Mwaa shani Nnungu ankuvanavo shipinga sha vanu valipúdya kwake?

1. Mwaa shani Nnungu kala andivatandola vanaishilaeli?

Nnungu andivapanga shana udukulu umwe Abulaamu kuva venentete vake na kuvapa malamulo. Venentete avo andivapa lina lya “Ishilaeli”, na vanavo indivavaikila valipudye kwake Nnungu bai, na kuigwilila malamulo ake. (Dimu 147:19, 20) Napavedoni, vanu uti vamushilambo vakandipata dinema dyakwalakela kwa Nnungu kupitila kwa vanaishilaeli.—Shomya Kutunduvanga 22:18.

Nnungu andivatandola vanaishilaeli pakulota vave mashaidi vake. Maimyo lavo lankulodya shalowa kenga vashinapata ipaída wakati pavashigwilila malamulo a Nnungu. (Kumbukumbu 4:6) Nadoni, vanu vanji vakanimanya Nnungu wa umwiu kupitila kwa vanaishilaeli.—Shomya Ishaiya 43:10, 12.

2. Mwaa shani Vaklistu va umwiu vanavo vandilipanga shana?

Ukapite wakati, vanaishilaeli vandileka kuigwilila malamulo a Nnungu. Kwa mwaa washitendo asho, Yeova havalotile kavili vanaishilaeli kuva mashaidi vake. Nadoni, nae anditandola shipinga shavanu vanji. (Mateu 21:43; 23:37, 38) Nelo, Yeova ankuvatumila Vaklistu va umwiu pakulota kuva mashaidi vake.—Shomya Vitendo 15:14, 17.

Yesu andivapanganiyanga vakwoda vake pakulota vavalangange Utawala wa Nnungu, na ‘kuvatadya vanu vave vakwoda vake muvenentete uti.’ (Mateu 10:7, 11; 24:14; 28:19, 20) Mwisho washilambo ashi shaukalau undivandika, na Vaklistu va umwiu vankwandadya ntenga wa Utawala wa Nnungu mushilambo uti shapai. Nelo, Yeova ankuvanavo venentente voe mu mautu akuvilingananga. (Maono 7:9, 10) Pamo na davo, Vaklistu va umwiu vankupwashelana na kunagwaledyania mwaa vanavo ni vanu valyunganilo. Mu shilambo uti vanavo vankulipundisha vinu vimo vyovyo vya mu Ibibiliya mu mikutano vyavo.—Shomya Vabalaniya 10:24, 25.

3. Idini ya mashaidi va Yeova itunduvenge dashi?

Kutunduvangila mwaka wa 1870, shipinga shidikidiki shavanu shishilipundisha Ibibiliya, shinditunduvanga kwigwa shana ashilá shipundisha Ibibiliya. Vanu avo vandimanya kenga Yesu ashinalota Vaklistu vandadye Utawala wa Nnungu. Nadoni, vanavo vanditunduvanga kwandadya ntenga wa Utawala wa Nnungu mushilambo uti. Mu mwaka wa 1931, vanavo vanditunduvanga kutumila lina lya Mashaidi va Yeova.—Shomya Vitendo 1:8; 2:1, 4; 5:42.

4. Nyani apanga shimadengo sha Mashaidi va Yeova?

Yesu ngwengwe ankuva nanangalaledi wa Vaklistu va umwiu. Wakati wakunyuma, Yesu anditumila shipinga shavanu pakulota kuvapwashela na kupundisha maganisha. Nkati mu shipinga asho, vavele vamyombe na vanang’olo vanji vamaganisha. (Vitendo 16:4, 5) Nelo, shipinga shavalume valimanyilo shinkupanganiyanga shimadengo sha Mashaidi va Yeova. Shipinga asho shimanyika na lina lya Ibunge Ilangalela. Ibunge ayo inkulaledya shimadengo shakupindikulanga, kwimpilimili na kujava mabuku avalanganga Ibibiliya mu dinangodi dipita 750 mushilambo uti. Ibunge Ilangalela inkutumila Ibibiliya pakulota kupwashela na kupundisha maganisha lakupunda 110.000. Na kula liganisha, valume vanji vavaikidile vankutumika kenga vanang’olo. Vanavo ni vambone na vankushunga shana dingandolo dimwe Nnungu.—Shomya 1 Patulu 5:2, 3.

Wetu Mashaidi va Yeova tunandadya ntenga wa Utawala wa Nnungu. Wetu tunauka kula ing’ande ya munu, kenga momo mwavashitandela vamyombe kala. (Vitendo 20:20) Wetu tunkupundisha Ibibiliya pakati pa vanu uti valota kulipundisha vya Nnungu. Wetu Mashaidi va Yeova hatunava shinu ididi gwamba. Wetu tunkuva likola limo na tunkuvanavo Tatagwetu wa linagwaledyo namene, ni tuvanung’unumunu twangaikanila. (2 Vateshalonika 1:3) Wetu ni likola lya lipuwilo mushilambo uti mwaa ni tuvenentete tutenda malotelo a Nnungu na tunkuvapwashela vanu vanji.—Shomya Dimu 33:12; Vitendo 20:35.