Yesu kɛ ɖɔ-cɔjɔ kɩlɩm weyi ɛnɩɣ ɖe-siziŋ yɔ

1-2. (a) Ɛbɛ yɔɔ Yehowa tiyi ɛ-Pɩyalʋ tɛtʋ yɔɔ? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa? (Ebree mba 5:​7-9)

PƖLAKƖ ɛzɩ pɩnzɩ 2000 mbʋ yɔ, Yehowa tiyi ɛ-Pɩyalʋ weyi ɛkɩlɩ sɔɔlʋʋ yɔ tɛtʋ yɔɔ. Lɩmaɣza sakɩyɛ yɔɔ etiyi-i. A-taa naɖɩyɛ lɛ se ɛya ɛyaa ñʋʋ kɩwɛɛkɩm nɛ sɩm pe-nesi tɛɛ nɛ ɛñɔɔzɩ mbʋ Sataŋ wɛɛkaa yɔ. (Yoh. 3:16; 1 Yoh. 3:8) Yehowa kaanawa ɖɔɖɔ se wezuu ŋgʋ Yesu kaɣ caɣʋ tɛtʋ yɔɔ yɔ, kɩkaɣ-ɩ sɩnʋʋ nɛ ɛpɩsɩ cɔjɔ kɩlɩm weyi ɛnɩɣ ɖe-siziŋ nɛ ɛnaɣ ɖa-pʋtɔdɩyɛ yɔ. Yesu pɩsɩ cɔjɔ kɩlɩm ɛ-lɩm mɩyɩsʋʋ wayɩ pɩnaɣ 29 taa.a

² Tɔm ñʋʋ kʋnɛ kɩ-taa, ɖɩkaɣ naʋ ɛzɩma wezuu ŋgʋ Yesu kaacaɣ tɛtʋ yɔɔ yɔ kɩsɩnɩ-ɩ nɛ ɛmʋnɩ camɩyɛ se ɛkɛ cɔjɔ kɩlɩm weyi ɛnɩɣ ɖe-siziŋ yɔ. Pɩcɛyaa se ɖɩnɩɩ tɔm ndʋ tɩ-taa, mbʋ pʋyɔɔ yɔ ye ɖɩnɩ tɩ-taa yɔ pɩkaɣ-ɖʋ wɛʋ kɛlɛʋ se ɖɩtɩmnɩ Yehowa nɛ ɖɩñɔtɩnɩ-ɩ, kɔzɩ kɔzɩ alɩwaatʋ ndʋ ɖa-kɩwɛɛkɩm yeki nɛ ɖɩwɛɣ laŋwɛɛkɩyɛ taa yɔ.—Kalɩ Ebree mba 5:​7-9.

ƐSƆ PƖYALƲ KƲSƆƆLƲ KƆM TƐTƲ YƆƆ

3-4. Alɩwaatʋ ndʋ Yesu kɔm tɛtʋ yɔɔ yɔ, lɛɣzɩtʋ sɔsɔtʋ ndʋ ɛɛkataa?

³ Ða-taa sakɩyɛ katɩ lɛɣzɩtʋ pe-wezuu caɣʋ taa nɛ pana. Pɩtɩla ɖɩkʋyɩ ɖɩɣa ŋga ɖɩsɔɔlaa yɔ ka-taa nɛ ɖɩɖɛɛ ɖiyele ɖɔ-hɔʋ taa mba nɛ ɖa-taabalaa. Lɛɣzɩtʋ ndʋ tɩfɛyɩ kɛlɛʋ. Ɛlɛ ɛyʋ nɔɔyʋ tɩkatɩ lɛɣzɩtʋ natʋyʋ e-wezuu caɣʋ taa nɛ tɩtalɩ ndʋ Yesu kataa yɔ. Ɛɛwɛ ɛsɔdaa lɛ, ɛnʋ kaakɛnɩ Ɛsɔ tiyiyaa taa weyi ɛkpaɖaa yɔ. Yehowa kaasɔɔlɩ-ɩ nɛ paa ɛzɩmtaa ɛ-taa kaawɛ leleŋ siŋŋ, mbʋ pʋyɔɔ yɔ ɛ nɛ ɛ-Caa pɛkpɛndaɣ nɛ palakɩ tʋmɩyɛ. (Keɣ. 16:11; Adu. 8:30) Paa mbʋ yɔ, Filiipi mba 2:7 yɔɔdʋʋ se etisi faaa nɛ eyele «mbʋ payɩ ɛɛwɛna yɔ,» pʋ-tɔbʋʋ se lone sɔsɔɖɛ nɖɩ ɛɛwɛnɩ ɛsɔdaa yɔ nɛ ɛkɔɔ ɛcaɣ ɛyaa mantɩtalɩ pilimwaa hɛkʋ taa tɛtʋ yɔɔ.

⁴ Maɣzɩ ɖɔɖɔ nɛ ŋna mbʋ pɩlabɩ pɩnzɩ kajalaɣ ñɩnzɩ nzɩ Yesu caɣ wezuu tɛtʋ yɔɔ yɔ sɩ-taa yɔ. Ɛ-lʋlɩyaa kaakɛ kʋñɔndɩnaa. Ðɩyɔɔdʋʋ mbʋ, mbʋ pʋyɔɔ yɔ alɩwaatʋ ndʋ palʋlɩ-ɩ yɔ, sumasɩ cikpesi 2 ɖeke ɛ-lʋlɩyaa pɩzaa nɛ powoni templo taa nɛ palaa kɩlaʋ. (Lev. 12:8; Luka 2:24) Wiyaʋ kɩdɛkɛdʋ Eroodi nɩwa se palʋlɩ Yesu lɛ, ɛñaɣ pana se ɛkʋ-ɩ. Pɩsa nɛ Yesu lʋlɩyaa ya ɛ-ñʋʋ lɛ, pakpaɣ-ɩ nɛ pese pɛɖɛɛ Ejipiti nɛ pacaɣ peeɖe alɩwaatʋ natʋyʋ. (Mat. 2:​13, 15) Wezuu ŋgʋ Yesu kaacaɣ tɛtʋ yɔɔ yɔ, kɩɩwɛ ndɩ kpem nɛ ŋgʋ ɛɛcaɣ ɛsɔdaa yɔ.

5. (a) Yesu kɔm tɛtʋ yɔɔ lɛ, ɛbɛ ɛnawa? (b) Nɛ wezuu ŋgʋ ɛcaɣ tɛtʋ yɔɔ yɔ, ɛzɩma kɩsɩnɩ-ɩ se ɛnɩɩ ɛyaa siziŋ? (Cɔnɩ ɖɔɖɔ kɩlɛmʋʋ.)

⁵ Yesu kaawɛɛ tɛtʋ yɔɔ lɛ, ɛna ɛzɩma ɛyaa lakaɣ kʋñɔŋ siŋŋ yɔ. Ɛna ɛzɩma pɩlakɩ ɛyʋ alɩwaatʋ ndʋ ɛ-ɛyʋ kʋsɔɔlʋ nɔɔyʋ sɩkɩ yɔ. Nɛ pɩtʋʋ fɛyɩ se ɛyaa mba ɛɛsɩma yɔ pa-taa nabɛyɛ sɩbɩ ɛ-ɛsɩndaa, nɛ pa-taa nɔɔyʋ lɛ ɛ-caa Yosɛɛfʋ. Alɩwaatʋ ndʋ ɛlakaɣ ɛ-Ɛsɔ sɛtʋ tʋmɩyɛ yɔ, pɩtʋʋ fɛyɩ se ɛɛkatɩ canasɩ, yʋlʋmaa, kaakalasɩ nɛ lʋlɩyaa mba pelesi pe-piya yɔ. (Mat. 9:​2, 6; 15:30; 20:34; Mark. 1:​40, 41; Luka 7:13) Pɩkɛ toovenim se alɩwaatʋ ndʋ ɛɛwɛ ɛsɔdaa yɔ, ɛnaɣaɣ ɛzɩma ɛyaa lakaɣ kʋñɔŋ yɔ. Ɛlɛ Alɩwaatʋ ndʋ ɛpɩsɩ ɛyʋ nɛ ɛkɔɔ tɛtʋ yɔɔ yɔ, ɛpɩzaɣ se ɛnɩɩ ɛzɩma pɩlakɩ ɛyʋ alɩwaatʋ ndʋ ɛwɛɣ kʋñɔŋ taa yɔ pɩ-taa camɩyɛ nɛ pɩkɩlɩ. (Iza. 53:4) Mbʋ Yesu katɩ e-wezuu caɣʋ taa tɛtʋ yɔɔ yɔ, pɩsɩnɩ-ɩ nɛ ɛnɩɩ ɛzɩma pɩlakɩ ɛyaa alɩwaatʋ ndʋ pakatɩɣ wezuu caɣʋ taa kala yɔ pɩ-taa camɩyɛ nɛ pɩkɩlɩ. Ɛ-maɣmaɣ ɛɛkatɩ kala wena ɛyaa kataɣ yɔ; a-taa naayɛ lɛ nɩɣzɛ, ñɩŋanzɩ nɛ laŋwɛɛkɩyɛ.

YESU WƖLAA SE ƐNƖƔ ƐYAA SIZIŊ

6. Ɛbɛ natʋ tɔm ndʋ tɩwɛ Izaayii 42:3 taa yɔ tɩkpɛlɩkɩɣ-ɖʋ Yesu pʋtɔdɩyɛ naʋ nɛ e-siziŋ nɩʋ pɔ-yɔɔ?

⁶ Alɩwaatʋ ndʋ Yesu lakaɣ ɛ-Ɛsɔ sɛtʋ tʋmɩyɛ tɛtʋ yɔɔ yɔ, ɛwɩlaa se ɛnɩɣ ɛyaa mba pɛkɛ ajamaa nɛ mba pomuluu-wɛ yɔ pe-siziŋ siŋŋ. Nɛ ɛ-lakasɩ nzɩ, siyeba nɛ natʋ tɔm ndʋ Yehowa tɩŋnɩ nayʋ Izaayii yɔɔ nɛ ɛyɔɔdɩ yɔ tɩla. Ebree Masɩ taa, nabʋyʋ taa pakpaɣ ɛyaa mba pɛhɛzaa nɛ mba pɛwɛ ɖoŋ yɔ nɛ pamaɣzɩnɩ kaɖaɣ ŋga pamɩzɩ-kɛ lɩm camɩyɛ yɔ yaa tɩŋ sɔsɔŋ weyi ɩwɛ ɖoŋ yɔ. (Keɣ. 92:12; Iza. 61:3; Yer. 31:12) Ɛlɛ pakpaɣ kʋñɔndɩnaa nɛ ɛyaa mba pomuluu-wɛ yɔ nɛ pamaɣzɩnɩ kañɩŋgbayaɣ ŋga pɩcam-kɛ yɔ nɛ miŋ nimaɣ ŋga kalɩɣ ñɔsɩ yɔ. (Kalɩ Izaayii 42:3; Mat. 12:20) Yehowa labɩnɩ tʋmɩyɛ kɩɖaŋ ɛnɩ nɛ ɛwɩlɩ ɛzɩma Yesu kaɣaɣ wɩlʋʋ sɔɔlɩm ɛyaa mba pomuluu-wɛ yɔ nɛ ɛzɩma ɛkaɣaɣ naʋ pa-pʋtɔdɩyɛ yɔ.

7-8. Ɛzɩma Yesu yeba nɛ Izaayii natʋ tɔm la?

⁷ Maatiyee wɩlaa se Izaayii natʋ tɔm labɩ Yesu yɔɔ. Ɛyɔɔdaa se: «Ɛɛkaɣ pɛlʋʋ kañɩŋgbayaɣ ŋga kolowa yɔ, nɛ ɛɛkaɣ ɖɩzʋʋ miŋ nimaɣ ŋga kɛwɛɛ nɛ kalɩɣ ñɔsɩ yɔ.» Yesu labɩ piti lakasɩ sakɩyɛ nɛ ɛsɩnɩ ajamaa mba pɛwɛ ɛzɩ kañɩŋgbayaɣ ŋga kolowa yɔ nɛ mba pɛfɛyɩnɩ lidaʋ nakʋyʋ nɛ pɛwɛ ɛzɩ miŋ nimaɣ ŋga kalɩɣ ñɔsɩ nɛ piileɖiɣ lɛ kakaɣ ɖɩm yɔ. Kɩɖaŋ nɩɩyɩ yɔ: Yesu katɩ abalʋ nɔɔyʋ, canatʋ kʋdɔŋ kaasʋ-ɩ pɩŋŋ. Pɩtɩla ɛtaawɛɛnɩ lidaʋ se ɛ-yɔɔ kaɣ cɛbʋ wiɖiyi nɛ ɛ nɛ ɛ-hɔʋ taa mba nɛ ɛ-taabalaa pɛwɛɛ ɖama cɔlɔ. (Luka 5:​12, 13) Ɛkatɩ ɖɔɖɔ abalʋ nɔɔyʋ, ɛkɛ tandam nɛ ɛɛpɩzɩɣ yɔɔdʋʋ camɩyɛ. Maɣzɩ nɛ ŋna ɛzɩma pɩlakaɣ abalʋ ɛnʋ alɩwaatʋ ndʋ ɛnaɣaɣ ɛyaa lalaa pɛwɛɛ nɛ pɔyɔɔdʋʋ, ɛlɛ ɛɛnɩɣ ndʋ pɔyɔɔdʋʋ yɔ. (Mark. 7:​32, 33) Ɛlɛ pɩtɩtɛ.

⁸ Yesu alɩwaatʋ taa, Yuuda mba sakɩyɛ maɣzaɣ se ye ɛyʋ ɛkɛ ɛjam yaa ɛwɛnɩ kʋdɔŋ sɔsɔʋ nakʋyʋ yɔ, ɛ-kɩwɛɛkɩm yaa ɛ-lʋlɩyaa kɩwɛɛkɩm yebina nɛ pɩtalɩ-ɩ mbʋ. (Yoh. 9:2) Lɩmaɣza ana ayeba nɛ palakɩ kañatʋ ɛyaa mba. Ɛlɛ Yesu wa-wɛ nɛ ɛsɩnɩ-wɛ nɛ pana se Ɛsɔ maɣzɩɣ pɔ-yɔɔ. Lidaʋ ŋgʋ pɩhaɣ-ɖʋ sɔnɔ?

9. Ɛzɩma Ebree mba 4:​15, 16 wɩlɩɣ se ɖɔ-cɔjɔ kɩlɩm nɩɣ ɛyaa mantɩtalɩ pilimwaa siziŋ siŋŋ?

⁹ Kalɩ Ebree mba 4:​15, 16. Ða-taa pɩzɩɣ nɛ pɩtɛ se Yesu kaɣ nɩʋ ɖe-siziŋ paa ɛzɩmtaa. Tɔm ndʋ tɩ-tɔbʋʋ lɛ suwe? Ɛyʋ weyi ɛnɩɣ lalaa siziŋ yɔ, alɩwaatʋ ndʋ ɛnaɣ nɔɔyʋ ɛwɛɛ nɛ ɛlakɩ kʋñɔŋ yɔ, pɩcɛyɩɣ-ɩ. Grɛɛkɩ tɔm piye nɖɩ pɛɖɛzaa se ‘ɛyʋ siziŋ nɩʋ’ yɔ ɖɩ-tɔbʋʋ lɛ se ɛyʋ ɛkpaɣ ɛ-tɩ nɛ ɛɖʋ lɛlʋ lone taa nɛ ɛnɩɩ wɩzasɩ nzɩ ɛlɛ nɩɣ yɔ. (Pɔɔlɩ labɩnɩ tʋmɩyɛ tɔm piye kʋɖʋmɖɩyɛ nɖɩ Ebree mba 10:34 taa.) Kɛdɛsɩ nzɩ sɩyɔɔdʋʋ maamaaci lakasɩ nzɩ Yesu laba yɔ sɩ-tɔm yɔ, sɩwɩlɩɣ se Yesu nɩɣaɣ ɛyaa lalaa siziŋ siŋŋ. Ɛmaɣzaɣ ɛyaa yɔɔ siŋŋ nɛ ɛɛsɔɔlaa se ɛsɩnɩ-wɛ, pʋyɔɔ ɛwaɣaɣ-wɛ pa-kʋdɔmɩŋ. Kɩɖaŋ nɩɩyɩ yɔ: Alɩwaatʋ ndʋ ɛwaɣaɣ abalʋ weyi ɛwɛnɩ canatʋ kʋdɔŋ yɔ, ɛpɩzaɣ se ɛwɛɛ poliŋ taa nɛ ɛwaa-ɩ, ɛlɛ ɛ-tɔm labɩ-ɩ pʋtɔdɩyɛ nɛ ɛñɔtɩnɩ-ɩ nɛ etukuni-i nɛ ɛwaa-ɩ. Nɛ pɩtɩla ɛnʋ kaakɛnɩ ɛyʋ kajalaɣ tʋ weyi etukuni abalʋ ɛnʋ kpaɣnɩ alɩwaatʋ ndʋ ɛpɩsɩ canaɣ yɔ. Nɛ alɩwaatʋ ndʋ ɛwaɣaɣ abalʋ weyi ɛɛkɛ tandam nɛ ɛtaapɩzɩɣ yɔɔdʋʋ camɩyɛ yɔ, ɛkpaɣ-ɩ nɛ eposini samaɣ se kɔkɔɖɛ ɛtaacɛyɩ-ɩ. Pɩtasɩ lɛ, alɩwaatʋ ndʋ halʋ weyi ɛlabɩ kɩwɛɛkɩm sɔsɔm ɛlɛ pʋwayɩ ɛlɛɣzɩ e-wezuu caɣʋ yɔ ɛpɩyaɣ ɛ-ɛsɩtɛɣlɩm Yesu nɩŋgbanzɩ yɔɔ nɛ ɛhɩzɩɣ sɩ-yɔɔ nɛ ɛ-ñɔsɩ yɔ, Farɩsɩ tʋ nɔɔyʋ kʋ ɛ-tɔm, ɛlɛ Yesu lʋbɩ ɛ-yɔɔ. (Mat. 8:3; Mark. 7:33; Luka 7:44) Yesu taaseɣ ɛyaa mba pɛwɛnɩ tomnaɣ yɔɔ ɛjandʋ natʋyʋ yɔ yaa ɛyaa mba palabɩ kɩwɛɛkɩm sɔsɔm nabʋyʋ yɔ. Ɛlɛ ɛɛsɔɔlaa se pɔñɔtɩnɩ-ɩ nɛ ɛwɩlaɣ-wɛ se ɛsɔɔlɩ-wɛ. Ða ɖɔɖɔ, ɖa-taa pɩzɩɣ nɛ pɩtɛ se ɛnɩɣ ɖe-siziŋ.

ƐZƖMA ÐƖPƖZƖƔ NƐ ÐƖMAƔZƖNƖ ÐƆ-CƆJƆ KƖLƖM SƆNƆ?

10. Sɔnɔ, fezuu taa wondu ndʋ ɖɩpɩzɩɣ ɖɩlabɩnɩ tʋmɩyɛ nɛ ɖɩsɩnɩ tandamaa nɛ yʋlʋmaa? (Cɔnɩ ɖɔɖɔ kɩlɛmɩŋ.)

¹⁰ Ðɩsɔɔlaa se ɖɩmaɣzɩnɩ Yesu, pʋyɔɔ ɖɩñakɩ pana se ɖɩwɩlɩ lalaa sɔɔlɩm, ɖɩnɩɩ pe-siziŋ nɛ ɖɩna pa-pʋtɔdɩyɛ. (1 Pɩy. 2:21; 3:8) Pɩkɛ toovenim se ɖɩɩpɩzɩɣ nɛ ɖɩwaa tandamaa nɛ yʋlʋmaa, ɛlɛ ɖɩpɩzɩɣ nɛ ɖɩsɩnɩ-wɛ fezuu taa. Kɩɖaŋ nɩɩyɩ yɔ: Tandamaa kʋnʋmɩŋ weyi ɩ-taa palɩzɩ ɖɛ-ɛgbɛyɛ wondu yɔ, ɩcɛzɩ 100. Nɛ palɩzɩ takayɩsɩ ndɩ ndɩ yʋlʋmaa kʋnʋmɩŋ weyi ɩcɛzɩ 60 yɔ ɩ-taa. Nɛ lɛɛlɛɛyɔ, kʋnʋmɩŋ weyi ɩ-taa nɔɔ nakɛyɛ kɛdɩɣ mbʋ piɖiɣni labʋ videowaa taa yɔ ɩcɛzɩ 100. Wondu ndʋ, tɩsɩɣnɩ tandamaa nɛ yʋlʋmaa se pɔñɔtɩnɩ Yehowa nɛ ɛ-Pɩyalʋ.

11. Ɛzɩma Yehowa ɛgbɛyɛ wɩlɩɣ se ɖɩnɩɣ ɛyaa ndɩ ndɩ siziŋ ɛzɩ Yesu yɔ? (Tʋma Labʋ 2:​5-7, 33) (Cɔnɩ ɖɔɖɔ kɩlɛmɩŋ.)

¹¹ Yehowa ɛgbɛyɛ ñakɩ pana se ɖɩsɩnɩ ɛyaa ndɩ ndɩ nɛ pɔñɔtɩnɩ Yehowa. Tɔzɩ se pefezi Yesu nɛ ɛkpa ɛsɔdaa lɛ, eyeba nɛ fezuu kiɖeɖeu tii ɛ-tɔmkpɛlɩkɩyaa yɔɔ se pɩsa nɛ ɛyaa mba payɩ paakpeɣlaa se pɔtɔɔ Pantekooti kazandʋ yɔ, panɩɩ Kewiyaɣ tɔm kɩbandʋ paa anɩ lɛ «ɛ-maɣmaɣ ɛ-kʋnʋŋ taa.» (Kalɩ Tʋma Labʋ 2:​5-7, 33.) Sɔnɔ, Yesu wɛɛ nɛ eɖiyiɣ ɛgbɛyɛ nɛ ɖɩlɩzɩɣ Bibl kpɛlɩkʋʋ takayɩsɩ kʋnʋmɩŋ weyi ɩcɛzɩ 1000 yɔ ɩ-taa. Nɛ kʋnʋmɩŋ ɛnɩ ɩ-taa nɩɩyɩ lɛ, ɛyaa pazɩ yem yɔɔdʋʋnɩ-ɩ. Kɩɖaŋ nɩɩyɩ yɔ: Pɔyɔɔdʋʋ kʋnʋmɩŋ nɩɩyɩ Amerika hayo kiŋ nɛ Amerika hadɛ kiŋ, nɛ ɛyaa mba pɔyɔɔdʋʋ kʋnʋmɩŋ ɛnɩ yɔ patɩɖɔ. Paa mbʋ yɔ, ɖɛ-ɛgbɛyɛ lɩzɩɣ takayɩsɩ kʋnʋmɩŋ ɛnɩ ɩ-taa nɩɩyɩ taa se pɩsa nɛ ɛyaa sakɩyɛ pɩzɩ nɛ panɩɩ tɔm kɩbandʋ. Kʋnʋmɩŋ ɛnɩ ɩcɛzɩ 160. Palɩzɩ ɖɔɖɔ ɖɛ-ɛgbɛyɛ takayɩsɩ Rumaanii kʋnʋmɩŋ weyi ɩcɛzɩ 20 yɔ ɩ-taa. Piyeba nɛ ɛyaa mba pɔyɔɔdʋʋ kʋnʋmɩŋ ɛnɩ yɔ pa-taa kudokiŋ sakɩyɛ paɣzɩ Yehowa sɛʋ.

12. Ɛbɛ Yehowa ɛgbɛyɛ lakɩ ɖɔɖɔ nɛ ɖɩsɩɣnɩ ɛyaa?

¹² Pɩtasɩna se Yehowa ɛgbɛyɛ sɩɣnɩ ɛyaa se panɩɩ tɔm kɩbandʋ lɛ, ɖɩsɩɣnɩ ɖɔɖɔ ɛyaa mba asɛyʋʋ nakʋyʋ talɩ-wɛ yɔ. Pʋyɔɔ koobiya sakɩyɛ ha pa-tɩ faaa se pasɩnɩ po-koobiya mba pɛwɛ kɩcɛyɩm taa yɔ. Yehowa ɛgbɛyɛ sɩɣna ɖɔɖɔ se pama Ɛsɔ sɛtʋ lona wena amʋnaa yɔ se pɩsa nɛ ɛyaa kpeɣli a-taa nɛ pɛkpɛlɩkɩ nɛ patɩlɩ ɛzɩma Ɛsɔ sɔɔlɩ-wɛ yɔ nɛ pɩkɩlɩ.

ÐƆ-CƆJƆ KƖLƖM PƖZƖƔ NƐ ƐSƖNƖ-Ŋ

13. Nʋmɔŋ weyi yɔɔ Yesu tɩŋɩɣna nɛ ɛsɩɣnɩ-ɖʋ?

¹³ Yesu kɛ ɖe-ninɖiɣyu kɩbanʋ, pʋyɔɔ lɛ ɛcɔŋnɩ ɖa-taa paa weyi e-fezuu taa kɩcɛyɩm ɖeɖe. (Yoh. 10:14; Efɛz. 4:7) Nabʋyʋ taa, wezuu caɣʋ taa kala pɩzɩɣ ayele nɛ ɖɩwɛɛ ɛzɩ kañɩŋgbayaɣ ŋga kolowa yɔ yaa miŋ nimaɣ ŋga kalɩɣ ñɔsɩ yɔ. Ye ɖɩlʋkɩnɩ kʋdɔŋ sɔsɔʋ nakʋyʋ yaa ɖa-maɣmaɣ ɖɛ-ɛjandʋ yɔ, yaa ye nɔɔhɔnɖɛ naɖɩyɛ ɛkɔm ɖa nɛ ɖo-koobu nɔɔyʋ ɖɛ-hɛkʋ taa yɔ, pɩpɩzɩɣ nɛ pitibi-ɖʋ yɔɔɔ kpem. Pɩpɩzɩɣ nɛ pɩwɛɛ-ɖʋ kaɖɛ se ɖɩsɔɔ kala wena ɖɩkatɩɣ sɔnɔ yɔ a-yɔɔ nɛ ɖaka ɖa-lɩmaɣza cee wayɩ lidaʋ yɔɔ. Ɛlɛ tɔzɩ se Yesu wɛɛ nɛ ɛnaɣ kala wena ŋkatɩɣ yɔ nɛ ɛnɩɣ ɛzɩma pɩlakɩ-ŋ yɔ pɩ-taa. Yesu nɩɣ ñe-siziŋ, pʋyɔɔ lɛ ɛsɔɔlaa se ɛsɩnɩ-ŋ. Ɛpɩzɩɣ nɛ ɛtɩŋnɩ fezuu kiɖeɖeu yɔɔ nɛ ɛkpazɩ-ŋ ɖoŋ alɩwaatʋ ndʋ pitiki-ŋ yɔɔɔ yɔ. (Yoh. 16:7; Tiiti 3:6) Pɩtasɩ lɛ, ɛpɩzɩɣ nɛ ɛtɩŋnɩ ɛgbɛyɛ taa ɛzʋtʋyaa nɛ koobiya lalaa yɔɔ nɛ ɛkpazɩ-ŋ ɖoŋ nɛ ɛsɩnɩ-ŋ.—Efɛz. 4:8.

14. Alɩwaatʋ ndʋ pitiki-ɖʋ yɔɔɔ yɔ, ɛbɛ pɩzɩɣ pɩsɩnɩ-ɖʋ?

¹⁴ Ye pitibi-ŋ yɔɔɔ yɔ, tɔzɩ se Yesu kɛ ɖɔ-cɔjɔ kɩlɩm; maɣzɩ ɖɔɖɔ tʋmɩyɛ nɖɩ ɛlakɩ yɔ ɖɩ-yɔɔ. Pɩtasɩna se Yehowa tiyi Yesu se ɛkɔɔ nɛ ɛsɩ ɖɔ-yɔɔ lɛ, etiyi-i ɖɔɖɔ se ɛkɔɔ nɛ ɛnɩɩ kala wena ɛyaa mantɩtalɩ pilimwaa katɩɣ yɔ a-taa camɩyɛ nɛ pɩkɩlɩ. Alɩwaatʋ ndʋ ɖa-kɩwɛɛkɩm yaa ɖɛ-ɛjandʋ natʋyʋ yeki nɛ pitiki-ɖʋ yɔɔɔ yɔ, Yesu sɔɔlɩ faaa se ɛsɩnɩ-ɖʋ «alɩwaatʋ kɩbandʋ yɔɔ.»—Ebr. 4:​15, 16.

15. Ɛbɛ sɩnɩ koobu abalɩñɩnʋ nɔɔyʋ nɛ ɛpɩsɩ ɛgbɛyɛ taa?

¹⁵ Yesu ɖiyiɣ ɛ-tɔmkpɛlɩkɩyaa ɖɔɖɔ nɛ pasɩɣnɩ ɛyaa mba peyebi Yehowa sɛʋ yɔ se papɩsɩ ɛ-cɔlɔ. (Mat. 18:​12, 13) Iyele nɛ ɖɩna koobu abalɩñɩnʋ nɔɔyʋ kɩɖaʋ, payaɣ-ɩ se Stefano.b Palɩzɩ-ɩ ɛgbɛyɛ taa nɛ pɩla pɩnzɩ 12 lɛ, ɛkpaɣ lɩmaɣzɩyɛ se ewoki kediɣzaɣ. Ɛyɔɔdaa se: «Pɩtaawɛ-m kɛlɛʋ, ɛlɛ maasɔɔlaa se manɖaɣnɩ kpɛndʋʋ mon-koobiya yɔɔ nɛ ma nɛ wɛ ɖɩsɛɛ Yehowa. Ɛgbɛyɛ taa ɛzʋtʋyaa mba paakɔma nɛ pana-m yɔ, paayɔɔdɩnɩ-m camɩyɛ nɛ peyele nɛ ma-laŋɩyɛ hɛɛ. Nabʋyʋ taa mɔntɔzʋʋ se maha Yehowa siɣye lɛ, pɩcɛyɩɣ-m kpem nɛ pɩlakɩ-m ɛzɩ mɛntɛzɩ-ɩ yebu sɛʋ yɔ. Ɛlɛ koobiya tɔzaɣ-m se Yehowa nɛ Yesu patɩsɔɔlɩ se mɔlɔ lidaʋ. Alɩwaatʋ ndʋ papɩsɩnɩ-m ɛgbɛyɛ taa yɔ, ɛgbɛyɛ kpeekpe mʋ ma nɛ mɔ-hɔʋ nɛ taa leleŋ. Halɩ piyeba nɛ ma-halʋ tisi se ɛkpɛlɩkɩɣ Bibl, nɛ lɛɛlɛɛyɔ ɖa-tɩŋa ɖɩkpɛndaa nɛ ɖɩsɛɣ Yehowa.» Pɩtʋʋ fɛyɩ se alɩwaatʋ ndʋ ɖɔ-cɔjɔ kɩlɩm sɔɔlɩm tʋ naɣ ɛgbɛyɛ taa mba kpeekpe pɛwɛɛ nɛ pasɩɣnɩ mba pekpiɖi pa-kɩwɛɛkɩm yɔɔ yɔ se papɩsɩ ɛgbɛyɛ taa yɔ lɛ, ɛ-taa lakɩ leleŋ siŋŋ.

16. Ɛbɛ yɔɔ ɖɩwɛnɩ ɛsɩmɩyɛ se Yehowa ha-ɖʋ cɔjɔ kɩlɩm weyi ɛnɩɣ ɖe-siziŋ yɔ?

¹⁶ Alɩwaatʋ ndʋ Yesu kaawɛ tɛtʋ yɔɔ yɔ, ɛsɩnɩ ɛyaa sakɩyɛ alɩwaatʋ kɩbandʋ yɔɔ. Sɔnɔ ɖɔɖɔ, ɖa-taa pɩzɩɣ nɛ pɩtɛ kiya se ɛkaɣ-ɖʋ sɩnʋʋ alɩwaatʋ ndʋ payɩ pɩpɔzʋʋ se pasɩnɩ-ɖʋ yɔ. Nɛ ɛjaɖɛ kɩfaɖɛ taa, ɛkaɣ-ɖʋ sɩnʋʋ nɛ ɖɩlɩɩ kɩwɛɛkɩm nɛ mantɩtalɩ pilim wɛtʋ yomiye taa kiya. Ðɩwɛnɩ ɛsɩmɩyɛ siŋŋ ɖɛ-Ɛsɔ Yehowa yɔɔ, mbʋ pʋyɔɔ yɔ sɔɔlɩm nɛ pʋtɔdɩyɛ naʋ potuyi-i nɛ ɛlɩzɩ ɛ-Pɩyalʋ se ɛkɛ ɖɔ-cɔjɔ kɩlɩm weyi ɛnɩɣ ɖe-siziŋ yɔ.