A Dumbu World Cup i Nga Thama Kuti Bathu ba bo Chithu Chingompela?—Baibili Ikatini?

Ko kumbuligwa kuti bathu ba ngabe 5 billion ba lingilile FIFA World Cup ku tangisa ne November 20 ku noti December 18, 2022. Banjinji ba no kumbula kuti mishingo ya ka jali ye sports i nga thama kunjinji kupindisa koga ku thama kuti bathu ba zwiiwe ba li chithu chingompela ha ba ka lingilila.

• “Sports chi na masimba e ku shandula shango. Chi na masimba e ku sendedzela bathu. Chi na masimba e ku thama kuti bathu ba bo chithu chingompela ne zila ya ka shalulika.”—Nelson Mandela, wa ka tongo be a li president we South Africa.

• “Football . . . i no thama kuti bathu ba bo chithu chingompela ne kuti i no thama kuti ba be ne thembo, ba shathe, ba amike mu mazwiiwo, be zwiiwa be da bangwe, kakale be zwiiwa be da chithu chingompela bose.”—Gianni Infantino, president we FIFA.a

A dumbu World Cup kene nshingo nngwe koga we sports u ngabe ne belelo la ka jalo? A dumbu World Cup i nga thama kuti kube ne mbakiso ne wanano?

A dumbu i no thama kuti bathu ba bo chithu chingompela?

World Cup ye gole ileli ya ka thama kuti bathu ba si kumbule ne kwe football koga. Dzi-game idzedzi dza ka thama kuti bathu ba lebe kwazo ne kwe mathatha e bathu, dzipolotiki, dzifanilo dze bathu, ku shalaula bathu, ne mathatha e ikhonomi.

Ne kwa ka jalo, bathu banjinji ba cha shathila ku lingilila dzi-game idzedzi dze shango yose dzi nonga World Cup. Nenguba bathu ba nga dwilila be shaka ku thamiwa chithu chingompela ne dzi-game dzi nonga idzedzi, ha ba nga wanane. Mu bumo gwa ichecho, kanjinji ba no lakidza mazwibato a no ba thubukanya, ne thama mishingo ya ka lebegwa mbeli ne Baibili kuyi ndiyo i nowo lakidza kuti ti mu nako i no dangwa “mazhuba e bupelo.”—2 Timoti 3:1-5.

Thembo ye malebeswa dumbu ye ku thama kuti bathu ba bo chithu chingompela

Baibili i no pa thembo ye malebeswa ye ku thama kuti bathu ba bo chithu chingompela mu shango yose. I no thembesa kuti bathu bose mu shango ba nowo be chithu chingompela be busiwa ne mbuso u kudzimu u no dangwa “Bushe gwe Ndzimu.”—Luka 4:43; Matewu 6:10.

She we Bushe igogo, Jesu Kirisiti, u nowo thomamisa kuti mbakiso i no be yapo mu shango yose. Baibili ikati:

• “Ndulamo ingawanda, nenge kunyalala kuandame.”—Pisalema 72:7.

• “Ngobe unotjidza basheti abedana . . . mukutshambilidzwa nenge kuhwisiwa zogwadza, unobatjidza.”—Pisalema 72:12, 14.

Na ngwenu, zwidiyo zwa Jesu zwa ka thama kuti dzi-miliyoni dze bathu mu shango dzi li 239 dzi wanane. Ba ka zwidiya ku misa ku benga bangwe. Ku zwidiya kwa ka paphidzika, bala misholo inoti: “Letlhoo le ka Fedisiwa.”