Wɛɛnɩ tɩ luzuu ɛzɩ Yehowa yɔ

1. Ɛbɛ yɔɔ pɩɖɩɣzɩɣ-ɖʋ se Yehowa wɛnɩ tɩ luzuu?

ALƖWAATƲ ndʋ ŋnaɣ ɛyaa mba pɛwɛnɩ lona sɔsɔna sɔnɔ yɔ, ŋpɩzɩɣ nɛ ŋyɔɔdɩ se pɛwɛnɩ tɩ luzuu na? Pɩtʋʋ fɛyɩ se aayɩ. Ɛlɛ Yehowa weyi ɛkɛ ɖoŋ tɩŋa tʋ yɔ ɛwɛnɩ tɩ luzuu. (Keɣ. 113:​5-8) Nɔɔyʋ fɛyɩnɩ tɩ luzuu ɛzɩ Yehowa yɔ; Yehowa fɛyɩnɩ tɩ kpazʋʋ paa ññɩɩ. Tɔm ñʋʋ kʋnɛ kɩ-taa, ɖɩkaɣ tazʋʋ wɛtʋ kɩbandʋ ndʋ Yehowa wɛna yɔ tɩ-taa 4 taa nɛ ɖɩna ɛzɩma paa wɛtʋ ndʋ lɛ tɩwɩlɩɣ se ɛwɛnɩ tɩ luzuu siŋŋ yɔ. Ðɩkaɣ naʋ ɖɔɖɔ ɛzɩma Yesu maɣzɩnɩ ɛ-Caa tɩ luzuu yɔ. Pɩkaɣ-ɖʋ sɩnʋʋ nɛ ɖɩmaɣzɩnɩ Yehowa tɩ luzuu nɛ pɩkɩlɩ, nɛ pɩsɩɣnɩ-ɖʋ ɖɔɖɔ nɛ ɖɩñɔtɩnɩ-ɩ nɛ pɩkɩlɩ.

PƖWƐ KƐLƐƲ SE ÐƖÑƆTƖNƖ YEHOWA

2. Suwe Keɣa 62:8 heyiɣ-ɖʋ Yehowa yɔɔ? (Cɔnɩ ɖɔɖɔ kɩlɛmʋʋ.)

² Ðoŋ ɖoŋ lɛ pɩfɛyɩ kɛlɛʋ se ɛyʋ ɛñɔtɩnɩ ɛyaa mba pakpazɩɣ pa-tɩ yɔ. Pamaɣzɩɣ se pakɩlɩ ɛyaa lalaa nɛ pʋyɔɔ lɛ pɩwɛ paba kaɖɛ se pɔñɔtɩnɩ-wɛ, nɛ halɩ peseɣ-wɛ kiseu. Ɛlɛ Yehowa ñɛwɛ ndɩ kpem! Ɛwɛnɩ tɩ luzuu, pʋyɔɔ ɛyaɣ-ɖʋ se ɖɩñɔtɩnɩ-ɩ nɛ ‘ɖikuli ɖa-laŋɩyɛ nɛ ɖiheyi-i ɖa-taa tɔm.’ (Kalɩ Keɣa 62:8.) Ɛzɩ caja kʋsɔɔlʋ maɣzʋʋ e-piya yɔɔ nɛ ɛsɔɔlʋʋ se ewelisini-sɩ yɔ, mbʋ ɖɔɖɔ Yehowa sɔɔlaa se ewelisi ɛ-sɛyaa adɩma. Halɩ eyeba nɛ pama adɩma ana a-taa sakɩyɛ Bibl taa. Pɩwɩlɩɣ kpayɩ kpayɩ se pɩwɛ kɛlɛʋ se ɖɩñɔtɩnɩ-ɩ. (Yoz. 10:​12-14; 1 Sam. 1:​10-18) Ɛlɛ ye nabʋyʋ taa pɩlakɩ-ɖʋ ɛzɩ ɖɩtɩmʋna se ɖɩñɔtɩnɩ Yehowa yɔ, ɛbɛ pɩzɩɣ pɩsɩnɩ-ɖʋ?

3. Ɛbɛ yɔɔ ña-taa pɩzɩɣ nɛ pɩtɛ se Yehowa sɔɔlaa se ŋtɩmɩɣnɩ-ɩ ɖoŋ ɖoŋ?

³ Ðɩpɩzɩɣ nɛ ɖɩtɩmnɩ Yehowa paa pɩlakɩ-ɖʋ ɛzɩ ɖɩtɩmʋna se ɛsɔɔlɩ-ɖʋ yɔ. Ɛbɛ yɔɔ ɖɩyɔɔdʋʋ mbʋ? Mbʋ pʋyɔɔ yɔ, pɩɣa kilebaɣ eduuye taa, Yesu kpaɣ Yehowa nɛ ɛmaɣzɩnɩ caja kɩbanʋ nɔɔyʋ. Caja ɛnʋ, ɛ-pɩɣa labɩ kɩdɛkɛdɩm sakɩyɛ nɛ kamaɣzɩɣ se katɩmʋna se ɛtasɩ-kɛ yaʋ se ɛ-pɩyalʋ. Ɛlɛ alɩwaatʋ ndʋ pɩɣa ŋga kapɩsɩ ɖɩɣa yɔ ɛbɛ ka-caa laba? Yesu yɔɔdaa se caja ɛnʋ elosi ɛ-pɩyalʋ poliŋ taa lɛ, «ese nɛ ewolo ekpibi-i nɛ ɛkpɛlɩ ɛ-yɔɔ nɛ sɔɔlɩm.» (Luka 15:​17-20) Yehowa wɛ ɛzɩ caja ɛnʋ yɔ. Alɩwaatʋ ndʋ ɛ-sɛyaa nabɛyɛ lakɩ kɩwɛɛkɩm nabʋyʋ nɛ pɛwɛɛ laŋwɛɛkɩyɛ taa, yaa alɩwaatʋ ndʋ pɛwɛɣ nɩɣzɛ taa nɛ patɩmɩɣnɩ-ɩ yɔ, tɩ luzuu tuyuu-i nɛ ewelisiɣni-wɛ camɩyɛ. (Kʋñ. 3:​19, 20) Ɛzɩ caja ɛnʋ eseu nɛ ɛkatɩ ɛ-pɩyalʋ yɔ, mbʋ ɖɔɖɔ Yehowa nɩɣ ɛ-sɛyaa siziŋ nɛ eseɣ nɛ ewoki pɔ-cɔlɔ se ɛhɛzɩ pa-laŋa nɛ eyele nɛ pa-taa tɛ se ɛsɔɔlɩ-wɛ. (Iza. 57:15) Ɛzɩma Yehowa «seɣ nɛ ɛkɔŋ ɖɔ-cɔlɔ» sɔnɔ? Ðoŋ ɖoŋ lɛ ɛtɩŋɩɣnɩ ɛgbɛyɛ taa ɛzʋtʋyaa yɔɔ, ɖɔ-hɔʋ taa mba yɔɔ nɛ ɖa-taabalaa mba pɛsɛɣ-ɩ yɔ pɔ-yɔɔ nɛ ɛlakɩ mbʋ. (Yak. 5:​14, 15) Yehowa sɩɣnɩ-ɖʋ mbʋ, mbʋ pʋyɔɔ yɔ ɛsɔɔlaa se ɖɩñɔtɩnɩ-ɩ.

4. Ɛbɛ yɔɔ pɩɩwɛ ɛyaa kɛlɛʋ se pɔñɔtɩnɩ Yesu?

⁴ Yesu maɣzɩnɩ ɛ-Caa. Yesu kaawɛnɩ tɩ luzuu ɛzɩ ɛ-Caa yɔ. Piyeba nɛ alɩwaatʋ ndʋ ɛɛwɛ tɛtʋ yɔɔ yɔ pɩɩwɛ ɛyaa kɛlɛʋ se pɔñɔtɩnɩ-ɩ. Sɔɔndʋ taakpaɣ-wɛ se pɔpɔzɩ-ɩ tɔm. (Mark. 4:​10, 11) Nɛ alɩwaatʋ ndʋ ɛpɔzaɣ-wɛ tɔm se ɛtɩlɩ pa-lɩmaɣza yɔ, peheyaɣ-ɩ ndʋ ɖeyi ɖeyi pamaɣzɩɣ yɔ. (Mat. 16:​13-16) Pɩtasɩ lɛ, alɩwaatʋ ndʋ picoɖaɣ-wɛ yɔ sɔɔndʋ taakpaɣ-wɛ se Yesu taa kaawɩɩnɩ-wɛ, mbʋ pʋyɔɔ yɔ panawa se ɛlakɩ ɛyaa camɩyɛ lakasɩ, ɛkɛ pʋtɔdɩyɛ nayʋ nɛ ɛwɛ suuɖu. (Mat. 17:​24-27) Ɛzɩma Yesu maɣzaɣnɩ ɛ-Caa Yehowa camɩyɛ yɔ piyeba nɛ ɛ-wayɩ tɩŋɩyaa tɩlɩ Yehowa camɩyɛ nɛ pɩkɩlɩ. (Yoh. 14:9) Peɖiɣzinaa se Yehowa fɛyɩ ñaŋ nɛ ɛɛkpazɩɣ ɛ-tɩ ɛzɩ pa-alɩwaatʋ taa Ɛsɔ sɛtʋ ñʋndɩnaa yɔ, ɛlɛ eluzuu ɛ-tɩ nɛ pɩwɛ kɛlɛʋ se pɔñɔtɩnɩ-ɩ.

5. Ye ɖɩwɛnɩ tɩ luzuu yɔ, ɛbɛ yɔɔ pɩwɛɣ lalaa kɛlɛʋ se pɔñɔtɩnɩ-ɖʋ?

⁵ Ɛzɩma ɖɩpɩzɩɣ nɛ ɖɩmaɣzɩnɩ Yehowa? Ye ɖɩwɛnɩ tɩ luzuu yɔ pɩwɛɣ ɛyaa lalaa kɛlɛʋ se pɔñɔtɩnɩ-ɖʋ. Ye ɖɩfɛyɩnɩ tɩ luzuu yɔ, pɩpɩzɩɣ piyele nɛ ɖɩɖʋʋ ɛyaa lalaa yɔɔ ɛsɩyɛ, ɖɩkpazɩɣ ɖa-tɩ nɛ ɖiitisiɣ se ɖɩkpaɣ nɛ ɖikpeɣ. Wɛtʋ ndʋ, tiyeki nɛ ɛyaa ɩɩñɔtʋʋnɩ-ɖʋ. Ɛlɛ tɩ luzuu sɩɣnɩ-ɖʋ se ɖɩla ɛyaa camɩyɛ lakasɩ, ɖɩwɛɛ suuɖu nɛ ɖɩkpakɩɣ nɛ ɖikpeɣu. Wɛtʋ ndʋ, tiyeki nɛ pɔñɔtɩnɩ-ɖʋ. (Kol. 3:​12-14) Kɔzɩ kɔzɩ lɛ, pɩwɛɛ se ɛzʋtʋyaa ɩñaɣ pana nɛ pɛkɛ ɛyaa mba pɩwɛ kɛlɛʋ se pɔñɔtɩnɩ-wɛ yɔ. Pʋyɔɔ lɛ, pɩwɛɛ se pañaɣ pana nɛ pa nɛ koobiya pakatɩɣ ɖoŋ ɖoŋ. Pʋ-tɔbʋʋ se pɩwɛɛ se pañaɣ pana nɛ powoki kediɣzisi Kewiyaɣ kpaaŋ taa nɛ ye pɩtɩcɛyɩ yɔ, pataatɩŋnɩ visioconférence yɔɔ se pala kediɣzaɣ nakɛyɛ. Pɩtasɩ lɛ, ye pɛ-wɛtʋ ɛhaɣ-wɛ nʋmɔʋ yɔ pɩwɛɛ se pañaɣ pana nɛ pa nɛ koobiya posusuu tɔm kpaɣ ɖɩɣa nɛ ŋwolo ɖɩɣa. Piyeki nɛ koobiya tɩlɩ-wɛ camɩyɛ nɛ pɩwɛɛ-wɛ kɛlɛʋ se pɔñɔtɩnɩ-wɛ nɛ pɔpɔzɩ-wɛ sɩnʋʋ.

YEHOWA KƐ WEYI ƐNƖƔ TƆM TAA YƆ

6-7. Ha kɩɖaŋ weyi ɩwɩlɩɣ se Yehowa kaatisi faaa nɛ ɛlɛɣzɩ ɛ-lɩmaɣza alɩwaatʋ ndʋ ɛ-sɛyaa nabɛyɛ tɩmnɩ-ɩ yɔ.

⁶ Ðoŋ ɖoŋ lɛ, ɛyaa mba pakpazɩɣ pa-tɩ yɔ pamaɣzɩɣ se mba kɩlɩnɩ sɩm nɛ paatisiɣ se pɛlɛɣzɩ ndʋ pamaɣzɩɣ yɔ. Ɛlɛ Yehowa weyi ɛsɩm pɩtɩŋa yɔ ɛfɛyɩ mbʋ paa ññɩɩ. Ɛwɛnɩ tɩ luzuu nɛ pʋyɔɔ lɛ ewelisiɣni ɛyaa nɛ halɩ etisiɣ nɛ ɛlɛɣzɩɣ ɛ-lɩmaɣza nɛ pɩlakɩ nɔɔ kʋɖʋmaɣ nɛ ndʋ pamaɣzɩɣ yɔ. Alɩwaatʋ ndʋ Miriyam nɛ Aarɔɔnɩ pɔyɔɔdɩ tɔm kɩdɛkɛdɩtʋ Moyizi yɔɔ yɔ pɩtaakɛdɩnɩ Yehowa, mbʋ pʋyɔɔ yɔ ɛnʋ kaalɩzɩnɩ Moyizi se eɖiyi samaɣ. Toovenim taa lɛ, Miriyam kaɖɩnʋʋ Moyizi yɔ, Yehowa ɛkaɖɩnaa. Piyeba nɛ Yehowa taa wɩɩnɩ Miriyam nɛ eyele nɛ ɛlɛ pɩsɩ canaɣ. Ðɩnɛ ɛlɛ Aarɔɔnɩ tendi Moyizi se ɛsɩnɩ Miriyam, nɛ Moyizi ñetendi Yehowa se ɛwaa Miriyam kʋdɔŋ. Ɛbɛ Yehowa laba? Yehowa tɩkpazɩ ɛ-tɩ nɛ ekizi se ɛɛlɛɣzɩɣ ɛ-lɩmaɣza. Ɛ-tɩ luzuu tuyi-i nɛ ewelisini Moyizi nɛ ɛwaa Miriyam canatʋ.—Kɩg 12:​1-15.

⁷ Kɩɖaʋ lɛɛkʋ yɔ: Alɩwaatʋ natʋyʋ pɩwɩɣaɣ Wiyaʋ Ezekiyaasɩ lɛ, Yehowa tɩŋnɩ ɛ-nayʋ yɔɔ nɛ eheyi-i se ɛkaɣ sɩbʋ. Ðɩnɛ ɛlɛ Ezekiyaasɩ paɣzɩ wiu nɛ etendi Yehowa se ɛwaa ɛ-kʋdɔŋ. Nɛ Yehowa welisini Ezekiyaasɩ nɛ ɛna ɛ-pʋtɔdɩyɛ nɛ eheyi-i se ɛkaɣ tasʋʋ caɣʋ wezuu pɩnzɩ 15. (2 Awi. 20:​1, 5, 6) Toovenim taa lɛ, Yehowa tɩ luzuu tuyuuni-i nɛ ɛnɩɣ ɛyaa siziŋ nɛ ewelisiɣni-wɛ.

8. Kɩɖaŋ weyi wɩlɩɣ se Yesu kɛ weyi ɛnɩɣ tɔm taa yɔ? (Maarɩkɩ 3:​1-6)

⁸ Yesu maɣzɩɣnɩ ɛ-Caa. Yesu kaawɛ tɛtʋ yɔɔ lɛ, ɛlabɩ ɛyaa kɩbandʋ alɩwaatʋ ndʋ pɩpɔzaɣ se ɛsɩnɩ-wɛ yɔ. Kɩɖaʋ nakʋyʋ yɔ: Ɛwa ɛyaa Sabaatɩ wiye paa pɩtaakɛdɩnɩ e-koyindinaa yɔ. (Kalɩ Maarɩkɩ 3:​1-6.) Lɛɛlɛɛyɔ, ɛpɩsɩ ɛgbɛyɛ ñʋʋdʋ, paa mbʋ yɔ, ewoki pɩ-yɔɔ nɛ ɛnɩɣ ɛyaa tɔm taa nɛ ɛnaɣ pa-pʋtɔdɩyɛ. Alɩwaatʋ ndʋ nɔɔyʋ lakɩ kɩwɛɛkɩm sɔsɔm nabʋyʋ ɛgbɛyɛ taa yɔ, ɛɖʋʋ suuɖu, nɛ ɛhaɣ ɛyʋ ɛnʋ alɩwaatʋ se ɛlɛɣzɩ ɛ-ɖɔnɛ.—Natʋ 2:​2-5.

9. Ɛzɩma ɖɩpɩzɩɣ ɖɩwɩlɩ se ɖɩkɛ ɛyaa mba panɩɣ tɔm taa yɔ? (Cɔnɩ ɖɔɖɔ kɩlɛmɩŋ.)

⁹ Ɛzɩma ɖɩpɩzɩɣ nɛ ɖɩmaɣzɩnɩ Yehowa? Ɛzɩ Yehowa yɔ, pɩwɛɛ se ɖɩwɩlɩ ɖa-maɣzɩm nɛ ɖa-lakasɩ taa se ɖɩkɛ ɛyaa mba panɩɣ tɔm taa yɔ. (Yak. 3:17) Lʋlɩyaa mba pamaɣzɩɣnɩ Yehowa yɔ, pɩkɛ toovenim se paayeki pe-piya se sɩla mbʋ payɩ sɩsɔɔlaa yɔ, ɛlɛ paaɖaŋɩɣ ɖɔɖɔ se sɩla mbʋ pɩcɛzɩ si-ɖoŋ ɖeɖe yɔ. Yakɔɔb ha-ɖʋ kɩɖaʋ kɩbaŋʋ hɔɔlʋʋ ŋgʋ kɩ-taa. Kɛdaɣ ŋga kɛwɛ Kiɖe Tɛɛ Tɔm 33:​12-14 taa yɔ, kawɩlɩɣ se Yakɔɔb maɣzaɣ e-piya nzɩ sɩkɛ ajamaa yɔ sɩ-yɔɔ. Pɩwɛɛ ɖɔɖɔ se lʋlɩyaa ɩkɛ mba poluzuu pa-tɩ nɛ panɩɣ tɔm taa yɔ nɛ pataakpakɩɣ pa-pɩɣa nakɛyɛ nɛ pamaɣzɩɣnɩ lɛɛka. Pɩwɛɛ ɖɔɖɔ se ɛgbɛyɛ taa ɛzʋtʋyaa ɩkɛ mba panɩɣ tɔm taa yɔ. Nabʋyʋ taa, ɛgbɛyɛ taa ɛzʋtʋyaa ɛgbɛyɛ pɩzɩɣ nɛ ɖikpeɣli se ɖɩkpaɣ lɩmaɣzɩyɛ naɖɩyɛ. Nɛ pɩtɩla, ndʋ hɔɔlʋʋ sɔsɔʋ maɣzɩɣ yɔ, tɩɩlakɩ nɔɔ kʋɖʋmaɣ nɛ ɛgbɛyɛ taa ɛzʋtʋyʋ nɔɔyʋ lɩmaɣzɩyɛ. Ndʋ lalaa maɣzɩɣ yɔ, ye tɩɩkaɖɩɣnɩ Bibl paɣtʋ kila yɔ, pɩwɛɛ se etisi pɔ-tɔm yɔɔ. (1 Tim. 3:​2, 3) Nɛ ɖa-tɩŋa payɩ pɩwɛɛ se ɖɩñaɣ pana nɛ ɖɩnɩɩ lɩmaɣza wena lalaa kpakɩɣ yɔ a-taa paa awɛ ndɩ nɛ ɖa-ñɩna yɔ. (Roma 14:1) Tobi lɛ, pɩwɛɛ se ɛgbɛyɛ taa koobiya tɩŋa ‘iyele nɛ ɛyaa tɩŋa tɩlɩ se pɛkɛ mba panɩɣ tɔm taa yɔ.’—Filp. 4:5.

YEHOWA WƐ SUUÐU

10. Ɛzɩma Yehowa wɩlaa se ɛwɛ suuɖu?

¹⁰ Pɩtɩla ŋɖiɣzinaa se ɛyaa mba pakpazɩɣ pa-tɩ yɔ, pɛfɛyɩ suuɖu. Ɛlɛ Yehowa ñɛfɛyɩ mbʋ paa ññɩɩ. Ɛwɛ suuɖu nɛ pɩkɩlɩ ɛyaa tɩŋa. Noowa alɩwaatʋ taa, Yehowa yɔɔdaa se ɛkaɣ ɖaŋʋʋ pɩnzɩ 120 pʋcɔ nɛ ɛɖɩzɩ ɛyaa kɩdɛkɛdaa. (Kiɖe 6:3) Piyeba nɛ Noowa hiɣ alɩwaatʋ nɛ ɛcɔnɩ e-piya yɔɔ nɛ sɩpaɣlɩ, nɛ ɛ-hɔʋ sɩnɩ-ɩ nɛ ɛsaɣ aɖakaɣ. Pʋwayɩ Yehowa ɖʋ suuɖu nɛ ewelisini Abraham alɩwaatʋ ndʋ ɛlɛ pɔzaɣ-ɩ tɔm pɩlɩɩnɩ Sodom nɛ Gomɔɔrɩ pa-ɖɩzʋʋ yɔɔ yɔ. Ye Yehowa ɛɛkpazaɣ ɛ-tɩ yɔ, ɛpɩzaɣ se ɛpɔzɩ Abraham se: «Ña yɔ anɩ nɛ ŋpɔzʋʋ-m tɔm?» Ɛlɛ tɩ luzuu tuyi-i nɛ ɛɖʋ suuɖu nɛ ewelisini Abraham.—Kiɖe 18:​20-33.

11. Ɛzɩ 2 Pɩyɛɛrɩ 3:9 yɔɔdʋʋ yɔ, ɛbɛ yɔɔ Yehowa wɛɛ nɛ ɛɖʋʋ suuɖu sɔnɔ?

¹¹ Sɔnɔ ɖɔɖɔ, Yehowa wɛ suuɖu. Ɛɖaŋnɩ suuɖu se alɩwaatʋ ndʋ ɛɖʋwa yɔ tɩtalɩ nɛ ɛɖɩzɩ ɛjaɖɛ. Ɛbɛ yɔɔ ɛɖʋ suuɖu? «Mbʋ pʋyɔɔ yɔ ɛtɩsɔɔlɩ se paɖɩzɩ nɔɔyʋ; ɛlɛ ɛsɔɔlaa se ɛyaa tɩŋa ikpiɖi pa-kɩwɛɛkɩm yɔɔ.» (Kalɩ 2 Pɩyɛɛrɩ 3:9.) Ɛzɩ Yehowa suuɖu ɖʋʋ kɛ falaa? Aayɩ. Mbʋ pʋyɔɔ yɔ piyeba nɛ ɛyaa miiliyɔɔwaa sakɩyɛ hiɣ waɖɛ nɛ pɔñɔtɩnɩ-ɩ. Nɛ ɖɩwɛnɩ lidaʋ se ɛyaa miiliyɔɔwaa sakɩyɛ kaɣ-ɩ tasʋʋ ñɔtɩnʋʋ. Paa mbʋ yɔ, Yehowa suuɖu ɖʋʋ wɛnɩ kamaɣ. Yehowa sɔɔlɩ ɛyaa, ɛlɛ ɛɛhaɣ nʋmɔʋ se paa weyi ɛla mbʋ payɩ ɛsɔɔlaa yɔ. Ɛɛkaɣ yebu nɛ kɩwɛɛkɩm wɛɛ mbʋ tam.—Hab. 2:3.

12. Ɛzɩma Yesu maɣzɩnɩ ɛ-Caa suuɖu?

¹² Yesu maɣzɩnɩ ɛ-Caa. Yesu wɛʋ nɛ ɛmaɣzɩɣnɩ ɛ-Caa suuɖu yɔ, pɩlakɩ pɩnzɩ kudokiŋ sakɩyɛ yɔ. Ɛna ɛzɩma Sataŋ yɔɔdɩ tɔm kɩdɛkɛdɩtʋ Yehowa nɛ ɛyaa siɣsiɣ tɩnaa pɔ-yɔɔ yɔ. (Kiɖe 3:​4, 5; Yɔɔb 1:11; Natʋ 12:10) Ɛna ɖɔɖɔ ɛzɩma ɛyaa sakɩyɛ wɛɛ nɛ palakɩ kʋñɔŋ siŋŋ yɔ. Pɩtʋʋ fɛyɩ se pɩɩlakɩ-ɩ lɛɛ lɛɛ se «ɛɖɩzɩ Eleeu tʋma.» (1 Yoh. 3:8) Ɛbɛ sɩnɩ Yesu nɛ ɛɖʋ suuɖu nɛ ɛɖaŋ se Yehowa ɛha-ɩ nʋmɔʋ pʋcɔ nɛ ɛɖɩzɩ Eleeu tʋma caɣ caɣ? Mbʋ pɩsɩnɩ-ɩ yɔ, pɩ-taa nabʋyʋ lɛ tɩ luzuu. Ɛnawa se Yehowa pɩwɛɛ se ɛlɩzɩ alɩwaatʋ ndʋ pɩmʋnaa se ɛɖɩzɩ ɛjaɖɛ yɔ.—Tʋma 1:7.

13. (a) Ɛzɩma Yesu ɖʋ ɛ-apostoloowaa nɛ suuɖu? (b) Nɛ ɛbɛ yɔɔ?

¹³ Alɩwaatʋ ndʋ Yesu kaawɛ tɛtʋ yɔɔ yɔ, ɛɛɖʋ ɖɔɖɔ ɛ-apostoloowaa nɛ suuɖu. Alɩwaatʋ ndʋ pɔhɔmnɩ ɖama tɔm tam sakɩyɛ se pana se pa-taa lɛ akɩlaa yɔ, Yesu tɩmaɣzɩ se paakaɣ lɛɣzʋʋ wiɖiyi kpa. Ɛlɛ ewobi pɩ-yɔɔ nɛ ɛɖʋʋ-wɛ nɛ suuɖu. (Luka 9:46; 22:​24-27) Ɛbɛ yɔɔ? Mbʋ pʋyɔɔ yɔ ɛ-taa kaatɛma se pakaɣ lɛɣzʋʋ. Pɩtɩla, ŋlabɩ kɩwɛɛkɩm nabʋyʋ tam sakɩyɛ. Pɩtʋʋ fɛyɩ se ña-taa lakɩ leleŋ se ŋwɛnɩ Wiyaʋ weyi eluzuu ɛ-tɩ nɛ ɛɖʋʋ-ŋ nɛ suuɖu yɔ.

14. Ɛbɛ pɩzɩɣ pɩsɩnɩ-ɖʋ nɛ ɖɩwɛɛ suuɖu nɛ pɩkɩlɩ?

¹⁴ Ɛzɩma ɖɩpɩzɩɣ nɛ ɖɩmaɣzɩnɩ Yehowa? Ye ɖɩwɛnɩ «Krɩstʋ maɣzɩm» yɔ, piyeki nɛ ɖɩmaɣzɩnɩ Yehowa nɛ pɩkɩlɩ. (1 Kɔr. 2:16) Ɛbɛ pɩzɩɣ pɩsɩnɩ-ɖʋ nɛ ɖɩwɛɛnɩ Krɩstʋ maɣzɩm? Mbʋ pɩpɩzɩɣ pɩsɩnɩ-ɖʋ yɔ pɩ-taa nabʋyʋ lɛ se ɖɩkalɩɣ e-wezuu caɣʋ tɔm Evaŋgilimwaa taa. Nɛ pʋwayɩ lɛ, ɖɩkpaɣ alɩwaatʋ nɛ ɖɩmaɣzɩ camɩyɛ mbʋ Yesu laba yɔ nɛ mbʋ pʋyɔɔ ɛlabɩ-pʋ yɔ pɩ-yɔɔ. Pɩtasɩ lɛ, pɩwɛɛ se ɖɩtɩmnɩ Yehowa se ɛsɩnɩ-ɖʋ nɛ ɖɩwɛɛnɩ tɩ luzuu nɛ ɖɩɖʋʋ suuɖu ɛzɩ Yesu yɔ. Ye ɖɩwɛnɩ Krɩstʋ maɣzɩm yɔ, pɩsɩɣnɩ-ɖʋ nɛ ɖɩmaɣzɩnɩ Yehowa nɛ pɩkɩlɩ nɛ ɖɩɖʋʋ ɛyaa lalaa nɛ suuɖu nɛ ɖɩɩkɩlɩɣ ɖɔɖɔ ɖa-tɩ tɔm kʋʋ.—Mat. 18:​26-30, 35.

YEHOWA ÐƲƲ HƖÐƐ ƐYAA MBA PƐWƐNƖ TƖ LUZUU YƆ

15. Yɔɔdɩ kɩɖaŋ weyi ɩwɩlɩɣ se Yehowa ɖʋʋ hɩɖɛ ɛyaa mba pɛwɛnɩ tɩ luzuu yɔ ɩ-taa nɩɩyɩ tɔm. (Keɣa 138:6)

¹⁵ Kalɩ Keɣa 138:6. Pɩkɛnɩ hɩɖɛ ɖʋʋ kpem se kedeŋa kpeekpe Kɩlɩm keŋni ɛyaa mba pɛwɛnɩ tɩ luzuu yɔ. Iyele nɛ ɖɩyɔɔdɩ ɛyaa mba Yehowa kaaɖʋ hɩɖɛ yɔ pa-taa nabɛyɛ tɔm. Paakɛ mba ɛyaa lalaa maɣzaɣ se patɩlɩɩ pʋyʋ yɔ. Pɩtɩla ɖɩɩsɩŋ pa-taa nabɛyɛ yɔɔ tɔm sakɩyɛ, paa mbʋ yɔ Yehowa yeba nɛ pama pɔ-yɔɔ tɔm Bibl taa. Debora kaakɛ pʋnʋʋyʋ, paa mbʋ yɔ Yehowa tɩŋnɩ Moyizi yɔɔ nɛ eyele nɛ pama ɛ-hɩɖɛ Bibl taa. Ɛɛkɛ lɩmɖʋyʋ Izaakɩ nɛ Yakɔɔb pɔ-hɔŋ taa, nɛ ɛɛlabɩ tʋmɩyɛ nɖɩ siɣsiɣ pɩnzɩ 125. Paa ɖɩɩsɩŋ tɔm sakɩyɛ halʋ siɣsiɣ tʋ ɛnʋ ɛ-yɔɔ yɔ, Yehowa yeba nɛ pama ɛ-tɔm Bibl taa, nɛ pɩwɩlɩɣ se Yehowa kaasɔɔlɩ-ɩ siŋŋ. (Kiɖe 24:59; 35:​8, pɩ-tɛɛ tɔm) Pɩnzɩ mɩnɩŋ sakɩyɛ pʋwayɩ, Yehowa lɩzɩ Daviid se ɛkɛ Izrayɛɛlɩ wiyaʋ, ɛlɛ kaakɛ abalɩbɩɣa yem nɛ ninɖiɣyu. (2 Sam. 22:​1, 36) Palʋlɩ Yesu nɛ pitileɖi lɛ, Ɛsɔ tiyi e-tiyiyaa ninɖiɣyaa nabɛyɛ cɔlɔ se peheyi-wɛ se palʋlɩ weyi ɛkaɣ pɩsʋʋ Mesiya yɔ; paba kaawɛ lone nɖɩ ɖɩñɔtɩnɩ Bɛtɩlɛhɛm yɔ ɖɩ-cɔlɔ. Ɛsɔ kaaɖʋ-wɛ hɩɖɛ kpem, mbʋ pʋyɔɔ yɔ mba kaakɛnɩ kajalaɣ ñɩma mba panɩ tɔm ndʋ yɔ. (Luka 2:​8-11) Nɛ Yosɛɛfʋ nɛ Maarɩɩ powoni Yesu templo taa lɛ, Yehowa ɖʋ hɩɖɛ akpadɩyaa Siimeyɔɔ nɛ Ana nɛ eyele nɛ pana ɛ-Pɩyalʋ. (Luka 2:​25-30, 36-38) Toovenim taa lɛ, «paa Yehowa ɛwɛ ɖooo ɛsɔdaa yɔ, ekeŋni mba poluzuu pa-tɩ yɔ.»

16. Ɛzɩma Yesu maɣzɩnɩ wɛtʋ ndʋ ɛ-Caa wɛnɩ ɛyaa lalaa yɔɔ yɔ?

¹⁶ Yesu maɣzɩnɩ ɛ-Caa. Yesu maɣzɩnɩ ɛ-Caa nɛ ɛɖʋ hɩɖɛ ɛyaa mba lalaa kpakaɣ-wɛ se patɩlɩɩ pʋyʋ yɔ. Ɛwɩlɩ ɛyaa mba «patɩla sukuli nɛ pɛkɛ ɛyaa yemwaa» yɔ Ɛsɔ Kewiyaɣ yɔɔ toovenim tɔm. (Tʋma 4:13; Mat. 11:25) Ɛɛwa ɖɔɖɔ ɛyaa kʋdɔmɩŋ, nɛ ɛɛtɩŋnɩ nʋmɔʋ ŋgʋ kiyeki nɛ peɖiɣzina se ɛsɔɔlɩ-wɛ nɛ ɛɖʋʋ-wɛ hɩɖɛ yɔ kɩ-yɔɔ nɛ ɛla mbʋ. (Luka 5:13) Ðoo kɛdɛzaɣ ñɩna wena ɛcaɣ wezuu tɛtʋ yɔɔ pʋcɔ nɛ pakʋʋ-ɩ yɔ a-taa, ɛɛkɔ ɛ-apostoloowaa nɩŋgbanzɩ lɩm, nɛ ɖoŋ ɖoŋ lɛ, lɩmɖʋyaa lakaɣnɩ tʋmɩyɛ nɖɩ. (Yoh. 13:5) Nɛ pʋcɔ nɛ ɛkpaɣ ɛsɔdaa lɛ, ɛɖʋ hɩɖɛ ɛ-wayɩ tɩŋɩyaa tɩŋa nɛ ɛɖʋ-wɛ tʋmɩyɛ sɔsɔɖɛ naɖɩyɛ, nɖɩ lɛ se pasɩnɩ ɛyaa lalaa nɛ pehiɣ wezuu maatɛŋ; ɖa ɖɔɖɔ ɖɩwɛ pa-taa.—Mat. 28:​19, 20.

17. Ɛzɩma ɖɩpɩzɩɣ nɛ ɖɩɖʋ hɩɖɛ ɛyaa lalaa? (Cɔnɩ ɖɔɖɔ kɩlɛmʋʋ.)

¹⁷ Ɛzɩma ɖɩpɩzɩɣ nɛ ɖɩmaɣzɩnɩ Yehowa? Ðɩɖʋʋ ɛyaa lalaa hɩɖɛ ye ɖisusuu-wɛ tɔm kɩbandʋ paa le patɩɩlɩnaa, paa tomnaɣ tɔlɩm mbʋ patɩɩwɛna nɛ paa palabɩ sukuli yaa patɩla yɔ. Nɛ ɖɩɖʋʋ ɖo-koobiya hɩɖɛ ye ɖɩkpakɩɣ-wɛ se pakɩlɩ-ɖʋ paa lɛɣtʋ yaa waɖɛ nɖɩ ɖɩtɩɩwɛna yɔ. (Filp. 2:3) Ye ɖiluzuu ɖa-tɩ, nɛ ɖɩtɩŋɩɣnɩ nʋmɔŋ ɛnɩ nɛ nʋmɔŋ lɛɛŋ yɔɔ nɛ ‘ɖɩɖɛɣ nɔɔ’ nɛ ɖɩɖʋʋ lalaa hɩɖɛ yɔ, pɩkɛdɩɣnɩ Yehowa siŋŋ.—Roma 12:10; Sof. 3:12.

18. Ɛbɛ yɔɔ ŋsɔɔlaa se ŋmaɣzɩnɩ Yehowa tɩ luzuu?

¹⁸ Ye ɖɩñakɩ pana se ɖɩmaɣzɩnɩ ɖa-Caa sɔɔlɩm tʋ tɩ luzuu yɔ, pɩkaɣ wɛʋ lalaa kɛlɛʋ se pɔñɔtɩnɩ-ɖʋ nɛ pɩkɩlɩ, ɖɩkaɣ kɛʋ ɛyaa mba panɩɣ tɔm taa yɔ nɛ pɩkɩlɩ nɛ ɖɩkaɣ wɛʋ suuɖu nɛ pɩkɩlɩ. Pɩtasɩ lɛ, ɖɩkaɣ ɖʋʋ ɛyaa lalaa hɩɖɛ ɛzɩ Yehowa yɔ. Nɛ ɖɩtaasɔɔ se ye ɖɩñakɩ pana se ɖɩmaɣzɩnɩ ɖɛ-Ɛsɔ weyi eluzuu ɛ-tɩ yɔ, ɖɩkaɣ mʋʋ ñɩm ɛ-ɛsɩndaa nɛ pɩkɩlɩ.—Iza. 43:4.