Shangashanganyo ye Dzipolotiki i no Shingikadza Buporofiti gwe Baibili

Bathu mazhuba iyawa a ba to wanana ne ntata ye dzipolotiki. A ba to dumilana ne milawo i no ama buchilo gwabo gwe zhuba ne zhuba, ngono ba no leba mikumbulo yabo ye dzipolotiki ne ku ngangisana ku kulu. Mu na hurumente ba no thama milawo ne bashingi ba no nyanyaidzana ngono akuna u no shaka ku dumana ne nngwe. Ku sa wanana ikoko ku nga thama kuti hurumente a si tongo khona thama mishingo ya a ka fanila thama.

Kusalumakana kwe dzipolotiki ku United States ne ku Britain ndiko ku buthokwa kwazo. Ne ku tini? Ne kuti Baibili ya ka lebela mbeli kuti ko wobe ne kusawanana mu shango idzedzi mbili—mu nako iyeyo,Bushe gwe kudzimu gwa ka bigwa ne Ndzimu gowo shandula chimo che shango.

Ku shangashangana kwe Dzipolotiki “mu Mazhuba e Bupelo”

Baibili i na buporofiti gu no chenamisa gwa ka kwagwa,mu buka ya Daniele. Mu buporofiti igogu, Ndzimu wa ka lakidza “chi nowo shingikala mu mazhuba e bupelo,” ngono mu nako iyeyo kwa ka be ku dwiwa chi no shingikala mu chibaka chi no zha.—Daniele 2:28.

Ndzimu wa ka lakidza She we Babiloni buporofiti igogu mu wope. Mu wope idzedzo She wa ka bona itshwantsho che bukulu gu no chenamisa cha ka thamiwa ne tshipi dza ka siyasiyana. Shule, mporofiti Daniele wa ka thalosa kuti ku dwa ku nsholo ku noti ku makumbo itshwantsho ichecho chi milile mibuso ye Shango ya ka bo yowo busa i be i wa mu histori yose.a Ha nako i ntsi i yenda, itshwantsho ichecho chowo chinyiwa choselele, chi logwa ne bgwe li no milila mbuso kene hurumente wa ka bigwa ne Ndzimu.—Daniele 2:36-45.

Ku yenda ne buporofiti, Bushe gwe Ndzimu gowo busa mu bumo gwa bo hurumente be bathu. Bushe igogu ndigo Jesu gwa a ka diya badiwana babe kuti ba gu tembezelele beti: “Bushe gwenyu nga gu zhe.”—Matewu 6:10.

Ndi ngai mu buporofiti igogu gwe Baibili pa ka lebegwa mbeli ne kwe ku shangashangana kwe dzipolotiki? Yela njele kuti makumbo e itshwantsho ichechi a ka thamiwa nge “tshipi ne ntapkhwi.” (Daniele 2:33) Zwithu zwa ka shingisiwa ipapo zwa ka be zwi si nga fanane ne dzi tshipi dzingwe dza ka shingisiwa mu itshwantsho chose ichecho ku lakidza kuti ku be ne mbuso u ngompela u si nga fanane ne mingwe.Ko dwiwa chini? Buporofiti gwa Daniele go chenesa:

Ku yenda ne buporofiti igogu, mbuso we shango u miligwe ne makumbo e itshwantsho ichechi wa ka be woo be ne ku shangashangana kwe chipolotiki .Bathu ba no laugwa ne mbuso iwoyo ,ba ka be bo thama zwithu zwi no thama kuti u tapodzike masimba

Buporofiti gwa Daniele go shingikadziwa mu mazhuba a ngwenu

Makumbo e itshwantsho a no milila mbuso u na masimba ku pinda mibuso mingwe yose,United States ne Britain dza ka shangana. Zwithu zwi no shingikala ngwenu zo lakidza chini kuti ichechi malebeswa?

Makumbo e itshwantsho ichechi a ka thamiwa “nge tshipi ntome kumwe, kumwe nge ntapkhwi,” zwithu zwi no ti ha zwi shanganyiwa zwo thama makumbo a saka sima. (Daniele 2:42) Mu mazhuba iyawa,masimba e United States ne Britain a ka tapudzika ne kuti bathu ba bo ba ka thubukana . Ha ti lakidzila, shango idzedzi mbili ha dzi to dumana mu zwithu zwino ama buchilo gwe batho badzo zwe zhuba ne zhuba. Bathu ba no dwilila be gwila dzitshwanelo dzabo.Bathu ba ka thopiwa ku milila shango dzabo ha ba to wililana ha ku ha mu dzikhani dzi no ama bathu babo. Ne kuti bathu ba bo ba ka thubukana, bo hurumente babo mu dzinako dzingwe ba no kongwa thama mazwimisilo a bo.

Bona kwa ka paphidzika mu na chino dwiwa ne buporofiti gwa Daniele ne kuti go shingikadziwa chini ngwenu:

Buporofiti: “Unowobe mbuso wakathubukana ngono wakasima se tshipi.”—Daniele 2:41.

Cha gu no dwa: Ne bana mathatha e ku sa wanana kwe chipolotiki, United States ne Britain bana chisole cha ka sima. Ichecho cho thama kuti ba khone laula ne masimba a no nga e tshipi.

Kushingikadziwa kwago

Mu gole le 2023, mari dza ka shingisiwa mu chisole ne United States ne United Kingdom dza ka shangana a no pinda e shango dzili 12,dza ka shangana, dzi no dzi tobelela mu ku shingisa mari.—Stockholm International Peace Research Institute.

“Ku shingidzana kwe chisole che UK-US. . . kwa ka chi kula e bile kwa chi batana kwazo. . . . A kuna shango dzingwe mbili dzi na ku shingidzana ku no pinda ikoku, to shinga tose, to ma tose, to gwa tose.”—Strategic Command, U.K. Ministry of Defence, April 2024.

Buporofiti: “Zwinyala zwakathamiwa nge tshipi ntome kumwe, kunwe nge ntaphwi kodwa kuti mbuso unowobe wakasima ngono ntome kunwe ukabe nlelu.”—Daniele 2:42.

Cha gu no dwa: Ne ha chisole chabo chi na masimba, United States ne Britain dzo simisigwa zwithu ne sekwa chipolotiki che shango dzabo chi li iko. A bathu ba no dumana na hurumente ba se banjnji ku no boneka, ko thama kuti nako dzingwe bo hurumente ibaba ba kongwe ku shingikadza mazwimisilo abo.

Kushingikadziwa kwago

“Ku yenda ne bazibi be dzipolotiki, ku thubukana kwe dzipolotiki dze America ko laula zila yaba no khona thama mazwimisilo abo mu shango yose ku dwa koga, mu ku bakililika kwe bathu ku noti ku khani dze tenga ne ku tengesa.”—“The Wall Street Journal.”

“Ku sa wanana kwe chipolotiki ku Britain ko thama kuti mapolotiki ba se shinge zwibuyanana ku be ku thama kuti bashingi ba hurumenteb ba se khone thama mazwimisilo abo e ku thusa bathu.”—Institute for Government.

Buporofiti: “bathu [mbuso] banowoshangashangana ngono kowobe ne kusabhatana pakati kwabo.”—Daniele 2:43, footnote.

Cha gu no dwa: Bathu ba no busiwa ba no piwa chibaka che ku leba cha ba no shaka thamigwa na hurumente ngono, ichechi ha chi to shingikadziwa ne zila i no ba shathisa.

Kushingikadziwa kwago

“Mu mazhuba a ngweno, ma America ha ba to shaka ku dumana ne chipolotiki chabo ne bathu ba no thopiwa.”—Pew Research Center.

“Bathu be Britain ha ba cha themba bo hurumente ne mapolotiki sekwa ba ke be ba themba makole a li 50 a ka pinda”—“National Centre for Social Research.”

Buporofiti gwa Daniele—mu chibaka chi no zha

Ku yenda ne buporofiti gwa Daniele, mbuso we United States ne Britain dza ka shangana, ndiwo u no be u busa shango,a Bushe gwe Ndzimu gu pedzisa bo hurumente be bathu.—Daniele 2:44.

Mu buporofiti gwa ka kwagwa mu nako i no fanana mu buka ye Zumbunulo,Baibili i no lakidza kuti “bomambo be shango yose” ba no kubunganila ku no gwa na Jehovac Ndzimu mu ngwa ye Amagedoni, “ngwa mu zhuba gulu le Ndzimu Masimbawose.” (Zumbunulo 16:14, 16; 19:19-21) Mu ngwa iyeyi, Jehova u no pedzisa bo hurumente bose be bathu ,mu ku thama e jalo, u no pedzisa choselele mibuso i miligwe ne itshwantsho che buporofiti gwa Daniele.

Ku zwidiya kwa ka paphidzika, bona nsholo u no ti “Ngwa ye Amagedoni Ini?”

Tinga thusiwa chini ne Boporofiti Gwa Daniele gu no lebeleka ne kwe ku shangashangana kwe Dzipolotiki

Baibili ya ka lebelekela mbeli ne kwe ku shangashangana we dzipolotiki ku United States ne Britain, ku zwidiya ne kwago ku nga thama kuti nthu a linge zwithu zwino shingikala ngwenu ne zila ipoga.

• Nowo thaloganya kuti i ni Jesu a ka be e dwa badiwana babe e ti ba si nginilile mu dzi polotiki dze shango iyeyi (Johani 17:16) Kakale nowo thaloganya kuti ini Jesu, iye wa ka thopiwa ne Ndzimu ku be She ye Bushe gugwe,a kati: “Bushe gwangu ate guli gwe shango ino.”—Johani 18:36.

• Nowo shathisiwa ne ku ziba kuti Bushe gwe Ndzimu gwa be pejo ne buya, ne ku shingikadza zwithu zose zwa taka thembisiwa ne Ndzimu.—Zumbunulo 21:3, 4.

• Nowo sukika moyo ne kwe chibaka chino zha u singa tshugile ku chinyiwa kwe shango ku nga hisiwa ne ku sa wanana kwe bathu.—Pisalema 37:11, 29.

Buporofiti gwa Daniele go lakidza kuti mbuso we United States ne Britain u no miligwa ne makumbo e itshwantsho,i nowo be iwo mbuso we bathu we bupelo ku busa mu shango. Ku dwapo ko be ku ngina mbuso we kudzimu wa ka zwilisanila—Bushe gwe Ndzimu!

Ku ziba kwaka paphidzika ne kwe kuti Bushe gwe Ndzimu gowo thamilani bathu,lingilila vidiyo i no leba ne kwe kuti Bushe gwe Ndzimu ini?