Ŋpɩzɩɣ nɛ ŋkɛ Yehowa taabalʋ

Yehowa sɔɔlaa se ŋtɩlɩ-ɩ camɩyɛ. Ɛbɛ yɔɔ? Ɛnawa se ye ŋkpɛlɩkaa nɛ ŋtɩlɩ ɛ-wɛtʋ, ɛ-nʋmɔŋ nɛ ɛ-kaɖʋwa camɩyɛ yɔ, pɩkaɣ-ŋ seɣtuu se ŋkɛ ɛ-taabalʋ. Ŋpɩzɩɣ nɛ ŋkɛ Yehowa taabalʋ toovenim na? (Kalɩ Keɣa 25:14) Ɛbɛ ŋpɩzɩɣ ŋla nɛ ŋkɛ Yehowa taabalʋ? Bibl cosuu tɔm ndʋ tɩ-yɔɔ nɛ kɩwɩlɩɣ mbʋ pʋyɔɔ ña nɛ Yehowa mɩ-taabalɩyɛ kɛ taabalɩyɛ nɖɩ ɖɩ-tɔm cɛyɩ siŋŋ yɔ.

1. Ɛbɛ Yehowa seɣtiɣ-ŋ se ŋla?

«Ɩñɔtɩ mɩ-tɩ nɛ Ɛsɔ, nɛ ɛkaɣ-mɩ ñɔtɩnʋʋ.» (Yakubu 4:8) Tɔm tʋnɛ tɩ-tɔbʋʋ lɛ suwe? Yehowa seɣtiɣ-ŋ se ŋkɛ ɛ-taabalʋ. Nabɛyɛ pɩzɩɣ nɛ pamaɣzɩ se paapɩzɩɣ nɛ pɛkɛ weyi paanaɣ-ɩ yɔ ɛ-taabalʋ, nɛ kɔzɩ kɔzɩ lɛ pamaɣzɩɣ se paapɩzɩɣ nɛ pɛkɛ Ɛsɔ taabalʋ. Ɛlɛ Yehowa tɩŋɩɣnɩ Bibl yɔɔ nɛ ɛwɩlɩɣ-ɖʋ tɔm ndʋ payɩ pɩpɔzʋʋ se ɖɩtɩlɩ ɛ-yɔɔ nɛ pɩsa nɛ ɖɩñɔtɩnɩ-ɩ yɔ. Bibl kɛnɩ takayaɣ ŋga Ɛsɔ ma-ɖʋ yɔ; ye ɖɩkalɩɣ-kʋ ɖoŋ ɖoŋ yɔ, ɖa nɛ ɩ ɖa-taabalɩyɛ cɛyɩsɩɣ camɩyɛ, paa ɖɩɩpɩzɩɣ se ɖɩna-ɩ yɔ.

2. Yehowa kɛnɩ taabalʋ kɩbanʋ siŋŋ weyi ŋpɩzɩɣ nɛ ŋwɛɛna yɔ. Ɛbɛ yɔɔ?

Nɔɔyʋ tɩsɔɔlɩ-ŋ nɛ pɩtalɩ Yehowa. Ɛsɔɔlaa se ŋwɛɛ taa leleŋ taa nɛ ɛsɔɔlaa ɖɔɖɔ se ŋpɩsɩnɩ ɛ-yɔɔ alɩwaatʋ ndʋ payɩ pɩpɔzʋʋ se pasɩnɩ-ŋ yɔ. Ŋpɩzɩɣ ‘nɛ ŋɖʋzɩ ña-nɩɣzɛ kpeekpe e-nesi tɛɛ, mbʋ pʋyɔɔ yɔ ɛcɔŋnɩ ñɔ-yɔɔ.’ (1 Pɩyɛɛrɩ 5:7) Paa ɛzɩmtaa lɛ, Yehowa sɔɔlaa se ɛsɩnɩ ɛ-taabalaa, ɛhɛzɩ pa-laŋa nɛ ewelisini-wɛ.—Kalɩ Keɣa 94:18, 19.

3. Ɛbɛ pɩwɛɛ se ŋla nɛ ŋpɩsɩ Yehowa taabalʋ?

Yehowa sɔɔlɩ ɛyaa kpeekpe, ɛlɛ «ɛɖʋʋ taabalɩyɛ kɩbanɖɛ nɛ ɛyʋ siɣsiɣ tʋ.» (Aduwa 3:32) Pɩsa nɛ ŋkɛ Yehowa taabalʋ lɛ, pɩwɛɛ se ŋñaɣ pana nɛ ŋla mbʋ pɩwɛ ɖeu ɛ-ɛsɩndaa yɔ nɛ ŋse mbʋ pɩkɛ kɩdɛkɛdɩm yɔ. Nabɛyɛ pɩzɩɣ nɛ pamaɣzɩ se paakaɣ pɩzʋʋ kpa nɛ paña paɣtʋ ndʋ Yehowa ɖʋ kɩbam nɛ kɩdɛkɛdɩm pɔ-hɔɔlʋʋ taa yɔ. Ɛlɛ Yehowa kɛ pʋtɔdɩyɛ nayʋ. Ɛmʋʋ ɛyaa mba payɩ pɔsɔɔlɩ-ɩ nɛ pañakɩ pana se pala mbʋ pɩkɛdɩɣnɩ-ɩ yɔ.—Keɣa 147:11; Tʋma Labʋ 10:34, 35.

TAZƖ NƐ PILIMI

4. Abraham kaakɛ Yehowa taabalʋ

Tɔm ndʋ Bibl yɔɔdʋʋ Abraham (yaa Abram) yɔɔ yɔ, tɩsɩɣnɩ-ɖʋ se ɖɩtɩlɩ mbʋ pɩpɔzʋʋ se ɛyʋ ɛla nɛ ɛkɛ Yehowa taabalʋ yɔ. Ɩkalɩ Kiɖe Tɛɛ Tɔm 12:1-4, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ Yehowa kaapɔzɩ Abraham se ɛla?

• Tamaɣ ŋga Yehowa kaalabɩ-ɩ?

• Ɛzɩma Abraham ɖɔm tɔm ndʋ Yehowa heyi-i yɔ tɩ-yɔɔ?

5. Ɛbɛ Yehowa sɔɔlaa se ɛ-taabalaa ɩla?

Ðoŋ ɖoŋ lɛ, ɖɩsɔɔlaa se ɖa-taabalaa ɩlabɩ-ɖʋ mbʋ pɩkɛdɩɣnɩ-ɖʋ yɔ.

• Ɛbɛ ŋsɔɔlaa se ña-taabalaa ɩlabɩ-ŋ?

Ɩkalɩ 1 Yohanɛɛsɩ 5:3, nɛ pʋwayɩ lɛ icosi tɔm tʋnɛ tɩ-yɔɔ:

• Ɛbɛ Yehowa sɔɔlaa se ɛ-taabalaa ɩla?

Pɩsa nɛ ɖɔ-tɔm kɛdɩnɩ Yehowa lɛ, pɩtɩla pɩpɔzʋʋ se ɖɩlɛɣzɩ ɖa-lakasɩ yaa ɖɛ-wɛtʋ natʋyʋ. Ɩkalɩ Izaayii 48:17, 18; nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ yɔɔ Yehowa pɔzʋʋ ɛ-taabalaa se pɛlɛɣzɩ pa-lakasɩ?

6. Ɛbɛ Yehowa lakɩ ɛ-taabalaa?

VIDEO: Mbʋ mbʋ Yehowa labɩ-m yɔ, pɩfɛyɩ yɔɔdʋʋ (3:20)

• Halʋ weyi pɔyɔɔdɩ ɛ-tɔm video taa yɔ, ɛzɩma Yehowa sɩnɩ-ɩ nɛ ɛlʋbɩnɩ lɩmaɣza kɩdɛkɛda wena ɛɛwɛna yɔ?

Ɩkalɩ Izaayii 41:10, 13; nɛ pʋwayɩ lɛ ɩtazɩ tɔm tʋnɛ tɩ-taa:

• Tamaɣ ŋga Yehowa labɩ ɛ-taabalaa tɩŋa?

• Ŋmaɣzɩɣ se Yehowa pɩzɩɣ nɛ ɛkɛ taabalʋ kɩbanʋ na? Ɛbɛ yɔɔ?

7. Pɩsa nɛ ŋkɛ Yehowa taabalʋ lɛ, pɩpɔzʋʋ se ŋyɔɔdʋʋnɩ-ɩ nɛ ŋwelisiɣni-i

Ye taabalaa ɩyɔɔdʋʋnɩ ɖama yɔ, pa-taabalɩyɛ cɛyɩsɩɣ camɩyɛ. Ɩkalɩ Keɣa 86:6, 11; nɛ pʋwayɩ lɛ ɩtazɩ tɔm tʋnɛ tɩ-taa:

• Ɛzɩma ɖɩpɩzɩɣ nɛ ɖɩyɔɔdɩnɩ Yehowa?

• Ɛzɩma Yehowa yɔɔdʋʋnɩ-ɖʋ?

TOBI LƐ

Yehowa sɔɔlaa se ɛkɛ ña-taabalʋ nɛ ɛpɩzɩɣ nɛ ɛsɩnɩ-ŋ nɛ ŋñɔtɩnɩ-ɩ.

Tɔm taa tazʋʋ

• Ɛzɩma Yehowa sɩɣnɩ ɛ-taabalaa?

• Ɛbɛ yɔɔ Yehowa pɔzʋʋ ɛ-taabalaa se pɛlɛɣzɩ pa-lakasɩ?

• Ŋmaɣzɩɣ se mbʋ Yehowa pɔzʋʋ ɛ-taabalaa se pala yɔ, pɩkɩlɩ kaɖɛ na? Ɛbɛ yɔɔ?

WONDU LƐƐTƲ

Ye ɖɩɖʋ taabalɩyɛ nɛ Ɛsɔ yɔ, ɛzɩma pɩkaɣ-ɖʋ wazʋʋ?

«Jéhovah: un Dieu qui mérite d’être connu» (La Tour de Garde, 15 février 2003)

Na mbʋ ŋpɩzɩɣ ŋla nɛ ŋkɛ Ɛsɔ taabalʋ yɔ.

«Comment devenir l’ami de Dieu?» (Les jeunes s’interrogent. Réponses pratiques [volume 2], chapitre 35)

Kalɩ nɛ ŋna mbʋ pʋyɔɔ halʋ nɔɔyʋ maɣzɩɣ se ɛ nɛ Yehowa pa-taabalɩyɛ yabɩ ɛ-ñʋʋ yɔ.

«Mantaasɔɔlɩ se mansɩ!» (Feŋuu Tilimiye No. 1 2017)

Welisini piya evelisi nasɩyɩ nɛ ŋna lɩmaɣza wena sɩwɛnɩ Yehowa yɔɔ yɔ.

Ɛsɔ taabalʋ kɛʋ tɔbʋʋ lɛ suwe? (1:46)