LISHOMO 13
Shilota kumilila nyamani pakati pa didini?
1. Dá shana didini uti dyambone?
Mu didini uti vankupagwa vanu valota kulipúdya kwa Nnungu kwa umwiu. Ni shambone kumanya kenga Nnungu ankuvona vanu avo na ankuvangaikangila. Kanji, vanu vankutumila didini mukunyata. (2 Vakolintu 4:3, 4; 11:13-15) Dyabali dinkuvalanganga kenga didini dinji dinkulinjidyanga nkati mu ing’ondo na kuvabyaa vanu kwa mwaa waubagushi. Na vananangalaledi va didini dinji vankulala na vadyoko. Vanu vannagwaledya Nnungu vanaikala na matuva wakati pavona vitendo avi.—Shomya Mateu 24:3-5, 11, 12.
Pamo na davo, didini dyakushang’apa dinkupundisha ushwang’a pameo pa Nnungu, na ushwang’a kwa avalá vapadile. Vinu avi havinamupa shinu Nnungu ishima. Yeova ankuvalota vanu vamanye umwiu. Idini ya umwiu inkupundisha ashilá shitangaleka mu Ibibiliya.—Shomya Shakiyele 18:4; 1 Timoti 2:3-5.
2. Shilota kumilila nyamani pakati pa didini?
Muwakati wakuvandika, Nnungu anabamola didini divaduwanga vanu, mwaa nae ankwona vitendo vyavo. Bai, haunajugulange. Halapali mana pakati pa didini divalanga kenga dinkunagwaledya Nnungu, muwakati unji ditenda vyakalota Nnungu. (Tiyagu 4:4) Ibibiliya inkushema didini uti dyakushang’apa kuva kenga “Babiloni Nkumene”, na yanavo inkutangola kenga inabamolegwa. Babiloni uvele njini wakala muwakati umwe Noe. Njini awo ni padipandukenge didini dyakushang’apa baada ya Livambwe Likumene.—Shomya Maono 17:1, 2, 5, 16, 17; 18:8.
Shilota kuvatandeka nyamani vanu valota kutenda malotelo a Nnungu, kanji vapagwite momo mu didini dyakushang’pa? Yeova hanavalivaliva shinu vanu avo. Nae ankuvapa litala valipundishe umwiu wa mu Ibibiliya, na vaume mu didini dyakushang’apa.—Shomya Mikeya 4:2, 5.
3. Vanu vanagwaledya Nnungu inkuvavaikilavatende nyamani?
Idini ya umwiu inkuvaunganiyanga vanu
Yeova anditangola kenga vanu vanagwaledya umwiu wa mu Ibibiliya inkuvavaikila vaume mu didini dyakushang’apa. Nae ankuvangaikangila poe. Munu anannagwaledya Nnungu anatenda shanatangola nae.—Shomya Maono 18:4.
Muwakati wakunyuma, vanu voe vashinalipundisha mitenga vyambone vyavashipundisha vamyombe vamwe Yesu. Vanu avo vandilipundisha kunama kenga momo mwalatela Nnungu, na vandyúka napata lilindililo lyambone muwakati wa mushu. Wako ibidi utende kenga momo mwavatandadile vanavo. Kumwigwilila Yeova ibidi shive shinu shikumene mu shinamilo shetu.—Shomya 1 Vateshalonika 1:8, 9; 2:13.
Yeova ankulota namene vanu vaume mu didini dyakushang’apa, na valyunganiyange na vanu valinagwaledyo valipúdya kwake. Ukatenda davo, wako undava mbodi umwe Yeova, unalyunganiyanga mu shipinga shavenentete vake na unauka nanama mu shingumi shikamalilika.—Shomya Malukushi 10:29, 30; 2 Vakolintu 6:17, 18.
4. Mwaa shani mwisho wa didini dyakushang’apa ni ntenga wambone?
Didini dyakushang’apa dinauka nabamolegwa. Au ni ntenga wambone. Shikatandeka shinu ashi, vanu vanaikala mu ulu. Hapali alota kuduwangika nkati mu idini yakushang’apa. Vanu uti vanalipudya kwa Nnungu jumo bai wa umwiu kenga mwalatela nae.Shomya Maono 18:20, 21; 21:3, 4.