Otubru

Alvês bu ta atxa ma é difísil obi? Rei Davidi ta atxaba ma é difísil, pur isu el pidi Deus: ‘Labanta déntu mi kel vontadi di obi ku bo.’ (Sal. 51:12) Davidi ta amaba Jeová. Má simé, alvês el tevi ki sforsa pa obi, i nu debe faze mésmu kuza. Pamodi? Primeru, nu erda tendénsia di ka obi. Sugundu, Satanás ta sta sénpri ta tenta pô-nu ta rabela kóntra Jeová, sima el faze. (2 Kor. 11:3) Tirseru, kes algen na nos vólta ta krê rabela i es ten “kel spritu ki gósi sta ta kontrola kes algen dizobidienti.” (Efé. 2:2) Nu meste sforsa txeu pa ka peka i tanbê pa ka dexa kel preson ki Diabu i kel mundu li ta faze-nu, pô-nu ka ta obi. Nu debe sforsa pa obi ku Jeová i ku kes algen ki el da autoridadi. w23.10 6 ¶1

Kuzê ki nu pode prende di kel milagri di Jizus kantu el transforma agu na vinhu? Nu ta prende un lison di umildadi. Jizus ka ingaba di kel milagri. Na verdadi, nunka el ka ingaba di nada ki el faze. Envês di kel-li, sénpri el mostra umildadi i el da tudu glória i ónra pa se Pai. (Juan 5:19, 30; 8:28) Si nu imita Jizus i nu kontinua ku un ideia umildi sobri nos kabésa, nu ka ta ingaba di nada ki nu ta faze. Ka nu ingaba nos kabésa, má nu da glória pa nos grandi Deus ki nu ten priviléjiu di sirbi. (Jer. 9:23, 24) Nu debe da-l kel ónra ki el merese. Afinal, ten algun kuza dretu ki nu ta konsigi faze sen ajuda di Jeová? (1 Kor. 1:26-31) Óras ki nos é umildi, nu ka meste dadu ónra pa kes kuza dretu ki nu ta faze pa otus algen. Nu ta fika kontenti di sabe ma Jeová ta odja i ma el ta da valor pa kuzê ki nu ta faze. (Konpara ku Mateus 6:2-4; Ebr. 13:16) Di serteza, nu ta poi Jeová ta fika kontenti óras ki nu ta imita Jizus na mostra umildadi. — 1 Ped. 5:6. w23.04 4 ¶9; 5 ¶11-12

Ku ajuda di spritu santu, apóstlu Paulu insentiva kristons pa djobe interesi di otus algen. Modi ki nu pode sigi kel konsedju li na runion? Óras ki nu ta lenbra ma ten otus algen ki ta krê da komentáriu sima nos. Pensa na kel-li. Óras ki bu sta pâpia ku bus amigu, bu ta pâpia txeu dimás ki kuazi bu ka ta dexa-s pâpia? Bu ta dexa-s sin, bu krê pa es partisipa na kel konbérsu. Di mésmu manera, na runion nu krê pa txeu algen da komentáriu. Na verdadi, un di kes midjór manera di da nos irmons ku irmans koraji é da-s oportunidadi di pâpia sobri ses fé. (1 Kor. 10:24) Nton da komentáriu kurtu, asi ta da ténpu pa más algen da komentáriu. Sikrê óras ki bu sta da komentáriu kurtu, ivita pâpia di txeu pontu. Si bu pâpia di tudu kuza ki sta na parágrafu, ta fika poku kuza pa otus algen fla. w23.04 22-23 ¶11-13

Nu debe lenbra ma é inportanti kontinua ta djuda otus, prinsipalmenti através di nos trabadju di pregason. Na nos trabadju di pregason nu meste ser ikilibradu. Nu ta atxa algen ki ta kridita na kuzas diferenti di nos, ku atitudi diferenti i di lugar i kultura diferenti. Apóstlu Paulu konsigi prega pa tudu tipu di algen i nu pode prende ku se izénplu. Jizus skodje Paulu pa ser “apóstlu pa nasons”. (Rom. 11:13) Nton, Paulu prega pa judeus, gregus, kes algen ki tinha txeu skóla, kes algen sinplis, kes funsionáriu di govérnu i kes rei. Pa Paulu konsigi tokaba korason di tudu kes algen diferenti li, el bira “tudu kuza pa tudu tipu di algen.” (1 Kor. 9:19-22) El pensa na kultura, na lugar ki kes algen kria i na kuzê ki es ta kriditaba na el. I el muda se manera di prega di akordu ku ses situason. Nos tanbê nu pode midjora nos trabadju di pregason, si nu muda nos manera di prega di akordu ku nisisidadi di kes algen ki nu sta pâpia ku el. w23.07 23 ¶11-12

Un algen brandu é fórti, el é ka fraku. Bu ta meste ser fórti pa bu kontinua kalmu óras ki bu ta pasa pa un situason difísil. Brandura é un kualidadi ki ta faze párti di “frutu di spritu”. (Gál. 5:22, 23) Palavra gregu ki traduzidu pa “brandura” alvês ta uzadu pa pâpia di un kabalu brabu ki dipôs ta biradu mansu. Pensa na un kabalu asi. El é mansu, má el ta kontinua fórti. Modi ki nu pode ser brandu i omésmu ténpu fórti? Nu ka ta pode faze kel-li nos sô. Nu meste faze orason ta pidi spritu santu di Deus pa djuda-nu dizenvolve kel kualidadi bunitu li. Ten txeu algen ki prende mostra brandura. Pur izénplu, txeu irmon ku irmans mostra brandura kantu otus algen tenta provoka-s. I kel-li pode djuda kes algen ten un bon ideia sobri Tistimunhas di Jeová. — 2 Tim. 2:24, 25. w23.09 15 ¶3

Na un vizon ki dexa apóstlu Juan dimiradu, el odja 24 ansion na séu ta adora Jeová. Es lova Deus i es fla ma é sô el ki merese resebe ‘glória, ónra i puder’. (Apo. 4:10, 11) Tanbê, kes anju fiel ten txeu motivu pa lova i onra Jeová. Es sta na séu djuntu ku el i es konxe-l dretu. Es ta odja se kualidadis na kuzê ki el ta faze. Óras ki es ta odja modi ki Jeová ta aji, es ta fika ku gana di lova-l. (Jó 38:4-7) Tanbê nu debe lova Jeová na nos orason. Nu pode faze kel-li óras ki nu ta fla-l ma nu ta ama-l i pamodi ki nu ta ruspeta-l. Óras ki bu ta lé i studa Bíblia, tenta odja ki kualidadis di Jeová ki bu gosta más txeu. (Jó 37:23; Rom. 11:33) Dipôs, fla Jeová modi ki bu ta xinti sobri kes kualidadi li. Tanbê, nu ta lova Jeová pamodi el ta djuda-nu i el ta djuda tudu nos irmons ku irmans. — 1 Sam. 2:1, 2. w23.05 3-4 ¶6-7

Na 1919, Babilónia Grandi dexa di kontrola povu di Deus. Na kel anu, “skravu fiel i prudenti” kumesa ta trabadja. Asi, kes algen sinseru kumesa ta anda na ‘Kaminhu di Santidadi.’ (Mat. 24:45-47; Isa. 35:8) Trabadju ki otus algen faze na pasadu pa pripara kel ‘kaminhu’ djuda kes algen ki kumesa ta anda na el prende más sobri Jeová i se vontadi. (Pro. 4:18) Tanbê, es konsigi vive di akordu ku leis di Jeová. Jeová ka staba ta spéra pa se povu fazeba kes mudansa ki es mesteba di un bês. Má, el muda se povu poku-poku. Nos tudu nu ta fika kontenti óras ki nu ta konsigi agrada nos Deus na tudu kuza ki nu ta faze! Pa un strada kontinua dretu, el meste konpodu sénpri. Désdi 1919, trabadju na ‘Kaminhu di Santidadi’ kontinua ta fazedu, asi pa más algen pode sai di Babilónia Grandi. w23.05 17 ¶15; 19 ¶16

Irmons di Grupu Enkaregadu di Óbra sta ta trena ajudantis na kes txeu kumison di Grupu Enkaregadu di Óbra. Kes ajudanti li sta ta kuida di manera fiel di kes txeu responsabilidadi ki es ten na organizason. Es sta priparadu pa kontinua kel trabadju di kuida di ovelhas di Jizus Kristu. Óras ki kes últimu skodjedu lebadu pa séu pértu di fin di grandi tribulason, adorason verdaderu ta kontinua ta fazedu na téra. Dja ki Jizus sta ta toma kónta di povu di Deus, nunka nu ka ta para di adora Jeová. Nu sabe ma na kel ténpu un grupu di nasons ki Bíblia ta txoma di Gogi di Magogi, ta ben ataka povu di Deus. (Eze. 38:18-20) Má kel ataki li ka ta dura txeu i el ka ta ten bons rezultadu. El ka ta konsigi inpidi povu di Deus di adora Jeová. Di serteza Jeová ta ben salva-nu! Na un vizon, apóstlu Juan odja kel “monti di algen” ki ta faze párti di otus ovelha di Kristu. Juan fladu ma kel “monti di algen” é kes ki “sai di grandi tribulason”. (Apo. 7:9, 14) Nton, nu sabe ku serteza ma Jeová ta ben salva-s! w24.02 5-6 ¶13-14

Má kuzê ki nu pode faze pa nu resebe spritu santu? Nu pode faze orason ta pidi spritu santu, studa Palavra di Deus i faze párti di se organizason ki spritu santu ta orienta. Kel-li ta djuda-nu dizenvolve ‘frutu di spritu.’ (Gál. 5:22, 23) Deus ta da se spritu santu sô pa kes ki ta sforsa pa kontinua ta pensa i ta faze kuzas dretu. El ka ta kontinua ta da-nu se spritu santu si nu fika ta pensa ô ta faze kuzas ki el ka gosta. (1 Tes. 4:7, 8) Pa nu kontinua ta resebe spritu santu, tanbê nu meste ka “dispreza kes profesia.” (1 Tes. 5:20) “Kes profesia” li krê fla kes mensajen na Bíblia ki Deus da-nu através di se spritu santu. I kel-li ta inklui kes mensajen sobri dia di Jeová i sobri ténpu di fin. Ka nu pensa ma dia di Jeová ô Armajedon ka ta ben timenti nu sta bibu. Envês di kel-li, nu sta spera ma ka ta dura el ta ben. Nu ta faze kel-li óras ki nu ta mante okupadu ta ‘faze kuzas ki ta mostra ma nu ta adora Deus’. — 2 Ped. 3:11, 12. w23.06 12 ¶13-14

Kuzê ki nu debe faze si dirapenti parse un imajen di pornografia na nos aparelhu iletróniku? Nu debe tra odju di el lógu. Un kuza ki pode djuda-nu faze kel-li é lenbra ma nos amizadi ku Jeová é kuza más inportanti ki nu ten. Sikrê alguns imajen pode ka ser di pornografia, es pode pô-nu ta pensa na kuzas mariadu. Pamodi ki nu debe ivita-s? Pamodi nu ka krê faze nada ki pode pô-nu ta faze adultériu na nos korason, sikrê é un kuza pikinoti. (Mat. 5:28, 29) Un ansion na Tailándia, ki txoma Davidi, fla: “N pergunta nha kabésa: ‘Sikrê un imajen pode ka ser di pornografia, Jeová ta fika kontenti si N kontinua ta odja-l?’ Pensa di kel manera li ta djuda-m toma bons disizon.” Xinti medu di faze kalker kuza ki ta mágua Jeová ta djuda-nu toma bons disizon. ‘Ten grandi ruspetu pa Jeová é komésu di sabedoria’. w23.06 23 ¶12-13

‘Kuartu’ pode krê fla nos kongregason. Na grandi tribulason nu ta atxa kel proteson ki Jeová promete si nu kontinua unidu ku nos irmons. Pur isu, nu debe sforsa txeu gósi, ka sô pa aguenta nos irmons ku irmans, má tanbê pa ama-s. Nos salvason pode dipende di kel-li! ‘Kel grandi dia di Jeová’ ta ben ser un ténpu txeu difísil pa tudu algen. (Sof. 1:14, 15) Povu di Jeová tanbê ta ben sufri. Má si nu pripara gósi, nu ta konsigi kontinua kalmu i djuda otus. Nu ta konsigi aguenta firmi óras ki nu ben pasa pa kalker prubléma. Óras ki nos irmons ku irmans ben sufri, nu ta faze nos midjór pa djuda-s i asi, mostra-s konpaxon i da-s kes kuza ki es meste. I si nu prende ama nos irmons ku irmans gósi, nu ta ben mostra-s amor na futuru. Nton, Jeová ta ben rekonpensa-nu ku vida pa tudu ténpu na un mundu ki tudu disgrasa i prublémas ka ta ben lenbradu di es más. — Isa. 65:17. w23.07 7 ¶16-17

Palavra di Deus txeu bês ta fla ma kes ómi fiel éra fórti. Má ti kel más fórti ka xinti forsa sénpri. Pur izénplu, na alguns situason Rei Davidi ‘bira fórti sima un monti,’ má na otus situason ‘medu toma kónta di el.’ (Sal. 30:7) Enbóra spritu santu di Deus poi Sanson ta fika fórti dimás, el rekonhese ma sen kel spritu santu di Deus, el ta fikaba ‘fraku i el ta biraba sima tudu kes otu ómi.’ (Juí. 14:5, 6; 16:17) Kes ómi fiel li éra fórti pamodi Jeová ta daba es forsa. Apóstlu Paulu sabia ma el tanbê el mesteba forsa di Jeová. (2 Kor. 12:9, 10) El tinha prublémas di saúdi. (Gál. 4:13, 14) Tanbê alvês, éra difísil pa el fazeba kel ki é dretu. (Rom. 7:18, 19) I alvês el ta xintiba preokupadu dimás i ku medu di kuzê ki pode kontiseba ku el. (2 Kor. 1:8, 9) Má simé, óras ki Paulu ta xintiba fraku, é la ki el ta staba xeiu di puder. Di ki manera? Jeová da Paulu kel forsa ki staba ta falta-l. El poi Paulu ta bira fórti. w23.10 12 ¶1-2

Si alvês nu ta xinti ma nu ka ten valor, nu pode lenbra ma Jeová atrai-nu pa el. (Juan 6:44) El ta odja kes bon kualidadi ki nu ten, ki nen nos nu ka ta odja-s na nos mê, i el sabe midjór di ki nos ki tipu di algen ki nos é. (2 Cró. 6:30) Pur isu, nu pode kunfia na el óras ki el ta fla-nu ma nu ten valor. (1 Juan 3:19, 20) Antis di nu prende verdadi, alguns di nos faze kuzas ki talvês inda ta pô-nu ta xinti kulpadu. (1 Ped. 4:3) Ti mésmu sérvus fiel di Jeová luta kóntra kel tendénsia di faze kuzas mariadu. Bo tanbê bu ta xinti ma Jeová ka ta pode purdua-u? Si bu ta xinti si, bu pode fika inkorajadu di sabe ma otus sérvu fiel di Jeová luta ku sentimentus sima di bo. Pur izénplu, apóstlu Paulu ta xintiba mizeriadu óras ki el ta pensaba na se inperfeisons. (Rom. 7:24) É klaru ki Paulu dja rapendeba di se pekadus i dja el batizaba. Má simé, el fla ma el éra “kel apóstlu ménus inportanti” i ma el éra “kel más pekador.” — 1 Kor. 15:9; 1 Tim. 1:15. w24.03 27 ¶5-6

Un lison ki nu pode prende ku mau disizon ki rei Jioás toma, é ma nu meste skodje amigus ki ta ama Jeová i ki krê pô-l ta fika kontenti. Kes amigu li ta djuda-nu faze kuzas dretu. Nu pode faze amizadi ku kes ki é más bédju ô más novu ki nos. Lenbra ma Jioás éra mutu más novu ki se amigu Jioiada. Sobri amigus ki bu ta skodje, pensa na kes pergunta li: ‘Es ta djuda-m bira nha fé na Jeová más fórti? Es ta insentiva-m pa N vive di akordu ku leis di Deus? Es ta pâpia sobri Jeová i verdadis sobri el ki ten txeu valor? Es ta mostra ruspetu pa leis di Deus? Es ta fla-m sô kel ki N ta krê obi ô es ten koraji di koriji-m si N disvia?’ (Pro. 27:5, 6, 17) Pa ser sinseru, si bus amigu ka ta ama Jeová, bu ka meste-s. Má si bus amigu ta ama Jeová, ka bu larga-s, pamodi sénpri es ta djuda-u. — Pro. 13:20. w23.09 9-10 ¶6-7

Alfa é kel primeru létra di alfabétu gregu i ómega é kel últimu létra. Kantu ki Jeová fla ma el “é Alfa i Ómega”, el sta djuda-nu intende ma óras ki el kumesa un kuza el ta tirmina-l. Dipôs ki Jeová kria Adon ku Eva, El fla-s: ‘Nhos ten fidjus i nhos bira txeu; nhos intxi téra i nhos manda na el’. (Jén. 1:28) Kantu ki Jeová fla se vontadi pa primeru bês, é sima si el flaba: “Alfa”. Ta ben txiga un ténpu ki kes disendenti perfeitu i obidienti di Adon ku Eva, ta ben intxi téra i bira-l un paraízu. Óras ki kel-li kontise é sima si Jeová ta ben fla: “Ómega”. Dipôs ki el tirmina di faze ‘séu ku téra i tudu kuza ki ten na es’, Jeová fla un kuza ki ta mostra ma di serteza se vontadi ta ben kunpri. Vontadi di Jeová pa pesoas i pa téra ta ben kunpri tudu na fin di sétimu dia. — Jén. 2:1-3. w23.11 5 ¶13-14

Kel viajen difísil di Babilónia pa Israel, pode duraba uns kuatu mês. Má Jeová promete ma el ta poba kel viajen ta sérba más fásil pa es. Kes judeu fiel sabia ma kes rezultadu ki es ta tinha óras ki es voltaba pa Israel, éra mutu más midjór di ki kalker sakrifisiu ki es ta ba fazeba. Kel midjór benson ki es ta resebeba tinha aver ku ses adorason. Ka tinha ninhun ténplu pa adora Jeová na Babilónia. Ka tinha altar pa kes israelita ofereseba kes sakrifisiu ki Lei di Muizés ta izijiba, i ka tinha saserdótis priparadu pa ofereseba kes sakrifisiu. Tanbê, tinha mutu más algen na kel sidadi ki ta adoraba deus falsu di ki kes ki ta ruspetaba Jeová ô se leis. Nton, milharis di judeu ki ta amaba Jeová tinha gana di voltaba pa ses téra pa es pode rekuperaba adorason puru. w23.05 14-15 ¶3-4

Nu meste ajuda di spritu santu di Deus pa nu konsigi kontinua ta konporta “sima fidjus di lus”. Pamodi ki nu meste faze kel-li? Pamodi é ka fásil kontinua linpu na es mundu xeiu di konportamentu mariadu. (1 Tes. 4:3-5, 7, 8) Spritu santu pode djuda-nu luta kóntra pensamentu di mundu, i kel-li ta inklui filozofias i ideias ki ta bai kóntra pensamentu di Deus. Tanbê, spritu santu pode djuda-nu ser bon na ‘tudu tipu di kuza i ser justu.’ (Efé. 5:9) Un manera ki nu pode resebe spritu santu é óras ki nu ta pidi-l na orason. Jizus fla ma Jeová ta “da spritu santu pa kes ki ta pidi-l”. (Luk. 11:13) Tanbê, nu ta resebe spritu santu óras ki nu ta lova Jeová djuntu na runion. (Efé. 5:19, 20) Kel bon influénsia ki spritu santu di Deus ten na nos ta djuda-nu vive di un manera ki ta agrada Deus. w24.03 23-24 ¶13-15

Bu meste ten más paxénxa? Nton ora ta pidi paxénxa. Paxénxa é un kualidadi ki ta faze párti di frutu di spritu santu. (Gál. 5:22, 23) Pur isu, nu pode ora ta pidi spritu santu i pidi Jeová pa djuda-nu dizenvolve kes kualidadi di frutu di spritu santu. Si nu sta ta pasa pa un situason ki ta poi nos paxénxa na próva, nu “kontinua ta pidi” pa spritu santu djuda-nu ten paxénxa. (Luk. 11:13) Tanbê, nu pode pidi Jeová pa djuda-nu odja kuzas sima el ta odja. Dipôs di faze orason, nu meste faze nos midjór pa mostra paxénxa tudu dia. Si nu kontinua ta ora ta pidi paxénxa i sforsa pa mostra-l, Jeová ta djuda-nu ten kel kualidadi li más txeu, sikrê antis nu ka tinha paxénxa. Tanbê ta djuda midita/un kuza ki ta djuda-nu é midita na kes izénplu di Bíblia. Bíblia ten txeu izénplu di algen ki mostra paxénxa. Óras ki nu ta midita na kes izénplu li, nu pode prende maneras di mostra paxénxa. w23.08 22 ¶10-11

Jizus garanti apóstlu Pedru ma Jeová ta kuidaba di el. Dipôs ki Jizus resusitadu, el faze más un milagri ki poi Pedru i kes otu apóstlu ta pega pexi. (Juan 21:4-6) Kel milagri li da Pedru serteza ma pa Jeová ka éra difísil daba el kes kuza ki el staba ta meste. Talvês el lenbra ma Jizus flaba ma Jeová ta kuida di kes ki ta “kontinua ta buska Reinu primeru”. (Mat. 6:33) Tudu kel-li, djuda Pedru poi trabadju di pregason na primeru lugar na se vida, envês di se nogósiu di péska. Na dia di Pentikósti di anu 33 D.K., el prega ku koraji i el djuda monti algen seta kes notísia sábi. (Atus 2:14, 37-41) Dipôs, el djuda kes samaritanu i kes algen ki ka éra judeu prende sobri Kristu i sigi-l. (Atus 8:14-17; 10:44-48) Ta fika klaru ma Jeová uza Pedru dretu pa traze algen di tudu tipu pa kongregason. w23.09 20 ¶1; 23 ¶11

Uns dôs anu dipôs ki kes algen di Babilónia distrui Jiruzalen, Nabukudunuzor, rei di Babilónia, tevi un sonhu di un státua grandi ki ta daba medu. El fla ma el ta mataba tudu kes sábiu i Daniel tanbê, si es ka flaba el kuzê ki kel sonhu krê flaba. (Dan. 2:3-5) Daniel tinha ki ajiba rápidu pamodi si el ka fazeba kel-li txeu algen ta moreba. Pur isu, ‘Daniel bai ti rei i el pidi-l un ténpu pa el pode flaba rei kuzê ki kel sonhu siginifikaba.’ (Dan. 2:16) Kel-li ta mostra ma Daniel éra un algen ki tinha koraji i fé. Bíblia ka ta fla si antis Daniel dja flaba kuzê ki un sonhu siginifika. El pidi se amigus ‘pa es ora pa Deus mostra-s mizerikórdia sobri kel segredu li’. (Dan. 2:18) Jeová responde kes orason. Ku ajuda di Deus, Daniel fla Nabukudunuzor kuzê ki se sonhu krê flaba. Asi Daniel, se amigus i kes otu sábiu ka móre. w23.08 3 ¶4

Pensa na modi ki mostra paxénxa ta djuda-nu. Óras ki nu ten paxénxa, nu ta ser más filís i más kalmu. Pur isu, paxénxa pode midjora nos saúdi. Óras ki nu ten paxénxa ku otus, nu ta ten bon amizadi ku es i nos kongregason ta bira más unidu. Si un algen irita-nu, paxénxa ta djuda-nu ivita pa kel situason ka piora. (Sal. 37:8, nóta di rodapé; Pro. 14:29) Má más inportanti inda, nu ta imita nos Pai na séu i nu ta bira nos amizadi ku el más fórti. Paxénxa é un kualidadi bunitu i el ta djuda nos tudu! Enbóra pode ka ser fásil pa nos mostra paxénxa sénpri, ku ajuda di Jeová nu pode kontinua ta dizenvolve kel kualidadi li. I timenti nu ta spera pa mundu novu, nu pode ten serteza ma ‘odjus di Jeová ta sta sienti na kes ki ten grandi ruspetu pa el, kes ki ta spera pa se amor lial’. (Sal. 33:18) Nos tudu nu debe sta disididu na kontinua ta bisti di paxénxa. w23.08 22 ¶7; 25 ¶16-17

Tiagu mostra ma un ómi pode ti fla ma el ten fé, má talvês kuzê ki el ta faze ta mostra ma el ka ten fé di verdadi. (Tia. 2:1-5, 9) Tiagu tanbê pâpia di ‘un algen ki odja un irmon ô irman sen ropa ô sen kumida’, má el ka faze nada pa djuda-l. Sikrê kel algen fla ma el tinha fé, kuzê ki el faze mostra ma el ka tinha fé di verdadi. (Tia. 2:14-16) Tiagu fla ma Raabi é un bon izénplu di algen ki mostra fé através di kuzas ki el faze. (Tia. 2:25, 26) El obi ta papiadu di Jeová i el rekonhese ma Jeová staba ta djuda israelitas. (Jos. 2:9-11) Kes kuza ki el faze mostra ma el tinha fé. Pamodi se fé el proteje kes dôs spion israelitas kantu ki ses vida staba na prigu. Pur isu, kel mudjer li enbóra el éra inperfeitu i el ka éra israelita el txomadu di justu, sima Abraon. Izénplu di Raabi ta mostra ma é inportanti nu mostra fé através di kuzas ki nu ta faze. w23.12 5-6 ¶12-13

Nu ka krê intende sô kes verdadi prinsipal di Bíblia. Ku ajuda di spritu santu di Deus nu sta ku gana di prende “ti kes kuza profundu di Deus.” (1 Kor. 2:9, 10) Pamodi ki bu ka ta kumesa ta studa kes verdadi más profundu di Bíblia pa bu pode bira más amigu di Jeová? Pur izénplu, bu pode piskiza más sobri modi ki Jeová mostra se amor pa se sérvus na pasadu i modi ki kel-li ta prova ma el ta ama-u tanbê. Bu pode piskiza tanbê modi ki adorason di Jeová éra organizadu na Israel i konpara ku modi ki Jeová krê pa nu adora-l gósi. Ô talvês, bu pode studa ku kuidadu kes profesia ki Jizus kunpri duránti se vida i se trabadju di pregason li na téra. Bu pode fika txeu kontenti na studa kes asuntu li ku ajuda di Índice das publicações da Torre de Vigia ô Guia de pesquisa para Testemunhas de Jeová. Studa kes verdadi más profundu di Bíblia pode bira bu fé más fórti i djuda-u ‘atxa konhisimentu di Deus.’ — Pro. 2:4, 5. w23.10 18-19 ¶3-5

Palavra ki apóstlu Pedru uza pa “fórti” krê fla “stika.” Sugundu párti di kel versíklu ta fla kuzê ki amor fórti pode faze. El ta kubri pekadu di nos irmons. Nu pode konpara kel-li ku un panu ki nu ta stika di tal manera ki el ta kubri, ka un nen dôs, má “un monti pekadu.” “Kubri” é un manera di fla púrdua. Sima un padás di panu pode kubri un mantxa, amor pode kubri frakézas i inperfeisons di otus. Nos amor pa nos irmons debe ser fórti di tal manera, ki ta da pa nu púrdua ses inperfeison sikrê kel-li é txeu difísil. (Kol. 3:13) Óras ki nu ta púrdua otus algen nu ta mostra ma nos amor é fórti i nu ta dexa Jeová kontenti. w23.11 11-12 ¶13-15

Kantu Rei Juzias tinha 26 anu, el kumesa ta konpo ténplu. Duránti kel trabadju atxadu ‘livru di Lei di Jeová, ki dadu através di Muizés.’ Kantu rei obi kuzê ki el ta flaba, el aji lógu pa obi ku kuzê ki staba skrebedu na el. (2 Cró. 34:14, 19-21) Bu krê lé Bíblia tudu dia? Si bu sta ta tenta, bu sta konsigi? Bu ta kustuma skrebe alguns testu di Bíblia ki pode djuda-u? Kantu Juzias tinha uns 39 anu, el faze un kuza mariadu ki pô-l móre. El kunfia na el envês di pidi orientason na Jeová. (2 Cró. 35:20-25) Kuzê ki nu ta prende? Ka ta inporta kantu anu ki nu ten ô kantu ténpu dja nu ten ta studa Bíblia, nu debe kontinua ta buska Jeová. Kel-li krê fla, faze orason sénpri ta pidi se orientason, studa se Palavra i obi kes konsedju ki kes irmon maduru ta da. Asi, nu ta ten ménus xansi di faze érus gravi i más xansi di ser filís. — Tia. 1:25. w23.09 12 ¶15-16

Bíblia ta pâpia di txeu mudjer ki ta amaba Jeová i ki ta sirbiba el. Es éra “kontroladu na ses ábitu i fiel na tudu kuza.” (1 Tim. 3:11) Tanbê, kes irman jóven pode atxa na kongregason irmans maduru ki ta ama Jeová i ki es pode imita. Irmans jóven, nhos pensa na un irman ki nhos konxe, ki é un bon izénplu i ki nhos pode imita. Nhos repara kes kualidadi ki el ten. Dipôs, nhos pensa modi ki nhos pode imita kes kualidadi li. Un kualidadi inportanti pa nu bira un sérvu di Jeová maduru é ser umildi. Si un mudjer é umildi, el ta ten un bon amizadi ku Jeová i ku otus algen. Pur izénplu, un irman ki ta ama Jeová ta disidi sigi ku umildadi prinsípiu ki Jeová da ki sta na 1 Koríntius 11:3, ki ta splika kenha ki Jeová da responsabilidadi di toma kónta di kongregason i di família. w23.12 18-19 ¶3-5

Jeová ta spera ma un maridu ta ama se mudjer, el ta da-l kes kuza ki el meste, el ta ser un bon amigu pa el i el ta djuda-l bira más amigu di Jeová. Dizenvolve kapasidadi di rasusina, mostra ruspetu pa mudjer i ser un algen di kunfiansa, ta ben djuda-u bira un bon maridu. Dipôs ki bu kaza bu pode ser pai. Kuzê ki bu pode prende ku Jeová sobri ser un bon pai? (Efé. 6:4) Jeová fla se fidju Jizus, ma el ta amaba el i ma el staba kontenti ku el. (Mat. 3:17) Si bu ser pai, fla bus fidju sénpri ma bu ta ama-s. I sénpri ilojia-s óras ki es faze algun kuza dretu. Kes pai ki ta imita izénplu di Jeová, ta djuda ses fidjus bira un irmon i un irman maduru. Bu pode pripara gósi pa kes responsabilidadi li, si bu ta kuida di otus algen na bu família i na kongregason ku amor i prende fla-s ma bu ta ama-s i ma es ten txeu valor pa bo. — Juan 15:9. w23.12 28-29 ¶17-18

Sikrê nos é sérvus fiel di Jeová, tanbê nu ta pasa pa prublémas i nu ta duense, sima ta kontise ku tudu algen. Tanbê, talvês nu ten ki aguenta opozison ô pirsigison di kes ki ta ôdia povu di Deus. Enbóra Jeová ka ta inpidi pa kes kuza li kontise ku nos, el promete ma el ta djuda-nu. (Isa. 41:10) Ku se ajuda nu pode kontinua ku nos alegria, toma bons disizon i kontinua lial pa el, sikrê na situasons txeu difísil. Jeová promete ma el ta da-nu kel ki Bíblia ta txoma di “kel pas di Deus”. (Flp. 4:6, 7) Kel pas li krê fla ma nu ta xinti kalmu i trankuilu na menti i na korason pamodi kel amizadi ki nu ten ku Jeová ki ten txeu valor. Kel pas ki “nu ka ta konsigi intende” é un kuza más sábi di ki kel ki nu ta pode imajina. Dja bu kustuma ora txeu pa Jeová i bu fika dimiradu pamodi bu xinti txeu kalmu dipôs? Kel sentimentu li é pamodi “kel pas di Deus”. w24.01 20 ¶2; 21 ¶4

Kes ki ta ama Jeová ta krê lova se nómi di tudu ses korason. Rei Davidi sabia ma óras ki nu ta lova nómi di Jeová é mésmu kuza ki lova Jeová. Óras ki nu ta obi nómi di Jeová, nu ta pensa na ki tipu di algen el é. Nu ta pensa na tudu kualidadis bunitu ki el ten i na tudu kuzas sábi ki dja el faze. Davidi sabia ma nómi di se Pai é santu, pur isu el ta lovaba el. El krê fazeba kel-li ku ‘tudu kel ki el tinha’, ô di tudu se korason. Di mésmu manera, kes levita éra kes primeru na lova Jeová. Ku umildadi, es rekonhese ma ses palavra nunka ka ta konsigi flaba tudu kel lovor ki nómi sagradu di Jeová ta merese. (Nee. 9:5) Nu ka ten dúvida ma ses umildadi poi Jeová ta fika txeu kontenti. w24.02 9 ¶6

Si bu ka konsigi alkansa kel méta ki bu krê, Jeová nunka ka ta atxa ma bo é un algen fraku. (2 Kor. 8:12) Pensa na kuzê ki dja bu konsigi faze. Bíblia ta fla ma ‘Deus é ka injustu pa skese di nhos óbra’. (Ebr. 6:10) Nton, bo tanbê bu ka debe skese. Pensa na kuzê ki dja bu faze, sima ten un amizadi fórti ku Jeová, pâpia ku otus algen sobri el ô batiza. Sima bu faze prugrésu i bu alkansa bus méta spritual na pasadu, bu pode kontinua ta faze prugrésu pa alkansa kel méta ki bu tene gósi. Ku ajuda di Jeová bu pode alkansa bu méta. Sénpri tenta odja modi ki Jeová sta ta djuda-u i kel-li ta djuda-u fika kontenti timenti bu sta sforsa pa alkansa bus méta. (2 Kor. 4:7) Si bu ka dizisti, bu ta ben resebe txeu benson. — Gál. 6:9. w23.05 31 ¶16-18

Jeová djobe maneras di mostra se povu ma el ta ama-s i ma el sta kontenti ku es. Bíblia ta pâpia di dôs situason ki El fla Jizus ma el éra se fidju ki El ta ama i ki ta da-l txeu alegria. (Mat. 3:17; 17:5) Bu ta gostaba pa Jeová fla mésmu kuza di bo? Oji, Jeová ka ta pâpia ku nos la di séu, má através di Bíblia. Óras ki nu ta lé kes palavra ki Jizus fla se disiplus ku amor, é sima si nu sta “obi” Jeová ta fla ma el sta kontenti ku nos. Jizus imita se Pai di manera perfeitu. Pur isu, óras ki nu lé ma Jizus fla se disiplus inperfeitu, má ki éra fiel, ma el staba kontenti ku es, nu ta pode imajina Jeová ta fla-nu kes mésmu kuza. (Juan 15:9, 15) Si nu sta pasa pa prublémas, kel-li ka krê fla ma Deus ka sta kontenti ku nos. Envês di kel-li, kes prubléma ta da-nu oportunidadi di mostra ma nu ta ama Jeová txeu i ma nu ten tudu kunfiansa na el. — Tia. 1:12. w24.03 28 ¶10-11