Sugunda Koríntius
6 Nos ki sta trabadja djuntu ku Deus, tanbê nu ta pidi nhos pa nhos ka seta kel grandi bondadi di Deus i skese di se obijetivu. 2 Pamodi el ta fla: “Na ténpu di bon vontadi N obi-u i na un dia di salvason N djuda-u.” Nhos odja! Gósi é ténpu di bon vontadi. Nhos odja! Gósi é dia di salvason.
3 Nu ka ta faze nada ki ta poi algen ta tropesa, asi pa ningen ka pâpia mal di nos trabadju pa Deus. 4 Má di tudu manera nu ta mostra ma nos é sérvus* di Deus, pamodi nu aguenta txeu próva, sufrimentu, ténpus di nisisidadi, difikuldadi, 5 nu sotadu, nu podu na kadia, nu infrenta revólta, nu trabadja duru, nu ka durmi alguns noti i nu pasa fómi. 6 Nu ta vive un vida linpu, nu ta vive di akordu ku konhisimentu, nu ta mostra paxénxa, bondadi, nu ta dexa spritu santu gia nos vida i nos amor é sen finjimentu. 7 Nu ta pâpia verdadi, nu ta kunfia na puder di Deus, nu ta pega na armas di justisa ku mô direita* i ku mô skerda.* 8 Nu ta dadu glória i nu ta dizonradu, nu ta kritikadu i nu ta ilojiadu. Pesoas ta atxa ma nu ta ingana algen, má nu ta pâpia verdadi. 9 Nos é sima algen ki ka konxedu, má Deus konxe-nu; nos é sima algen ki sta kuazi ta móre,* má nu sta bibu; nos é sima algen ki kastigadu,* má nu ka intregadu pa matadu. 10 Pesoas ta pensa ma nu sta tristi, má nu sta sénpri kontenti; ma nos é póbri, má nu ta da txeu kuza bon pa txeu algen; ma nu ka ten nada, má nu ten tudu kuza.
11 Irmons di Korintu, nu abri nos bóka pa pâpia* ku nhos, i nu abri tudu nos korason pa nhos. 12 Nu ka sta ta poi limiti na* nos amor pa nhos, má nhos sta ta poi limiti na nhos amor pa nos. 13 Nton, N sta ta pâpia ku nhos, sima nhas fidju, pa nhos abri nhos korason más txeu tanbê.*
14 Ka nhos djunta* ku kes ki é ka krenti. Pamodi ki ligason justisa ten ku maldadi?* Ô kuzê ki lus ten aver ku sukuru? 15 Tanbê, modi ki Kristu ku Belial* pode sta di akordu? Ô kuzê ki un krenti* ten aver* ku kel ki é ka krenti? 16 I ki akordu ténplu di Deus ten ku imajen? Pamodi nos é ténplu di un Deus bibu; sima Deus fla: “N ta ben mora na ses meiu i N ta ben anda na ses meiu, i N ta ben ser ses Deus i es ta ben ser nha povu.” 17 “Tanbê, Jeová* fla: ‘Pur isu nhos sai di ses meiu, i nhos sipara di es, nhos para di toka na kuzas inpuru, i N ta ben resebe nhos.’” 18 “Jeová,* kel Tudu-Poderozu, tanbê fla: ‘I N ta ben bira un pai pa nhos, i nhos ta ben bira nhas fidju matxu i nhas fidju-fémia.’”