Alɩwaatʋ ndʋ ñɛ-ɛyʋ kʋsɔɔlʋ nɔɔyʋ yeki Yehowa sɛʋ yɔ

1. Alɩwaatʋ ndʋ palɩzɩɣ ɛyʋ nɔɔyʋ ɛgbɛyɛ taa yɔ, ɖoŋ weyi pɩpɩzɩɣ nɛ pɩwɛɛnɩ ɛ-hɔʋ taa mba yɔɔ?

PALƖZƖ ñɛ-ɛyʋ kʋsɔɔlʋ nɔɔyʋ ɛgbɛyɛ taa? Pɩpɩzɩɣ nɛ pɩha-ŋ laŋwɛɛkɩyɛ. Payaɣ koobu halɩñɩnʋ nɔɔyʋ se Hilda, ɛyɔɔdaa se: “Ma nɛ ma-walʋ ɖɩɖɔkɩ nesi nɛ pɩla pɩnzɩ 41 lɛ ɛsɩ. Alɩwaatʋ ndʋ, mamaɣzaɣ se pɩɩkɛnɩ kaɖɛ sɔsɔɖɛ nɖɩ ɖɩkpaɖaa yɔ. Ɛlɛ alɩwaatʋ ndʋ man-pɩyalʋ lɩ ɛgbɛyɛ taa nɛ eyele ɛ-halʋ nɛ e-piya nɛ ɛɖɛɛ yɔ, pɩɩcɛzɩ-m nɛ pɩkpaɖɩ pɩtɩŋa.”b

2-3. Ɛzɩ Keɣa 77:40, 41 yɔɔdʋʋ yɔ, ɛzɩma pɩlakɩ Yehowa alɩwaatʋ ndʋ ɛ-sɛyaa nabɛyɛ haɣ-ɩ siɣye yɔ?

² Maɣzɩ nɛ ŋna ɛzɩma kpem pɩɩkɔnɩ Yehowa laŋwɛɛkɩyɛ alɩwaatʋ ndʋ e-tiyiyaa nabɛyɛ lɩ ɛ-hɔʋ taa nɛ paha-ɩ siɣye yɔ! (Yud. 6) Nɛ maɣzɩ nɛ ŋna ɛzɩma pɩɩcɛyɩ-ɩ kpem alɩwaatʋ ndʋ ɛɛwɛɛ nɛ ɛnaɣ Izrayɛɛlɩ samaɣ ŋga ɛsɔɔlaa yɔ, kɛwɛɛ nɛ kakaɖɩɣnɩ-ɩ tam sakɩyɛ yɔ. (Kalɩ Keɣa 77:40, 41.) Ña-taa ɛtɛ se ɖa-Caa kʋsɔɔlʋ weyi ɛwɛ ɛsɔdaa yɔ, ɛsʋʋ laŋwɛɛkɩyɛ taa ɖɔɖɔ alɩwaatʋ ndʋ ñɛ-ɛyʋ kʋsɔɔlʋ nɔɔyʋ yeki-i sɛʋ yɔ. Ɛsɩm laŋwɛɛkɩyɛ nɖɩ ɖɩ-taa ŋwɛɛ yɔ. Ɛkaɣ naʋ ña-pʋtɔdɩyɛ nɛ ɛkpazɩ-ŋ ɖoŋ nɛ ɛɖʋ-ŋ nesi ɛzɩ pɩpɔzʋʋ yɔ.

³ Tɔm ñʋʋ kʋnɛ kɩ-taa, ɖɩkaɣ naʋ mbʋ ɖɩpɩzɩɣ ɖɩla nɛ Yehowa sɩnɩ-ɖʋ alɩwaatʋ ndʋ ɖɛ-ɛyʋ kʋsɔɔlʋ nɔɔyʋ yeki-i sɛʋ yɔ. Ðɩkaɣ naʋ ɖɔɖɔ ɛzɩma ɖɩpɩzɩɣ ɖɩsɩnɩ ɛgbɛyɛ taa ñɩma lalaa mba pɛwɛɛ nɛ pakatɩɣ kaɖɛ nɖɩ yɔ. Ɛlɛ kajalaɣ lɛ, iyele nɛ ɖɩna lɩmaɣza kɩdɛkɛda wena pɩtɩpɔzɩ se ɖɩwɛɛna yɔ a-taa naayɛ.

TAAWƐƐ NƐ ŊKƲƲ ÑƆ-TƆM

4. Ɛzɩma pɩlakɩ lʋlɩyaa sakɩyɛ alɩwaatʋ ndʋ pa-pɩɣa nakɛyɛ haɣ Yehowa siɣye yɔ?

⁴ Alɩwaatʋ ndʋ pɩɣa nakɛyɛ yeki Yehowa sɛʋ yɔ, ɖoŋ ɖoŋ lɛ lʋlɩyaa wɛɣ nɛ pɔpɔzʋʋ pa-tɩ tɔm pɩlɩɩnɩ mbʋ papɩzaɣ se patasɩ labʋ nɛ pasɩnɩ-kɛ nɛ kɛwɛɛ toovenim taa yɔ pɩ-yɔɔ. Payaɣ koobu nɔɔyʋ se Luke, palɩzɩ ɛ-pɩyalʋ ɛgbɛyɛ taa. Ɛyɔɔdaa se: “Mamaɣzaɣ se mɔn-cɔlɔ pɩlɩnaa. Halɩ piiyeba nɛ monɖozuu ɖoza kɩdɛkɛda. Nabʋyʋ taa mewiɣaɣ nɛ manɩɣ wɩzasɩ ɖooo ma-laŋɩyɛ taa.” Payaɣ koobu halɩñɩnʋ nɔɔyʋ se Elizabeth, ɛnʋ ɖɔɖɔ ɛɛwɛ wɛtʋ kʋɖʋmtʋ ndʋ tɩ-taa, ɛmaɣzaɣ ɖoŋ ɖoŋ se: “Pɩtɩla mantɩla ɖoyo tʋmɩyɛ camɩyɛ hɔɔlɩŋ sakɩyɛ taa. Mamaɣzaɣ se mantɩwɩlɩ man-pɩyalʋ toovenim camɩyɛ.”

5. Alɩwaatʋ ndʋ nɔɔyʋ yeki Yehowa sɛʋ yɔ, a-cɔlɔ pɩlɩnaa?

⁵ Pɩwɛɛ se ɖɩtɔzɩ se Yehowa ha ɖa-taa paa anɩ tɩ-yɔɔ wɛʋ lɩzʋʋ waɖɛ. Pɩwɩlɩɣ se ɖɩpɩzɩɣ ɖɩlɩzɩ se ɖɩñaŋɩ-ɩ yaa ɖɩɩñaŋɩ-ɩ. Piya nasɩyɩ lʋlɩyaa tɩha-sɩ kɩɖaʋ kɩbaŋʋ, ɛlɛ sɩkpaɣ lɩmaɣzɩyɛ se sɩsɛɣ Yehowa nɛ sɩwɛɛ siɣsiɣ ɛ-ɛsɩndaa. Piya lɛɛsɩ lɛ, sɩ-lʋlɩyaa ñaɣ pana siŋŋ se pafalɩsɩ-sɩ nɛ pɩla nɔɔ kʋɖʋmaɣ nɛ Bibl paɣtʋ kila, ɛlɛ sɩpaɣlaa lɛ, sikizi toovenim. Ye mbʋ, ɖa-taa paa weyi pɩwɛɛ se ɛlɩzɩ se ɛsɛɣ Yehowa yaa ɛɛsɛɣ-ɩ. (Yoz. 24:15) Ye mbʋ lʋlɩyaa, mɩ mba ɩnɩɣ siziŋ mbʋ pʋyɔɔ yɔ mi-piya yebi Yehowa sɛʋ yɔ, ɩtaamaɣzɩ se mɩ-cɔlɔ pɩlɩnaa.

6. Ɛzɩma pɩpɩzɩɣ nɛ pɩla pɩɣa nakɛyɛ alɩwaatʋ ndʋ ka-lʋlɩyʋ nɔɔyʋ kiziɣ Ɛsɔ yɔ?

⁶ Nabʋyʋ taa, lʋlɩyʋ nɔɔyʋ yeki toovenim nɛ halɩ ɛɖɛɛ eyele ɛ-hɔʋ. (Keɣa 26:10) Pɩpɩzɩɣ nɛ pɩkɔnɩ kaɖɛ piya nzɩ sɩkpakaɣ sɩ-lʋlɩyʋ ɛnʋ se ɛkɛ kɩɖaʋ kɩbaŋʋ yɔ. Payaɣ pɩɣa nakɛyɛ se Esther, paalɩzɩ ka-caa ɛgbɛyɛ taa. Kɔyɔɔdaa se: “Ðoŋ ɖoŋ lɛ, mewiɣaɣ mbʋ pʋyɔɔ yɔ menɖiɣzinaa se pɩtaakɛ toovenim yem ɛwɛɛ nɛ ekiziɣ. Ɛɛkpaɣ lɩmaɣzɩyɛ se ɛtɩsɔɔlɩ se ɛtasɩ Yehowa sɛʋ. Maasɔɔlɩ man-caa, pʋyɔɔ alɩwaatʋ ndʋ palɩzɩ-ɩ ɛgbɛyɛ taa yɔ maawɛɛ nɛ manɩɣzɩɣ ɛ-yɔɔ kaahɛzaɣ se nabʋyʋ ɛtaatalɩ-ɩ. Halɩ ma-laŋɩyɛ maɣaɣ siŋŋ.”

7. Ɛzɩma pɩlakɩ Yehowa alɩwaatʋ ndʋ palɩzɩɣ pɩɣa nakɛyɛ lʋlɩyʋ nɔɔyʋ ɛgbɛyɛ taa yɔ?

⁷ Piya, ye palɩzɩ mɩ-lʋlɩyʋ nɔɔyʋ ɛgbɛyɛ taa yɔ, ɖɩnɩɣ mi-siziŋ siŋŋ! Ðitendi-mɩ, mɩ-taa ɩtɛ ɖɔɖɔ se Yehowa sɩm siziŋ weyi ɩwɛɛ nɛ ɩnɩɣ yɔ. Ɛsɔɔlɩ-mɩ, nɛ ɛ-taa lakɩ leleŋ nɛ mi-siɣsiɣ wɛtʋ; nɛ ɖa mba ɖɩkɛ mi-koobiya yɔ, ɖa-taa lakɩ leleŋ ɖɔɖɔ. Pɩtasɩ lɛ, ɩtɔzɩ se lɩmaɣzɩyɛ nɖɩ mɩ-lʋlɩyʋ kpaɣaa yɔ pɩtɩlɩɩnɩ mɩ-cɔlɔ. Ɛzɩ ɖɩtɛm yɔɔdʋʋ nɛ pɩɖɛɛ yɔ, Yehowa ha ɖa-taa paa anɩ waɖɛ se ɛlɩzɩ se ɛsɛɣ-ɩ yaa ɛɛsɛɣ-ɩ. Nɛ mba payɩ paha pa-tɩ nɛ pamɩyɩsɩ-wɛ lɩm yɔ, pa-taa “paa weyi lɛ, ɛkaɣ sɩɣlʋʋ ɛ-maɣmaɣ ɛ-sʋʋtʋ.”—Gal. 6:5.

8. Ɛbɛ hɔʋ taa ñɩma mba pɛwɛ siɣsiɣ yɔ papɩzɩɣ pala alɩwaatʋ ndʋ paɖaŋɩɣ se pɛ-ɛyʋ kʋsɔɔlʋ weyi palɩzɩ ɛgbɛyɛ taa yɔ ɛpɩsɩ Yehowa cɔlɔ yɔ? (Kalɩ ɖɔɖɔ aɖakaɣ “Pɩsɩ Yehowa cɔlɔ.”)

⁸ Alɩwaatʋ ndʋ ñɛ-ɛyʋ kʋsɔɔlʋ nɔɔyʋ yeki Yehowa sɛʋ yɔ, ŋwɛɣnɩ lidaʋ se wiɖiyi ɛkaɣ pɩsʋʋ nɛ ɛɖaɣnɩ-ɩ paɣzʋʋ sɛʋ, nɛ pɩmʋnɩ mbʋ. Alɩwaatʋ ndʋ ŋɖaŋɩɣ se ɛɖaɣnɩ pɩsʋʋ Yehowa cɔlɔ yɔ, ɛbɛ ŋpɩzɩɣ nɛ ŋla? La mbʋ payɩ ŋpɩzɩɣ yɔ nɛ ŋcɛyɩsɩ ñe-tisuu. Ye ŋlakɩ mbʋ yɔ, ŋkaɣ kɛnʋʋ kɩɖaʋ kɩbaŋʋ hɔʋ taa ñɩma lalaa nɛ halɩ pɩtɩla weyi palɩzɩ-ɩ ɛgbɛyɛ taa yɔ ɖɔɖɔ. Pɩtasɩ lɛ, ŋkaɣ hiɣu ɖoŋ weyi pɩpɔzʋʋ-ŋ yɔ nɛ ŋlʋbɩnɩ laŋwɛɛkɩyɛ nɖɩ pɩha-ŋ yɔ. Iyele nɛ ɖɩna nɩŋgbanzɩ nzɩ ɖeyi ɖeyi ŋpɩzɩɣ nɛ ŋkpɛzɩ yɔ sɩ-taa nasɩyɩ.

ƐBƐ ŊPƖZƖƔ ŊLA NƐ ŊWOLO PƖ-YƆƆ NƐ ŊWƐƐ ÐOŊ FEZUU TAA?

9. Ɛbɛ ŋpɩzɩɣ ŋla nɛ ŋhiɣ ɖoŋ weyi ɛlɩnɩ Yehowa cɔlɔ yɔ? (Kalɩ ɖɔɖɔ aɖakaɣ “Masɩ nzɩ sɩpɩzɩɣ nɛ sɩhɛzɩ ña-laŋɩyɛ ye ñɛ-ɛyʋ kʋsɔɔlʋ nɔɔyʋ eyebi Yehowa sɛʋ yɔ.”)

⁹ Ñɔɔnɩ fezuu taa ɖʋtʋ kɩbandʋ kpam. Pɩcɛyɩ siŋŋ se ŋwolo pɩ-yɔɔ nɛ ŋkpazɩɣ ña-maɣmaɣ nɛ hɔʋ taa mba lalaa ɖoŋ. Ɛzɩma ŋpɩzɩɣ nɛ ŋla mbʋ? Ye ŋlabɩ ɖʋtʋ nɛ ŋwolo pɩ-yɔɔ nɛ ŋkalɩɣ Ɛsɔtɔm nɛ ŋmaɣzɩɣ tɩ-yɔɔ camɩyɛ nɛ ŋwoki ɖɔɖɔ ɛgbɛyɛ taa kediɣzisi yɔ, ŋkaɣ hiɣu ɖoŋ weyi ɛlɩnɩ Yehowa cɔlɔ yɔ. Joanna caa nɛ ɛ-kɔɔ pekizi toovenim, ɛyɔɔdaa se: “Ma-laŋɩyɛ hɛ pazɩ alɩwaatʋ ndʋ mankalɩ Abigayɛɛlɩ, Ɛstɛɛrɩ, Yɔɔb, Yosɛɛfʋ, nɛ Yesu pɔ-tɔm Bibl taa yɔ. Pa-kɩɖaŋ kpazɩ-m ɖoŋ nɛ pɩsɩnɩ-m se mɛwɛɛnɩ lɩmaɣza kɩbana nɛ pɩkɩlɩ. Jw Tɔm Ðɩyɔɔdɩyɛ yɔɔ hendu kɩfatʋ kpazɩ-m ɖoŋ ɖɔɖɔ.”

10. Keɣa 31:6-8 wɩlɩɣ se ɛzɩma ɖɩpɩzɩɣ nɛ ɖɩlʋbɩnɩ laŋwɛɛkɩyɛ?

¹⁰ Heyi Yehowa mbʋ payɩ pɩcɛyɩɣ-ŋ yɔ pɩ-tɔm. Alɩwaatʋ ndʋ ŋwɛɣ laŋwɛɛkɩyɛ taa yɔ, taayele Yehowa tɩmnʋʋ. Tendi ɖɛ-Ɛsɔ sɔɔlɩm tʋ se ɛsɩnɩ-ŋ nɛ ŋwɛɛnɩ ɛ-lɩmaɣza, wɛtʋ ndʋ tɩ-taa ŋwɛɛ yɔ tɩ-yɔɔ, nɛ ‘ɛwɩlɩ-ŋ nʋmɔʋ ŋgʋ ŋtɩŋ yɔ.’ (Kalɩ Keɣa 31:6-8.) Pɩkɛ toovenim se pɩpɩzɩɣ nɛ pɩlabɩ-ŋ kaɖɛ siŋŋ se ŋheyi Yehowa ɛzɩma ɖeyi ɖeyi pɩlakɩ-ŋ yɔ. Ɛlɛ siziŋ weyi payɩ ŋnɩɣ ña-laŋɩyɛ taa yɔ, Yehowa sɩmɩ-ɩ camɩyɛ. Ɛsɔɔlɩ-ŋ siŋŋ nɛ eseɣtiɣ-ŋ se ŋheyi-i mbʋ pɩwɛ ña-laŋɩyɛ taa yɔ.—Ejl. 34:6; Keɣa 61:8, 9.

11. Ɛzɩ Ebree mba 12:11 yɔɔdʋʋ yɔ, ɛbɛ yɔɔ pɩwɛɛ se ɖɩtaa liu lɔŋ weyi Yehowa sɩɣzɩɣ ɛyaa nɛ sɔɔlɩm yɔ? (Kalɩ ɖɔɖɔ aɖakaɣ “Ɛyaa lɩzʋʋ ɛgbɛyɛ taa ɖʋtʋ wɩlɩɣ se Yehowa sɔɔlɩ-ɖʋ.”)

¹¹ Ðʋ nesi lɩmaɣzɩyɛ nɖɩ ɛzʋtʋyaa kpaɣaa yɔ. Ɛyaa lɩzʋʋ ɛgbɛyɛ taa kɛ ɖʋtʋ ndʋ tɩlɩnɩ Yehowa cɔlɔ yɔ. Yehowa sɩɣzɩɣ ɛyaa lɔŋ se pɩsɩnɩ kɩwɛɛkɩm laɖʋ nɛ pɩtɛ pɩwazɩ ɛyaa tɩŋa. (Kalɩ Ebree mba 12:11.) Ɛgbɛyɛ taa mba nabɛyɛ pɩzɩɣ nɛ pɔyɔɔdɩ se lɩmaɣzɩyɛ nɖɩ ɛzʋtʋyaa kpaɣaa nɛ palɩzɩ nɔɔyʋ ɛgbɛyɛ taa yɔ pɩtɩkɛnɩ lɩmaɣzɩyɛ kɩbanɖɛ, ɛlɛ tɔzɩ se ɖoŋ ɖoŋ lɛ ɛyaa mba, paayɔɔdʋʋ mbʋ ɛyʋ ɛnʋ ɛlaba nɛ pɩfɛyɩ ɖeu yɔ pɩ-tɔm. Ðɩɩsɩŋ mbʋ pɩlaba yɔ pɩtɩŋa. Ye mbʋ, pɩkɛɣnɩ lɔŋsɩnɖɛ se ɖɩtaa liu ɛzʋtʋyaa mba pañaɣ pana siŋŋ nɛ palabɩnɩ tʋmɩyɛ Bibl paɣtʋ kila nɛ pahʋʋ tɔm “Yehowa hɩɖɛ taa yɔ.”—4 Aw. 19:6, nwt.

12. Ɛyaa nabɛyɛ ɖʋ nesi lɔŋ sɩɣzʋʋ ɖʋtʋ ndʋ Yehowa laba yɔ lɛ, wazasɩ nzɩ pehiɣaa?

¹² Ye ŋɖʋʋ nesi lɩmaɣzɩyɛ nɖɩ ɛzʋtʋyaa kpaɣaa nɛ palɩzɩ ñɛ-ɛyʋ kʋsɔɔlʋ nɔɔyʋ ɛgbɛyɛ taa yɔ, toovenim taa lɛ ŋpɩzɩɣ ŋsɩnɩ-ɩ nɛ ɛpɩsɩ Yehowa cɔlɔ. Elizabeth weyi ɛ-tɔm ɖɩyɔɔdaa nɛ pɩɖɛɛ yɔ, ɛtɔm se: “Pɩɩlabɩ-ɖʋ kaɖɛ kpem se ɖɩcɛ taabalɩyɛ nɖɩ ɖɩɩwɛ ɖa nɛ ɖa-pɩyalʋ ɖɛ-hɛkʋ taa yɔ. Ɛlɛ ɛpɩsɩ Yehowa cɔlɔ nɛ pɩtɛ lɛ, ɛyɔɔdɩ se palɩzʋʋ-ɩ ɛgbɛyɛ taa yɔ pɩɩkɛnɩ lɩmaɣzɩyɛ kɩbanɖɛ. Pʋwayɩ ɛyɔɔdaa se ɛnʋ kpɛlɩkɩ lɔŋ kɩbaŋ sakɩyɛ. Mɔnkɔm nɛ menɖiɣzina se lɔŋ weyi Yehowa sɩɣzɩɣ ɛyaa yɔ, ɩtʋʋzɩ paa ɛzɩmtaa.” Ɛ-walʋ Mark sɔzaa se: “Pɩlabɩ alɩwaatʋ sakɩyɛ pʋwayɩ lɛ, ɖa-pɩyalʋ heyi-m se mbʋ pʋyɔɔ ɛnʋ kaasɔɔlaa se ɛpɩsɩ nɛ ɛkɔɔ yɔ pɩ-taa nabʋyʋ lɛ se ɖɩlabɩ mbʋ ɖeyi ɖeyi pɩɩpɔzaa se ɖɩla yɔ. Man-taa labɩ leleŋ se Yehowa sɩnɩ-ɖʋ nɛ ɖɩɖɔ ɛ-paɣtʋ yɔɔ.”

13. Ɛbɛ ŋpɩzɩɣ ŋla nɛ pɩsɩnɩ-ŋ nɛ ŋlʋbɩ laŋwɛɛkɩyɛ?

¹³ Heyi ña-taa tɔm taabalaa mba panɩɣ ñɔ-tɔm taa yɔ. Ðʋ taabalɩyɛ nɛ Krɩstʋ ñɩma mba papɩ fezuu taa nɛ papɩzɩɣ pasɩnɩ-ŋ nɛ ŋwɛɛnɩ lɩmaɣza kɩbana yɔ. (Adu. 12:25; 17:17) Joanna weyi ɖɩyɔɔdɩ ɛ-tɔm nɛ pɩɖɛɛ yɔ ɛyɔɔdaa se: “Pɩlakaɣ-m ɛzɩ mɛwɛ men-ɖeke yɔ. Ɛlɛ mɔyɔɔdaɣnɩ taabalaa mba mantaɣ-wɛ liu yɔ lɛ, pɩsɩnɩ-m kpem.” Ɛlɛ ɛbɛ ŋpɩzɩɣ nɛ ŋla ye ɛgbɛyɛ taa mba nabɛyɛ eheyiɣ-ŋ tɔm ndʋ tɩtɛzɩɣ-ŋ kɔnʋʋ laŋwɛɛkɩyɛ yɔ?

14. Ɛbɛ yɔɔ pɩwɛɛ se ‘ɖiwolo pɩ-yɔɔ nɛ ɖɔ-tɔm ɛtaanɩɩ ɖama nɛ ɖikpeɣ ɖama faaa’?

¹⁴ Wɛɛnɩ suuɖu ño-koobiya yɔɔ. Ðɩɩpɩzɩɣ nɛ ɖɩɖaŋ se paa weyi lɛ, ɛkaɣ yɔɔdʋʋ tɔm ndʋ tɩtʋʋzaa yɔ paa ɛzɩmtaa. (Yak. 3:2) Ða-tɩŋa ɖɩtɩtalɩ pilim, ye mbʋ pɩtaaɖɩɣzɩ-ŋ ye nɔɔyʋ ɛɛsɩŋ tɔm ndʋ ɛyɔɔdɩ yɔ yaa ye ɛtɩɖʋna nɛ ɛyɔɔdɩ tɔm natʋyʋ nɛ tɩɖʋ-ŋ ɖɩwɩzɩyɛ yɔ. Tɔzɩ apostoloo Pɔɔlɩ lɔŋ tasʋʋ ɩnɛ ɩ-yɔɔ: “Iwolo pɩ-yɔɔ nɛ mɩ-tɔm ɛtaanɩɩ ɖama nɛ ikpeɣ ɖama faaa paa nɔɔyʋ taa ɛwɛnɩ lɛlʋ yɔ.” (Kol. 3:13) Palɩzɩ koobu halɩñɩnʋ nɔɔyʋ hɔʋ taa tʋ nɔɔyʋ ɛgbɛyɛ taa. Ɛyɔɔdaa se: “Yehowa kaasɩnɩ-m nɛ mankpaɣ menkpeɣ koobiya mba pañakaɣ pana se pakpazɩ-m ɖoŋ ɛlɛ pɩɖʋʋ-m ɖɩwɩzɩyɛ yɔ.” Ɛbɛ ɛgbɛyɛ pɩzɩɣ ɖɩla nɛ ɖɩsɩnɩ hɔʋ taa ñɩma mba pɛwɛ siɣsiɣ yɔ?

ƐGBƐYƐ PƖZƖƔ NƐ ÐƖÐƲ NESI

15. Ɛbɛ ɖɩpɩzɩɣ ɖɩla nɛ ɖɩsɩnɩ hɔʋ taa ñɩma mba palɩzɩ pɛ-ɛyʋ kʋsɔɔlʋ nɔɔyʋ ɛgbɛyɛ taa pitileɖita yɔ?

¹⁵ Mʋ hɔʋ taa ñɩma mba pɛwɛ siɣsiɣ yɔ camɩyɛ. Payaɣ koobu halɩñɩnʋ nɔɔyʋ se Miriam. Ɛyɔɔdaa se alɩwaatʋ ndʋ palɩzɩ e-neu abalɩñɩnʋ ɛgbɛyɛ taa yɔ, kediɣzisi wobu kpaɣaɣ ɛnʋ sɔɔndʋ. Ɛtɔm se: “Sɔɔndʋ kpaɣaɣ-m nɛ tɔm ndʋ ɛyaa kaɣaɣ yɔɔdʋʋ yɔ. Ɛlɛ mbʋ pɩɩlaba yɔ, pɩɩkɔnɩ koobiya sakɩyɛ laŋwɛɛkɩyɛ ɖɔɖɔ. Nɛ pataayɔɔdʋʋ tɔm kɩdɛkɛdɩtʋ natʋyʋ me-neu yɔɔ. Koobiya mba pasɩnɩ-m, nɛ mantaawɛɛ men-ɖeke ma-laŋwɛɛkɩyɛ taa.” Koobu halɩñɩnʋ lɛlʋ yɔɔdaa se: “Alɩwaatʋ ndʋ palɩzɩ ɖa-pɩyalʋ ɛgbɛyɛ taa yɔ, ɖa-taabalaa kɩbama kɔm nɛ pɛhɛzɩ ɖa-laŋa. Pa-taa nabɛyɛ yɔɔdaa se paasɩŋ tɔm ndʋ pɔyɔɔdɩ yɔ. Nabɛyɛ sɩnɩ-m wiu, nɛ lalaa ñama takayɩsɩ nzɩ sɩkpazɩɣ ɖoŋ yɔ nɛ petiyini-m. Mbʋ palaba yɔ pɩsɩnɩ-m siŋŋ!”

16. Ɛzɩma ɛgbɛyɛ taa ñɩma pɩzɩɣ powolo pɩ-yɔɔ nɛ pɛhɛzɩɣ weyi palɩzɩ-ɩ ɛgbɛyɛ taa yɔ ɛ-hɔʋ taa ñɩma laŋa?

¹⁶ Wolo pɩ-yɔɔ nɛ ŋɖʋʋ nesi hɔʋ taa ñɩma mba pɛwɛ siɣsiɣ yɔ. Lɛɛlɛɛyɔ kpem pɩpɔzaa se ŋwɩlɩ-wɛ sɔɔlɩm nɛ ŋkpazɩ-wɛ ɖoŋ. (Ebr. 10:24, 25) Nabʋyʋ taa, weyi palɩzɩ-ɩ ɛgbɛyɛ taa yɔ ɛ-hɔʋ taa ñɩma ɖiɣziɣna se ɛgbɛyɛ taa ñɩma nabɛyɛ ɩɩyɔɔdʋʋnɩ-wɛ, nɛ pakpakɩɣ-wɛ ɛzɩ palɩzɩ-wɛ ɖɔɖɔ ɛgbɛyɛ taa yɔ. Ðɩtɩsɔɔlɩ se ɖiyele nɛ pɛwɛɛnɩ lɩmaɣza ana. Kɔzɩ kɔzɩ lɛ, pɩpɔzʋʋ se ɖɩsaŋ piya nzɩ sɩ-lʋlɩyaa kizi toovenim yɔ nɛ ɖɩkpazɩ-sɩ ɖoŋ. Palɩzɩ Maria walʋ ɛgbɛyɛ taa nɛ ɛɖɛɛ nɛ eyele ɛ-hɔʋ. Maria yɔɔdaa se: “Man-taabalaa nabɛyɛ kɔŋ nɛ palakɩ-ɖʋ tɔɔnaɣ nɛ pasɩɣnɩ-m nɛ mɛnkpɛlɩkɩɣnɩ men-piya. Panɩ men-siziŋ nɛ pasɩnɩ-m wiu. Palʋbɩ mɔ-yɔɔ alɩwaatʋ ndʋ ɛyaa yɔɔdaɣ cɛtɩm tɔm mɔ-yɔɔ yɔ. Paakpazɩ-m ɖoŋ siŋŋ!”—Roma 12:13, 15.

17. Ɛbɛ ɛgbɛyɛ taa ɛzʋtʋyaa pɩzɩɣ pala nɛ pɛhɛzɩ mba pɛwɛ laŋwɛɛkɩyɛ taa yɔ pa-laŋɩyɛ?

¹⁷ Ɛzʋtʋyaa, ɩlabɩnɩ tʋmɩyɛ wala wena payɩ ɩpɩzɩɣ nɛ ihiɣ yɔ nɛ ɩkpazɩ ɖoŋ hɔʋ taa ñɩma mba pɛwɛ siɣsiɣ yɔ. Mɩ-tʋmɩyɛ pɩkɛnaa se ɩhɛzɩ koobiya mba pɔ-hɔʋ taa tʋ nɔɔyʋ yebi Yehowa sɛʋ yɔ pa-laŋa. (1 Tes. 5:14) Pɩsa nɛ ɩkpazɩ-wɛ ɖoŋ lɛ, pʋcɔ nɛ kediɣzaɣ paɣzɩ lɛ, ɩyɔɔdɩnɩ-wɛ, nɛ kediɣzaɣ tɛŋ ɖɔɖɔ lɛ ɩyɔɔdɩnɩ-wɛ. Iwoki pɛ-tɛ nɛ mɩ nɛ wɛ ɩkpɛndɩ nɛ ɩtɩmɩɣ. Mɩ nɛ wɛ ɩlɩɣ nɛ isusuu tɔm; yaa nabʋyʋ taa, ɩyaa-wɛ nɛ pɔkɔɔ mɩ-tɛ nɛ mɩ nɛ wɛ ɩla hɔʋ taa Ɛsɔ sɛtʋ. Pɩpɔzʋʋ se ɛgbɛyɛ taa ɛzʋtʋyaa ɩcɔnɩ mba pɛwɛ laŋwɛɛkɩyɛ taa yɔ pɔ-yɔɔ nɛ panɩɩ pe-siziŋ nɛ pawɩlɩ-wɛ sɔɔlɩm mbʋ pɩpɔzʋʋ-wɛ yɔ.—1 Tes. 2:7, 8.

TAALƆ LIDAƲ, WOLO PƖ-YƆƆ NƐ ŊTAƔ YEHOWA LIU

18. Ɛzɩ 2 Pɩyɛɛrɩ 3:9 yɔɔdʋʋ yɔ, ɛbɛ Ɛsɔ sɔɔlaa se mba peyebi-i sɛʋ yɔ pala?

¹⁸ Yehowa tɩsɔɔlɩ “se paɖɩzɩ nɔɔyʋ, ɛlɛ ɛsɔɔlaa se ɛyaa tɩŋa ikpiɖi pa-kɩwɛɛkɩm yɔɔ.” (Kalɩ 2 Pɩyɛɛrɩ 3:9.) Paa ɛyʋ nɔɔyʋ ɛlabɩ kɩwɛɛkɩm sɔsɔm nabʋyʋ yɔ, e-wezuu kpɛndɩ kɩmʋ ñɩm Ɛsɔ ɛsɩndaa. Tɔzɩ se Yehowa hɛyɩ kɩhɛyʋʋ sɔsɔʋ, pʋ-tɔbʋʋ se ɛ-Pɩyalʋ kʋsɔɔlʋ wezuu ɖa-taa paa anɩ lɛ ɛ-yɔɔ. Yehowa naɣ ɛyaa mba, pa-pʋtɔdɩyɛ nɛ ɛñakɩ pana se ɛsɩnɩ-wɛ nɛ papɩsɩ pɔkɔɔ ɛ-cɔlɔ. Ɛtaɣ liu se ɛyaa mba, pakaɣ kpaɣʋ lɩmaɣzɩyɛ se papɩsɩ nɛ pɔkɔɔ ɛzɩ Yesu yɔɔdʋʋ pɩɣa kilebaɣ eduuye taa yɔ. (Luka 15:11-32) Mba paakizi toovenim yɔ, pa-taa sakɩyɛ pɩsɩ pʋwayɩ nɛ pɔkɔɔ pa-Caa kʋsɔɔlʋ weyi ɛwɛ ɛsɔdaa yɔ ɛ-cɔlɔ. Nɛ ɛgbɛyɛ taa koobiya mʋ-wɛ nɛ taa leleŋ siŋŋ. Elizabeth weyi ɖɩɩtɛm ɛ-tɔm yɔɔdʋʋ nɛ pɩɖɛɛ yɔ, ɛ-taa kaalabɩ leleŋ siŋŋ alɩwaatʋ ndʋ papɩsɩnɩ ɛ-pɩyalʋ ɛgbɛyɛ taa yɔ. Ɛmaɣzɩ mbʋ pɩlaba nɛ pɩɖɛɛ yɔ pɩ-yɔɔ lɛ, ɛyɔɔdɩ se: “Man-taa kaalabɩ leleŋ siŋŋ se ɛyaa sakɩyɛ kaaseɣti-ɖʋ se ɖɩtaalɔ lidaʋ.”

19. Ɛbɛ yɔɔ ɖɩpɩzɩɣ ɖiwolo pɩ-yɔɔ nɛ ɖɩtaɣ Yehowa liu?

¹⁹ Ðɩpɩzɩɣ nɛ ɖɩtaa Yehowa liu paa ɛzɩmtaa. Ɛ-lɔŋ tasʋʋ sɩɣnɩ-ɖʋ paa ɛzɩmtaa. Ɛkɛ Caja kʋjɔʋ tʋ nɛ pʋtɔdɩyɛ nayʋ weyi ɛsɔɔlɩ mba payɩ pɔsɔɔlɩ-ɩ nɛ pɛsɛɣ-ɩ yɔ. Ña-taa ɛtɛ se Yehowa ɛɛkaɣ-ŋ siɣye haʋ alɩwaatʋ ndʋ ŋwɛɣ laŋwɛɛkɩyɛ taa yɔ. (Ebr. 13:5, 6) Mark weyi ɖɩtɛm ɛ-tɔm yɔɔdʋʋ nɛ pɩɖɛɛ yɔ, ɛyɔɔdaa se: “Yehowa tɩha-ɖʋ siɣye kaaʋ. Eeposuu ɛ-tɩ nɛ ɖʋ kaaʋ alɩwaatʋ ndʋ ɖɩkatɩɣ kala yɔ.” Yehowa kaɣ wobu pɩ-yɔɔ nɛ ɛhaɣ-ŋ “ɖoŋ weyi ɩcɛzɩ ɛyʋ ɖoŋ yɔ.” (2 Kɔr. 4:7) Ɛɛɛ, ŋpɩzɩɣ nɛ ŋɖɔkɩ ñe-siɣsiɣ wɛtʋ kpam nɛ ŋwɛɛnɩ lidaʋ, pɩkpɛndɩnɩ alɩwaatʋ ndʋ ñɛ-ɛyʋ kʋsɔɔlʋ nɔɔyʋ yeki Yehowa sɛʋ yɔ.