Ko Dwiwani ku be Nkirisiti?​—Baibili i no Tini?

Mazhuba i yawa, bathu ba njinji ba no zwidana be ti bakirisiti; ngono, ba no bata bangwe ne zila i no wisa zogwadza. Bangwe ba no zwikumbulila ba li boga, ha bana malebeswa kene buthu. Bangwe ba no shanganyila ngubo ne wa ba sa ka lobolana naye. Mazwibato abo a no thama kuti bathu banjinji ba zwi buzwe kuti: ‘Dumbu ko be Nkirisiti ku dwiwani?’

Chi no dwiwa ne ku be Nkirisiti

Ku lelu kuti nthu a ti i Nkirisiti. Ngono ku na chingwe kakale cha ku no dwa. Ku yenda ne Baibili, Nkirisiti ku dwiwa ndiyiwana wa Jesu. (Mis 11:26) Jesu ne bukukwe wa ka ti: “Ha mulondolodza matama angu mu badiyiwana bangu.” (Johani 8:31) Malebeswa ndi kuti, ha kuna nthu u nga thama chingwe ne chingwe cha ka legwa na Jesu. Ngono Nkirisiti wa ka fanila salashule zwidiyo zwa Jesu, e lakidza ichecho ne zila ya a no chila nayo. Kumbulila zwilakidzilo izwezwi.

Bakirisiti ba no lakidza ludo gwe malebeswa

Cha ka legwa na Jesu: “Ndomupa nlayo ntshwa nditi, Mudane. Koga sekwa ndakamuda, namwibo mudane. Bathu bose banowoziba kuti mu badiyiwa bangu ha mudana.”​—Johani 13:34, 35.

Cha ka thangwa na Jesu: Jesu wa ka be e lakidza bathu bose ludo gwe malebeswa, ku singa kgathelesege kuti i bathu ba no dwa ngayi kene mamo a bo. Wa ka be i podza bano gwala, i pa zojiwa ba na hala i be i buya i fila bathu.​—Matewu 14:14-21; 20:28.

Bakirisiti ba no zwibata chini: Bakirisiti ba no lakidza ludo gwe malebeswa ne ku pa ne moyonchena, ku sa shalula bathu ne ku zwibatigwa bathu. Bano batsha bathu mu mathatha a bali mu ali, ba ka zwimisila lashikigwa kuti ba batshe bangwe.​—1 Johani 3:16.

Bakirisiti ba na malebeswa

Cha ka legwa na Jesu: “Ndimi . . . malebeswa.”​—Johani 14:6.

Cha ka thangwa na Jesu: Jesu wa ka be a na malebeswa mu chingwe ne chingwe cha a kabe i leba kene i chi thama. Wa kabe a singa like ku tsietsa bathu kuti ba thame cha a no shaka kene i shingisa bupitipiti. Wa kabe i zigwa ne ku leba malebeswa, ne apa ku leba malebeswa ku nga ndila mu mathatha.​—Matewu 22:16; 26:63-67.

Bakirisiti ba no zwibata chini: Bakirisiti ha ba to leba manyekhwa. Ba no ruela likhetho, ha ba to kwiba, kakale ha ba to thama busimbe mu nshingo kuti ba si ruelegwe nako ya ba sa shingila. (Baroma 13:5-7; Baefesiya 4:28) Ha ba to tsietsa bathu, ha bato koopa ku ikwele ebili a bato leba manyekhwa kuti ba hiriwe.​—Bahebera 13:18.

Bakirisiti ba na buthu

Cha ka legwa na Jesu: “Izhani kundili imwi makanyala kakale munolemegwa, ndowomunyalulusa. Muzwitilike jokwi langu muzwidiye mundili, ngobe ndina moyo nnyolo ne kuzwiyisa pasi ngono mowozwiwanila kunyaluluka. Ngobe jokwi langu lilelu ne ntolo wangu nlelu.”​—Matewu 11:28-30.

Cha ka thangwa na Jesu: Jesu wa kabe a na buthu, e thama kuti bathu be phuthuluke ba li panli. Wa kabe e amuchila bana, e nyaladza ba ka tshambilidzigwa mu ma zwiwo kakale i tuta bathu.​—Mako 10:13-15; Luka 9:11.

Bakirisiti ba no zwibata chini: Bakirisiti ba no lebesa bathu ne buthu, kakale a ba to tukana. (Baefesiya 4:29, 31, 32) Ba no khathegela bathu ne ku shaka ku bona sekwa ba nga ba batsha.​—Bagalatiya 6:10.

Bakirisiti ba na malebeswa mu bathu ba ba ka lobolana nabo

Cha ka legwa na Jesu: “Ndizo Ndzimu tja wa bhatshanya, kushaye nthu wa tji thubukanya.”​—Mako 10:9.

Cha ka thangwa na Jesu: Ne nguba Jesu a sa ka tongo lobola, wa ka khutatsa kuti balobolani ba si shitelane malebeswa. (Matewu 19:9) Wa ka chemela bathu mu zwithu zwi nga khwanya nsha.​—Matewu 5:28.

Bakirisiti ba no zwibata chini: Bakirisiti ha ba to shaka thama chingwe chi singa lakidze tuto mu na wa baka lobolana naye (Bahebera 13:4) Ba lobolani ba no lakidzana ludo ne ku tutana.​—Baefesiya 5:28, 33.