Matéria pa studa na runion Vida i pregason
4 TI 10 DI NOVÉNBRU
TIZORUS DI PALAVRA DI DEUS | 1 JOÃO 1-5
“Ka nhos ama mundu, nen kes kuza di mundu”
(1 João 2:15, 16 ) Ka nhos ama mundu, nen kes kuza di mundu. Si algen ta ama mundu, amor di Pai ka sta na el; 16 pamodi tudu kuza ki sta na mundu, sima dizeju di karni, dizeju di odju i izibison di kuzas ki algen ten, ka ta ben di Pai, má es ta ben di mundu.
w05 1/1 p. 10 par. 13
Nu sigi kel izénplu ki Jizus dexa-nu
13 Alguns algen pode atxa ma é ka tudu kuza na mundu ki é mariadu. Sikrê kel-li é verdadi, é fásil pa mundu i kes kuza di mundu disvia-nu di sirbi Jeová. I ninhun di kes kuza ki mundu ta oferese ka ten obijetivu di djuda-nu ser más amigu di Jeová. Pur isu, si nu ama kes kuza di mundu, sikrê kes ki é ka mariadu, nu sta ta kóre risku. (1 Timóteo 6:9, 10 ) Tanbê, txeu di kes kuza di mundu é mariadu i es pode prujudika-nu. Si nu odja filmis ô prugramas di tilivizon ki ta mostra violénsia, materialismu ô konportamentu seksual mariadu, nu pode fika ta pensa ma kes kuza li é normal i dipôs es ta bira un tentason pa nos. Si nu fika ta pasa ténpu ku kes algen ki ses obijetivu prinsipal é ten un vida más midjór ô ganha txeu dinheru, kes kuza li pode bira más inportanti pa nos tanbê. — Mateus 6:24; 1 Coríntios 15:33.
(1 João 2:17 ) Alén di kel-li, mundu sta ta pasa, i se dizeju tanbê, má ken ki ta faze vontadi di Deus ta kontinua pa tudu ténpu.
w13 15/8 p. 27 par. 18
Pensa na ki tipu di algen ki bu debe ser
18 Otu kuza ki pode djuda-nu luta kóntra ‘kes kuza di mundu’ é lenbra sénpri di kes palavra ki apóstlu Juan skrebe: ‘Mundu sta ta pasa, i se dizeju tanbê, má ken ki ta faze vontadi di Deus ta kontinua pa tudu ténpu.’ (1 João 2:17 ) Ta parse ma mundu di Satanás nunka ka ta kaba. Má, un dia el ta kaba. Ninhun di kes kuza ki mundu di Satanás ta oferese-nu ta dura pa tudu ténpu. Si nu lenbra sénpri di kel-li, nu ka ta kai na kes tentason di Diabu.
Djobe jóias ki sta na Bíblia
(1 João 2:7, 8 ) Nhas irmon ki N krê txeu, N sta skrebe nhos, ka un mandamentu novu, má un mandamentu antigu, ki dja nhos tene désdi komésu. Es mandamentu antigu é kel palavra ki nhos obi. 8 Má simé, N sta skrebe nhos un mandamentu novu ki é verdaderu pa Jizus i pa nhos, pamodi sukuru sta ta pasa i kel lus verdaderu dja sta ta límia.
Konsedjus di Jeová é di kunfiansa
14 Na Skrituras Gregu, nu ta atxa txeu testu ki ta lenbra-nu ma nu debe mostra amor pa kunpanheru. Jizus fla ma kel sugundu mandamentu más inportanti é ‘ama bu prósimu sima bu kabésa.’ (Mat. 22:39) Di mésmu manera, Tiagu, irmon di Jizus sô pa ladu mai, fla ma kel lei di amor é txeu inportanti. El txoma-l di ‘lei di rei’. (Tia. 2:8) Apóstlu Juan skrebe: ‘Nhas irmon ki N krê txeu, N sta skrebe nhos, ka un mandamentu novu, má un mandamentu antigu, ki dja nhos tene désdi komésu.’ (1 João 2:7, 8 ) Kuzê ki Juan krê flaba ku ‘mandamentu antigu’? El staba ta pâpia sobri kel mandamentu di mostra amor pa kunpanheru. Kel mandamentu li éra ‘antigu’ pamodi Jizus dja daba es mandamentu ‘désdi komésu’ ô duránti se trabadju di pregason. Má tanbê el éra ‘novu’ pamodi se disiplus tinha ki fazeba sakrifisius pa mostraba es amor na otus situason ki ta ben parseba. Oji kuazi tudu algen ta pensa sô na ses kabésa. Má anos nu ka krê ser asi. Pur isu, nu ta fika kontenti ku kes konsedju di Bíblia ki ta djuda-nu pa nu ka imita spritu di mundu. Kel spritu li ka ta dexa-nu mostra amor pa otus algen.
(1 João 5:16, 17 ) Si un algen odja se irmon ta faze un pekadu ki ka ta leba pa mórti, el ta pidi, i Deus ta da-l vida, sin, pa kes ki ka faze un pekadu ki ta leba pa mórti. Ten un pekadu ki ta leba pa mórti. É ka sobri kel pekadu li ki N sta fla ma el debe ora. 17 Tudu injustisa é pekadu, má, ten un pekadu ki ka ta leba pa mórti.
it-3 p. 243 par. 3
Perdon
Nu pode faze orason pa otus algen i pidi pa Deus purdua-s ses pekadu. Nu pode pidi kel-li ti mésmu pa un kongregason interu. Muizes faze kel-li pa nason di Israel interu. El konfesa ses pekadu i el pidi pa Deus purdua-s. I Jeová faze sima Muizes pidi-l. (Núm 14:19, 20) Tanbê, na inaugurason di ténplu, Salumon pidi Jeová pa el púrdua se povu óras ki es peka i es muda ses konportamentu mariadu. (1Rs 8:30, 33-40, 46-52) Esdras reprizenta kes judeu ki volta pa ses téra, kantu el konfesa ses pekadu na meiu di un monti di algen. Kel orason ki el faze di korason i kel konsedju ki el da povu, pô-s ta faze kuzas pa Jeová purdua-s. (Esd 9:13–10:4, 10-19, 44) Tiagu insentiva kel algen ki sta duenti na sentidu spritual pa txoma ansions di kongregason pa faze orason pa el, i Jeová ta purdua-l kes pekadu ki el faze. (Tg 5:14-16) Má, ‘ten un pekadu ki ta leba pa mórti.’ É pekadu kóntra spritu santu, ô óras ki algen faze un pekadu di abuzu ô di propózitu. Ka ten ninhun perdon pa kel tipu di pekadu li. Un kriston ka debe faze orason pa kes algen ki ta faze kel tipu di pekadu li. — 1Jo 5:16; Mt 12:31; He 10:26, 27; djobe ESPÍRITO; PECADO.
11 TI 17 DI NOVÉNBRU
TIZORUS DI PALAVRA DI DEUS | 2 JOÃO 1–JUDAS
“Nu ten ki luta pa nu kontinua na verdadi”
(Judas 3 ) Nhas irmon ki N krê txeu, nbóra N staba ta faze tudu kel ki N pode pa N skrebe nhos sobri kel mésmu salvason ki nu ten, N atxa ma N meste skrebe nhos pa N fla nhos pa nhos luta duru pa kel fé ki ntregadu pa kes santu, di un bês i pa tudu ténpu.
w04 15/9 pp. 11-12 pars. 8-9
‘Nhos kontinua ta bira fórti na Sinhor’
8 Nu konxe kes manha di Satanás, pamodi Skrituras ta pâpia di kes armadilha ki más el ta uza. (2 Coríntios 2:11 ) Pa prujudikaba Jó, ki éra un ómi justu, Diabu pô-l ta pasa pa txeu prubléma difísil. Pur izénplu, Diabu kaba ku tudu se rikézas, el mata pesoas ki Jó ta amaba, el kria-l opozison na família, el pô-l un duénsa gravi i el uza amigus falsu pa kritika-l sen motivu. Jó fika dizanimadu i el atxa ma Deus bandona-l. (Jó 10:1, 2) Nbóra oji pode ka ser Satanás ki sta kria-nu prublémas sima el fazeba ku Jó, txeu sérvus di Jeová sta ta pasa pa kes mésmu tipu di prubléma. I Diabu pode pruveta di kes prubléma pa el kunpri se obijetivu.
9 Na es ténpu di fin, kuzas ki ta prujudika nos amizadi ku Jeová sta ta bira kada bês más txeu. Nu sta ta vive na un mundu ki pesoas sta ta npenha pa kuzas material más di ki faze kuzas pa Deus. Prugramas ki mundu ta spadja através di internet, tilivizon i publisidadis, txeu bês ta mostra ma konportamentu seksual mariadu ta traze filisidadi envês di sufrimentu. I kuazi tudu algen sta ta ‘krê sô pasa sábi envês di ama Deus’. (2 Timóteo 3:1-5 ) Kel manera di pensa li pode poi nos amizadi ku Jeová na prigu si nu ka ‘luta duru pa nos fé’. — Judas 3.
Djobe jóias ki sta na Bíblia
(Judas 4 ) É pamodi dja kanba na nhos meiu alguns ómi ki Skrituras dja dura ki flaba ma es ta tinha kel julgamentu li; aes é ómis ki ka ta ruspeta Deus, ki transforma bondadi di Deus ki ka meresedu na un diskulpa pa faze konportamentu sen vergónha i ki mostra ma es é falsu pa nos úniku dónu i Sinhor, Jizus Kristu.
(Judas 12 ) Kes ómi li é rótxas sukundidu dibaxu di agu na nhos féstas di amizadi, timenti es sta ta kume na fésta djuntu ku nhos; es é pastoris ki ta da ses kabésa kumida sen medu; es é núvens sen agu, ki béntu ta leba di un ladu pa kel otu; es é arvis di fin di otonu, sen frutu, ki móre dôs bês, ki rinkadu pa raís;
it-1 p. 62 par. 1
(Ágapes ) Féstas di amizadi
Bíblia ka ta konta modi ki es ta fazeba kes fésta di amizadi ô di amor, nen el ka ta fla kantu bês ki es ta fazeba el. (Ju 12) Nen Jizus nen se apóstlus ka manda pa faze-s. Kel-li ta mostra klaru ma kes fésta é ka un kuza obrigatóriu ô ki sigidoris di Kristu debe kontinuaba ta faze-s. Alguns algen ta fla ma na kes fésta, kristons riku ta konvidaba kes kriston más póbri pa kumeba ku es. Kes algen ki éra órfus, viúvas, rikus, ô póbris ta xintaba tudu djuntu na méza ku txeu kumida i na un anbienti di amizadi pa kunpanheru.
it-3 p. 456 par. 6
Rótxa
Ten otu palavra na língua gregu, ki é spi·lás, ki ten aver ku un rótxa ô un grupu di rótxa ki ta fika sukundidu dibaxu di agu. Judas uza-l pa faze konparason ku alguns ómi ki entra disfarsadu na kongregason ku intensons mariadu. Sima kes rótxa dibaxu di agu é un prigu pa barkus, di mésmu manera kes ómi éra un grandi prigu pa kes otu algen déntu di kongregason. Judas fla sobri kes ómi: ‘Kes ómi li é rótxas sukundidu dibaxu di agu na nhos féstas di amizadi, timenti es sta ta kume na fésta djuntu ku nhos’. — Judas 12.
(Judas 14, 15 ) Enoki, ki é kel sétimu ómi ki ben di família di Adon, tanbê profetiza sobri es, kantu el fla: “Nhos odja! Jeová ben ku miríadis di se anjus santu 15 pa faze julgamentu kóntra tudu algen i pa kondena tudu kes algen ki ka ta ruspeta Deus pa tudu kuzas mariadu ki es faze i pa tudu kes kuza gravi ki kes pekador ki ka ta ruspeta Deus fla kóntra el.”
‘El agradaba Deus’
Sobri kuzê ki Enoki profetiza? Bíblia ta fla: ‘Nhos odja! Jeová ben ku miríadis di se anjus santu pa faze julgamentu kóntra tudu algen i pa kondena tudu kes algen ki ka ta ruspeta Deus pa tudu kuzas mariadu ki es faze i pa tudu kes kuza gravi ki kes pekador ki ka ta ruspeta Deus fla kóntra el.’ (Judas 14, 15 ) Un di kes primeru kuza ki nu pode repara na kel testu li, é ki Enoki uza vérbus na pasadu, sima si Deus dja fazeba kes kuza ki el flaba na se profesia. Txeu profétas ki vive dipôs di Enoki tanbê faze profesias ku vérbus na pasadu. Kes proféta tinha tantu sertéza ma kes profesia ta ben kunpriba, ki es pâpia di kuzas ki ta ben kontiseba sima ki dja es kontiseba! — Isaías 46:10.
‘El agradaba Deus’
Fé di Enoki ta pô-nu ta pergunta nos kabésa si nu ta nkara es mundu, di mésmu manera ki Deus. Kel mensaji di julgamentu ki Enoki prega, ti inda ten kel mésmu forsa ki el tinha na kel ténpu. Jeová kunpri kel profesia di Enoki kantu el traze Dilúviu i el distrui kel mundu mau na ténpu di Nué. Kel Dilúviu é un izénplu di un distruison mutu más grandi ki ta ben kontise na futuru. (Mateus 24:38, 39; 2 Pedro 2:4-6 ) Oji, sima na kel ténpu, Jeová ku se anjus sta prontu pa faze julgamentu di es mundu mau. Pur isu, nu debe presta atenson na kel avizu di Enoki i fla otus algen ma ka ta dura Deus ta ben aji. Nos família i nos amigus talvês ta afasta di nos. Pode ser ki na alguns momentu nu ta xinti ma nu sta nos sô. Má Jeová nunka ka bandona Enoki; i nunka el ka ta bandona se sérvus fiel oji.
18 TI 24 DI NOVÉNBRU
TIZORUS DI PALAVRA DI DEUS | APOCALIPSE 1-3
“N sabe kuzê ki bu sta ta faze”
(Apocalipse 1:20 ) Kel-li é kel segredu sagradu di kes 7 stréla ki bu odja na nha mô direita i di kes 7 kandelabru di oru: kes 7 stréla ta reprizenta kes anju di kes 7 kongregason, i kes 7 kandelabru ta reprizenta kes 7 kongregason.
w12 15/10 p. 14 par. 8
Ki tipu di spritu bu ta mostra?
8 Pa nu ivita kes tipu di spritu ô atitudi li, nu debe lenbra ma Bíblia ta fla ma Jizus tene ‘7 stréla na se mô direita’. Kes ‘stréla’ ta reprizenta kes ansion skodjedu ku spritu santu, i tanbê ta inklui tudu kes otu ansion na kongregasons. Jizus pode uza kes ‘stréla’ na se mô di manera ki el ta atxa ma é midjór. (Apo. 1:16, 20) Dja ki Jizus é Kabésa di kongregason, el ta kontrola tudu kuza ki grupus di ansion ta faze. El ten ‘odjus sima un lumi ta arde’, i el ta odja tudu kuza. Pur isu, si un ansion meste ser korijidu, Jizus ta toma medida pa el resebe koreson na ténpu ki El krê i di manera ki El krê. (Apo. 1:14) Nton, timenti Jizus ka aji, nu ta kontinua ta mostra ruspetu pa kes ansion ki sta na ‘mô direita’ di Jizus. Apóstlu Polu skrebe: ‘Nhos obi ku kes ki ta toma kónta di nhos i nhos obi ku es na tudu kuza, pamodi es ta sta ta djobe nhos, sima kenha ki ta pididu kónta, pa es pode faze-l ku alegria i nau ta suspira, pamodi kel-li ta prujudikaba nhos.’ — Heb. 13:17.
(Apocalipse 2:1, 2 ) “Skrebe pa kel anju di kongregason na Éfezu: Ki fla kes kuza li é kel ki tene kes 7 stréla na se mô direita i ki ta anda na meiu di kes 7 kandelabru di oru: 2 ‘N sabe kuzê ki bu sta ta faze, i di bu trabadju duru i bu kapasidadi di aguenta firmi, i N sabe ma bu ka ta tolera kes ómi mau i ma bu poi na próva kes ki ta fla ma es é apóstlus, má ki ka é, i bu da kónta ma es é mintirozus.
w12 15/4 p. 29 par. 11
Jeová ta proteje-nu pa salvason
11 Na kel vizon ki sta na Apocalipse kapítlus 2 i 3, ta fla ma kantu Jizus Kristu staba na se glória na Séu dipôs ki el resusitadu, el faze inspeson na kes 7 kongregason di Ázia Menór. Kel vizon ta dexa klaru ma Jizus ka ta odja sô modi ki un kongregason sta, má el ta odja tudu kuza ki kada algen ta faze déntu di un kongregason. El pâpia di alguns algen pa ses nómi i na kada un di kes situason, el da ilojiu ô konsedju ki es mesteba. Kuzê ki kel-li ta mostra? Na kunprimentu di kel vizon, kes 7 kongregason ta reprizenta kes kriston ki skodjedu ku spritu santu, dipôs di 1914. I kes konsedju ki Jizus da pa kes 7 kongregason tanbê ta aplika na tudu kongregason di povu di Deus oji na mundu interu. Pur isu, nu pode fla ma Jeová sta ta uza se Fidju pa toma kónta di Se povu. Modi ki kes konsedju li pode djuda-nu?
w01 15/1 pp. 20-21 par. 20
Kunpanha pasu di organizason di Jeová
20 Organizason di Jeová sta sénpri ta faze prugrésu. Pa nu kunpanha se pasu, nu ten ki rekonhise funson di Jizus Kristu, ki é kel ki Deus skodje pa ser ‘kabésa di kongregason’. (Efésios 5:22, 23 ) Tanbê é inportanti kuzê ki Isaías 55:4 ta fla: ‘Nhos odja! [Ami, Jeová,] N bira-l un tistimunha pa nasons, un líder i un governanti pa nasons.’ É klaru ki Jizus sabe ser un líder. Tanbê el konxe se ovelhas i kuzas ki es ta faze. Pamodi kantu ki el faze inspeson di kes 7 kongregason na Ázia Menór el fla-s sinku bês: ‘N sabe kuzê ki bu sta ta faze.’ (Apocalipse 2:2, 19; 3:1, 8, 15 ) Sima se Pai Jeová, Jizus tanbê sabe kal ki é nos nisisidadis. Antis di el inxina kel orason ki ta txomadu Pai-Nosso, Jizus fla: ‘Nhos Pai sabe di kuzê ki nhos meste, mésmu antis di nhos pidi-l.’ — Mateus 6:8-13.
Djobe jóias ki sta na Bíblia
(Apocalipse 1:7 ) Nhos odja! El ta ben ku núvens, i tudu odju ta ben odja-l, ti mésmu kes ki da-l ku lansa; i tudu tribu di Téra ta ben da ku mô na petu di tristéza pamodi el. Sin, amén.
Reinu di Deus ta ben distrui se inimigus
8 Kel profesia di Jizus sobri ténpu di fin ta mostra ma sta ben kontise txeu kuza inportanti antis di Armajedon. Kes dôs primeru kuza ki sta ben kontise i ki nu sta ben pâpia di es, sta na livrus di Mateus, Marcos i Lucas. — Lé Mateus 24:29-31; Mar. 13:23-27; Luc. 21:25-28.
10 Julgamentu. Tudu kes inimigu di Reinu ta ben podu ta odja un kuza ki ta omenta ses sufrimentu. Jizus fla: ‘Es ta odja Fidju di Ómi ta ben na núvens, ku grandi puder i glória.’ (Mar. 13:26) Óras ki Jizus mostra se puder di kel manera li, pesoas ta odja ma Jizus dja txiga pa faze julgamentu. Na otu párti di es profesia sobri ténpu di fin, Jizus ta da más informason di kel ténpu ki el ta ben faze se julgamentu. Nu ta atxa kel informason li na kel ilustrason di ovelhas ku kabritus. (Lé Mateus 25:31-33, 46.) Kes algen ki ta apoia Reinu di Deus ku lialdadi ta ben ser julgadu kómu ‘ovelhas’ i es ta ben ‘labanta [ses] kabésa’, pamodi es ta da kónta ma ses ‘salvason sta kuazi ta txiga.’ (Lucas 21:28 ) Má kes algen ki é kóntra Reinu ta ben ser julgadu kómu ‘kabritus’ i es ‘ta da ku mô na petu ku tristéza’ pamodi es ta da kónta ma es sta ba ser ‘distruídu pa tudu ténpu’. — Mat. 24:30; Apo. 1:7.
(Apocalipse 2:7 ) Ken ki ten obidu obi kuzê ki spritu sta fla pa kongregasons: Kel ki vense, N ta da-l xansi di kume di arvi di vida, ki sta na paraízu di Deus.’
w09 15/1 p. 31 par. 1
Pártis inportanti di livru di Apocalipse — Párti 1
2:7 — Kuzê ki é ‘paraízu di Deus’? Dja ki kes palavra li é pa kes kriston skodjedu ku spritu santu, kel paraízu ki es versíklu sta pâpia di el debe ser na Séu, na própi prezénsa di Deus, ki é un lugar sima un paraízu. Kes kriston skodjedu ku spritu santu ki kontinua fiel ta ben dadu priviléjiu di kume ‘di arvi di vida’. Es ta ben resebe un vida ki ka ta kaba. — 1 Cor. 15:53.
25 DI NOVÉNBU TI 1 DI DIZÉNBRU
TIZORUS DI PALAVRA DI DEUS | APOCALIPSE 4-6
“Kes kuatu kabalu di Apocalipse ”
(Apocalipse 6:2 ) I N odja un kabalu branku. Kel ki staba montadu na el tinha un arku; el dadu un koroa i el sai ta ganha pa konpleta se vitória.
Kenha ki é kes ómi montadu na kes kuatu kabalu di Apocalipse?
Kenha ki é kel ómi montadu na kabalu branku? Nu ta atxa respósta na livru di Apocalipse. El ta txoma kel ómi na kabalu branku di ‘Palavra di Deus’. (Apocalipse 19:11-13 ) É Jizus ki ta txomadu di ‘Palavra’, pamodi el é pórta-vós di Deus. (João 1:1, 14 ) Tanbê el ta txomadu di ‘Fiel i Verdaderu’ i di ‘Rei di reis i Sinhor di sinhoris’. (Apocalipse 19:16 ) Kel-li ta mostra klaru ma Jizus ten puder pa el aji sima un Rei, ki tanbê é un trópa balenti. El é fiel pur isu el ka ta abuza di se puder ô uza-l di manera mariadu. Má simé, kel-li ta pô-nu ta faze alguns pergunta.
Kenha ki é kes ómi montadu na kes kuatu kabalu di Apocalipse?
Na ki ténpu ki kes ómi montadu na kabalu kumesa ta kóre? Repara ma Jizus, ki é kel primeru ómi montadu na kabalu, kumesa ta kóre kantu el resebe un koroa. (Apocalipse 6:2 ) Na ki ténpu ki Jizus bira Rei na Séu? Kel-li ka kontise lógu ki el volta pa Séu dipôs ki el resusitadu. Bíblia ta mostra ma Jizus tevi ki spéra algun ténpu antis di el bira rei. (Hebreus 10:12, 13 ) Jizus da se sigidoris un sinal ki ta djudaba es odja na ki ténpu ki el ta kumesaba ta governa na Séu. El fla-s ma lógu ki el kumesaba ta governa, situason na mundu ta fikaba kada bês más piór. Ta ben tinha géra, falta di kumida i duénsas. (Mateus 24:3, 7; Lucas 21:10, 11 ) Na anu 1914, lógu dipôs ki kumesa Primeru Géra na Mundu Interu, fika klaru ma dja nu staba na kel ténpu difísil. Bíblia ta txoma-l di ‘ténpu di fin’. — 2 Timóteo 3:1-5.
(Apocalipse 6:4-6 ) I sai un otu kabalu, ki éra kor di lumi. Kel ki staba montadu na el dadu puder pa tra pas di Téra, pa ómis pode mata kunpanheru, i el dadu un spada grandi. 5 Kantu el abri kel tirseru sélu, N obi kel tirseru kriatura bibu ta fla: “Ben!” I N odja un kabalu prétu. Kel ki staba montadu na el tinha un balansa na mô. 6 N obi un kuza sima un vós na meiu di kes kuatu kriatura bibu, ta fla: “Un litru di trigu pa un dináriu i três litru di sevada pa un dináriu. I ka bu straga azeti nen vinhu.”
Kenha ki é kes ómi montadu na kes kuatu kabalu di Apocalipse?
Kel ómi montadu na kel kabalu burmedju, ta reprizenta géra. Repara ma el ka sta tra pas sô di alguns nason, má di Téra interu. Pa primeru bês na stória, na anu 1914, kontise un géra na mundu interu. Dipôs di kel-li kontise un sugundu géra na mundu interu, ki faze mutu más stragu. Alguns algen ta atxa ma nunbru di tudu kes algen ki dja móre pamodi géra ô konfuzon entri paízis désdi anu 1914, é más di 100 milhon! Tanbê, txeu algen fika prujudikadu pamodi es panha pankada gravi.
Kenha ki é kes ómi montadu na kes kuatu kabalu di Apocalipse?
“I N odja un kabalu prétu. Kel ki staba montadu na el tinha un balansa na mô. N obi un kuza sima un vós na meiu di kes kuatu kriatura bibu, ta fla: ‘Un litru di trigu pa un dináriu i três litru di sevada pa un dináriu. I ka bu straga azeti nen vinhu.’” — Apocalipse 6:5, 6.
Kel ómi montadu na kabalu prétu ta reprizenta fómi. Situason ta ben fikaba konplikadu dimás ki Bíblia ta fla ma un litru di trigu ta kustaba un dináriu, ki éra saláriu di un dia di trabadju na ténpu di Jizus! (Mateus 20:2 ) Kel dinheru li ta daba pa kunpra três litru di sevada, ki éra un tipu di serial ki tinha ménus valor ki trigu. Kel kuantidadi di kumida li ka ta txigaba pa sustentaba un família grandi. Kel vós tanbê aviza pesoas pa popa azeti ku vinhu. Kes kuza li ta fazeba párti di kumida ki pesoas ta kumeba na ses dia-dia na kel ténpu.
(Apocalipse 6:8 ) I N odja un kabalu diskoradu. Kel ki staba montadu na el, se nómi éra Mórti, i Sipultura staba ta bai se tras, pértu di el. Es dadu autoridadi na un kuartu di Téra, pa es mata ku un spada kunpridu, ku fómi, ku duénsas ki ta mata i ku kes féra di Téra.
Kenha ki é kes ómi montadu na kes kuatu kabalu di Apocalipse?
Kel ómi montadu na kabalu diskoradu ta reprizenta mórti, ki ta kontise pamodi duénsas i otus kuza. Poku ténpu dipôs di 1914, Gripi Spanhóla mata txeu milhon di algen. Talvês kuazi 500 milhon di algen panha kel duénsa. Na kel ténpu, na kada 3 algen na mundu, 1 algen panha kel duénsa.
Má é ka sô Gripi Spanhóla ki staba ta mata algen. Alguns piskiza ta fla ma, más di 300 milhon di algen móre di varióla duránti séklu 20. Nbóra oji medisina dja avansa txeu, ti inda milhons di algen sta ta móre pamodi SIDA, tuberkulozi i malária.
Pur isu, ka ta nporta si é pamodi géras, fómi ô duénsas, txeu algen sta ta móre. I Sipultura sta kontinua ta resebe kes algen sen dór i sen péna.
Djobe jóias ki sta na Bíblia
(Apocalipse 4:4 ) Na vólta di kel tronu tinha 24 tronu, i N odja 24 ansion xintadu na kes tronu. Es staba bistidu ku ropas branku i es tinha koroas di oru na ses kabésa.
(Apocalipse 4:6 ) Dianti di tronu tinha un kuza ki ta parse ku un mar di vidru, sima kristal. Na meiu di tronu i na vólta di tronu tinha kuatu kriatura bibu, xeiu di odju pa frenti i pa tras.
re pp. 76-77 par. 8
Glória di tronu di Jeová na Séu
8 Juan sabia ma skodjedu saserdótis pa sirbi na tabernákulu na ténpu antigu. Pur isu, talvês el fika dimiradu ku kuza ki el odja dipôs: ‘Na vólta di kel tronu tinha 24 tronu, i N odja 24 ansion xintadu na kes tronu. Es staba bistidu ku ropas branku i es tinha koroas di oru na ses kabésa.’ (Apocalipse 4:4 ) Envês di saserdótis, el odja 24 ansion, xintadu na tronus i ku koroas na kabésa sima reis. Kenha ki é kes ansion? É kes kriston na kongregason ki skodjedu ku spritu santu, ki resusitadu i es sta na ses lugar ki Jeová dja prometeba es na Séu. Modi ki nu sabe kel-li?
re p. 80 par. 19
Glória di tronu di Jeová na Séu
19 Kuzê ki kes kriatura ta reprizenta? Na un vizon ki proféta Ezekiel tevi i ki el konta, ta djuda-nu atxa respósta. Ezekiel odja Jeová xintadu na se tronu na un karu na Séu, i kriaturas bibu staba ta kunpanha-l. Es éra sima kes kriatura ki Juan pâpia di es. (Ezequiel 1:5-11, 22-28 ) Un ténpu dipôs na otu vizon, Ezekiel torna odja kel karu ku tronu i kes kriatura bibu ta kunpanha-l. Di kel bês li, el txoma kes kriatura bibu di kerubins. (Ezequiel 10:9-15 ) Kes kuatu kriatura bibu ki Juan odja, talvês ta reprizenta kes txeu kerubin di Deus. Es é kriaturas ô anjus ki ten un puzison altu na organizason di Jeová, kel párti ki ta fika na Séu. Juan ka fika dimiradu di odja kerubins pértu di Jeová. Pamodi na ténpu antigu kantu ta izistiba tabernákulu, tinha dôs kerubin di oru riba di tanpa di arka di kontratu, ki ta reprizentaba tronu di Jeová. Na meiu di kes kerubin, ta saíba vós di Jeová ki ta daba mandamentus pa nason. — Êxodo 25:22; Salmo 80:1.
(Apocalipse 5:5 ) Má un di kes ansion fla-m: “Para di txora. Odja! Kel Lion di tribu di Judá, kel raís di Davidi, dja vense, i el pode abri kel rolu i kes 7 sélu.”
cf p. 36 pars. 5-6
‘Odja! Kel Lion di tribu di Judá’
5 Lion txeu bês ta uzadu pa reprizenta koraji. Dja bu kustuma sta frenti-frenti ku un lion matxu? Si dja bu kustuma sta, talvês éra na un jardin zoológico i kel lion staba déntu di un gradi ki sipara nhos. Má simé, talvês bu fika ku un poku di medu. Si bu djobe déntu di odju di kel lion grandi i fórti, i el djobe-u, bu ka ta konsigi imajina kel lion ta fuji di medu di algun kuza. Bíblia ta fla ma ‘lion é kel animal más balenti ki ten, i el ka ta kóre dianti di ningen’. (Provérbios 30:30 ) Kristu ten kel mésmu tipu di koraji li.
6 Nu ben analiza três manera ki Jizus mostra koraji sima di lion: kantu el difende verdadi, kantu el apoia justisa i kantu el nfrenta opozison. Nu ta ben odja tanbê ma nos tudu nu pode imita Jizus i mostra koraji, ka ta nporta si nu ta atxa ma anos é korajozu ô nau.