Juízis

8 Nton, kes ómi di Efrain fla-l: “Pamodi ki bu faze kel-li ku nos? Pamodi ki bu ka txoma-nu kantu bu bai pa géra ku kes midianita?” I es fika ta pâpia xatiadu ku el. 2 Má el fla-s: “Kuzê ki N faze konparadu ku nhos? Kes réstu di uva di Efrain é ka midjór ki kes kodjéta di uva di Abiezer? 3 É ka na nhos mô ki Deus intrega Orebe i Zebe, kes prínsipi di kes midianita? Nton, kuzê ki N faze konparadu ku nhos?” Kantu el fla-s kel-li,* es fika más kalmu.*

4 Dipôs, Jidion txiga na Jurdon i el trabesa riu djuntu ku kes 300 ómi ki staba djuntu ku el. Es staba kansadu, má es kontinua ta bai tras di ses inimigu. 5 Nton, el fla kes ómi di Sukote: “Favor, nhos da kes ómi ki sta djuntu ku mi pon, pamodi es sta kansadu i N sta ta pirsigi Zeba i Zalmuna, kes rei di kes midianita.” 6 Má, kes prínsipi di Sukote fla-s: “Pamodi ki nu ten ki da nhos pon? Pur akazu dja bu pega Zeba i Zalmuna?” 7 Jidion responde: “Dja ki nhos fla kel-li, óras ki Jeová intrega Zeba i Zalmuna na nha mô, N ta kastiga nhos ku kes planta di dizértu ki ten spinhu.” 8 Di la, el bai pa Penuel i el pidi mésmu kuza. Má kes ómi di Penuel fla-l mésmu kuza ki kes ómi di Sukote. 9 Nton, el fla kes ómi di Penuel: “Óras ki N ganha géra i N volta,* N ta distrui kel tori li.”

10 Zeba i Zalmuna staba na Karkor djuntu ku uns 15 mil trópa. Kes-li éra kes ki resta di tudu kes trópa di Orienti, pamodi 120 mil di kes ómi armadu ku spada dja moreba. 11 Jidion kontinua ta subi pa kel kaminhu di kes algen ki ta moraba na ténda i ki ta fikaba na lésti di Noba i di Jogbeá. Jidion bai sen es da kónta i el ataka-s na undi ki es tinha ses ténda armadu. 12 Zeba i Zalmuna, kes dôs rei di kes midianita, fuji. Má Jidion bai ses tras i el pega-s. Pur isu, tudu algen ki staba na kes ténda fika dizorientadu i ku txeu medu.

13 Dipôs Jidion, fidju di Joás, volta di géra pa kel kaminhu ki ta subi pa Eres. 14 Na kaminhu, el pega un jóven di Sukote i el faze-l pergunta. I kel jóven skrebe-l nómi di 77 prínsipi i ansion di Sukote. 15 Dipôs, Jidion bai ti kes ómi di Sukote i el fla-s: “Zeba i Zalmuna sta li. Nhos ta lenbra kantu ki nhos faze-m trósa, i nhos fla-m: ‘Pamodi ki nu ten ki da pon pa bus ómi ki sta kansadu? Pur akazu dja bu pega Zeba i Zalmuna?’” 16 Nton, el pega kes ansion di kel sidadi i ku kes planta di dizértu ki ten spinhu, el da kes ómi di Sukoti un lison. 17 Tanbê, el distrui kel tori di Penuel i el mata kes ómi di kel sidadi.

18 El pergunta Zeba i Zalmuna: “Modi ki éra kes ómi ki nhos mata na Tabor?” Es responde: “Es éra sima bo, kada un di es ta parseba ku fidju di un rei.” 19 Nton el fla: “Es éra nhas irmon, fidju di nha mai. N ta jura pa Jeová, kel Deus bibu, ma si nhos ka mataba es, N ka ta mataba nhos.” 20 Nton, el fla Jeter, ki éra se primeru fidju: “Labanta i mata-s!” Má, Jeter ka puxa se spada pamodi el éra jóven i el staba ku medu. 21 Pur isu, Zeba i Zalmuna fla: “Mata-nu abo, pamodi un ómi ta mididu pa se forsa.”* Nton, Jidion mata Zeba i Zalmuna, i el tra kes infeitu* ki staba na piskôs di ses kamelu.

22 Dipôs, kes ómi di Israel fla Jidion: “Governa-nu abo, i tanbê bu fidju i bu nétu, pamodi é bo ki salva-nu di mô di kes midianita.” 23 Má Jidion fla-s: “N ka ta governa nhos, nen nha fidju ka ta governa nhos. É Jeová ki ta governa nhos.” 24 Tanbê Jidion fla: “Dexa-m pidi nhos un kuza: di kes kuza ki nhos toma, kada un di nhos da-m un argóla di poi na narís.” (Pamodi kes ismaelita ta uzaba argóla di oru pa poi na narís.) 25 Es fla: “Nu ta da-u sin.” Nton, es stende un ropa i kada ómi poi na el un argóla di poi na naris ki es panha di kes kuza ki es toma. 26 Kes argóla di oru di poi na narís ki el pidi ta pezaba 19 kilu,* sen konta ku kes infeitu ki ta parseba ku meia-lua, kes brinku, kes ropa di lan brumedju ki kes rei di kes midianita ta uzaba i kes kolar di kes kamelu.

27 Jidion uza kel oru pa faze un éfodi* i el mostra-l na Ofra, se sidadi. I la tudu Israel adora* kel éfodi. Di kel manera li, kel éfodi poi Jidion i se família ta kai na prubléma.

28 Nton, kes israelita ganha kes midianita, i kes midianita ka amiasa-s* más. I na ténpu di Jidion téra tevi pas* duránti 40 anu.

29 Nton Jerubal, fidju di Joás, volta pa kaza i el fika la.

30 Jidion bira pai di 70 fidju,* pamodi el tevi txeu mudjer. 31 I kel konkubina* ki el tinha na Sikén tanbê da-l un fidju, i el pô-l nómi di Abimeleki. 32 I Jidion, fidju di Joás, móre na un bon bedjisa i el interadu na sipultura di se pai, Joás, na Ofra, sidadi di kes disendenti di Abiezer.

33 Lógu dipôs ki Jidion móre, kes israelita kumesa ta adora Baal* otu bês i es skodje Baal-Berite pa ser ses deus. 34 Kes israelita ka lenbra di Jeová, ses Deus, ki dja libraba es di mô di tudu ses inimigu na ses vólta. 35 I nen es ka mostra amor lial pa família di Jerubal, ki é Jidion, pa tudu kuza dretu ki el fazeba pa Israel.