Wɩlɩ ñɛ-ɛsɩmɩyɛ koobiya mba pɛwɛnɩ wala ɛgbɛyɛ taa yɔ pɔ-yɔɔ

1. Kʋjɔŋ weyi Yesu labɩ-ɖʋ yɔ, ɩ-taa nɩɩyɩ lɛ weyi?

ƐYƲ nɔɔyʋ fɛyɩ kʋjɔʋ nɛ pɩtalɩ Yesu. Alɩwaatʋ ndʋ ɛɛwɛ tɛtʋ yɔɔ yɔ, ɛɛlabɩ maamaaci lakasɩ nɛ ɛsɩnɩ ɛyaa lalaa. (Luka 9:​12-17) Ɛkpaɣ e-wezuu nɛ ɛlaa ɖɔ-yɔɔ, nɛ mbʋ kɛnɩ kʋjɔʋ ŋgʋ kɩkpaɖɩ kʋjɔŋ kpeekpe taa yɔ. (Yoh. 15:13) Pefezi Yesu nɛ pɩtɛ lɛ, ewobi pɩ-yɔɔ nɛ ɛsɩɣnɩ ɛyaa. Ɛzɩ ɛɛlabʋ-ɖʋ tamaɣ yɔ, ɛpɔzɩ Yehowa se ɛha-ɖʋ e-fezuu kiɖeɖeu nɛ kɩwɩlɩ-ɖʋ tɔm nɛ kɩhɛzɩ ɖa-laŋa. (Yoh. 14:​16, 17, pɩ-tɛɛ tɔm; 16:13) Nɛ Yesu tɩŋɩɣnɩ ɛgbɛyɛ taa kediɣzisi yɔɔ nɛ ɛhaɣ-ɖʋ mbʋ pɩpɔzʋʋ-ɖʋ yɔ se pɩsɩnɩ-ɖʋ nɛ ɖɩla kpɛlɩkɩyaa tɛtʋ kpeekpe yɔɔ.—Mat. 28:​18-20.

2. Ɛyaa mba Yesu hawa se pɛkɛ «kʋjɔŋ» yɔ, pa-taa nabɛyɛ lɛ mba? (Efɛɛzɩ mba 4:​7, 8)

² Iyele nɛ ɖɩna kʋjɔʋ lɛɛkʋ ŋgʋ Yesu labɩ-ɖʋ yɔ. Apostoloo Pɔɔlɩ mawa se Yesu kpa ɛsɔdaa lɛ, «ɛha ɛyaa se pɛkɛ kʋjɔŋ.» (Kalɩ Efɛɛzɩ mba 4:​7, 8.) Pɔɔlɩ lɩzɩ pɩ-taa se Yesu labɩ kʋjɔŋ ɛnɩ se pɩsa nɛ ɛsɩnɩ ɛgbɛyɛ hɔɔlɩŋ ndɩ ndɩ taa. (Efɛz. 1:​22, 23; 4:​11-13) Sɔnɔ, «kʋjɔŋ» ɛnɩ ɩ-taa nɩɩyɩ lɛ ɛgbɛyɛ taa tʋmlaɖaa, ɛgbɛyɛ taa ɛzʋtʋyaa nɛ egeetiye yɔɔ cɔnɩyaa.a Toovenim taa lɛ, abalaa mba patɩtalɩ pilim nɛ pʋyɔɔ lɛ piyiɣdiɣ-wɛ. (Yak. 3:2) Ɛlɛ pɛkɛ ɖa-Kɩbaɣlʋ Yesu Krɩstʋ kʋjɔŋ nɛ ɛtɩŋɩɣnɩ pɔ-yɔɔ nɛ ɛsɩɣnɩ-ɖʋ.

3. Ha kɩɖaʋ ŋgʋ kɩwɩlɩɣ ɛzɩma ɖa-tɩŋa ɖɩpɩzɩɣ nɛ ɖɩɖʋ nesi ɛyaa mba Yesu hawa se pɛkɛ «kʋjɔŋ» yɔ.

³ Yesu ɖʋ abalaa mba tʋmɩyɛ se pakpazɩ ɛgbɛyɛ ɖoŋ. (Efɛz. 4:12) Ɛlɛ, ɛyaa lalaa pɩzɩɣ nɛ pasɩnɩ-wɛ nɛ pala tʋmɩyɛ sɔsɔyɛ nɖɩ. Ðɩpɩzɩɣ ɖɩkpaɣ pa-tʋmɩyɛ nɛ ɖɩmaɣzɩnɩ Kewiyaɣ kpaaŋ nakʋyʋ maʋ tʋmɩyɛ. Nabɛyɛ maɣ kuduyuu. Lalaa kɔŋnɩ-wɛ tɔɔnasɩ nɛ wondu lɛɛtʋ, yaa patɩŋɩɣnɩ nʋmɔŋ lɛɛŋ yɔɔ nɛ paɖʋʋ-wɛ nesi. Mbʋ ɖɔɖɔ ɖa-tɩŋa payɩ ɖɩpɩzɩɣ nɛ ɖɩtɩŋnɩ tɔm ndʋ ɖɩyɔɔdʋʋ yɔ nɛ mbʋ ɖɩlakɩ yɔ pɩ-yɔɔ nɛ ɖɩɖʋ nesi ɛgbɛyɛ taa tʋmlaɖaa, ɛgbɛyɛ taa ɛzʋtʋyaa nɛ egeetiye yɔɔ cɔnɩyaa. Iyele nɛ ɖɩna ɛzɩma abalaa mba pa-tʋmɩyɛ wazɩɣ-ɖʋ yɔ, nɛ ɛzɩma ɖɩpɩzɩɣ nɛ ɖɩwɩlɩ se ɖɩsɔɔlɩ pa nɛ Yesu weyi ɛha-ɖʋ «kʋjɔŋ» ɛnɩ yɔ.

ƐGBƐYƐ TAA TƲMLAÐAA LAKƖ «SƖNƲƲ TƲMA»

4. «Sɩnʋʋ tʋma» wena kajalaɣ pɩnzɩ mɩnʋʋ taa ɛgbɛyɛ taa tʋmlaɖaa lakaɣ?

⁴ Kajalaɣ pɩnzɩ mɩnʋʋ taa, paalɩzɩ koobiya abalɩñɩma nabɛyɛ se pɛkɛ ɛgbɛyɛ taa tʋmlaɖaa. (1 Tim. 3:8) Pɩwɛ ɛzɩ mba lakaɣnɩ «sɩnʋʋ tʋma» wena a-tɔm Pɔɔlɩ yɔɔdaa yɔ. (1 Kɔr. 12:28) Ye mbʋ, pɩwɛ ɛzɩ ɛgbɛyɛ taa tʋmlaɖaa lakaɣ tʋma wena a-tɔm cɛyaa yɔ a-taa sakɩyɛ se pɩsa nɛ ɛgbɛyɛ taa ɛzʋtʋyaa ka ñʋʋ nɛ tɔm wɩlʋʋ nɛ ninɖiɣyu tʋmɩyɛ yɔ. Kɩɖaʋ nakʋyʋ yɔ: Pɩtɩla, ɛgbɛyɛ taa tʋmlaɖaa ɖʋwaɣ nesi nɛ paɖaɣnɩɣ maʋ Masɩ, yaa pɩtɩla pasɩɣaɣna nɛ payakɩ wondu ndʋ pɩpɔzʋʋ se palabɩnɩ tʋmɩyɛ nɖɩ yɔ.

5. Sɩnʋʋ tʋma wena ɛgbɛyɛ taa tʋmlaɖaa lakɩ sɔnɔ?

⁵ Maɣzɩ nɛ ŋna sɩnʋʋ tʋma wena ɛgbɛyɛ taa tʋmlaɖaa lakɩ ñɛ-ɛgbɛyɛ taa yɔ. (1 Pɩy. 4:10) Pɩtɩla paɖʋ-wɛ tʋmɩyɛ se pɔcɔnɩ ɛgbɛyɛ taa liidiye akɔnta yɔɔ, yaa tɔm susuu kookasɩ yɔɔ, yaa pɔcɔlʋʋ takayɩsɩ nɛ palɩzɩɣ-sɩ nɛ pasɩɣ se koobiya ɩkpaɣ, pɔcɔŋnɩ miikroowaa nɛ tɔm yɔɔdʋʋ menziiniwaa yɔɔ, pɛkɛ ɛyaa mʋʋ tʋmɩyɛ ɖɔkɩyaa, yaa pasɩɣna se Kewiyaɣ kpaaŋ ɛwɛɛ cɩɖɩ cɩɖɩ. Tʋma ana a-tɩŋa a-tɔm cɛyaa se pɩsa nɛ pɩtɩŋa pɩɖɔ camɩyɛ ɛgbɛyɛ taa. (1 Kɔr. 14:40) Pɩtasɩ lɛ, pahaɣ ɛgbɛyɛ taa tʋmlaɖaa nabɛyɛ Ðe-wezuu caɣʋ nɛ ɖɛ-Ɛsɔ sɛtʋ kediɣzaɣ taa tɔm yɔɔdʋʋ nɛ samaɣ taa tɔm yɔɔdʋʋ. Papɩzɩɣ ɖɔɖɔ nɛ palɩzɩ ɛgbɛyɛ taa tʋmlaɖʋ nɔɔyʋ se ɛsɩnɩ tɔm susuu ɛgbɛyɛ yɔɔ cɔnɩyʋ. Nabʋyʋ taa, ɛgbɛyɛ taa ɛzʋtʋyaa pɩzɩɣ nɛ palɩzɩ ɛgbɛyɛ taa tʋmlaɖaa mba pɛwɛ niye yɔ se pasɩɩ-wɛ nɛ powolo pekilimi koobiya yɔɔ.

6. Lɩmaɣza wena a-yɔɔ ɖɩwɛnɩ ɛsɩmɩyɛ ɛgbɛyɛ taa tʋmlaɖaa yɔɔ?

⁶ Tʋma wena ɛgbɛyɛ taa tʋmlaɖaa lakɩ yɔ, ɛzɩma awazɩɣ ɛgbɛyɛ? Payaɣ koobu halɩñɩnʋ nɔɔyʋ se Beberly,b ɛwɛ Boolivii ɛjaɖɛ taa. Ɛyɔɔdaa se: «Ɛgbɛyɛ taa tʋmlaɖaa yɔɔ lɛ, kediɣzisi wazɩɣ-m camɩyɛ. Tʋmɩyɛ nɖɩ palakɩ yɔ ɖɩsɩɣnɩ-m nɛ manpɩzɩɣ menteɣ hendu, moncosuu tɔm, mewelisiɣ samaɣ taa tɔm yɔɔdʋʋ nɛ mɛnkpɛlɩkɩɣ lɔŋ videowaa nɛ kɩlɛmɩŋ taa. Pasɩɣna se kaɖɛ naɖɩyɛ ɛtaatalɩ mba pɔkɔŋ kediɣzisi yɔ, nɛ pasɩɣnɩ mba paapɩzɩɣ kediɣzisi kɔm kpaaŋ taa yɔ se patɩŋnɩ visioconférence yɔɔ nɛ palabɩ-sɩ. Kediɣzisi tɛŋ lɛ, pɛɖɛɣ nɔɔ nɛ pɔñɔɔzʋʋ kpaaŋ taa, pasɩɣna nɛ palakɩ liidiye akɔnta nɛ pahaɣ-ɖʋ takayɩsɩ nzɩ pɩpɔzʋʋ-ɖʋ yɔ. Mɛwɛnɩ ɛsɩmɩyɛ siŋŋ pɔ-yɔɔ.» Leslie wɛ Kolombii ɛjaɖɛ taa; ɛ-walʋ kɛ ɛgbɛyɛ taa ɛzʋtʋyʋ. Ɛyɔɔdaa se: «Ɛgbɛyɛ taa tʋmlaɖaa sɩɣnɩ ma-walʋ nɛ ɛlakɩ tʋma ndɩ ndɩ. Pɩtaakɛ pɔ-yɔɔ yɔ, pɩɩɖɔkɩnɩ-ɩ siŋŋ nɛ pɩkɩlɩ. Pʋyɔɔ lɛ, mɛwɛnɩ ɛsɩmɩyɛ siŋŋ kpekpeka ŋga pɛwɛna nɛ ɛzɩma pɔsɔɔlɩ faaa se pasɩna yɔ pɩ-yɔɔ.» Pɩtʋʋ fɛyɩ se lɩmaɣza ana ɖɔɖɔ ŋwɛna.—1 Tim. 3:13.

7. Ɛzɩma ɖɩpɩzɩɣ nɛ ɖɩwɩlɩ ɖɛ-ɛsɩmɩyɛ ɛgbɛyɛ taa tʋmlaɖaa? (Cɔnɩ ɖɔɖɔ kɩlɛmʋʋ.)

⁷ Ðɩpɩzɩɣ nɛ ɖɩwɛɛnɩ ɛsɩmɩyɛ ɛgbɛyɛ taa tʋmlaɖaa yɔɔ, paa mbʋ yɔ Bibl seɣtiɣ-ɖʋ se: «Ɩwɩlɩ se ɩwɛnɩ ɛsɩmɩyɛ.» (Kol. 3:15) Payaɣ ɛgbɛyɛ taa ɛzʋtʋyʋ nɔɔyʋ se Krzysztof, ɛwɛ Fɛɛlandɩ ɛjaɖɛ taa. Ɛyɔɔdɩ ɛzɩma ɛlɩzɩɣ ɛ-ɛsɩmɩyɛ nɛ ɛwɩlɩɣ ɛgbɛyɛ taa tʋmlaɖaa yɔ pɩ-tɔm. Ɛyɔɔdaa se: «Mamaɣ mayaɣ nakɛyɛ takayaɣ yɔɔ yaa message nakʋyʋ taa nɛ mentiyini ɛgbɛyɛ taa tʋmlaɖʋ nɔɔyʋ nɛ meheyi-i mbʋ ɖeyi ɖeyi ɛlaba nɛ pɩkpazɩ-m ɖoŋ yɔ pɩ-tɔm yaa mbʋ pʋyɔɔ man-taa wɛ leleŋ nɛ tʋmɩyɛ nɖɩ ɛlakɩ yɔ.» Pascal nɛ Jael pɛwɛ Nuvɛɛlɩ Kaledonii ɛjaɖɛ taa. Ðoŋ ɖoŋ lɛ patɩmɩɣ ɛgbɛyɛ taa tʋmlaɖaa yɔɔ. Pascal yɔɔdaa se: «Pitileɖi yɔ, ɖɩtɩmnɩ Yehowa tam sakɩyɛ ɛgbɛyɛ taa tʋmlaɖaa mba pɛwɛ ɖɛ-ɛgbɛyɛ taa yɔ pɔ-yɔɔ nɛ ɖɩsɛɛ-ɩ se ɛlabaɣ lɛ, nɛ ɖɩpɔzɩ-ɩ se ɛwɛɛ pɔ-cɔlɔ nɛ ɛsɩnɩ-wɛ.» Yehowa welisiɣ adɩma ana nɛ pɩwazɩɣ ɛgbɛyɛ kpeekpe.—2 Kɔr. 1:11.

ƐGBƐYƐ TAA ƐZƲTƲYAA LAKƖ «TƲMƖYƐ NƐ KPEKPEKA MƖ-HƐKƲ TAA»

8. Ɛbɛ yɔɔ Pɔɔlɩ yɔɔdaa se kajalaɣ pɩnzɩ mɩnʋʋ taa ɛgbɛyɛ taa ɛzʋtʋyaa lakaɣ «tʋmɩyɛ nɛ kpekpeka»? (1 Tesalooniiki mba 5:​12, 13)

⁸ Kajalaɣ pɩnzɩ mɩnʋʋ taa ɛgbɛyɛ taa ɛzʋtʋyaa lakaɣ tʋmɩyɛ nɛ kpekpeka ɛgbɛyɛ taa. (Kalɩ 1 Tesalooniiki mba 5:​12, 13; 1 Tim. 5:17) ‘Peɖiyaɣ’ ɛgbɛyɛ, pʋ-tɔbʋʋ se pɔcɔŋnaɣ kediɣzisi yɔɔ nɛ pɛkpɛndɩɣ nɛ pakpakɩɣ lɩmaɣza. ‘Papakaɣ’ po-koobiya, pʋ-tɔbʋʋ se patasaɣ-wɛ lɔŋ kpayɩ, ɛlɛ palakaɣ mbʋ nɛ sɔɔlɩm, se pɩsa nɛ pakandɩyɩ ɛgbɛyɛ yɔɔ. (1 Tes. 2:​11, 12; 2 Tim. 4:2) Ɛlɛ abalaa mba, palakaɣ tʋmɩyɛ nɛ kpekpeka nɛ pɔcɔŋnɩ pɔ-hɔŋ yɔɔ nɛ pañakaɣ pana ɖɔɖɔ se pɛcɛyɩsɩ pe-tisuu nɛ pɛcɛyɩsɩ ɖɔɖɔ pa nɛ Yehowa pa-taabalɩyɛ.—1 Tim. 3:​2, 4; Tiiti 1:​6-9.

9. Sɔnɔ, tʋma wena ɛgbɛyɛ taa ɛzʋtʋyaa lakɩ?

⁹ Sɔnɔ ɖɔɖɔ, pɩɖɔkɩnɩ ɛgbɛyɛ taa ɛzʋtʋyaa. Pɛkɛ tɔm kɩbandʋ susuyaa. (2 Tim. 4:5) Pɛɖɛɣ nɔɔ tɔm susuu tʋmɩyɛ taa nɛ pɛwɛ kpekpeka ɖɩ-taa, palakɩ ɖʋtʋ nɛ posusuu tɔm ɛgbɛyɛ kookasɩ taa nɛ pafalɩsɩɣ-ɖʋ se ɖisusi tɔm nɛ ɖɩwɩlɩ tɔm camɩyɛ. Pɛkɛ ɖɔɖɔ tɔm hʋyaa mba panaɣ pʋtɔdɩyɛ nɛ paaɖʋʋ tʋkaɣ ɛyaa taa yɔ. Alɩwaatʋ ndʋ Krɩstʋ tʋ nɔɔyʋ lakɩ kɩwɛɛkɩm sɔsɔm nabʋyʋ yɔ, ɛgbɛyɛ taa ɛzʋtʋyaa ñakɩ pana se pasɩnɩ-ɩ nɛ ɛñɔɔzɩ ɛ nɛ Yehowa pa-taabalɩyɛ. Alɩwaatʋ kʋɖʋmtʋ ndʋ tɩ-taa lɛ, pañakɩ pana se ɛgbɛyɛ ɛwɛɛ kele kele. (1 Kɔr. 5:​12, 13; Gal. 6:1) Kɔzɩ kɔzɩ lɛ, ɛgbɛyɛ taa ɛzʋtʋyaa kɛ ninɖiɣyaa. (1 Pɩy. 5:​1-3) Patɩŋɩɣnɩ Bibl yɔɔ nɛ pɔñɔɔzʋʋ samaɣ taa tɔm camɩyɛ nɛ pɔyɔɔdʋʋ-tʋ, pañakɩ pana se patɩlɩ paa ɛgbɛyɛ taa tʋ weyi nɛ pekilimiɣ koobiya yɔɔ. Pɩtasɩnɩ ɛgbɛyɛ taa tʋma lɛɛna lɛ, ɛgbɛyɛ taa ɛzʋtʋyaa nabɛyɛ ɖʋʋ nesi Kewiyaɣ kpaamɩŋ maʋ nɛ ɩ-ñɔɔzʋʋ tʋmɩyɛ, pɔñɔɔzʋʋ kigbeɣliŋ, nɛ palakɩ tʋmɩyɛ Ðama nɩnʋʋ nɛ ɖɔkɔtɔnaa kɔɔmiteewaa taa nɛ pɛkɛ ɖɔɖɔ Kʋdɔndɩnaa yɔɔ kilimiyaa. Ɛgbɛyɛ taa ɛzʋtʋyaa lakɩ tʋmɩyɛ nɛ kpekpeka nɛ pasɩɣnɩ-ɖʋ.

10. Lɩmaɣza wena yɔɔ ɖɩwɛnɩ ɛsɩmɩyɛ ɖɛ-ɛgbɛyɛ taa ɛzʋtʋyaa mba palakɩ tʋmɩyɛ nɛ kpekpeka yɔ pɔ-yɔɔ?

¹⁰ Yehowa labɩ-ɖʋ tamaɣ se ninɖiɣyaa kaɣ cɔnʋʋ ɖɔ-yɔɔ camɩyɛ nɛ ‘sɔɔndʋ ɛɛkaɣ-ɖʋ tasʋʋ kpaʋ nɛ ɖɩɩtasɩɣ seluu.’ (Yer. 23:4) Payaɣ koobu halɩñɩnʋ nɔɔyʋ se Johanna, ɛwɛ Fɛɛlandɩ ɛjaɖɛ taa. Alɩwaatʋ ndʋ pɩwɩɣaɣ e-ɖoo siŋŋ yɔ, eeɖiɣzinaa se tɔm ndʋ tɩkɛ toovenim. Ɛyɔɔdaa se: «Pɩɩwɛ-m kaɖɛ se meheyi ɛyaa lalaa ɛzɩma pɩlakaɣ-m yɔ. Paa mbʋ yɔ, ɛgbɛyɛ taa ɛzʋtʋyʋ nɔɔyʋ kaaɖʋ suuɖu nɛ ewelisini-m alɩwaatʋ ndʋ mɔyɔɔdaɣ yɔ, ma nɛ ɩ ɖɩkpɛndaa nɛ ɖɩtɩmɩ nɛ eyele nɛ man-taa tɛ se Yehowa sɔɔlɩ-m, ŋgʋ mantaatɩlɩ ɛzʋtʋyʋ ɛnʋ camɩyɛ. Maatɔzʋʋ ndʋ ɖeyi ɖeyi ɛɛyɔɔdaa yɔ tɩ-yɔɔ, ɛlɛ mɔntɔzʋʋ se mɔn-sɔɔndʋ cɛba. Man-taa tɛma se Yehowa tiyini-i se ɛkɔɔ alɩwaatʋ kɩbandʋ yɔɔ ɖeyi ɖeyi nɛ ɛsɩnɩ-m.» Ɛzɩma ñɛ-ɛgbɛyɛ taa ɛzʋtʋyaa tɛmɩ-ŋ sɩnʋʋ?

11. Ɛzɩma ɖɩpɩzɩɣ nɛ ɖɩlɩzɩ ɖɛ-ɛsɩmɩyɛ nɛ ɖɩwɩlɩ ɛgbɛyɛ taa ɛzʋtʋyaa? (Cɔnɩ ɖɔɖɔ kɩlɛmʋʋ.)

¹¹ Yehowa sɔɔlaa se ɖɩlɩzɩ ɖɛ-ɛsɩmɩyɛ nɛ ɖɩwɩlɩ ɛgbɛyɛ taa ɛzʋtʋyaa «pa-tʋmɩyɛ yɔɔ.» (1 Tes. 5:​12, 13) Payaɣ koobu halɩñɩnʋ nɔɔyʋ se Henrietta, ɛwɛ ɖɔɖɔ Fɛɛlandɩ ɛjaɖɛ taa. Ɛyɔɔdaa se: «Ɛgbɛyɛ taa ɛzʋtʋyaa tisiɣ faaa nɛ pasɩɣnɩ ɛyaa lalaa; ɛlɛ pɩtɩwɩlɩ se pakɩlɩ wɛnʋʋ alɩwaatʋ nɛ ɖoŋ yaa paakatɩɣ kala pe-wezuu caɣʋ taa. Nabʋyʋ taa, meheyiɣ-wɛ se: “Ŋnawa, mɔnsɔɔlaa se ŋtɩlɩ se ŋkɛ ɛzʋtʋyʋ kɩbanʋ siŋŋ.”» Payaɣ koobu halɩñɩnʋ nɔɔyʋ se Sera, ɛwɛ Turkii ɛjaɖɛ taa. Ɛyɔɔdaa se: «Pɩpɔzʋʋ se pakpazɩ ɛgbɛyɛ taa ɛzʋtʋyaa ɖoŋ se pɩsa nɛ powolo pa-tʋmɩyɛ yɔɔ. Pʋyɔɔ lɛ, ɖɩpɩzɩɣ nɛ ɖɩma-wɛ takayaɣ, ɖɩyaa-wɛ se pɔkɔɔ nɛ ɖɩtɔɔ tɔɔnaɣ yaa ɖa nɛ wɛ ɖɩlɩɩ tɔm susuu.» Ŋwɛnɩ ɛsɩmɩyɛ ɛzʋtʋyʋ nɔɔyʋ yɔɔ ɖeyi ɖeyi tʋma wena ɛlakɩ yɔ a-yɔɔ? Yele nɛ ɛtɩlɩ se ŋwɛnɩ ɛsɩmɩyɛ mbʋ payɩ ɛlakɩ yɔ pɩ-yɔɔ.—1 Kɔr. 16:18.

EGEETIYE YƆƆ CƆNƖYAA KPAZƖƔ AGBAA ÐOŊ

12. Kajalaɣ pɩnzɩ mɩnʋʋ taa, ɖʋtʋ ndʋ paalaba nɛ pakpazɩnɩ agbaa ɖoŋ? (1 Tesalooniiki mba 2:​7, 8)

¹² Yesu Krɩstʋ lɩzɩ abalaa nabɛyɛ ɖɔɖɔ se patɩŋnɩ nʋmɔʋ lɛɛkʋ yɔɔ nɛ pasɩnɩ ɛgbɛyɛ. Eɖiyi Yeruzalɛm ɛzʋtʋyaa nɛ petiyi Pɔɔlɩ nɛ Barnaabaasɩ nɛ ɛyaa lalaa se pɛkɛ egeetiye yɔɔ cɔnɩyaa. (Tʋma 11:22) Ɛbɛ yɔɔ? Tʋmɩyɛ nɖɩ ɛlɩzɩ ɛgbɛyɛ taa tʋmlaɖaa nɛ ɛgbɛyɛ taa ɛzʋtʋyaa se pala yɔ, nɖɩ ɖɔɖɔ ɛlɩzɩ egeetiye yɔɔ cɔnɩyaa se pala. Tʋmɩyɛ nɖɩ lɛ se pakpazɩ agbaa ɖoŋ. (Tʋma 15:​40, 41) Abalaa mba, palaɣ kɩlaŋ sakɩyɛ se pɩsa nɛ pala tʋmɩyɛ nɖɩ, halɩ nabʋyʋ taa, paɖʋʋ pe-weziŋ kaɖɛ taa se pɩsa nɛ pawɩlɩ lalaa tɔm nɛ pakpazɩ-wɛ ɖoŋ.—Kalɩ 1 Tesalooniiki mba 2:​7, 8.

13. Tʋma wena egeetiye yɔɔ cɔnɩyaa lakɩ?

¹³ Egeetiye yɔɔ cɔnɩyaa ɖɔŋ nʋmɔʋ ɖoŋ ɖoŋ. Nabɛyɛ ɖɔŋ nʋmɔʋ kilomɛtanaa mɩnɩŋ sakɩyɛ pʋcɔ nɛ powoki agbaa naayɛ taa. Paa kpɩtaʋ ŋgʋ, egeetiye yɔɔ cɔnɩyʋ yɔɔdʋʋ samaɣ taa tɔm sakɩyɛ, ekilimiɣ koobiya yɔɔ, ɛlakɩ nʋmɔʋ lɩzɩyaa kediɣzaɣ, ɛzʋtʋyaa kediɣzaɣ nɛ tɔm susuu kediɣzisi. Ɛñɔɔzʋʋ samaɣ taa tɔm nɛ ɛlakɩ egeetiye kigbeɣliŋ nɛ kigbeɣliŋ sɔsɔŋ ɖʋtʋ. Ɛwɩlɩɣ tɔm nʋmɔʋ lɩzɩyaa sukulinaa taa, ɛlakɩ ŋgee kediɣzaɣ ŋga egeetiye taa nʋmɔʋ lɩzɩyaa lakɩ yɔ ka-ɖʋtʋ, nɛ ɛlakɩ tʋma lɛɛna wena ɛgbɛyɛ piliŋa ɖʋʋ-ɩ yɔ; nabʋyʋ taa pɩpɔzʋʋ se pala tʋma ana kpɛdɛyɛ.

14. Lɩmaɣza wena a-yɔɔ ɖɩwɛnɩ ɛsɩmɩyɛ egeetiye yɔɔ cɔnɩyaa yɔɔ?

¹⁴ Ɛzɩma egeetiye yɔɔ cɔnɩyaa tʋmɩyɛ wazɩɣ agbaa? Koobu abalɩñɩnʋ nɔɔyʋ wɛ Turkii ɛjaɖɛ taa. Ɛyɔɔdaa se: «Paa ɛzɩmtaa, egeetiye yɔɔ cɔnɩyʋ kilimiɣ ɖɛ-ɛgbɛyɛ yɔɔ lɛ, piseɣtiɣ-m se mankpaɣ alɩwaatʋ sakɩyɛ nɛ mansɩnɩ mon-koobiya. Mankatɩ egeetiye yɔɔ cɔnɩyaa sakɩyɛ, ɛlɛ wiɖiyi pa-taa nɔɔyʋ tiyele nɛ pɩlabɩ-m ɛzɩ ɛtɩsɔɔlɩ se ɛyɔɔdɩnɩ-m yaa ɛzɩ pɩkɩlɩ-ɩ ɖɔkɩnʋʋ yɔ.» Johanna weyi ɖɩyɔɔdɩ ɛ-tɔm nɛ pɩɖɛɛ yɔ, ɛ nɛ egeetiye yɔɔ cɔnɩyʋ palɩ tɔm susuu, ɛlɛ patɩna nɔɔyʋ ɖɩɣa. Ɛyɔɔdaa se: «Paa mbʋ yɔ, paa ɛzɩmtaa mɔntɔzʋʋ evemiye nɖɩ ɖɩ-yɔɔ. Mɔn-kɔɔnaa 2 kʋyɩ tɛtʋ ndʋ tɩ-taa maawɛɛ yɔ, nɛ pɩɩlakaɣ liu kpem se mana-wɛ. Egeetiye yɔɔ cɔnɩyʋ kpazɩ-m ɖoŋ nɛ ɛsɩnɩ-m nɛ menɖiɣzina se lɛɛlɛɛyɔ lɛ, pɩtɩla ɖiposini ɖɔ-hɔʋ taa mba nɛ ɖa-taabalaa. Ɛlɛ ɛjaɖɛ kɩfaɖɛ taa, ɖɩkaɣ hiɣu wala tam se ɖɩkpɛndɩ nɛ ɖɩcaɣ.» Mbʋ ɖɔɖɔ ɖa-taa sakɩyɛ tɔzʋʋ ɖe-egeetiye yɔɔ cɔnɩyaa yɔɔ nɛ taa leleŋ.—Tʋma 20:37–21:1.

15. (a) Ɛzɩ 3 Yohanɛɛsɩ 5-8 yɔɔdʋʋ yɔ, ɛzɩma ɖɩpɩzɩɣ nɛ ɖɩlɩzɩ ɖɛ-ɛsɩmɩyɛ nɛ ɖɩwɩlɩ egeetiye yɔɔ cɔnɩyaa? (Cɔnɩ ɖɔɖɔ kɩlɛmʋʋ.) (b) Ɛbɛ yɔɔ pɩpɔzʋʋ se ɖɩwɩlɩ ɖɛ-ɛsɩmɩyɛ abalaa mba palakɩ tʋmɩyɛ nɛ kpekpeka ɛgbɛyɛ taa yɔ pa-halaa, nɛ ɛzɩma ɖɩpɩzɩɣ nɛ ɖɩla mbʋ? (Kalɩ aɖakaɣ «Tɔzɩ pa-halaa yɔɔ.»)

¹⁵ Apostoloo Yohanɛɛsɩ seɣti Gayuusi se ɛmʋ ɛgɔndʋ koobiya mba pekilimi pɔ-yɔɔ yɔ nɛ ɛsɩɩ-wɛ «nɛ pɔɖɔ pa-nʋmɔʋ ɛzɩ pɩmʋnaʋ Ɛsɔ ɛsɩndaa yɔ.» (Kalɩ 3 Yohanɛɛsɩ 5-8.) Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩla mbʋ yɔ, ɩ-taa nakʋyʋ lɛ se ɖɩyaa egeetiye yɔɔ cɔnɩyʋ nɛ ɖa nɛ ɩ ɖɩtɔɔ tɔɔnaɣ. Nʋmɔʋ lɛɛkʋ lɛ se ɖɩɖʋ nesi tɔm susuu ɖʋtʋ alɩwaatʋ ndʋ ekilimiɣ ɖɔ-yɔɔ yɔ. Leslie weyi ɖɩyɔɔdɩ ɛ-tɔm nɛ pɩɖɛɛ yɔ, ɛlakɩ nabʋyʋ ɖɔɖɔ nɛ ɛwɩlɩɣ ɛ-ɛsɩmɩyɛ. Ɛyɔɔdaa se: «Mantɩmɩɣnɩ Yehowa se ɛcɔnɩ pa-kɩcɛyɩm ɖeɖe. Ma nɛ ma-walʋ ɖɩma-wɛ ɖɔɖɔ takayɩsɩ nɛ ɖiheyi-wɛ ɛzɩma pakpazɩ-ɖʋ ɖoŋ yɔ pɩ-tɔm.» Tɔzɩ se egeetiye yɔɔ cɔnɩyaa katɩɣ kala nɛ pɩnɩɣ-wɛ ɖɔɖɔ ɛzɩ ɖa yɔ. Nabʋyʋ taa, pahɩnɩɣ kʋdɔŋ, panɩɣzɩɣ nɛ halɩ pitiki-wɛ yɔɔɔ. Pɩtɩla, tɔm kɩbandʋ ndʋ ŋheyiɣ-wɛ yɔ yaa kʋjɔʋ ŋgʋ ŋlakɩ-wɛ yɔ, kɩpɩzɩɣ nɛ kɩkɛnɩ pa-adɩma yɔɔ cosuu.—Adu. 12:25.

PƖPƆZƲƲ-ÐƲ «ƐYAA . . . KƲJƆŊ»

16. Ɛzɩ Aduwa 3:27 yɔɔdʋʋ yɔ, tɔm ndʋ koobiya abalɩñɩma pɩzɩɣ nɛ pɔpɔzɩ pa-tɩ?

¹⁶ Ɛjaɖɛ kpeekpe yɔɔ, pɩpɔzʋʋ koobiya abalɩñɩma sakɩyɛ se pɛkɛ ‘ɛyaa kʋjɔŋ.’ Ye ŋkɛ koobu abalɩñɩnʋ nɛ pamɩyɩsɩ-ŋ lɩm yɔ, ña ɖɔɖɔ ‘ŋpɩzɩɣ nɛ ŋsɩna’? (Kalɩ Aduwa 3:27.) Ŋsɔɔlɩ faaa se ŋñaɣ pana nɛ ŋpɩsɩ ɛgbɛyɛ taa tʋmlaɖʋ na? Ye ŋtɛm kɛʋ ɛgbɛyɛ taa tʋmlaɖʋ yɔ, ŋsɔɔlɩ faaa se ŋpɩsɩ ɛgbɛyɛ taa ɛzʋtʋyʋ nɛ ŋsɩnɩ ño-koobiya na?c Ŋpɩzɩɣ nɛ ŋla lɛɣzɩtʋ ñe-wezuu caɣʋ taa se pɩsa nɛ ŋwolo Kewiyaɣ tɔm susuyaa sukuli? Pakaɣ-ŋ falɩsʋʋ sukuli ŋgʋ kɩ-taa se pɩsa nɛ Yesu tɩŋnɩ ñɔ-yɔɔ nɛ ɛla tʋma sakɩyɛ nɛ pɩkɩlɩ. Ye ŋmaɣzɩɣ se ŋŋpɩzɩɣ nɛ ŋla tʋma ana yɔ tɩmnɩ Yehowa. Pɔzɩ-ɩ se ɛha-ŋ e-fezuu kiɖeɖeu nɛ ŋpɩzɩ nɛ ŋla tʋma wena payɩ ɛɖʋʋ-ŋ yɔ camɩyɛ.—Luka 11:13; Tʋma 20:28.

17. Ɛbɛ ‘ɛyaa kʋjɔŋ’ wɩlɩɣ ɖe-Wiyaʋ Yesu Krɩstʋ yɔɔ?

¹⁷ Koobiya mba Yesu lɩzaa se pɛkɛ ‘ɛyaa kʋjɔŋ’ yɔ, pɛkɛnɩ yʋsaɣ ŋga kawɩlɩɣ se Yesu wɛɛ nɛ eɖiyiɣ-ɖʋ kɛdɛzaɣ kɩyakɩŋ ɩnɛ ɩ-taa yɔ. (Mat. 28:20) Ða-taa wɛ leleŋ siŋŋ se ɖɩwɛnɩ Wiyaʋ sɔɔlɩm tʋ, kʋjɔʋ tʋ weyi ɛsɩm mbʋ pɩpɔzʋʋ-ɖʋ nɛ ɛhaɣ-ɖʋ abalaa mba pɛwɛ niye se pɔcɔnɩ ɖa-kɩcɛyɩm ɖeɖe yɔ. Ye mbʋ, ñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋwɩlɩ ñɛ-ɛsɩmɩyɛ abalaa kpekpeka tɩnaa mba yɔ. Pɩtasɩ lɛ, sɛɛ Yehowa se ɛlabaɣ lɛ, mbʋ pʋyɔɔ yɔ ɛ-cɔlɔ «paa kʋjɔʋ kɩbaŋʋ ŋgʋ nɛ paa haɖɛ pilim ñɩnɖɛ nɖɩ lɛ» ɖɩlɩɣna.—Yak. 1:17.