Óras ki bu tene un duénsa gravi

“Kantu N fika ta sabe ma N tinha kánser na dôs órgon, éra sima si N resebe un senténsa di mórti. Má kantu N txiga kaza, N pensa: ‘Ok, é ka kel-li ki N staba ta spéra, má N ten ki ranja un manera di lida ku el.’” — Linda, 71 anu.

“N ten un duénsa ki ta afeta nervus di ladu skérda di nha róstu i ki ta pô-m ta xinti txeu dór. Di vês en kuandu, kel dór ta pô-m ta xinti diprimidu. Txeu bês N ta xinti mi sô i ti N ta pensa na mata kabésa.” — Eliza, 49 anu.

Un ómi duenti na un karinhu di róda djuntu ku uns algen ki krê-l txeu

SI BO ô un algen ki bu ta ama atxadu ku un duénsa gravi, bu sabe modi ki kel-li é difísil. Alén di kel duénsa, bu ten ki lida ku preokupason. Kes konsulta, falta di dinheru pa paga kes tratamentu ô kes rezultadu kasábi di kes ramedi pode pô-u ta xinti medu i preokupadu. I tudu kel-li pode dizanima algen.

Na undi ki nu pode atxa ajuda? Txeu algen da kónta ma ora pa Deus i lé kes párti di Bíblia ki ta konsola algen djuda-s txeu. Otu kuza ki pode djuda é amor i apoiu ki família i amigus pode da.

MODI KI ALGUNS ALGEN LIDA KU KEL SITUASON LI

Robertu, di 58 anu, fla: “Lida ku bu duénsa ku fé na Deus i el ta kuida di bo. Faze orason pa Jeová. Dexa-l sabe modi ki bu sta xinti. Pidi-l spritu santu. Pidi-l pa el djuda-u ser puzitivu, nkoraja bu família i pa bu kontinua kalmu timenti bu ta lida ku bu duénsa.

“Un kuza ki ta djuda txeu, é óras ki bu família ta apoia-u. Tudu dia es ta txoma-m i es ta pergunta-m: ‘Modi ki bu sta?’ Tanbê N ta resebe nkorajamentu di amigus di lugaris diferenti. Es ta da-m txeu forsa. Kel-li ta djuda-m kontinua.”

Si bu sta ba vizita un amigu ki sta duenti, odja kuzê ki Linda fla: “Di sertéza kel algen ki sta duenti krê leba un vida normal ti undi ta da. I talvês é ka tudu óra ki el ta krê pâpia sobri se duénsa. Nton pâpia sobri kuzas ki normalmenti bu ta pâpia.”

Ku forsa di Deus, konsolu di Bíblia i ajuda di família i amigus, nu pode ten sertéza ma bale péna kontinua ta vive, sikrê nu tene un duénsa gravi.

Testus di Bíblia ki pode djuda-u

Kunfia na Deus.

‘N pergunta Jeová, i el responde-m. El libra-m di tudu nhas medu. Es ómi umildi txoma i Jeová obi.’ — Salmo 34:4, 6.

Linda, ki dja nu papiaba di el antis, fla: “Nunka N ka ora ta fla: ‘Pô-m midjora.’ Sénpri N ta flaba: ‘Djuda-m ser fórti pa N aguenta nha duénsa.’”

Lé Palavra di Deus ta djuda-u ten forsa.

‘Ningen ki ta mora la ka ta fla: “N sta duenti.”’ — Isaías 33:24.

Midita na promésas di Deus pa futuru ta da-u speransa i kel-li ta djuda-u aguenta firmi.

Pidi família i amigus pa djuda-u.

‘Un amigu di verdadi ta ama tudu óra i el é un irmon ki nase pa ténpu di frónta.’ — Provérbios 17:17.

Eliza, ki dja nu papiaba di el antis, fla: “Ka bu fika bo sô. Dexa irmons djuda-u. Pode ten dias ki bu ta xinti bo sô i bu ta atxa ma nen Deus ka ta obi-u, má ka bu fika bo sô.”