Ulota kumanya dashi idini ya umwiu?

1. Dá shana inkupagwa idini imo ya umwiu?

Yesu andivapundisha vakwoda vake idini imo tu ya umwiu. Yanavo ni kenga indila yúka kushingumi shikamalilika. Yesu ate doni: ‘Vaanaléla nnango awo vavé padyoko.’ (Mateu 7:14) Nnungu ankulota idini yodedya Lilove lyake lya umwiu. Vakulipudya vaiu vankuvanavo likulupulilo limo tu bai.—Shomya Nshuwau 4:23, 24; 14:6; Vaepeshu 4:4, 5.

2. Yesu avalenge nyamani kwa Vaklistu vakushang’apa?

Yesu andimanyia kenga vakulava vakushang’apa vakanditimbanga Uklistu. Kwa panda, vanavo vankuva kenga vakwoda vaiu, na didini dyavo dinkwaula kenga vankumwoda Klistu. Kanji, wako unkulula kuvamanya kenga avo avanava shinu vaiu. Kwa dindila shani? Idini ya umwiu inkuvanavo mavalelo na matendo lambone avalodya shalowa kenga vanavo ni Vaklistu va umwiu.—Shomya Mateu 7:13-23.

3. Ulota kuvamanya dashi vakulipudya vaiu?

Lola vinu mwanu vyavatenda vakulipudya vaiu:

• Vakulipudya vaiu vankwamini Ibibiliya kuva Lilove lya Nnungu. Vanavo vanalikanyalidya kwodyedya ashilá shitangaleka mu Ibibiliya. Napavedoni, idini ya umwiu indivilingananga na didini dyodyedya makumbukililo la vanu. (Mateu 15:7-9) Vakulipudya vaiu vanatandedya ashilá shavavalanganga.—Shomya Nshuwau 17:17; 2 Timoti 3:16, 17.

• 

  Vakwoda vaiu vamwe Yesu vanaishimu lina lya Nnungu, Yeova. Yesu ashinaishimu lina lya Nnungu kwa kuvapundisha vanu lina alyo. Nae andivapwashela vanu vammanye Nnungu, na andivapundisha kushwali pakulota lina lya Nnungu lishwalele. (Mateu 6:9) Palyutu lyaunama wako, idini shani ipundisha lina lya Nnungu?—Shomya Nshuwau 17:26;Valoma 10:13, 14.

• Vaklistu va umwiu vanandadya Utawala wa Nnungu. Nnungu anintuma Yesu pakulota andadye mitenga vyambone vya Utawala wa Nnungu. Utawala awo bai ni ulota kumalidya mauvilo a vanu. Yesu ándivalanga Utawala wa Nnungu mpaka mu liduva lya kupela kwake. (Lukashi 4:43; 8:1; 23:42, 43) Nae anditangola kenga vakwoda vake vaandadye ntenga wa Utawala. Ikava kenga munu andaida pa ing’ande pako akwaulila ntenga wa Utawala wa Nnungu, wako ulota kumwona kenga ni wa idini shani?—Shomya Mateu 24:14.

• Vaklistu va umwiu havanalinjidyanga mushilambo. Wako unkulula kuvamanya Vaklistu va umwiu, mwaa vanavo havanalinjidyanga mu myaa vya mushiyasa au nkati mmagombi la vanu. (Nshuwau 17:16; 18:36) Na yadavo, vanavo havanajedya mavalelo avanu au matendo laukalau amushilambo.—Shomya Tiyagu 4:4.

• Vaklistu va umwiu vananagwaladyania. Vanavo vandilipundisha mu Lilove lyake Nnungu kuvaishimu vanu uti. Didini dyakushang’apa dinaunga nkono kwaupande wa ding’ondo dya mushilambo, kanji idini ya umwiu yanavo inapinga kulinjidyanga mu ing’ondo. (Mikeya 4:1-3) Kwa mwaa wa mene kunga nkono kwaupande wa ding’ondo, Vaklistu va umwiu vanatumila mali na wakati wavo pakulota kupwashalana na kúpana ntima shii.—Shomya Nshuwau 13:34, 35; 1 Nshuwau 4:20.

4. Undyulula kwanalela idini ya umwiu?

Ni idini shani yupa mapundisho uti akwalakela mu Ibibiliya, inaishimu lina lya Nnungu, na inaandadya Utawala wa Nnungu kenga ishilikali imo-tu bai ilota kumalidya mauvilo a vanu? Ni shipinga shani sha vanu shilodya linagwaledyo na havanalinjidyanga mu ding’ondo? Wako wonela mwashi?—Shomya 1 Nshuwau 3:10-12.