Dizénbru

Un di kes kualidadi ki más ta toka-nu na manera di ser di Jizus é pamodi el ta ntende prublémas ki nu ta pasa pa es, dja ki nos é inperfetu. Kantu Jizus staba na Téra, el ‘txora ku kes ki sta txora.’ (Rom. 12:15) Pur izénplu, kantu kes 70 disiplu volta di pregason kontenti i es konta Jizus rezultadu di ses trabadju, el ‘fika ku txeu alegria através di spritu santu’. (Luc. 10:17-21) Má, kantu el odja ma kes algen ki ta amaba Lázaru staba txeu tristi pamodi el móre, Jizus ‘xinti mágua na korason i el fika tristi.’ (João 11:33 ) Jizus éra un ómi perfetu, má simé el ta xintiba péna i el ta preokupaba ku umanus inperfetu. Pamodi ki el ta xintiba si? Primeru, Jizus ta amaba pesoas. El ta ‘gostaba más txeu di fidjus di ómis.’ (Pro. 8:31) Kel amor ki el tinha pa pesoas, djuda-l sforsa pa el ntende nos manera di pensa. Apóstlu Juan fla: ‘El sabia kuzê ki tinha na ómis.’ — João 2:25. w19.03 20 ¶1-2

Satanás toma tudu kuza ki Jó tinha, el mata se npregadus i el suja se nómi. El ataka se família i el mata se fidjus. Dipôs el ataka korpu di Jó ku un duénsa gravi ki pô-l ta sufri txeu. Mudjer di Jó fika txeu tristi i dizanimadu ki el fla-l pa el dizisti, pa el maldísua Deus i pa el móre. Jó tanbê krê moreba, má simé el kontinua lial. Nton, Satanás tenta ataka-l di un otu manera. El uza três ómi ki éra amigus di Jó pa ba vizitaba el duránti alguns dia. Má, envês di es konsola Jó, es kritika-l di un manera ki pô-l más dizanimadu. Es fla ma éra Deus ki poi tudu kes kuza la ta kontise ku el i ma Deus ka ta nportaba ku se lialdadi. Tanbê, kuzas ki es fla ta mostra ma Jó éra un algen mau i ma el mereseba tudu kel sufrimentu ki kontise ku el! — Jó 1:13-22; 2:7-11; 15:4, 5; 22:3-6; 25:4-6. w19.02 4 ¶7-8

Alguns tipu di medu é bon pa nos. Pur izénplu, nu meste ten medu pa nu ka faze kuzas ki Jeová ka gosta ô pa nu ka perde se amizadi. Si Adon ku Eva dizenvolveba kel tipu di medu li, es ka ta rabelaba kóntra Jeová. Má es rabela. Dipôs ki es faze kel-li, ses odju abri. Kel-li krê fla ma es ntende ma es bira pekador. Úniku kuza ki es podia pasaba pa ses fidju éra pekadu ku mórti. Kantu es ntende ses situason, Adon ku Eva fika ku vergónha pamodi es staba nu i es kubri ses korpu. (Gén. 3:7, 21) Nu meste ten medu di faze kuzas ki Jeová ka gosta. Má, nu ka meste ten medu dimás di mórti. Jeová ranja un manera pa nu ten vida pa tudu ténpu. Si nu faze un pekadu, má nu rapende di korason, Jeová ta purdua-nu nos pekadu. El ta faze kel-la pamodi nos fé ki nu ten na sakrifisiu di se Fidju. Un di kes midjór manera di mostra nos fé é óras ki nu ta da nos vida pa Deus i nu ta batiza. — 1 Ped. 3:21. w19.03 5-6 ¶12-13

Israelitas tinha txeu motivu di mostraba gratidon. Es fika livri di skravatura dipôs ki Jeová manda kes 10 Praga na Ijitu. Dipôs, Jeová torna salva-s más un bês la na Mar Burmedju kantu el kaba ku tudu trópas di Ijitu. Israelitas fika txeu kontenti ki es kanta un kántiku di lovor pa Jeová. Má, es kontinua ta mostra gratidon? Kantu israelitas torna pasa pa otus prubléma, es skese di tudu kes kuza ki Jeová dja fazeba pa es. Es mostra ma es éra ingratu. (Sal. 106:7) Modi? Bíblia ta fla: ‘Tudu asenbleia di Israel kumesa ta rasmunga kóntra Muizes ku Aron’. Na verdadi, es staba ta kexa kóntra Jeová. (Êxo. 16:2, 8) Jeová fika txeu maguadu pamodi se povu ka mostra gratidon. Poku ténpu dipôs, el fla-s ma nason interu di Israel ta moreba na dizértu, ménus Juzué ku Kalebi. — Núm. 14:22-24. w19.02 17 ¶12-13

Jizus ka txoma atenson pa se kabésa pamodi el ka manda pa faze un komemorason konplikadu pa lenbra di se mórti. Má, el fla se disiplus ma es debe faze un komemorason sinplis un bês pa anu pa lenbra di el. (João 13:15; 1 Cor. 11:23-25) Kel runion sinplis i spesial ta mostra ma Jizus ka éra orgulhozu. Nu ta fika kontenti di sabe ma nos Rei é txeu umildi. (Fil. 2:5-8) Modi ki nu pode imita umildadi di Jizus? Óras ki nu ta poi interesi di otus algen más primeru ki di nos. (Fil. 2:3, 4) Pensa otu bês na kel últimu noti di Jizus li na Téra. El sabia ma lógu el ta moreba di un manera ki el ta sufreba txeu. Má simé el staba txeu preokupadu ku se apóstlus fiel, ki lógu dipôs ta fikaba tristi ku se mórti. Pur isu, duránti kel noti el apruveita pa el inxina, nkoraja i konsola se apóstlus. (João 14:25-31 ) Envês di el preokupa ku se kabésa, el staba más preokupadu ku se apóstlus, pamodi el é umildi. El dexa un grandi izénplu pa nos! w19.01 21 ¶5-6

Bu ta xinti bariga ta korta-u sô di pensa na labanta mô pa da komentáriu na runion? Si bu ta xinti si, é ka sô bo. Na verdadi, kuazi nos tudu ta xinti un poku di medu óras ki nu ta da komentáriu. Kes medu li pode ser un bon sinal. Es ta mostra ma bo é umildi i ma bu ta atxa ma kes otu irmon é más midjór di ki bo. Jeová gosta txeu di algen umildi. (Sal. 138:6; Fil. 2:3) Jeová tanbê krê pa bu lova-l i pa bu nkoraja bus irmon na runion. (1 Tes. 5:11) Jeová gosta txeu di bo i el ta da-u koraji ki bu meste. Pensa na alguns testu di Bíblia. Bíblia ta fla ma nos tudu ta fadja na kuzas ki nu ta fla i na manera ki nu ta fla-s. (Tia. 3:2) Nen Jeová nen nos irmons ka ta spéra pa nu ser perfetu. (Sal. 103:12-14) Nos irmons é nos família na fé i es krê-nu txeu. (Mar. 10:29, 30; João 13:35 ) Es ta ntende ma alvês nos komentáriu ka ta sai sima nu kreba. w19.01 8 ¶3; 10-11 ¶10-11

Na mundu ki nu sta vive oji é ka faxi faze kel-li, má é ka inposível. Jeová krê pa bu ten susésu i un vida filís. Ku ajuda di Deus bu pode ten susésu na vida gósi ki bo é jóven i pa bu vida interu. Pa djuda-nu ntende kel-li midjór, nu sta ben odja kuzê ki djuda israelitas entra na kel téra ki Deus prometeba es i modi ki Davidi konsigi forsa pa el ganha Gulias. Kantu israelitas staba kuazi ta entra na kel téra ki Deus prometeba es, Jeová ka fla-s pa es trenaba pa géra, ô pa es biraba un bon trópa. (Deut. 28:1, 2) Má, Jeová fla-s ma es meste obiba ku se leis i kúnfia na el. (Jos. 1:7-9) Pa un umanu, kel konsedju ka ta fazeba sentidu! Má, kel-li éra midjór konsedju ki israelitas pode resebeba, pamodi txeu bês Jeová djuda-s ganha géra kóntra povu di Kanan. (Jos. 24:11-13) Kel-li ta mostra ma pa bu obi ku Deus, bu meste sforsa pa bu ten fé, i kel fé sénpri ta djuda-u ten susésu. É kel-li ki kontise na ténpu antigu i ti oji inda é si. w18.12 25 ¶3-4

Alguns tropesa pamodi mudansas na ntendimentu di un asuntu di Bíblia. Tanbê pode ser ki otus sigi ensinus falsu di kes algen ki éra Tistimunha di Jeová i ki fika ta pâpia mal di organizason ô di otus algen ki é kóntra verdadi. Pur isu, alguns disidi ‘afasta’ di Jeová i di kongregason. (Heb. 3:12-14) Éra mutu más midjór si es imitaba izénplu di apóstlu Pedru Talvês, otus ba ta afasta di verdadi poku-poku, pamodi es ka da kónta di kuzê ki staba ta kontise. Es é sima un barku ki ba ta perde rumu poku-poku. Bíblia ta fla ma nu debe toma kuidadu ‘pa nunka nu ka disvia.’ (Heb. 2:1) Un algen pode afasta di verdadi pamodi el ki krê, má ten otus ki ta disvia pamodi es ka toma kuidadu. Es dexa ses amizadi ku Jeová ba ta bira fraku ti ki kaba. w18.11 9 ¶5-6

Bu ta gostaba di resebe más trenu pa sirbi Jeová más midjór? Nton bu pode prenxe pitison pa Skóla di Pregadoris di Reinu. Kel skóla li ta trena irmons i irmans maduru, ki ta sirbi Jeová pa ténpu interu i ki krê ser uzadu más midjór. Kes ki prenxe pitison pa sisti kel skóla, sta prontu pa sirbi na undi ki es mandadu. Bu ta gostaba di ten es xansi di sirbi Jeová más midjór? (1 Cor. 9:23) Nos é povu di Jeová pur isu nu gosta di da, nu ta trata otus ku bondadi i nu ta ama-s. Tudu dia nu ta preokupa ku otus. Faze kes kuza li ta da-nu alegria, pas i filisidadi. (Gál. 5:22, 23) Ka ta nporta nos situason, nu ta ser filís si nu imita Jeová ki é un Deus ki gosta di da i el ta da-nu txeu valor pamodi nu ta trabadja ku el! — Pro. 3:9, 10. w18.08 27 ¶16-18

Talvês alguns ta pergunta: ‘Ten algun motivu pa un kriston divôrsia i kaza otu bês?’ Repara kuzê ki Jizus fla sobri divórsiu: ‘Ken ki divôrsia di se mudjer i kaza ku otu, el ta faze adultériu kóntra se mudjer, i, si un mudjer dipôs ki el divôrsia di se maridu, el kaza ku otu, el sta faze adultériu.’ (Mar. 10:11, 12; Luc. 16:18) É klaru ki Jizus ta ruspeta kazamentu, i el krê pa otus faze mésmu kuza. Si un ómi divôrsia di se mudjer fiel (ô si mudjer divôrsia di se maridu fiel) pa kalker kuza i el torna kaza, el sta faze adultériu. Pamodi divórsiu ka ta kaba ku kazamentu. Deus inda ta atxa ma kel kazal é ‘sô un karni’. Jizus tanbê fla ma si un ómi divôrsia di se mudjer fiel, el sta poi kel mudjer na prigu di faze adultériu. Modi ki kel-li pode kontise? Na kel ténpu, un mudjer ki staba divorsiadu, el pode xintiba obrigadu kaza otu bês pa el ka pasaba nisisidadi. Má kel tipu di kazamentu, éra mésmu kuza ki faze adultériu. w18.12 11 ¶8-9

Dipôs ki Abakuki pâpia ku Jeová el xinti un pas déntu di el. El disidi kúnfia na Jeová i spéra pa el aji. Kel-li é ka sô un disizon ki el toma na kel momentu, pamodi más tardi el ripiti se disizon: ‘N ta spéra trankilu pa dia di frónta.’ (Hab. 3:16) Kuzê ki nu ta prende ku disizon di Abakuki? Primeru, nunka nu ka debe dexa di faze orason i konta Jeová tudu nos prublémas. Sugundu, nu meste obi kuzê ki Jeová ta fla-nu através di se Palavra i di se organizason. Tirseru, nu meste spéra ku paxénxa i kúnfia ma Jeová ta aji na ténpu sértu pa kaba ku nos sufrimentu. Si nu faze sima Abakuki, nu ta xinti pas déntu nos i nu ta konsigi aguenta firmi. Nos speransa ta djuda-nu ten paxénxa i ser filís, mésmu ku prublémas. Speransa ta da-nu sertéza ma nos Pai na Séu ta ben aji. — Rom. 12:12. w18.11 15-16 ¶11-12

Kuzê ki Jeová ta atxa di un algen ki ta tropesa otus? Jizus fla: ‘Ken ki poi un di kes pikinoti ki ten fé ta tropesa, éra midjór es prindaba el un pédra di muinhu na piskós, sima kes ki buru ta poi ta da vólta, i pa es botaba el na mar.’ (Mar. 9:42) Nu pode odja klaru ma Jizus ta atxa ma kel-li é un asuntu sériu! I nu sabe ma Jizus é sima se Pai. Pur isu, Jeová tanbê ta atxa ma é un asuntu sériu óras ki un algen ka ta preokupa si kuzas ki el ta faze pode tropesa sigidoris di Jizus. (João 14:9 ) Nu ta pensa sobri kel asuntu li sima Jeová ku Jizus? Nu ta mostra kel-li na kuzas ki nu ta faze? Pur izénplu, nu pode gosta di nos manera di bisti i di konpo. Má, kuzê ki nu ta faze si nu sabe ma nos manera di bisti sta ta inkomoda alguns irmon na kongregason ô sta ta poi alguns ta ten pensamentus mariadu? Si nu ta ama nos irmons nu ta muda nos manera di bisti i di konpo. w18.11 25 ¶9-10

Pamodi ki kada un di nos nu meste ser lial? Nu meste ser lial pamodi Satanás dizâfia Jeová, i tanbê el dizafia-nu. É na jardin di Éden ki kel anju rebéldi tenta suja nómi di Jeová kantu el fla ma Jeová é mau Governanti, dizonéstu i ma el ta pensa sô na se kabésa. É tristi, pamodi Adon ku Eva djunta ku Satanás i es rabela kóntra Jeová. (Gén. 3:1-6) Vida ki Adon ku Eva tinha na jardin di Éden, ta daba es txeu motivu di amaba Jeová kada bês más txeu. Má kantu Satanás tenta-s, fika klaru ma ses amor pa Jeová ka éra konplétu, interu ô sen defetu. Pur isu, kel-li traze un otu pergunta: Algun umanu ta konsigiba ser lial pa Deus pamodi amor? Nu pode faze kel pergunta di otu manera: Umanus ta konsigi ser lial? Kel pergunta li fazedu na ténpu di Jó. (Jó 1:8-11 ) É klaru ki Jó éra inperfetu sima nos i el ta fadjaba. Má Jeová gostaba txeu di el pamodi el éra lial. w19.02 3-4 ¶6-7

Jizus konta un stória, di un ómi di nogósiu ki ta viajaba pa djobe jóias di txeu valor. Kantu kel ómi atxa un di kes jóia el bende tudu kes kuza ki el tinha i el kunpra kel jóia. Kel jóia ta reprizenta verdadi sobri Reinu di Deus. Jizus uza kel stória pa mostra ma kes algen ki ta djobe verdadi, ta da-l txeu valor. (Mat. 13:45, 46) É si ki nu xinti kantu nu prende verdadi sobri Reinu di Deus pa primeru bês i tudu kes otu verdadi di Bíblia. Nu staba prontu pa dizisti di kalker kuza pamodi es. Si nu kontinua ta da kes verdadi di Bíblia valor, nunka nu ka ta ‘bende-l’ ô dizisti di el. (Pro. 23:23) Má é tristi di odja ma alguns sérvu di Jeová dexa di da valor pa verdadi ki es prende i es bende-l. Nunka nu ka krê faze un kuza di kel-li. Nu meste sigi konsedju di Bíblia ki ta fla pa nu ‘kontinua ta anda na verdadi.’ (3 João 2-4 ) Kel-li siginifika ma nu ta poi verdadi na primeru lugar i nu ta vive sima nu prende. w18.11 9 ¶3

Tanbê, Jeová fla israelitas pa es ka ataka Jerikó. Má el manda-s da vólta sidadi. Es tinha ki fazeba kel-la un bês duránti 6 dia. I na sétimu dia es tinha ki daba 7 vólta. Talvês kes trópa fika ta pensa: ‘Asi nu sta ta perde ténpu i forsa!’ Má Jeová ki é Líder di Israel, sabia kuzê ki el staba ta faze. Sigi orientasons di Jeová, poi fé di israelitas ta fika más fórti i tanbê es ka tevi ki ba géra kóntra kes trópa poderozu di Jerikó. (Jos. 6:2-5) Kuzê ki nu ta prende ku kel stória li? Alvês organizason di Jeová ta da novus orientason i nen sénpri nu ka ta ntende pamodi. Pur izénplu, alvês nu ka ta atxa ma nu meste uza tablet ô telemóvel na nos studu pesoal, na pregason ô na runion. Má talvês gósi, nu pode odja vantaji di uza-s si nu ten es. Óras ki nu ta odja bons rezultadu, na sigi kes mudansa, nos fé ta fika más fórti i nu ta fika más unidu ku nos irmons i irmans. w18.10 23 ¶8-9

Kes judeu, sima kes disiplu di Jizus, ta speraba ma Misías ta rezolveba ses prubléma. É pur isu ki povu di Galilea kreba pa Jizus sérba ses rei. Talvês es ta pensaba ma el ta sérba midjór líder ki ten. El éra bon na pâpia, el ta kuraba duentis i el daba kumida pa kes ki staba ku fómi. Dipôs ki el da sinku mil ómi kumida, Jizus da kónta kuzê ki es krê fazeba ku el. Bíblia ta fla: ‘Nton, kantu Jizus da kónta ma es staba ta ben faze-l rei, el torna bai pa monti, el sô.’ (João 6:10-15 ) Na kel otu dia, tudu kel alegria di povu kaba. Dipôs, Jizus splika-s kal ki éra obijetivu di se trabadju. El ben inxina-s sobri Reinu di Deus. El ka binha pa da-s kumida ku otus kuza ki es staba ta meste. El fla-s: ‘Ka nhos trabadja pa kumida ki ta kaba, má nhos trabadja pa kumida ki ta dura pa tudu ténpu’. — João 6:25-27. w18.06 4 ¶4-5

Jizus ntende sentimentus di kes algen ki staba dizanimadu sima un ‘kana piladu’ ô sima un ‘pabiu ki sta ta bota fumu’. Pur isu, Jizus tinha paxénxa i el ta trataba es ku bondadi. (Mar. 10:14) É klaru ki nu ka ta konsigi odja korason sima Jizus, i nen nu ka ta inxina sima el. Má nu pode mostra preokupason pa pesoas na nos tiritóriu, na manera ki nu ta pâpia ku es, sabe ki óra ki nu ta faze-l i ténpu ki nu ta ten na pâpia ku es. Milhons di algen oji ta xinti ‘sfoladu i botadu di un ladu pa kel otu’ pamodi korupson i maldadi na nogósiu, na pulítika i na relijion. (Mat. 9:36) Pur isu, es ka ta kúnfia na ningen i es ka tene speransa. Nton, kuzas ki nu ta fla i nos manera di fla debe ser ku amor i ruspetu. Txeu algen ta krê obi nos mensaji ka sô pamodi kel ki nu sabe di Bíblia, má tanbê pamodi nu ta preokupa ku es di verdadi i nu ta ruspeta-s. w18.09 31-32 ¶13-14

Modi ki nu ta mostra ma nu ten konsénsia di nos nisisidadi spritual? Óras ki nu ta studa Bíblia, faze kel ki Deus ta manda i poi nos adorason pa Jeová na primeru lugar. Nu ta ser filís si nu faze kes kuza li. Nos fé na promésas di Deus pa futuru ta fika más fórti. (Tito 2:13 ) Ka ta nporta kuzê ki pode kontise ku nos, nu pode ser filís si nu kontinua ta ten un amizadi fórti ku Jeová. Apóstlu Polu skrebe: ‘Nhos fika kontenti sénpri na Sinhor [Jeová]. N ta torna fla: Nhos fika kontenti!’ (Fil. 4:4) Pa nu ten un amizadi fórti ku Jeová, nu meste ten se sabedoria. (Pro. 3:13, 18) Má pa nu kontinua filís, nu meste faze sima nu prende na Bíblia. Sô lé Bíblia ka ta txiga. Jizus fla: ‘Si nhos sabe kes kuza li, nhos ta ser filís si nhos faze-s.’ (João 13:17; Tia. 1:25) Kel-li é inportanti si nu krê kuida di nos amizadi ku Jeová i pa nu kontinua filís. w18.09 18 ¶4-6

Epafras konxeba kes irmon dretu i el ta preokupaba txeu ku es. Nbóra el éra ‘kunpanheru di kadia’ di apóstlu Polu, Epafras ka ta pensaba sô na se situason. (Filém. 23) El ta preokupaba pa ses irmon tinha un amizadi fórti ku Jeová. I pa el djudaba es, el ta ‘fazeba orason pa es ku zelu’. Nos tanbê nu pode faze sima Epafras. Kuzê ki bu ta atxa di ora pa bus irmon i ti fla ses nómi? Kes tipu di orason li ten txeu forsa. (2 Cor. 1:11; Tia. 5:16) Pensa na kes algen ki bu pode fla ses nómi na orason. Pur izénplu, talvês bu konxe irmons ki ten txeu responsabilidadi, ki meste toma disizons inportanti ô ki sta pasa pa tentason. Tanbê bu pode faze orason pa kes algen ki sta sufri pamodi móre algen ki es ta ama, pamodi dizastri na naturéza, géra ô falta di dinheru. Ten txeu irmon ki meste pa nu faze orason pa es. w18.09 5-6 ¶12-13

Polu ka staba ta pâpia sô di kuzas material. Tanbê nu meste da kunpanheru koraji, da orientason ku bazi na Bíblia i djuda ken ki meste. (Atus 20:31-35, BPK ) Polu inxina-nu ku se izénplu modi ki é inportanti nu ser un algen ki gosta di da: nos ténpu, nos forsa, nos atenson i nos amor. Fazedu alguns piskiza ki ta mostra ma un algen ki gosta di da é más filís. Di akordu ku un studu, ‘pesoas ta xinti más filís dipôs ki es faze kuzas dretu pa otus.’ Otus piskiza ta fla ma, óras ki nu ta djuda otus, nu ta xinti más sábi i ma nos vida ten obijetivu. Inda kes piskizador ta fla ma, algen debe faze algun tipu di trabadju voluntáriu pa es pode ten un bon saúdi i pa es xinti más sábi. Nu ka ta fika dimiradu ku kes piskiza li, pamodi Jeová nos Kriador dja fla txeu bês, ma da kuzas ki nu ten ta da-nu txeu alegria. — 2 Tim. 3:16, 17. w18.08 22 ¶17-18

Profesia di Izaías sobri Jizus ta da-nu speransa. El fla ma Jizus ‘ka ta ben julga sô pa kel ki ta parse, nen el ka ta ben da reprenson sô pa kel ki el ta obi’ i ‘el ta ben julga kes ki é koitadu ku justisa’. (Isa. 11:3, 4) Pamodi ki kel-li ta konsola-nu? Pamodi nu sta ta vive na un mundu xeiu di diskriminason. I pesoas ta julga kunpanheru pa kuzas ki es ta odja. Pur isu, nu meste di un Juís perfetu ki nunka ka ta julga-nu pa kuzas ki el ta odja! Tudu dia nu ta julga otus algen. Má nos é ka perfetu sima Jizus, pur isu nu ka ta konsigi julga otus sima el. Nos tendénsia é julga pa kuzas ki nu ta odja. É pur isu ki Jizus fla-nu pa nu ka julga ‘pa kuzas ki nu ta odja’, má pa nu faze ‘un julgamentu justu.’ Órdi di Jizus é klaru, nu ten ki ser sima el i ka julga otus algen pa kuzas ki nu ta odja. w18.08 8 ¶1-2

É klaru ki nu ka ta obi Deus ta pâpia ku nos la di Séu. Má, el da-nu se Palavra skrebedu, ki é Bíblia, ki ta da-nu orientason. Tanbê, spritu di Jeová ta poi ‘skravu fiel’ ta da se sérvus kumida spritual. (Luc. 12:42) Nu ta resebe txeu kumida spritual através di publikasons inprimidu ô na formatu dijital. Tanbê, nu ten txeu vídiu i publikasons gravadu pa obi, ki pode djuda-nu ten un fé más fórti. Kel ki Jeová fla sta skrebedu na Bíblia i el ta da-nu sertéza ma Jeová sta ta kontrola tudu kuza. Pur isu, el ta ben kaba ku tudu maldadi ki Satanás i se mundu sta ta faze. Nu krê sta disididu na presta atenson na kuzê ki Jeová ta fla. Si nu faze si, nu ta konsigi aguenta kalker prubléma ki nu sta ta pasa oji ô ki nu pode ben pasa na futuru. Bíblia ta lenbra-nu: ‘Nhos meste aguenta firmi, asi, dipôs ki nhos faze vontadi di Deus, nhos ta resebe se promésa ki sta pa kunpri.’ — Heb. 10:36. w19.03 13 ¶17-18

Muizes dja tinha txeu ténpu ta lideraba Israel. Má gósi é Juzué ki ten ki lidera-s. Talvês el pergunta si povu ta setaba el pa el sérba ses líder. (Deut. 34:8, 10-12) Un livru inportanti ki ta pâpia sobri Bíblia faze un komentáriu sobri Josué 1:1, 2. El ta fla: “Désdi ténpu antigu ti gósi, un di kes momentu más difísil pa un nason é óras ki trokadu líder.” Juzué tinha razon pa el staba preokupadu. Má, el kúnfia na Jeová i el staba prontu pa sigi se orientasons. (Jos. 1:9-11) Deus abênsua Juzué pamodi el kúnfia na el i el uza un anju pa gia Juzué ku israelitas. Pode ser ki kel anju é kel primeru Fidju di Deus, ki Bíblia ta txoma di Palavra. (Êxo. 23:20-23; João 1:1 ) Jeová djuda nason di Israel lida dretu ku kel mudansa di líder. w18.10 22-23 ¶1-4

Jeová konxe kes algen ki krê sirbi-l i el ta skrebe ses nómi na se ‘livru di rekordason’. Ten alguns kuza ki nu meste faze pa Jeová poi nos nómi na se ‘livru di rekordason’. Malakias fla ma nu debe ten grandi ruspetu pa Jeová i pensa na se nómi. Si nu adora kalker otu algen ô algun otu kuza, Jeová ta tra nos nómi di livru di vida. (Êxo. 32:33; Sal. 69:28) Kel-li ta mostra ma sô promete faze se vontadi i batiza ka ta txiga. Kes-li é kuzas ki nu ta faze sô un bês, má adora Jeová é un manera di vive. Nu krê obi ku Jeová gósi, na futuru i pa tudu nos vida. — 1 Ped. 4:1, 2. w18.07 23-24 ¶7-9

Nu ka ta konsigi faze kel-li di un óra pa otu, má nu meste sforsa pa nu bira un algen maduru. Nu ten ki studa Bíblia pa nu konxe i ntende Palavra di Deus. É pur isu ki Jeová sénpri ta fla-nu pa nu lé Bíblia tudu dia. (Sal. 1:1-3) Bu sta sforsa pa faze kel-li? Kada bês ki bu lé Bíblia, bu ta ntende leis i prinsípius di Jeová más midjór. Lei más inportanti pa sérvus di Jeová, é lei di amor. Jizus fla se disiplus: ‘Pamodi kel-li tudu algen ta fika ta sabe ma nhos é nha disiplus: si nhos mostra amor pa kunpanheru.’ (João 13:35 ) Tiagu, ki éra irmon di Jizus sô pa ladu mai, fla ma amor é ‘kel lei ki ta manda’. (Tia. 2:8) Apóstlu Polu tanbê fla: ‘Amor ta kunpri lei.’ (Rom. 13:10) Kuzas ki es fla sobri amor é verdadi, pamodi Bíblia ta fla ma ‘Deus é amor.’ — 1 João 4:8. w18.06 19 ¶14-15

Nbóra israelitas provoka Jeová, má é Muizes ki fika xatiadu. El ka kontrola se kabésa i el pâpia sen pensa na kuzê ki podia kontiseba. Muizes dexa fadjas di otus distrai-l di kontinua ta odja pa Jeová. Na primeru bês ki povu kexa pamodi falta di agu, Muizes faze sima Jeová mandaba el. (Êxo. 7:6) Má talvês dipôs di txeu ténpu ta lida ku israelitas rebéldi, Muizes fika kansadu i dizanimadu. Pode ser ki Muizes staba ta pensa sô na kuzê ki el sta xintiba envês di modi ki el ta daba Jeová glória. Si Muizes ki éra un proféta fiel di Jeová fika distraídu i faze un éru gravi, tanbê é faxi kontise mésmu kuza ku nos. Sima Muizes, nos tanbê nu sta kuazi ta entra na mundu novu. (2 Ped. 3:13) Ninhun di nos ka krê perde xansi di sta la. Pur isu, nu meste kontinua ta odja pa Jeová i obi ku el sénpri. — 1 João 2:17. w18.07 15 ¶14-16

Satanás ka ta pode obriga un algen pa faze kuza ki el krê. (Tia. 1:14) Txeu algen na mundu nen ka ta da kónta ma el sta na ladu di Satanás. Má, óras ki un algen ta prende verdadi, el pode skodje di ki ladu el krê fika. (Atos 3:17; 17:30 ) Si nu sta disididu na obi ku Deus, Satanás ka ta konsigi disvia-nu. (Jó 2:3; 27:5 ) Ten más un kuza ki Satanás ku se dimónis ka ta konsigi faze. Pur izénplu, ka ten nada na Bíblia ki ta mostra ma es ten puder di lé menti ô korason di un algen. Sô Jeová ku Jizus ki pode faze kel-la. (1 Sam. 16:7; Mar. 2:8) Si nu sforsa pa nu pâpia i faze kuzas di manera ki Jeová krê el ka ta dexa pa Diabu faze-nu nada ki el ka ta pode konpo. (Sal. 34:7) Nu meste konxe nos inimigu, má nu ka meste xinti medu di el. Ku ajuda di Jeová ti un umanu inperfetu pode vense Satanás. Si nu fika kóntra Diabu, el ta fuji di nos. — Tia. 4:7; 1 Ped. 5:9. w18.05 26 ¶15-17

Imajina ma bu sta bai pa un atividadi inportanti na un sidadi lonji. Pa txiga la bu ten ki toma otokaru. Na paraji di otokaru tene txeu otokaru. Bu meste sabe undi bu sta bai i ki otokaru ki bu debe toma pa bu txiga la! Bu sabe ma panha un kalker otokaru pode leba-u pa un lugar mariadu. Jóvens di oji sta na un situason kuazi igual. Adulesentis ten un viaji kunpridu pa faze, ka di otokaru, má na vida. Alvês, es pode xinti trapadjadu ku txeu oportunidadi i disizons ki es ten ki toma. Jóvens, pode ser faxi toma bons disizon, si nhos sabe pa undi nhos krê bai na vida. Bu sta konsentra bu vida na sirbi Jeová? Kel-li ta siginifika inklui-l na tudu disizons ki bu ta toma, sima skóla, trabadju, ten un família i otus asuntu. Tanbê ta siginifika ten métas spritual. Jóvens ki ta mante konsentradu na sirbi Jeová pode ten sertéza ma el ta abensua-s i es ta ten susésu na vida. w18.04 25 ¶1-3

Jefté kunpri se promésa. El manda se fidju-fémia pa ba sirbi na tabernákulu na Silu pa réstu di se vida. (Juí. 11:30-35) Kel-li éra un kuza difísil pa Jefté, má éra más difísil inda pa se fidju-fémia. Má simé el seta kunpri promésa ki se pai faze. (Juí. 11:36, 37) Dja el ka ta pode kazaba, nen ten fidju pa mante nómi i eransa di família. Si tinha algen ki mesteba di konsolu éra fidju-fémia di Jefté. Bíblia ta fla: ‘Kel-li bira un ábitu na Israel: tudu anu, duránti kuatu dia na anu, kes jóven di Israel ta ba djobeba fidju-fémia di Jefté ki éra di Jiliádi’. (Juí. 11:39, 40) Bu ka ta atxa ma kes irmon ku irman ki disidi fika solteru pa es pode da txeu atenson pa ‘kuzas di Sinhor’, tanbê merese nkorajamentu i pa nu ilojia-s? — 1Cor. 7:32-35. w18.04 17 ¶10-11

Antis di Dilúviu, Satanás konvense alguns anju pa rabela kóntra Jeová i ben faze séksu ku mudjeris li na Téra. Kel verdadi li sta na Bíblia. El ta fla ma dragon ki ta reprizenta Satanás rasta djuntu ku el un térsu di strélas di Séu. (Gén. 6:1-4; Apo. 12:3, 4) Kantu ki kes anju bandona família di Deus, es toma ladu di Satanás. Oji Satanás ta kontrola tudu kes anju ki rabela kóntra Jeová. Kes anju é mutu más di ki un grupu ki ta kria prubléma, es sta organizadu. Satanás faze un govérnu pa imita Reinu di Deus. El é rei di kel govérnu i el organiza dimónis, el da-s puder i el faze-s governanti di mundu. (Efé. 6:12) Satanás ta uza se organizason ki nu ka ta odja pa kontrola tudu kes govérnu di ómi. w18.05 23 ¶5-6

Alvês, Deus ta mostra-nu se amor óras ki el ta koriji-nu, sima un pai ki ten amor ta koriji se fidju. Davidi ta daba konsedju di Jeová txeu valor. El ta miditaba na manera ki Deus ta pensa pa el pode pensaba sima el. Asi, el ta dexaba maneras di Deus pensa, muda-l pa el ser un algen midjór. Si bu faze sima Davidi, bu amor pa Deus i bu dizeju di faze se vontadi ta bira más txeu. Tanbê bu ta bira un algen más maduru. Un irman ki txoma Christin fla: “Óras ki N ta faze piskiza i N ta pensa na kuza ki N lé, N ta xinti ma Jeová skrebe kel kuza pa mi!” Un algen spritual ta ten konhisimentu i el ta odja kuzas sima Jeová ta odja. Tanbê bu ta prende odja mundu i kuzas ki ta ben kontise sima Jeová. Pamodi ki Jeová ta da-u kel konhisimentu? Pamodi el krê pa bu sabe kuzê ki é más inportanti na vida, toma bons disizon i odja pa futuru sen medu! — Isa. 26:3. w18.12 26 ¶9-10