FAZE REVIZITAS
LISON 7
Kontinua ta tenta djuda pesoas
Konsedju di Bíblia: “Es kontinua sen para ta inxina i ta pâpia di notísias sábi”. — Atus 5:42.
Kuzê ki Paulu faze
1. Odja VÍDIU, ô lé Atus 19:8-10. Dipôs pensa i responde kes pergunta li:
Envês di dizisti kantu alguns algen fika kóntra el, modi ki Paulu kontinua ta djuda kes algen ki mostra interesi?
Kantu bês ki Paulu volta pa inxina kes algen ki mostra interesi i pa kantu ténpu ki el faze kel-la?
Kuzê ki nu ta prende ku Paulu?
2. Nu meste gasta ténpu i sforsa pa faze bons revizita i kumesa studus di Bíblia.
Imita Paulu
3. Sforsa pa faze revizita na un óra ki é midjór pa kel algen. Pergunta bu kabésa: ‘Ki óra i na ki lugar ta fika más midjór pa N vizita-l? Ki óra ki el ta ten ténpu pa el pâpia ku mi?’ Sforsa pa faze kel revizita sikrê na un óra ki ka é midjór pa bo.
4. Pergunta kel algen ki dia bu pode torna volta. Tudu bês ki bu tirmina di pâpia ku kel algen, tenta konfirma ku el un óra sértu pa nhos pâpia otu bês. Sforsa pa bu inkontra ku el na lugar i na óra ki nhos konbina.
5. Kontinua ku speransa. Ka bu pensa ma kel algen ka sta interesadu sô pamodi é difísil atxa-l na kaza ô pamodi el é txeu okupadu. (1 Kor. 13:4, 7) Kontinua ta djobe kel algen, má tanbê sforsa pa uza bu ténpu ku sabedoria. — 1 Kor. 9:26.