Ngwanadi u no simisa mbalo uwe we Baibili e shingisa ndongoloso, study Bible ye jw.org, mmepe, ne itshwantsho cha ka dorowiwa ne liboko

BATSHWA BA NO BUZWA

Ku Bala Baibili ku Nga Ndi Batsha Chini?—Ipithu 2: Thama Kuti Mbalo Uwo we Baibili u be u no Shathisa

“Baibili i nga lingika i singa khate,” ko leba ngwanadi Will, “ha u singa i bale ne zila ya ka fanila.”

Apa u no shaka bona chi nga ku batsha kuti u de mbalo we Baibili? Chidiyo ichechi cho wo ku batsha.

Thama kuti Hwalo dzi hwike mu kuli

Nginilila mu cha u no bala. U nga shingisa zila yeyi:

Shalula mbiko ingwe ye Baibili ya u no shaka ku zwidiya ne kwayo. U nga shalula chingwe cha ka kwagwa mu Baibili kene chingwe cha ka kwagwa mu buka dze Gospel, kene u shalula chingwe che mbalo we dzidrama we Baibili u mu jw.org.
Bala mbiko. U nga zwibalila iyo u li woga, kene u i bala ne bakhwinya ne be nsha uwo. Nngwe u nga bala cha ka kwagwa, bangwe be be be bala matama a ka legwa ne bathu.
Shingisa zwingwe zwe zwi no tobela:
- Dorowa zwitshwantsho ku thalusa mbiko. Kene dorowa zwitshwantsho zwi no lakidza chi no shingikala—i li zwitshwantsho zwi lelu zwi no lakidza ku tobedzana kwe zwithu zwi no shingikala. Thama mikwalo i no chenesa chi no shingikala.
- Dorowa itshwantsho chi no lakidza zwithu zwi singa fanane zwi mu itshwantsho. Ha ti lakidzila, ha u bala ne kwe nthu u no thembeka, fanidzanya mazwibato e nthu iwoyo, zwa a no thama ne ku kombolegwa kukwe.
- Thama kuti mbiko i hwike se kwa u ngati ko bagwa dzikhani. Leba chi no shingikala ne zila dzi singa fanane, u bo u thama kuti ba no shingisiwa se bathu ba mu Baibili ba buzwiwe “dzibuzo” kose ne ba ka bona zwa ka shingikala.
- Ha ngwe we ba ka shingisiwa a ka tola thambo i si ye buchenjedu, bona kuti ku nga be ne belelo la ka tini. Ha ti lakidzila, kumbula ku landula Jesu kwa Pita. (Mako 14:66-72) Pita u nga be a ka zwibata chini mu na cha ka shingikala?
- Ha u da, u nga zwithamila drama iyo ne kwe mbiko ye Baibili. Kwala chi nga zwidiyiwa mu mbiko iyeyo.—Baroma 15:4.
  
  U nga thama kuti Baibili i be ne buchilo!

Shakisisa!

Ha u lingisisa zwithu, u nga bona fumwa ya ka sumbikika mu mbiko. Mu zwibaka zwingwe dama lingompela kene mabili mu mbiko ye Baibili a ka lizana.

Ha ti lakidzila, fanidzanya Matewu 28:7 na Mako 16:7.

Ini Mako a ka kwala mbiko ye kuti Jesu wa ka be dwa e boneka mu badiyiwa babe “na Pita”?
Gumbuludzo: Mako ha a zo tongo bona zwiyetikalo zwa ka shingikala; ha ku to bilayedza, kuti wa ka tola mbiko iyeyi mu na Pita.
Fumwa ya ka sumbikika: Ini Pita a ka gadzikanyiwa moyo ne ku hwa kuti Jesu wa ka be e shaka ku mbona kakale? (Mako 14:66-72) Jesu wa ka zwilakidza chini kuti i nkhwinya we malebeswa mu na Pita? U nga yedza Jesu chini ku be nkhwinya we malebeswa mu bangwe?

Ha u thama kuti Hwalo dzi hwike ne ku shakisisa zwithu, mbalo we Baibili u nga shathisa kwazo!

Chi no legwa ne bakhwinya babo

“Mu zwibaka zwingwe ndo bala ndima i ngompela ne ku i lingisisa ku dzina ndi i hwisisa. Ha ndi thama ndi jalo, ndo khona bona chingwe cha nda ka be ndi singa hwisise. Ko be chithu chi no ndi shathisa mu zwibaka zose.”—Bonnie.

“Nda ka zwidiya buka ya Ruthi ndi shingisa Watchtower Library ku shakisisa kwa ka paphidzika kuti ndi i hwisise. Ndi nga kulumbidza bathu kuti ba shingise thulusu iyeyi ye Watchtower Library. Ya ka ndi batsha kuti ndi yele njele se kwa mbalo we Baibili u nga shathisa.”—Timothy.

“Ko khata ku bala Baibili ti li banjinji, nngwe ne nngwe kwa a no be ne gobe, to bala mbiko se ya ka kwagwa mu phepa. Kakale ndo shathila dzidrama dze mbalo we Baibili dzi mu jw.org. Dzo thama kuti zwiyetikalo zwe Baibili zwi be ne buchilo!”—Isabel.