Mwaa shani andinjipa mauvilo na ukalau?

Vikatandeka vyovya, ni shinu shakawaida vanu kulyudya doni: “Mwaa shani vikutandeka vinu avi?” Ni shinu shambone kumanya kenga Ibibiliya inkujang’ula shakudya ashi!

1. Mauvilo alakadile dashi mushilambo?

Shatwani Ndamoni animpinga Nnungu. Nae ashílota alangalalele lyutu lya Nnungu, ndyomana andívambukisha vanu vatandi, Adamu namu Eva, vanavo momo vandyuka nampinga Nnungu. Shatwani atandíle dashi? Nae anínduwanga Eva. (Kutunduvanga 3:1-5) Nae aníntadya Eva akumbukile kenga Yeova andípiya shinu shambone. Shatwani ankuvatadya vanu vakumbukile kenga vanavo vandavanavo lipuwilo ata vakanamwigwilila Nnungu. Shatwani anínduwanga Eva kwa kumwaulila kenga hakanapele. Ndyomana Ibibiliya inshema Shatwani kuva “nshwang’a na lipata lya ushwang’a.”—Nshuwau 8:44.

2. Adamu namu Eva vamuwidye kutenda nyamani?

Yeova andívapa vinu vyoe Adamu namu Eva. Nae andívaulila kenga vankuulula kulya vyepo uti vivele kuliteka lya ku Edeni kanji havanalye shepo sha nnandi umo. (Kutunduvanga 2:15-17) Kanji vanavo vandyamuwa kulya shepo sha nnandi awo. Eva “andítwala shepo sha nnandi awo kutwala kulya.” Badae yake Adamu “momo andílya.” (Kutunduvanga 3:6) Kwa kutenda davo vanavo vandíleka kumwigwilila Nnungu. Adamu namu Eva vavele vakwaloka, ndyomana shivele shinu shíkakamadyanga vanavo kutenda shinu shambone. Kanji vanavo vandyamuwa mene kumwigwilila Yeova, vakatende davo vanavo vandítega na vandíta kulangalalegwa na Nnungu. Wamushi awo undidanavo mauvilo loe kwavo.—Kutunduvanga 3:16-19.

3. Wamushi umwe Adamu namu Eva wambukishidye dashi shingumi shetu?

Adamu namu Eva pavatagile, vanavo vandíleka kuva vanu vakwaloka, kwamwaa wa shinu asho vandivambukisha vanavo uti lidambi. Ibibiliya inkuvalanga kwaupande umwe Adamu iishidoni: “Kulingana kenga mo mwaliinjilidile lidambi mushilambo shapai kwaindila yamunu jumo na kupela kwaindila yalidambi, napane momo kupela kwandavala kwavanu uti.”—Valoma 5:12.

Kwamwaa walidambi lankutukodya mauvilo loe. Myanda vinji wetu tunkuvauvanga kwamwaa wa wamushi wakunyata watumya. Wakati unji wetu tunkuva kwamwaa wa wamushi vakunyata wavaumya vanu vanji. Wakati unji wetu tunkuvauvanga kwamwaa wakupagwa mumautu lakujowa na wakati ukavaikidile.—Shomya Nkúvalanga 9:11.

LAMBELA KUMANYA VYOE

4. Atadidye mushilambo lapagwe mauvilo

Vanu voe vamini kenga Nnungu ni alaledya shilambo. Tushidoni shinu ashi shiu? Lola VIDEO.

VIDEO: Nyani alaledya shilambo? (1:24)

Shomya Tiyagu 1:13 na 1 Nshuwau 5:19, na badae mwambangile mwaa shakudya sha mwina:

• Da Nnungu ni atadya upagwe ukalau na mauvilo?

5. Lola nyamani shumilidile na kulangalela kumwe Shatwani

VIDEO: Mwaa shani Nnungu ankuleka mauvilo mushilambo?—Imbande (3:07)

Shomya Kutunduvanga 3:1-6, na badae mwambangile mwaa vyakudya vya mwina:

• Ushwang’a shani wavalénge Shatwani?—Lola nshitali 4,  na 5.

• Shatwani avashang’apidíle dashi vanu kenga Yeova shipali shambone shapiidye?

• Kulingana na shatangwele Shatwani, da vanu vankulota ishilikali imwe Yeova pakulota vapuwange?

Shomya Nkúvalanga 8:9, na badae mwambangile mwaa shakudya sha mwina:

• Pakuva Yeova hanava shinu alaledya shilambo, shinkutandeka nyamani?

1. Adamu namu Eva vavele vakwaloka na vashinama ku Palaishu. Kanji vanavo vamwigwilidíle Shatwani na vakampinga Yeova

2. Kwamwaa wakupinga, shilambo shindyumbaligwa na lidambi, mauvilo na kupela

3. Yeova anamalidya lidambi, mauvilo na kupela. Vanu vanaujila kuva wakwaloka na kunama ku Palaishu

6. Yeova ankutwangaikangila patuvauvanga

Da Nnungu ankutwangaikangila muwakati watuvauvanga? Tuke tulole nyamani shandike Umu Daudi namu myombe Patulu. Shomya Dimu 31:7 na 1 Patulu 5:7, na badae mwambangile mwaa shakudya sha mwina:

• Wako unkuligwa dashi kwa kumanya kenga Yeova ankwona na ankutwangaikangila tukauvauvanga?

KWAUNGWIPI

Shatwani, Adamu namu Eva ni vatadidye lapagwe mauvilo mushilambo uti. Yeova ankutwangaikangila namene wetu, na muwakati wakuvandika anauka namalidya mauvilo mushilambo uti.

Tukumbukilange

• Shatwani Ndamoni anduwenge dashi Eva?

• Wamushi umwe Adamu namu Eva wambukishidye dashi shingumi shetu?

• Tunkumanya dashi kenga Yeova ankutwangaikangila patuvauvanga?

LIPUNDISHE

Lidambi ni nyamani? Lola mwaivalangila Ibibiliya.

“Dhambi Ni Nini?” (Makala iliyo kwenye mtandao)

Shomya kwaupande wa ing’ano yaumilididye Shatwani Ndamoni, ku liteka lya ku Edeni.

“Kwa Nini Mungu Anaruhusu Watu Wateseke?” (Mnara wa Mlinzi, Januari 1, 2014)

Pata majibu lyakupambadyanga kwa shakudya ashi shakukamadyanga.

“Kwa Nini Wayahudi Wengi Waliuawa? Kwa Nini Mungu Hakuzuia?” (Makala iliyo kwenye mtandao)

Lola nyamani shalipundishidye nnume kwaupande wa mauvilo lapitidile.

Nangu hangunaligwa shinu kavili gweka (5:09)