Janeru

Kantu Muizes éra prínsipi na Ijitu, el ka éra un algen mansu. Un bês, el odja un ómi ta faze un kuza ki el atxa ma ka staba dretu. El fika txeu xatiadu ki el mata kel ómi. Muizes atxa ma Jeová ta konkordaba ku kuzê ki el faze. Má, Jeová pasa 40 anu ta djuda Muizes ntende ma pa el sérba líder di Israel sô koraji ka ta txigaba, el tinha ki sérba mansu. I pa el sérba mansu tanbê el tinha ki sérba umildi, obidienti i brandu. Muizes prende kel lison li dretu i el bira un bon líder. (Êxo. 2:11, 12; Atos 7:21-30, 36 ) Oji tanbê, xéfis di família i ansions debe imita Muizes. Óras ki otus algen ka ruspeta-u, ka bu mágua faxi. Ser umildi i lenbra ma bo tanbê bu ta fadja. (Ecl. 7:9, 20) Rezolve kes prubléma sima orientason di Jeová ta fla, asi bu ta mostra ma bo é obidienti. I sénpri responde ku brandura. (Pro. 15:1) Óras ki xéfis di família i ansions ta aji di kel manera li, Jeová ta fika kontenti. Tanbê, es ta djuda ten pas i ses izénplu ta inxina-nu modi ki ta mostradu mansidon. w19.02 8 ¶1; 10 ¶9-10

Pamodi ki Jizus xinti péna i el mostra ma el ta preokupaba ku kes algen? El odja ma kes algen ‘éra sima ovelhas sen pastor.’ Talvês, Jizus odja ma alguns di es éra póbri i es tinha ki trabadjaba dimás pa sustenta ses família. Otus talvês staba ta sufri pamodi mórti di algen ki es ta amaba txeu. Nton, Jizus ta ntendeba ses situason. Talvês el pasa pa alguns di kes prubléma li. Jizus ta preokupaba ku otus i el ta xintiba txeu vontadi di pâpia di un mensaji ki ta konsolaba es. (Isa. 61:1, 2) Kuzê ki nu ta prende ku izénplu di Jizus? Sima Jizus, nu sta serkadu di pesoas ki sta ‘sima ovelhas sen pastor’. Es sta pasa pa txeu prubléma. I nu sabe ma es meste obi notísias sábi di Reinu. (Apo. 14:6) Nton, nu ta imita Jizus óras ki nu ta prega notísias sábi pamodi nu ta ‘xinti péna di koitadu i di póbri’. (Sal. 72:13) Nu ta fika tristi di odja sufrimentu di algen i nu krê faze algun kuza pa djuda-s. w19.03 21-22 ¶6-7

Nu ten txeu motivu pa nu ama Jeová. El ta da-nu kuzas sábi tudu dia i tanbê el ta inxina-nu verdadis sobri el i sobri se vontadi. (João 8:31, 32 ) El da-nu kongregason pa gia-nu i pa apoia-nu. El ta djuda-nu lida ku nos prubléma gósi i el ta da-nu un speransa di ten un vida perfetu pa tudu ténpu na futuru. (Apo. 21:3, 4) Óras ki nu ta pensa na tudu kuza ki Jeová dja faze pa mostra ma el ta ama-nu, nos tanbê nu ta xinti vontadi di ama-l. I kel amor, ta djuda-nu xinti medu di mágua Jeová, nos Deus ki nu ta ama txeu. Óras ki sénpri bu ta lenbra ma sigi orientasons di Jeová ta da bons rezultadu, bu amor pa el i pa se leis ta bira más txeu. Nton, ka ten nada ki Satanás pode oferese-u ki ta pô-u ta dexa di sirbi Jeová. Imajina bu kabésa di li mil anu. Óras ki bu odja pa tras, bu ta ten sertéza ma batiza foi midjór disizon ki bu toma na bu vida! w19.03 6 ¶14; 7 ¶19

Família interu ta ganha óras ki kada un di es ta mostra gratidon. Óras ki maridu ku mudjer ta da kunpanheru valor, es ta bira más amigu inda. Tanbê ta fika más faxi púrdua kunpanheru. Maridu ki ta da valor pa se mudjer, ta odja kes kuza dretu ki el ta fla i ki el ta faze, má tanbê el ‘ta labanta i el ta ilojia-l.’ (Pro. 31:28) Tanbê un mudjer ki ten sabedoria, ta dexa se maridu sabe di kes kuza ki el ta gosta na el. Pai ku mai, modi ki nhos pode inxina nhos fidju mostra gratidon? Nhos lenbra ma nhos fidju ta imita kes kuza ki nhos ta fla i ki nhos ta faze. Nton, nhos fla nhos fidju obrigadu óras ki es faze alguns kuza pa nhos. Asi, nhos ta da-s un bon izénplu. Tanbê nhos inxina-s fla obrigadu óras ki otus algen ta faze kuzas pa es. Nhos djuda-s ntende ma mostra gratidon ta ben di korason i ma ses palavra pode djuda txeu. w19.02 17 ¶14-15

Ku kes palavra li, Jó mostra ma el staba disididu na mante se lialdadi, ka ta nporta kuzê ki podia kontiseba. Nos tanbê nu pode faze sima el. Anos tanbê nu sta nvolvidu na kuzê ki Satanás fla sobri Jó. Modi? Satanás fla ma bu ka ta ama Jeová di verdadi. Tanbê el fla ma si bu vida sta na prigu, bu ta para di sirbi Jeová pa bu pode salva bu vida. I ma bu lialdadi é falsu! (Jó 2:4, 5; Apo. 12:10) Modi ki bu ta xinti ku kel-li? Ta duê, ka simé? Má pensa na kel-li: Jeová ta kúnfia txeu na bo ki el sta ta dexa Satanás prova bu lialdadi. Jeová ta kúnfia ma bu ta kontinua lial i ma bu ta djuda prova ma Satanás é mintirozu. I Deus promete ma el ta djuda-u kontinua lial. (Heb. 13:6) É un priviléjiu grandi sabe ma kel algen Más Grandi di Séu ku Téra ta kúnfia na bo. Bu konsigi odja pamodi ki lialdadi é txeu inportanti? El ta djuda-nu prova ma Satanás é mintirozu i el ta mostra ma nu sta di ladu di Jeová i ma nu ta kridita ma se manera di governa é midjór pa nos. w19.02 5 ¶9-10

Jizus fla se apóstlus ma es ta ben pasaba pa txeu provason. El uza se própi izénplu pa fla-s: ‘Nhos ten koraji!’ (João 16:1-4a, 33 ) Txeu ténpu dipôs, disiplus di Jizus kontinua ta preokupa ku otus i ta imita koraji di Jizus. Nbóra es sufri txeu, sénpri es apoia kunpanheru na tudu prublémas. (Heb. 10:33, 34) Nos tanbê nu ta sigi izénplu di Jizus óras ki nu ta mostra koraji. Pur izénplu, nu meste ten koraji pa nu djuda nos irmons ki sta sufri pirsigison pamodi ses fé. Alvês, nos irmons ta podu na kadia sô pamodi es é Tistimunhas di Jeová. Óras ki kel-li kontise nu meste faze tudu kel ki nu pode pa djuda-s. I si meste, nu ta difende-s. (Fil. 1:14; Heb. 13:19) Otu manera di nu mostra koraji é óras ki nu ta kontinua ta prega ‘sen medu’. (Atus 14:3, BPK ) Sima Jizus, nu sta disididu na prega mensaji di Reinu, mésmu ki pesoas ta fika kóntra nos i ta pirsigi-nu. w19.01 22-23 ¶8-9

Kuzê ki pode djuda-u da komentárius na runion ki ta nkoraja otus? Más inportanti é pripara pa kada runion. Si bu krê da komentáriu i bu pripara dretu, bu ta xinti más kunfiansa. (Pro. 21:5) Modi ki nu ta pripara dretu pa runions? Pidi spritu santu di Jeová antis di bu kumesa kada studu. (Luc. 11:13; 1 João 5:14 ) Dipôs, tra alguns minutu pa pensa na téma, na subtéma, na ilustrasons i na kuadrus. Sima bu ta ba ta studa kel parágrafu, tenta lé tudu testu ki bu ta pode. Midita na kuzê ki bu sta lé, prinsipalmenti kes ki bu krê faze komentáriu. Sénpri ki bu pripara más dretu, bu ta prende más txeu i ta fika más faxi da komentárius. — 2 Cor. 9:6. w19.01 9 ¶6; 11-12 ¶13-15

Má, Jeová manda Abakuki pa skrebe sobri se prublémas. Kel-li ta inxina-nu un lison inportanti: nu ka meste xinti medu di konta Jeová nos preokupasons ô algun kuza ki nu ka sta ntende. Pur isu, el ta konvida-nu pa nu faze orason i pa nu fla-l modi ki nu sta xinti. (Sal. 50:15; 62:8) Abakuki ta kunfiaba na Jeová. Pur isu, el faze di tudu pa el ser más se amigu. Abakuki ka fika sô preokupadu ku se situason i nen el ka kúnfia na se ntendimentu. Má, el fla Jeová kuzê ki el staba ta xinti i ses preokupason. Kel-li é un bon izénplu pa nos. Jeová ki é Kel ki ta obi orason, ta konvida-nu pa nu pâpia ku el sobri nos prublémas. Asi nu ta mostra ma nu ta kúnfia na el. (Sal. 65:2) Óras ki nu ta faze si, nu ta odja ma Jeová ta responde nos orason. Nu ta xinti ma el ta gia-nu i ma el ta konsola-nu. É sima ki el ta da-nu un abrasu ku karinhu. (Sal. 73:23, 24) Ka ta nporta ki prubléma nu sta pasa pa el, Jeová ta djuda-nu ntende modi ki el ta odja nos situason. Pâpia ku Jeová na orason é un di kes midjór manera di nu mostra ma nu ta kúnfia na el. w18.11 13 ¶2; 14 ¶5-6

Davidi ka ta skodjeba sô kes amigu ki tinha mésmu idadi ki el. Bu ta lenbra nómi di un di kes grandi amigu di Davidi? Éra Jonatan. Amizadi ki Davidi ku Jonatan tinha é un di kes amizadi más bunitu ki nu pode lé na Bíblia. Má bu sabia ma Jonatan éra 30 anu más bédju ki Davidi? Nton, pamodi ki es éra txeu amigu? Pamodi es tinha fé na Jeová. Tanbê es ta ruspetaba kunpanheru i es ta daba valor pa bons kualidadi ki kada un di es tinha, sima koraji ki es mostra na luta kóntra inimigus di Deus. (1 Sam. 13:3; 14:13; 17:48-50; 18:1) Sima Davidi ku Jonatan, bu pode ten ‘txeu alegria’ óras ki bus amigu ta ama Jeová i es ten fé na el. Un irman ki txoma Kiera, ki dja ten txeu anu ta sirbi Jeová fla: “N faze amizadis ku algen di mundu interu. Pesoas ku stória i kultura diferenti.” Si bu faze mésmu kuza, bu ta odja ma Bíblia i spritu santu ta djuda-nu ser un família unidu na mundu interu. w18.12 26 ¶11-13

Kes palavra ‘konportamentu seksual mariadu’ pode ser pekadus sima adultériu, prostituison, séksu entri dôs algen ki é ka kazadu, séksu ómi ku ómi ô ku animal. Pur izénplu, si un ómi kazadu faze konportamentu seksual mariadu, se mudjer pode disidi si el ta divôrsia di el ô nau. Repara ma Jizus ka fla ma si un algen kazadu faze adultériu, ma kel maridu ô mudjer fiel tinha ki divorsiaba. Pur izénplu, un mudjer pode skodje fika kazadu ku kel maridu mésmu ki el faze konportamentu seksual mariadu. Pamodi? Talvês kel mudjer inda ta ama-l, el krê purdua-l i es sta sforsa pa ses kazamentu midjora. Tanbê, si kel mudjer divôrsia i el ka kaza otu bês, el pode pasa pa alguns difikuldadi. Pur izénplu, modi ki el ta konsigi sustenta se kabésa i lida ku nisisidadis seksual? El ta konsigi lida ku kes momentu ki el ta xinti el sô? Modi ki divórsiu pode prujudika ses fidjus? (1 Cor. 7:14) Ta fika klaru, ma un maridu ô mudjer fiel ki divôrsia pode pasa pa txeu prubléma. w18.12 12 ¶10-11

Jeová ta ôdia injustisa. (Isa. 61:8) El sabe ma alvês é difísil nu faze kel ki é dretu pamodi nos é inperfetu. Má simé, el krê pa nu pensa sima el i pa nu ôdia kel ki é mau. Si nu ntende pamodi ki Jeová ta ôdia kuzas mariadu, kel-li ta djuda-nu pensa sima el i ta da-nu forsa pa nu ka faze kes kuza ki el ta ôdia. Si nu prende ôdia kel ki é mau, tanbê el ta djuda-nu sabe óras ki un kuza é mariadu, mésmu si Bíblia ka ta pâpia klaru sobri el. Pur izénplu, lap dancing é un tipu di konportamentu seksual mariadu ki dja bira normal oji. Alguns algen ta atxa ma el é diferenti di faze séksu. Nton, es ta atxa ma es ka ten ki ivita-l. Má kuzê ki Jeová ta pensa sobri kel-li? Lenbra ma el ta ôdia tudu tipu di kuzas mariadu. Pur isu, si nu prende kontrola nos kabésa i ôdia kel ki Jeová ta ôdia, nu ta konsigi fika lonji di kalker kuza ki é mariadu. — Rom. 12:9. w18.11 25 ¶11-12

Kel promésa li é txeu inportanti ki apóstlu Polu pâpia di el três bês na se kartas! (Rom. 1:17; Gál. 3:11; Heb. 10:38) Ka ta nporta sufrimentu ki nu sta ta pasa, nu pode ten sertéza ma si nu kontinua lial i ku fé na Jeová, nu ta ben odja se promésas ta kunpri. Jeová krê pa nu mante konsentradu na nos speransa pa futuru. Livru di Habacuque ten txeu lison inportanti pa nos ki sta vive na ténpu di fin. Jeová promete ma el ta da vida pa tudu ténpu, pa kalker algen ki kúnfia na el. Pur isu, ka ta nporta ki prublémas ô preokupasons ki nu tene, nu kontinua ta omenta nos kunfiansa na Deus. Kuza ki Jeová fla Abakuki ta da-nu sertéza ma el ta ben djuda-nu i el ta ben salva-nu. El ta pidi-nu ku amor pa nu kúnfia i pa nu spéra ku paxénxa ti ki txiga kel dia ki el tene markadu pa traze se Reinu pa governa Téra. Na kel ténpu, Téra ta ben sta xeiu di algen filís, ki gosta di pas i ki ta adora sô Jeová. — Mat. 5:5; Heb. 10:36-39. w18.11 16-17 ¶15-17

Kantu Jizus staba na Téra, alguns di kes ki bira se disiplus dexa di sigi-l. Pur izénplu, kantu Jizus faze un milagri i el da txeu algen kumida, es sigi-l ti kel otu ladu di Mar di Galilea. Nton, Jizus fla un kuza ki es ka sta speraba. El fla: ‘Si nhos ka kume karni di Fidju di Ómi i bebe se sangi, nhos ka ten vida na nhos.’ Envês di es fla Jizus pa splika-s, es fika ofendidu i es fla: ‘Ken ki pode obi kel-li?’ Pur isu, ‘txeu di se disiplus, volta pa kes kuza ki es dexaba pa tras i es para di anda ku el.’ (João 6:53-66 ) Oji tanbê é tristi di odja ma alguns afasta di verdadi. Alguns tropesa pamodi algun kuza ki un irmon ki ten txeu responsabilidadi na organizason fla ô faze. Otus fika maguadu pamodi konsedju di Bíblia ki es dadu ô pamodi algun prubléma ku otu irmon. w18.11 9 ¶3-5

Si organizason faze un mudansa i bu ka ntende, pensa modi ki Kristu lidera kongregason na pasadu. Na ténpu di Juzué i na ténpu di apóstlus, Kristu sénpri da orientasons ku sabedoria pa proteje povu di Deus. Kel-la poi ses fé bira más fórti i djuda-s kontinua unidu. (Heb. 13:8) Oji, ‘skravu fiel i prudenti’, ta da-nu orientason ki nu meste déntu di óra. (Mat. 24:45) Kes orientason ta mostra ma Kristu sta ta kuida di nos. Óras ki nu odja modi ki Kristu sta ta orienta-nu, nu ta ntende ma el krê djuda-nu mante nos fé fórti. Tanbê Kristu ta djuda-nu mante konsentradu na nos trabadju di pregason, ki é trabadju más inportanti ki sta fazedu oji. — Mar. 13:10. w18.10 25 ¶13-16

Un izénplu di umildadi ki ta djuda-nu kontrola nos kabésa óras ki algen ofende-nu, é kel ki nu ta atxa na 2 Samuel 16:5-13. Un família di Saul ki txomaba Simei, provoka Davidi i ti el ataka-l, el ku se sérvus. Davidi podia kababa ku kel situason kel óra. Má ku paxénxa, el aguenta kel provokason di Simei. Kuzê ki djuda Davidi kontrola se kabésa? Pa riba di Salmo 3, ta fla ma el skrebedu kantu Davidi staba ta ‘fuji di se fidju Absalon’. Informasons ki sta na versíklus 1 i 2 ta konbina ku kapítlu 16 di 2 Samuel. Na Salmo 3:4 Davidi fla: ‘N ta txoma Jeová riju, i el ta responde-m’. Sima Davidi, nu pode faze orason pa Jeová ta pidi forsa, óras ki algen trata-nu mal. Bu ta konsigi pensa na algun situason ki ta iziji pa bu kontrola bu kabésa más txeu? Ô situasons ki bu meste púrdua un algen ki trata-u mariadu? Bu ta kridita ma Jeová sta ta odja bu prubléma, ma el ta djuda-u i el ta abensua-u? w18.09 6-7 ¶16-17

Óras ki nu sta da tistimunhu, sénpri nu debe mostra preokupason i trata otus ku ruspetu. Pa kel-li, nu meste konxe dretu kes algen di nos tiritóriu. Nu ka debe skese ma óras ki nu sta na pregason di kaza en kaza, pesoas ka ta sta ta spera-nu pamodi es ka konvida-nu. Pur isu, é bon nu vizita-s na un óra ki es ta pode pâpia ku nos. (Mat. 7:12) Pur izénplu, pesoas na bu tiritóriu ta gosta di labanta más tardi na fin di simana? Nton bu pode kumesa ta prega na rua, na tistimunhu pa públiku ô ta revizita kes algen ki bu sabe ma ta labanta sédu. Monti algen ten un vida txeu okupadu. Pur isu, nu debe ser brévi, prinsipalmenti na komésu. É midjór nu finda un konbérsu más sédu di ki fika txeu ténpu. (1 Cor. 9:20-23) Óras ki pesoas repara ma nu sabe ma es sta okupadu, es pode fika más avontádi pa seta un revizita. Si nu mostra kes kualidadi di frutu di spritu na pregason, nu sta ser ‘kolaboradoris di Deus.’ I nen nu ka sabe si Jeová ka pode uza-nu pa djuda un algen konxe verdadi. — 1 Cor. 3:6, 7. w18.09 32 ¶15-17

Modi ki brandura pode djuda algen ser filís? Txeu algen antis di konxe verdadi éra mal idukadu, konfuzéntu i violéntu. Má kantu es prende verdadi es muda ses vida i es bisti di ‘kel novu manera di ser’. Gósi es ta konsigi mostra ‘konpaxon, bondadi, umildadi, brandura i paxénxa.’ (Col. 3:9-12) Pur isu, es ten pas, bon amizadi ku otus i es é filís. Tanbê, Palavra di Deus ta promete ma kes algen li ‘ta ben toma kónta di Téra.’ (Sal. 37:8-10, 29) Kuzê ki Jizus krê flaba kantu el fla ma kes algen brandu ta ben erda Téra? Kes skodjedu ku spritu santu ta ben erda Téra, óras ki es bira reis i saserdótis i es kumesa ta governa Téra. (Apo. 20:6) Milhons di kes otu ki ka ten speransa di bai pa Séu, ta ben erda Téra óras ki es ben vive na el pa tudu ténpu. Es ta ben bira perfetu, es ta ten pas i filisidadi. w18.09 19 ¶8-9

Jeová é midjór izénplu ki nu pode imita. (Gén. 18:32; Jos. 10:14) Pensa na se konbérsu entri el ku Muizes ki sta na Êxodo 32:11-14. Jeová ka mesteba opinion di Muizes pa el tomaba disizon. Má simé, el dexa Muizes fla kuzê ki el staba ta xinti. I nbóra Muizes dja fadjaba txeu bês, Jeová faze kel ki Muizes fla-l. I bo? Bu ta tinha paxénxa di faze kel-li? É si ki Jeová ta faze pa tudu ken ki ta ora pa el ku fé. Pergunta bu kabésa: ‘Si Jeová mostra txeu umildadi pa obi algen, sima Abraon, Rakel, Muizes, Juzué, Manuá, Elias i Ezekias, ami N ka debe faze mésmu kuza? N ka debe mostra ma N ta da nhas irmon más valor, óras ki N ta obi ses ideia, i si da, faze sima es fla? Ten algun algen na nha kongregason ô na nha família ki na kel momentu li sta meste pa N obi-l i djuda-l? Kuzê ki N debe faze pa N djuda-l?’ — Gén. 30:6; Juí. 13:9; 1 Reis 17:22; 2 Cró. 30:20. w18.09 6 ¶14-15

É ka faxi ser un algen ki gosta di da, pamodi nu sta ta vive na un mundu undi ki pesoas ta pensa sô na ses kabésa. Má Jizus fla ma kel dôs mandamentu más inportanti é ama Jeová di tudu nos korason, alma, menti i forsa, i ama nos kunpanheru sima nu ta ama nos kabésa. (Mar. 12:28-31) Ken ki ta ama Jeová ta imita-l. Jeová i Jizus é algen ki gosta di da. Es ta fla ma si nu krê ser filís, nu ten ki ser algen ki gosta di da. Pur isu, nu sforsa pa nu faze más na nos trabadju ki nu ta faze pa Deus i kel ki nu ta faze pa otus. Si nu faze si, nu sta ta onra Jeová, nu ta djuda nos kabésa i otus algen. Nu ka ten dúvida ma dja bu faze bu midjór pa djuda otus, prinsipalmenti bus irmon na fé. (Gál. 6:10) Si bu kontinua ta faze kel-li, pesoas ta fika kontenti ku bo, es ta bira ta ama-u i bu ta ser más filís. w18.08 22 ¶19-20

Pa Jeová, ka ta nporta nos é di ki rasa, tribu ô língua ki nu ta pâpia. El ta seta tudu algen ki ta ruspeta-l i ta faze kel ki é dretu. (Gál. 3:26-28; Apo. 7:9, 10) Talvês kel-li é un kuza ki dja bu sabe dretu. Má i si bu kria na un família ô un país ki ta diskrimina otus algen? Bu pode atxa ma bu ka ta mostra diskriminason. Má bu ta xinti algun diskriminason déntu bo? Nbóra Pedru odja ma pa Deus tudu algen é igual, el mostra ma inda el ta xintiba algun diskriminason. (Gál. 2:11-14) Nton, modi ki nu pode para di julga otus pa kel ki nu ta odja? Pa nu sabe si inda nu ta xinti algun diskriminason, nu pode konpara nos atitudi ku kel ki nu prende na Palavra di Deus. (Sal. 119:105) Nu pode pergunta un amigu di kunfiansa si el odja-nu ta mostra algun tipu di diskriminason. (Gál. 2:11, 14) Talvês, nu sta txeu kustumadu na aji di un manera, ki nen nu ka ta da kónta si nu sta mostra diskriminason. w18.08 9 ¶5-6

Pergunta bu kabésa: ‘Otus algen ta konsigi odja ma N ta sirbi sô Jeová? N ta xinti orgulhu di fla otus algen ma mi é un Tistimunha di Jeová?’ Imajina modi ki Jeová ta fikaba tristi si nu xinti vergónha di fla otus algen ma nos é di sel. (Sal. 119:46; Mar. 8:38) É tristi di odja ma alguns irmon ta imita ‘spritu di mundu’. Ten poku diferénsa entri es i kes algen ki ka ta adora Jeová. (1 Cor. 2:12) Spritu di mundu ta poi algen ta pensa sô na dizeju di karni. (Efé. 2:3) Pur izénplu, organizason dja da-nu txeu konsedju, má simé alguns irmon inda ta uza ropa ki ta mostra falta di ruspetu pa ses kabésa i pa otus algen. Es ta bisti ropa pertadu ô kurtu ki ta mostra pártis di korpu ki ka debe, mésmu óras ki es ta bai runions, asenbleias i kongrésus. Tanbê es ta korta kabélu i es ta faze pentiadu ki ta txoma txeu atenson i ki ta imita stilus di mundu. (1 Tim. 2:9, 10) Pur isu, óras ki es sta na meiu di otus algen, é difísil sabe ken ki é di Jeová i ken ki é ‘amigu di mundu’. — Tia. 4:4. w18.07 24-25 ¶11-12

Nos é ‘irmons’ pamodi nos tudu é fidju di Adon. (Atos 17:26 ) Má é ka sô pamodi kel-li. Jizus splika ma se disiplus é irmons ku irmans pamodi es seta pa Jeová ser ses Pai. (Mat. 12:50) Tanbê nos tudu ta faze párti di família di Deus, unidu pamodi amor i fé. É pur isu ki txeu bês na kartas ki apóstlus skrebe, es ta txomaba otus disiplu di ‘irmons ku irmans’. (Rom. 1:13; 1 Ped. 2:17; 1 João 3:13 ) Dipôs ki el dexa klaru ma nu debe trata kunpanheru sima irmons ku irmans, Jizus mostra ma é inportanti nu ser umildi. (Mat. 23:11, 12) Sima dja nu odja, alvês orgulhu ta dividiba apóstlus. Tanbê na ténpu di Jizus pesoas tinha orgulhu di ses rasa. Má, judeus podia flaba ma es éra midjór di ki otus rasa sô pamodi es éra família di Abraon? Txeu judeu ta pensaba si. Má Juan Batista fla-s: ‘Di es pédras li Deus pode faze fidjus di Abraon.’ — Lúkas 3:8, BPK. w18.06 9-10 ¶8-9

Óras ki nu ta pasa pa situasons ki ta dizanima-nu ô prublémas ki nu pode ten ku algen, nu debe pensa dretu antis di pâpia i mante kalma. (Pro. 10:19; Mat. 5:22) Si algen provoka-nu, nu ten ki prende ‘da lugar pa raiba’. Raiba di kenha? Di Jeová. (Rom. 12:17-21) Envês di fika ku raiba, nu debe kontinua ta odja pa Jeová. Nu debe ten paxénxa i spéra ma Jeová ta rezolve nos prubléma di akordu ku se vontadi. Tenta atxa manera pa nu vinga, ta mostra falta di ruspetu pa Jeová. Nos é fiel na obi ku kes instruson más novu ki Jeová ta da-nu? Envês di faze kuzas di kel manera ki sénpri nu sta kustumadu, nu debe sigi lógu kalker orientason novu ki Jeová ta da através di se organizason. (Heb. 13:17) Tanbê nu debe toma kuidadu pa nu ‘ka pasa di kuzas ki sta skrebedu’. (1 Cor. 4:6) Nu ta mostra ma nu sta ta odja pa Jeová óras ki nu ta sigi se orientasons. w18.07 15-16 ¶17-18

Sima bu ta ba ta sforsa pa bu ser un algen más maduru, bu ta pasa ta da más valor pa prinsípius di Bíblia. Pamodi? Pamodi leis pode sirbi sô pa alguns situason, má prinsípius ta sirbi pa txeu situason. Pur izénplu, un mininu ka ta ntende pamodi ki é prigozu sta djuntu ku maus koléga. Nton, se pai ku se mai ta kria régras pa es pode proteje-l. (1 Cor. 15:33) Má óras ki el fika más grandi, kel mininu ta prende pensa di akordu ku prinsípius di Bíblia. Asi el ta konsigi skodje dretu ken ki debe ser se amigus. (1 Cor. 13:11; 14:20) Di mésmu manera, si nu prende uza prinsípius di Bíblia pa djuda-nu pensa, nu sta trena nos konsénsia di manera ki Jeová krê pa nu pensa. Asi, nos konsénsia sénpri ta djuda-nu toma bons disizon. Jeová ta da-nu tudu ki nu meste pa nu toma bons disizon. Si nu prende uza dretu kes lei i prinsípius ki nu ta atxa na Bíblia, es ta djuda-nu ‘ser totalmenti kapás, ben priparadu pa tudu bon óbra.’ — 2 Tim. 3:16, 17. w18.06 19 ¶14; 20 ¶16-17

Stória di Jizus mostra ma un samaritanu podia inxinaba judeus kuzê ki siginifika ama otus algen. (Lúkas 10:25-37, BPK ) Pa es fazeba kel ki Jizus mandaba es, es tinha ki venseba kalker sentimentu di orgulhu ô diskriminason. Antis di Jizus bai pa Séu, el manda se disiplus pa da tistimunhu na ‘tudu Judea ku Samaria, i na tudu kantu di mundu.’ (Atus 1:8, BPK ) Má txeu ténpu antis, Jizus dja priparaba se disiplus pa kel-li. Sénpri el ta txomaba atenson pa bons kualidadi na kes algen ki éra stranjeru. Pur izénplu, el ilôjia un stranjeru ki éra xéfi di trópa pamodi el tinha un fé fórti. (Mat. 8:5-10) Kantu Jizus staba na Nazaré, el mostra modi ki Jeová djuda dôs stranjeru, sima kel viúva di Sarefá, ki éra di Finísia i Naaman ki éra di Síria. (Luc. 4:25-27) Alén di pâpia ku un mudjer samaritana, Jizus pasa dôs dia na sidadi di Samaria pamodi kes algen krê obiba se mensaji. — João 4:21-24, 40. w18.06 10 ¶10-11

Apóstlu Polu konpara kristons ku trópas ki sta na un géra frenti-frenti. Má es géra é ka kóntra algen sima nos, é un géra spritual. Nos inimigu é Satanás ku se dimónis i es ta izisti di verdadi. Es é bon na géra i es ten txeu spiriénsa. Pode parse ma nu ka ten xansi di ganha-s. Prinsipalmenti jóvens, ki pode parse ma é más faxi Satanás disvia-s. Modi ki es pode konsigi ganha géra kóntra Satanás ku se dimónis? Nu ten sertéza ma jóvens pode ganha i ma es sta ta ganha! Pamodi? Pamodi es sta ‘kontinua ta bira fórti na Sinhor’. Má es ta faze más di ki pidi Deus forsa. Es sta priparadu pa géra. Sima kes trópa ben trenadu, es tene ‘armadura konplétu di Deus’. (Efé. 6:10-12) Kantu Polu faze kel konparason li, talvês el staba ta pensa na armadura ki trópas di Roma ta uzaba. — Atos 28:16. w18.05 27 ¶1-2

Razon más inportanti di nu bai pregason é da glória pa Jeová i santifika se nómi pa mundu interu. (João 15:1, 8 ) Má simé, nu ka ta pode bira nómi di Deus más santu, pamodi se nómi dja é santu ô sagradu. Má repara kuzê ki proféta Izaías fla: ‘Jeová di izérsitu é kel ki nhos debe tene sima santu’. (Isa. 8:13) Kel testu li ta mostra ma un di kes manera di santifika nómi di Deus é pa nu sipara-l di tudu kes otu nómi i djuda otus algen trata-l di mésmu manera. Pur izénplu, óras ki nu ta inxina otus algen sobri kualidadis bunitu di Jeová i se vontadi pa Téra, nu sta ta mostra-s ma tudu kel ki Satanás fla kóntra Jeová é sô mintira. (Gén. 3:1-5) Tanbê óras ki nu ta sforsa pa djuda pesoas na nos tiritóriu odja ma Jeová merese ‘resebe glória, ónra i puder’, nu sta ta santifika nómi di Deus. — Apo. 4:11. w18.05 18 ¶3-4

Kel motivu prinsipal di ten métas spritual é mostra Jeová ma nu sta kontenti pa tudu ki el faze pa nos. Pensa na tudu ki Jeová dja da-u. Bu vida, Bíblia, kongregason, konhisimentu sobri Jeová i speransa di un futuru sábi. Óras ki bu ten un méta spritual é un manera di agradise Jeová pa tudu kel ki dja el da-u. Kel-li ta poi bu amizadi ku Jeová más fórti. Óras ki bu ta sforsa pa alkansa bus méta spritual, Jeová ta odja ma bu krê faze bu midjór i el ta da valor pa kel ki bu ta faze. Kel-la ta pô-u más amigu di Jeová. Apóstlu Polu promete: ‘Pamodi Deus é ka injustu pa skese di nhos óbra i amor ki nhos mostra pa se nómi’. (Heb. 6:10) Nunka bo é jóven dimás pa ten métas. Pamodi ki bu ka ta pensa na ki métas ki é bon pa bo i kumesa ta trabadja pa es? — Fil. 1:10, 11. w18.04 26 ¶5-6

Kes primeru sigidor di Kristu ta viveba na meiu di romanus. I kes romanu ta atxaba ma es éra kes midjór na difendeba lei, justisa i liberdadi. Má, un bon párti di puder i glória ki Inpériu di Roma tinha, éra na kusta di skravus. Txiga un pontu ki 30 pursentu di populason éra skravu. Pur isu, tudu romanus, ti kes kriston, ta papiaba txeu di skravidon i liberdadi. Kartas ki apóstlu Polu skrebe ta pâpia txeu sobri liberdadi. Má, obijetivu di se pregason é ka éra mudaba sosiadadi ô pulítika, nbóra éra kel-li ki povu kreba. Má, envês di spéra ma algun governanti umanu ta trazeba liberdadi, Polu ku kes otu kriston trabadja txeu pa djuda otus prende di notísias sábi sobri Reinu di Deus. Tanbê, el djuda-s ntende valor di sakrifisiu di resgati di Jizus Kristu. Polu orienta kes kriston pa buska kel fonti di liberdadi di verdadi. w18.04 8 ¶1-2

Na kel noti antis di Jizus móre, el fla apóstlu Pedru kuzê ki sta di riba. Pedru prova ma el é un pilar di kongregason. (Gál. 2:9) El nkoraja se irmons na Pentikósti i na otus situason. Dipôs di monti anu di pregason el skrebe pa kristons. El fla: ‘N skrebe nhos na pokus palavra pa N nkoraja nhos i pa N da nhos sertéza ma kel-li é kel bondadi di verdadi di Deus ki nu ka merese. Nhos mante firmi na el.’ (1 Ped. 5:12) Kes karta ki Pedru skrebe kontinua ta da nkorajamentu pa kristons pa monti ténpu i pa nos oji. Kel-li ta nkoraja-nu pa nu kontinua ta spéra ma promésas di Jeová ta kunpri. — 2 Ped. 3:13. w18.04 17 ¶12-13

Na tudu lugar, kuza ki algen más krê é ten liberdadi pa faze kuzê ki es krê ô vive di manera ki es krê. Nbóra pesoas krê ten liberdadi, txeu bês es ka ta konsigi-l. Pur isu, es ta faze manifestason, grévi i ti revólta. Má kel-li ta pô-s ta ten liberdadi ki es krê? É klaru ki nau. Txeu bês el ta traze disgrasa i mórti. Tudu kel-li é un próva di kel ki Rei Salumon fla: ‘Ómi ta manda na ómi pa se disgrasa.’ (Ecl. 8:9) Na testu di oji, disiplu Tiagu fla kal ki é segredu pa ten liberdadi i filisidadi di verdadi. Jeová ki ta da lei perfetu, sabe midjór ki ningen, kuzê ki nu meste pa nu ser filís di verdadi. El da Adon ku Eva tudu kuza ki es mesteba pa es ser filís i kel-li ta inklui liberdadi di verdadi. w18.04 3 ¶1-3