LISHOMO 56
Shunga upamo pashipinga
Tukapagwa na vanung’unumunu vetu tunaligwa kenga Umu Daudi: ‘Ni shinu shambone na ni shinu shalipuwilo vanung’unumunu kunama kwa upamo!’ (Dimu 133:1) Kanji upamo awo haunatandeka shingangala. Kula munu immaikidile atende imbande yake.
1. Venentete vake Nnungu vavenavo nyamani shapagweka?
Wako ukapagwa mu nkutano mushilambo shapanda, ata ukanaigwa inangodi, wako unkuulula kuligwa kenga uvele kukaja. Mwaa wa nyamani? Mwaa tunkushomya Ibibiliya na mabuku lamulolo mushilambo uti. Na tunalikanyalidya namene kulodya linagwaledyo kula munu na muje. Kwabila kujali lyutu lyatwaloka, uti wetu ‘tunatambulanga lina limwe Yeova kwambangidya tulipudye kwa upamo.’—Soponiya 3:9, inota.
2. Ulota kutenda nyamani pakulota ushunge upamo?
“Bai nagwaladyania kwabila kudabadabanga kwa ntima.” (1 Patulu 1:22) Ulota kutenda dashi davo? Haunalole vyakunyata vya vanu vanji kanji lola mavalelo lavo lambone. Kuleka kutenda umbodi na vanu vavenavo vinu vimo vyovyo, likanyalidye kuvamanya vanung’unumunu vanji. Ivaikidile tulikanyalidye tumye mavalelo lakupambula ikava kenga tunkuvanavo.—Shomya 1 Patulu 2:17.a
3. Shikuvaikidile utende nyamani ukanaigwanianavo nung’unumunu?
Wetu ni tuvanu vaupamo, kanji momo hatunava shinu vakwaloka. Wakati unji tunkuulula kutajana shitundi kula munu na muje. Ndyomana Ibibiliya inkutwaulila iishidoni: “Pililanila . . . namomo inkushidoni pakuva Yeova aninnivaliva mwenu namwenu momo livalivanila.” (Shomya Vakoloshu 3:13.) Hainaululika shinu kuvalangila myanda mingapi vyatuntajile Yeova shitundi. Ata ikava davo nae ankutulivaliva, ndyomana nae ankulota tuvalivalive vanung’unumunu vetu. Wako ukamanya kenga uninkawedya mujo lambela inamuna yakwangangola litatisho pakulota ipagwe amani.—Shomya Mateu 5:23, 24.b
LAMBELA KUMANYA VYOE
Manya mwashi mwakutandela pakulota ipagwe amani na upamo pashipinga.
Ulota kutenda nyamani pakulota kwidanavo amani?
4. Tema kupambula
Ituvaikidile tuvanagwaledye vanung’unumunu uti. Kanji inkuulula kuva shinu shakukamadyanga na munu watumwona kenga andivilingananga namu wetu. Shilota kutupwashela nyamani? Shomya Vitendo 10:34, 35, na badae mwambangile mwaa vyakudya vya mwina:
Yeova hanava shinu wakupambula, munu woewoe ankuulula kulipudya kwake. Shinu ashi shilota kukwambukisha dashi wako kwa avalá vavilinganenge namu wako?
Kupambula shani kupagwite kulyutu lyaunama kuvaikidile unyeme?
Shomya 2 Vakolintu 6:11-13, na badae mwambangile mwaa shakudya vya mwina:
Ulota kummandika dashi nung’unumunu au numbumunu avilinganenge namu wako?
5. Livaliva na ntima wako uti na tenda amani
Hayululika wetu Yeova kutulivaliva kwabila kutenda shinu, ata ikava davo nae anatulivaliva. Shomya Dimu 86:5, na badae mwambangile mwaa vyakudya vya mwina:
Kulivaliva kumwe Yeova kumalilikila mpaka pashi?
Mwaa shani wako unkulambwalela kulivaliva kumwe Yeova?
Indituvaikila twigwanie na vanu uti, shinu shani shilota kututadya pakulota hatunaigwanie na vanu vanji?
Tulota kunjedya dashi Yeova kupagwa pamo na vanung’unumunu na valumbumunu vetu? Shomya Mikong’o 19:11, na badae mwambangile mwaa shakudya sha mwina:
Munu akakutaja shitundi au akakulimbula shivaikidile utende nyamani pakulota kupagwe kwigwania?
Wakati unji wetu tunavalimbula vanu vanji. Kanji shikatandeka davo ituvaikidile tutende nyamani? Lola VIDEO, na badae mwambangile mwaa shakudya sha mwina.
Kulingana na video, numbumunu atandile dashi amani?
6. Lola mavalelo lambone lavanung’unumunu na lavalumbumunu
Patuka mushu tupagwa pamo na vanung’unumunu na valumbumunu vetu, tunamanya shana mavalelo lavo lambone na kudabadabanga kwavo. Tulota kuulula dashi kulola mavalelo lambone lavanung’unumunu na lavalumbumunu vetu? Lola VIDEO, na badae mwambangile mwaa shakudya sha mwina.
Shilota kukupwashela nyamani kulola mavalelo lambone la vanung’unumunu na lavalumbumunu?
Yeova alola mavalelo letu lambone. Shomya 2 Maimyo 16: 9a, na badae mwambangile mwaa shakudya sha mwina:
Wako unkuligwa dashi pakumanya kenga Yeova ankumanya mavalelo ako lambone?
Ata ipete ya mali ikavanavo kasholo, yanavo hainaleka kuvanavo mana makumene. Nimumo momo, vanung’unumunu na valumbumunu vetu uti havanava shinu vakwaloka, kanji vankuvanavo mana pameo pamwe Yeova
VANU VANJI VANKUSHIDONI: “Nangu ninkuulula kunnivaliva munu, kanji kwanja aide angujugwe shamani.”
Mwaa shani haivaikidile kukumbukila davo?
KWAUNGWIPI
Wako unkuulula kupwashela kupagwa upamo pashipinga, kwa kuva munu wakulivaliva na kulodya linagwaledyo kwa vanung’unumunu uti.
Tukumbukilange
Wako ulota kutema dashi kupambula?
Ulota kutenda dashi wako ukanaigwania na nung’unumunu au numbumunu?
Mwaa shani unkulota kujedya mpano umwe Yeova kwa kuvalivaliva vanu vanji?
LIPUNDISHE
Manya nkong’o umo umwe Yesu utupwashela kunyema kuvaukumu vanu vanji.
Da shana indituvaikila tujugwe shamani ata ikava kenga hatutandile shinu shakunyata?
“Kuomba Msamaha—Ni Njia Bora ya Kufanya Amani” (Mnara wa Mlinzi, Novemba 1, 2002)
Valole valume vavili vashinama kunjini vadikabila dyakuvilingananga mwavapatidile upamo wiu.
Johny namu Gideon: Kunnantandi vavele vamongo, ambi ni vanung’unumunu (6:42)
Manya mwashi mwakwangangalela matatisho na nung’unumunu lákanava kutimbanga amani pashipinga.
“Suluhisha kwa Upendo Hali ya Kutoelewana” (Mnara wa Mlinzi, Mei 2016)
a Lola imbande Igwa shana 6 linagwaledyo linavatadya vaklistu kwangaikangila shingumi sha vanu vanji, shinu ashi shinkuvika nkati kulishunga shana pakulota haunavambukishe shilwele vanu vanji.
b Lola imbande Igwa Shana 7 lambela kwangangola matatisho la nshulusho na laishaliya na nung’unumunu.