɛ wazaɣ nɛ tɩlakɩ nɔɔ kʋɖʋmaɣ nɛ ña-maɣmaɣ ña-kɩcɛyɩm? Pɩwɛ mbʋ, mbʋ pʋyɔɔ yɔ, weyi ɛ-cɔlɔ Bibl lɩnaa yɔ, ɛnʋ kɩlɩnɩ lɔŋ ɛjaɖɛ kpeekpe yɔɔ.—2 Tim. 3:16, 17.

BIBL WƖLƖƔ SE ƐSƆ WƐ SIƔSIƔ

11. Alɩwaatʋ ndʋ pamaɣaɣ Bibl yɔ, ɛzɩma Ɛsɔ wɩlaa se ɛɛɖʋʋ tʋkaɣ ɛyaa taa?

¹¹ Yehowa wɛtʋ lɛɛtʋ lɛ siɣsiɣ wɛtʋ. (Wp. 32:4) Ɛyʋ weyi ɛwɛ siɣsiɣ yɔ, ɛɛɖʋʋ tʋkaɣ ɛyaa taa, nɛ Yehowa ɛɛɖʋʋ tʋkaɣ ɛyaa taa. (Tʋma 10:34, 35; Roma 2:11) Kʋnʋmɩŋ weyi ɩ-taa pama Bibl yɔ, ɩwɩlɩɣ se Yehowa ɛɛtʋkʋʋ ɛyaa taa. Bibl taa takayɩsɩ 39 nzɩ pacalɩnɩ maʋ yɔ, Ebree kʋnʋŋ taa pama sɩ-taa hɔɔlʋʋ sɔsɔʋ, nɛ kʋnʋŋ ŋgʋ Ɛsɔ samaɣ taa mba nɩɣaɣ kɛlɛʋ alɩwaatʋ ndʋ tɩ-taa. Ɛlɛ kajalaɣ pɩnzɩ mɩnʋʋ taa lɛ, Grɛɛkɩ kʋnʋŋ ɛyaa hɔɔlʋʋ sɔsɔʋ yɔɔdaɣ; pʋyɔɔ lɛ, pama Bibl taa takayɩsɩ 27 kɛdɛzaɣ ñɩnzɩ hɔɔlʋʋ sɔsɔʋ kʋnʋŋ ŋgʋ kɩ-taa. Yehowa tɩkpaɣ lɩmaɣza se pama ɛ-tɔm kʋnʋŋ kʋɖʋmʋʋ nakʋyʋ ɖeke taa na. Sɔnɔ ɛyaa miiliyaarɩwaa lutozo mbʋ yɔ wɛnɩ tɛtʋ yɔɔ nɛ pɔyɔɔdʋʋ kʋnʋmɩŋ sakɩyɛ. Ye mbʋ, ɛzɩma ɛyaa sakɩyɛ pɩzɩɣ nɛ pɛkpɛlɩkɩ nɛ patɩlɩ Yehowa?

12. Nʋmɔŋ weyi ɩ-yɔɔ pɩtɩŋɩɣna nɛ Danɩyɛɛlɩ 12:4 taa tɔm lakɩ kɛdɛzaɣ kɩyakɩŋ ɩnɛ ɩ-taa yɔ, ɩ-taa nakʋyʋ lɛ ŋgʋ?

¹² Yehowa tɩŋnɩ nayʋ Danɩyɛɛlɩ yɔɔ nɛ ɛyɔɔdɩ se kɛdɛzaɣ alɩwaatʋ taa lɛ, Bibl taa «lɔŋsɩmtʋ kaɣ tɔyʋʋ.» Sakɩyɛ kaɣ nɩʋ tɩ-taa. (Kalɩ Danɩyɛɛlɩ 12:4.) Nʋmɔŋ weyi ɩ-yɔɔ pɩtɩŋnaa nɛ lɔŋsɩmtʋ tɔyɩ yɔ, ɩ-taa nakʋyʋ lɛ se pɛɖɛzɩ Bibl nɛ Bibl kpɛlɩkʋʋ takayɩsɩ, palɩzɩ-sɩ, nɛ patayɩ-sɩ. Bibl kɛnɩ takayaɣ ŋga pakɩlɩ ɖɛzʋʋ nɛ pakɩlɩ tayʋʋ ɛjaɖɛ kpeekpe yɔɔ yɔ. Biblwaa mba tadɩyɛ agbaa ɖɛzɩɣ yɔ, nabʋyʋ taa pɛwɛ liidiye siŋŋ. Yehowa samaɣ kɩlɩnɩ ɖɛzʋʋ Bibl. Kɛɖɛzɩ kɩ-tɩŋa yaa kɩ-hɔɔlɩŋ nɩɩyɩ kʋnʋmɩŋ weyi ɩ-taa yɔ, ɩcɛzɩ 240; nɛ paa anɩ ɛpɩzɩɣ nɛ ɛwɛɛnɩ-kʋ ɛlɛ ɛɛhɛyɩɣ liidiye. Mbʋ pɩlɩ pɩ-taa yɔ lɛ se ajɛɛ tɩŋa taa ɛyaa wɛɛ nɛ pɛkpɛlɩkɩɣ Kewiyaɣ tɔm kɩbandʋ se pʋcɔ nɛ ɛjaɖɛ tɛm kɔɔ. (Mat. 24:14) Ðɛ-Ɛsɔ wɛ siɣsiɣ nɛ ɛsɔɔlaa se ɛha ɛyaa sakɩyɛ waɖɛ nɛ pakalɩ ɛ-Tɔm nɛ patɩlɩ-ɩ. Ɛlakɩ mbʋ, mbʋ pʋyɔɔ yɔ ɛsɔɔlɩ ɖa-tɩŋa siŋŋ.

BIBL WƖLƖƔ SE ƐSƆ SƆƆLƖ-ÐƲ

13. Ɛbɛ yɔɔ ɖɩpɩzɩɣ nɛ ɖɩyɔɔdɩ se Bibl wɩlɩɣ se Yehowa sɔɔlɩ-ɖʋ? (Yohanɛɛsɩ 21:25)

¹³ Bibl wɩlɩɣ-ɖʋ kpayɩ kpayɩ se Yehowa wɛtʋ sɔsɔtʋ lɛ sɔɔlɩm. (1 Yoh. 4:8) Iyele nɛ ɖɩna tɔm ndʋ Yehowa yeba nɛ pama nɛ ndʋ etiyele nɛ pama yɔ. Eyeba nɛ pama tɔm ndʋ pɩpɔzʋʋ se ɖɩtɩlɩ nɛ pɩsa nɛ taabalɩyɛ wɛɛ ɖa nɛ ɩ ɖɛ-hɛkʋ taa, ndʋ tɩsɩɣnɩ-ɖʋ se ɖihiɣ koboyaɣ ɖe-wezuu caɣʋ taa lɛɛlɛɛyɔ, nɛ ndʋ tɩsɩɣnɩ-ɖʋ se ɖihiɣ wezuu maatɛŋ yɔ. Yehowa sɔɔlɩ-ɖʋ; pʋyɔɔ lɛ, etiyele nɛ pama tɔm ndʋ tɩ-tɔm tɩcɛyɩ yɔ nɛ pɩkɛnɩ-ɖʋ sʋʋtʋ.—Kalɩ Yohanɛɛsɩ 21:25.

14. Tɔm ndʋ tɩwɛ Bibl taa yɔ, ɛzɩma tɩwɩlɩɣ ɖɔɖɔ kpayɩ kpayɩ se Ɛsɔ sɔɔlɩ-ɖʋ?

¹⁴ Mbʋ pɩwɩlɩɣ ɖɔɖɔ se Yehowa sɔɔlɩ-ɖʋ yɔ mbʋ lɛ se ɛyɔɔdɩnɩ-ɖʋ nɛ nɔɔ ŋga kawɩlɩɣ se ɛɖʋʋ-ɖʋ hɩɖɛ yɔ. Bibl taa, ɛtɩɖʋ-ɖʋ paɣtʋ tete se eheyi-ɖʋ mbʋ ɖeyi ɖeyi pɩwɛɛ se ɖɩla nɛ mbʋ pɩwɛɛ se ɖɩtaala ɖe-wezuu caɣʋ hɔɔlɩŋ tɩŋa taa yɔ. Ɛlɛ ɛtɩŋnɩ wezuu caɣʋ taa kɛdɛsɩ, natʋ ndɩ ndɩ ndʋ tiseɣtiɣ ɛyʋ yɔ, nɛ lɔŋ tasʋʋ kɩbam yɔɔ se ɛsɩnɩ-ɖʋ nɛ ɖɩkpakɩɣ lɩmaɣza kɩbana. Pɩtɩŋnɩ nʋmɔŋ ɛnɩ ɩ-yɔɔ lɛ, Ɛsɔtɔm seɣtiɣ-ɖʋ se ɖɩsɔɔlɩ Ɛsɔ nɛ ɖɩñamɩ-ɩ nɛ ɖa-laŋɩyɛ faaa.

15. (a) Ɛzɩma Yehowa wɩlaa se ɛmaɣzɩɣ ɛyaa mba pakalɩɣ ɛ-Tɔm yɔ pɔ-yɔɔ? (b) Ɛzɩ ɖɩnaʋ kɩlɛmʋʋ taa yɔ, Bibl taa ɛyaa mba yɔɔ halɩbɩɣa, evebu, nɛ koobu halɩñɩnʋ akpadɩyʋ pɛwɛɛ nɛ pamaɣzɩɣ? (Kiɖe 39:1, 10-12; 2 Aw. 5:1-3; Luka 2:25-38)

¹⁵ Bibl wɩlɩɣ se Yehowa maɣzɩɣ ɖɔ-yɔɔ siŋŋ. Ɛzɩma tɩyɛ? Ɛyaa mba pɩlakɩ-wɛ ɛzɩ ɖa yɔ, pɛ-kɛdɛsɩ sakɩyɛ wɛ Bibl taa. Ðɩpɩzɩɣ nɛ ɖɩnɩɩ ɛzɩma pɩlakaɣ-wɛ yɔ pɩ-taa, mbʋ pʋyɔɔ yɔ paakɛ ‘ɛyaa ɛzɩ ɖa yɔ.’ (Yak. 5:17) Kɔzɩ kɔzɩ lɛ, ye ɖɩkpaɣ alɩwaatʋ nɛ ɖɩmaɣzɩ nɛ ɖɩna wɛtʋ ndʋ Yehowa lɩzaa nɛ ɛwɩlɩ ɛyaa mba pɛwɛ ɛzɩ ɖa yɔ tɩ-yɔɔ yɔ, pɩsɩɣnɩ-ɖʋ nɛ ɖɩnɩɩ tɔm natʋyʋ taa kpayɩ kpayɩ nɛ pɩkɩlɩ. Ndʋ yɔ: «Yehowa wɛnɩ sɔɔlɩm sɔsɔm nɛ ɛkɛ pʋtɔdɩyɛ nayʋ.»—Yak. 5:11.

16. Alɩwaatʋ ndʋ ɖɩkalɩɣ ɛyaa mba picoɖi-wɛ nɛ pala kɩwɛɛkɩm nɛ pama pɔ-tɔm Bibl taa yɔ pɔ-tɔm yɔ, ɛbɛ pɩkpɛlɩkɩɣ-ɖʋ Yehowa yɔɔ? (Izaayii 55:7)

¹⁶ Bibl wɩlɩɣ se Yehowa sɔɔlɩ-ɖʋ hɔɔlʋʋ lɛɛkʋ taa ɖɔɖɔ. Masɩ yeki se ɖa-taa ɛtɛ se ye picoɖi-ɖʋ yɔ, Yehowa ɛɛkaɣ-ɖʋ lɔʋ. Izrayɛɛlɩ mba yʋsɩnɩ Yehowa tam sakɩyɛ; ɛlɛ alɩwaatʋ ndʋ pekpiɖaa siŋŋ yɔ, Yehowa kpaɣ nɛ ekpeɣ-wɛ. (Kalɩ Izaayii 55:7.) Kajalaɣ pɩnzɩ mɩnʋʋ taa Krɩstʋ mba ɖɔɖɔ kaaɖiɣzinaa se Ɛsɔ sɔɔlɩ-wɛ siŋŋ. Fezuu kiɖeɖeu ɖiyi apostoloo Pɔɔlɩ nɛ eseɣti e-koobiya Krɩstʋ mba se ‘pekpeɣ [abalʋ weyi ɛɛlabɩ kɩwɛɛkɩm sɔsɔm yɔ] nɛ pɛhɛzɩ ɛ-laŋɩyɛ.’ (2 Kɔr. 2:6, 7; 1 Kɔr. 5:1-5) Pɩwɛ ɖeu kpem se Yehowa tɩlɔ ɛ-sɛyaa mba picoɖi-wɛ nɛ pala kɩwɛɛkɩm yɔ! Ɛlɛ ɛsɩnɩ-wɛ nɛ sɔɔlɩm, ɛsɩɣzɩ-wɛ lɔŋ, nɛ eseɣti-wɛ se paɖaɣnɩ kɛʋ ɛ-taabalaa. Ɛha-ɖʋ lidaʋ se mbʋ ɖɔɖɔ ɛkaɣ labʋ kɩwɛɛkɩm laɖaa mba payɩ pekpiɖiɣ sɔnɔ yɔ.—Yak. 4:8-10.

WƖLƖ SE ƐSƆTƆM KƐ «KƲJƆƲ KƖBAŊƲ» NƐ KƖMƲ ÑƖM ÑƐ-ƐSƖNDAA

17. Ɛbɛ yɔɔ Bibl kɛ kʋjɔʋ ŋgʋ kɩwɛ ŋgee yɔ?

¹⁷ Yehowa labɩ-ɖʋ kʋjɔʋ kɩbaŋʋ. Ɛbɛ yɔɔ ɛ-Tɔm wɛ ŋgee kpem mbʋ? Ɛzɩ ɖɩkpɛlɩkʋʋ nɛ pɩɖɛɛ yɔ, Bibl wɩlɩɣ se Ɛsɔ wɛnɩ lɔŋsɩnɖɛ, ɛwɛ siɣsiɣ, nɛ ɛsɔɔlɩ-ɖʋ. Takayaɣ ŋga kawɩlɩɣ se Yehowa sɔɔlaa se ɖɩkpɛlɩkɩ nɛ ɖɩtɩlɩ-ɩ. Ɛsɔɔlaa se ɖɩpɩsɩ ɛ-taabalaa.

18. Bibl kɛ «kʋjɔʋ kɩbaŋʋ» ŋgʋ Yehowa labɩ-ɖʋ yɔ. Ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ ɛsɩmɩyɛ kɩ-yɔɔ?

¹⁸ Pɩwɛɛ se ɖɩtɔzʋʋ tam se Ɛsɔtɔm kɛ «kʋjɔʋ kɩbaŋʋ.» (Yak. 1:17) Ye mbʋ, iyele nɛ ɖiwolo pɩ-yɔɔ nɛ ɖɩwɩlɩɣ ɖɛ-ɛsɩmɩyɛ kɩ-yɔɔ. Ðɩpɩzɩɣ nɛ ɖɩla mbʋ, ye ɖɩtɩmɩɣ, ɖɩkalɩɣ Ɛsɔtɔm nɛ ɖɩmaɣzɩɣ tɩ-yɔɔ yɔ. Ye ɖɩlakɩ mbʋ yɔ, ɖa-taa pɩzɩɣ nɛ pɩtɛ se weyi ɛ-cɔlɔ Bibl lɩnaa yɔ, ɛkaɣ wazʋʋ ɖa-pana ñaɣʋ yɔɔ nɛ ‘ɖɩkaɣ Ɛsɔ sɩm.’—Adu. 2:5.