Prende ku profesias di Bíblia

1. Kuzê ki pode djuda-nu prende gosta di studa profesias di Bíblia?

UN IRMON jóven ki txoma Ben, fla: “N gosta txeu di studa kes profesia di Bíblia.” Bu ta xinti sima el ô bu ta xinti ma kes profesia di Bíblia é difísil dimás di intende? Bu pode ti atxa ma studa profesias di Bíblia pode ser infadadu. Má óras ki bu prende más sobri pamodi ki Jeová poi kes profesia na se Palavra, bu pode muda bu manera di pensa.

2. Kuzê ki nu ta ben odja na kel studu li?

² Na kel studu li, nu ta ben odja pamodi ki nu debe prende sobri profesias di Bíblia i tanbê modi ki nu pode studa-s. Dipôs, nu ta ben analiza dôs profesia ki sta na livru di Daniel i nu ta ben odja modi ki intende-s pode djuda-nu gósi.

PAMODI KI NU DEBE STUDA PROFESIAS DI BÍBLIA?

3. Kuzê ki nu meste faze pa nu intende profesias di Bíblia?

³ Nu meste pidi ajuda pa nu intende profesias di Bíblia. Odja un izénplu. Imajina ma bu sta ta vizita un lugar ki bu ka konxe, má bu amigu ki sta djuntu ku bo, konxe kel lugar dretu. El sabe dretu na undi ki bu sta i na undi ki kada rua ta leba-u. Di serteza, bu ta fika kontenti pamodi bu amigu seta bai ku bo. Di mésmu manera, Jeová sabe na ki ténpu nu sta ta vive i kuzê ki ta ben kontise na futuru. Pur isu, pa nu intende profesias di Bíblia, nu debe pidi Jeová ajuda ku umildadi. — Dan. 2:28; 2 Ped. 1:19, 20.

4. Pamodi ki Jeová poi profesias na se Palavra? (Jeremias 29:11) (Odja fotu.)

⁴ Sima kalker bon pai ku mai, Jeová krê pa se fidjus ten un futuru filís. (Lé Jeremias 29:11.) Má diferenti di kalker pai ku mai, Jeová pode fla-nu ku serteza kuzê ki ta ben kontise na futuru i el ka ta fadja. Jeová poi profesias na se Palavra pa nu pode sabe sobri kontisimentus inportanti antis di es kontise. (Isa. 46:10) Pur isu, profesias di Bíblia é un prezenti ki nos Pai na séu da-nu ku amor. Má modi ki bu pode ten serteza ma kel ki Bíblia ta fla ta ben kunpri?

5. Kuzê ki un jóven pode prende ku spiriénsia di Max?

⁵ Na skóla, jóvens ta sta na meiu di kes algen ki ten poku ô ninhun ruspetu pa Bíblia. Kuzas ki es ta fla i ses manera di konporta, pode poi un jóven ki é Tistimunha di Jeová ku dúvida. Repara kuzê ki kontise ku un irmon, ki txoma Max. El fla: “Kantu N staba na skóla, N kumesa ta duvida si nha pai ku nha mai staba ta inxina-m relijion verdaderu i si Bíblia ben di Deus.” Kuzê ki se pai ku se mai faze? El fla: “Es reaji ku kalma, enbóra N sabia ma es staba preokupadu.” Pai ku mai di Max uza Bíblia pa responde kes pergunta ki el tinha. Max faze algun kuza tanbê. El fla: “N studa kes profesia di Bíblia di mi pa mi i N pâpia ku otus jóven sobri kuzê ki N prende.” Kuzê ki kontise dipôs? Max fla: “Dipôs di kel-li N fika ku serteza ma Bíblia ben di Deus!”

6. Kuzê ki bu meste faze si bu tene dúvida i pamodi?

⁶ Si sima Max, bu kumesa ta duvida si Bíblia é verdadi, bu ka meste xinti kulpadu. Má, bu meste faze algun kuza. Dúvida é sima ferújen. Si bu ka faze nada, poku-poku el pode distrui un kuza di valor. Pa kumesa tra kalker “ferújen” di bu fé, bu meste pensa na kel pergunta li: “N ta kridita na kuzê ki Bíblia ta fla sobri futuru?” Si bu ka ten serteza di kel-li, nton bu meste studa kes profesia di Bíblia ki dja kunpri. Modi ki bu pode faze kel-li?

MODI KI NU DEBE STUDA KES PROFESIA DI BÍBLIA

7. Kuzê ki djuda Daniel studa kes profesia? (Daniel 12:10) (Odja fotu.)

⁷ Daniel da un bon izénplu pa nos tudu sobri modi ki nu debe studa kes profesia. El studa profesias ku motivason sértu. El krê prendeba verdadi. Tanbê Daniel éra umildi. El sabia ma si el kontinuaba ku un amizadi fórti ku Jeová i ta obi ku el, Jeová ta djudaba el intende kes profesia. (Dan. 2:27, 28; lé Daniel 12:10.) Daniel prova ma el éra umildi pamodi el kunfia ma Jeová ta djudaba el. (Dan. 2:18) Tanbê Daniel studa ku kuidadu. El piskiza kes párti di Skrituras ki tinha na kel ténpu. (Jer. 25:11, 12; Dan. 9:2) Modi ki bu pode imita Daniel?

8. Pamodi ki alguns algen ka ta kridita ma profesias di Bíblia ta kunpri, má kuzê ki nu debe faze?

⁸ Studa ku motivason sértu. Bu ta studa profesias di Bíblia pamodi bu tene gana di intende verdadi? Nton, Jeová ta djuda-u. (Juan 4:23, 24; 14:16, 17) Má alguns algen ta studa profesias di Bíblia pamodi otus motivu. Alguns ta faze kel-li pa tenta prova ma Bíblia ka ben di Deus. Es ta atxa ma si Bíblia ka ben di Deus, nton es pode disidi di es pa es kuzê ki é dretu i mariadu. Má nu debe studa ku motivason sértu. Tanbê, nu meste ten un kualidadi inportanti pa nu intende profesias di Bíblia.

9. Ki kualidadi nu meste ten pa nu intende kes profesia di Bíblia? Splika.

⁹ Mostra umildadi. Jeová promete ma el ta djuda kes algen ki é umildi. (Tia. 4:6) Nton, nu meste faze orason ta pidi Se ajuda pa intende kes profesia di Bíblia. Tanbê, si nos é umildi nu ta seta ajuda di skravu fiel i prudenti ki Jeová sta ta uza pa da-nu kumida spritual na óra sértu. (Luk. 12:42) Jeová é un Deus organizadu. Pur isu, nu debe spera ma el ta uza sô un fonti pa djuda-nu intende kes verdadi ki sta na se Palavra. — 1 Kor. 14:33; Efé. 4:4-6.

10. Kuzê ki bu ta prende ku spiriénsia di Ester?

¹⁰ Studa ku kuidadu. Skodje un profesia ki bu gosta i kumesa ta faze piskiza sobri el. É kel-li ki un irman, ki txoma Ester, faze. El krê sabeba más sobri kes profesia ki ta fla ma Misías ta binha. Ester fla: “Kantu N tinha 15 anu, N kumesa ta djobe próvas ma kes profesia li skrebedu antis di ténpu di Jizus.” Kuzê ki el prende sobri kes Rolu di Mar Mortu konvense-l. El fla: “Alguns di es skrebedu antis di ténpu di Jizus. Nton, kes profesia ki sta na el tinha ki ben di Deus. N tevi ki lé txeu bês pa N pode intende-s.” Má el sta kontenti pamodi kel sforsu ki el faze. Dipôs di studa txeu profesia di Bíblia ku kuidadu el fla: “N konsigi odja klaru, di mi pa mi ma Bíblia é verdadi!”

11. Modi ki ten serteza ma Bíblia é verdadi ta djuda-nu?

¹¹ Óras ki nu ta odja modi ki alguns profesia di Palavra di Deus dja kunpri, nu ta kunfia más na Jeová i na kalker orientason ki el ta da-nu. Tanbê, kes profesia di Bíblia ta djuda-nu kontinua ku un speransa puzitivu pa futuru, ka ta inporta ki prublémas ki nu ta pasa pa el gósi. Nu ben analiza dôs profesia ki Daniel skrebe ki sta ta kunpri gósi. Intende-s pode djuda-nu toma bons disizon.

PAMODI KI BU MESTE SABE SOBRI KES PÉ DI FÉRU I ARJILA?

12. Kuzê ki kes ‘pé di féru misturadu ku arjila móli’ ta reprizenta? (Daniel 2:41-43)

¹² Lé Daniel 2:41-43. Na kel sonhu ki Daniel splika Rei Nabukudunuzor, kes pé di kel státua ki rei odja, éra di féru misturadu ku arjila móli. Si nu konpara kel profesia li ku otus profesia ki sta na livru di Daniel i Apokalipse, nu ta intende ma kes pé ta reprizenta govérnu di Mérka ku Inglatéra djuntadu, ki sta ta manda na mundu gósi. Sobri kel govérnu li ki sta manda na mundu, Daniel fla ma kel govérnu ta ben ser un párti fórti i un párti fraku. Pamodi ki el ta tinha un párti fraku? Pamodi povu, ki arjila móli ta reprizenta, ka ta dexa-l aji ku forsa sima féru.b

13. Ki verdadis inportanti nu ta prende ku kel profesia li?

¹³ Nu ta prende verdadis inportanti di kel státua ki Daniel pâpia di el. I nu pode prende txeu kuza prinsipalmenti di kes pé di kel státua. Primeru, govérnu di Mérka ku Inglatéra djuntadu, ki sta manda na mundu, dja mostra di alguns manera ma el ten txeu puder. Pur izénplu, govérnu di Mérka ku Inglatéra djuntadu staba na meiu di kes nason ki ganha Primeru ku Sugundu Géra na Mundu Interu. Má kel govérnu li bira fraku i el ta kontinua ta bira fraku pamodi kes algen di ses país sta luta kóntra kunpanheru i kóntra govérnu. Sugundu, Mérka ku Inglatéra djuntadu é últimu govérnu ki ta manda na mundu antis di Reinu di Deus kaba ku tudu govérnu di ómi. Sikrê otus govérnu alvês pode fika kóntra Mérka ku Inglatéra djuntadu, es ka ta ben fika ta manda na ses lugar. Nu sabe kel-li pamodi kel pédra ki ta reprizenta Reinu di Deus, ta ben distrui kes pé ki é kel párti di kel státua ki ta reprizenta govérnu di Mérka ku Inglatéra djuntadu. — Dan. 2:34, 35, 44, 45.

14. Modi ki intende kel profesia sobri kes pé di féru i arjila pode djuda-nu toma bons disizon?

¹⁴ Bu sta konvensidu ma kel profesia di Daniel sobri kes pé di féru i arjila sta ta kunpri? Nton, kel-li ta afeta manera ki bu ta leba bu vida. Bu ka ta fika ta kóre tras di kuzas material pamodi bu sabe ma ka ta dura kel mundu li ta ben distruídu. (Luk. 12:16-21; 1 Juan 2:15-17) Intende kel profesia li tanbê ta djuda-u odja ma trabadju di prega i inxina é inportanti. (Mat. 6:33; 28:18-20) Dipôs di studa es profesia, pensa na kel pergunta li: ‘Disizons ki N ta toma, ta mostra ma N ten serteza ma Reinu di Deus ka ta dura ta ben kaba ku tudu govérnu di ómis?’

PAMODI KI BU MESTE SABE SOBRI ‘REI DI NÓRTI’ I ‘REI DI SUL’?

15. Gósi ken ki é ‘rei di nórti’ i ken ki é ‘rei di sul’? (Daniel 11:40)

¹⁵ Lé Daniel 11:40. Kapítlu 11 di Daniel ta pâpia di dôs rei ô dôs govérnu, ki ta luta ku kunpanheru pa manda na mundu. Óras ki nu konpara kel profesia li ku otus profesia ki sta na Bíblia, nu ta intende ma ‘rei di nórti’ é Rúsia i kes ki ta apoia-l i ma ‘rei di sul’ é Mérka ku Inglatéra djuntadu ki sta manda na mundu.c

16. Modi ki ‘rei di nórti’ ta trata povu di Deus?

¹⁶ Povu di Deus ki ta vive na kes lugar ki ‘rei di nórti’ ta manda na el, sta ta sufri pirsigison pamodi kel rei li. Alguns Tistimunha di Jeová sotadu i podu na kadia pamodi ses fé. Kes kuza ki ‘rei di nórti’ ta faze ka ta poi nos irmons ta fika ku medu, má es ta poi ses fé más fórti. Pamodi? Pamodi nos irmons sabe ma pirsigison ki povu di Deus ta pasa pa el ta kunpri un profesia di livru di Daniel.d (Dan. 11:41) Sabe kel-li tanbê pode djuda-nu kontinua ku nos speransa fórti i kontinua lial pa Jeová.

17. Modi ki ‘rei di sul’ ta trata povu di Deus?

¹⁷ Na pasadu, ‘rei di sul’ tanbê pirsigi povu di Jeová. Pur izénplu, kel-li kontise duránti Primeru i Sugundu Géra na Mundu Interu, kantu txeu irmon podu prézu pamodi es nega ba géra i alguns fidju di Tistimunhas di Jeová koredu ku el di skóla pamodi es ka sauda bandera. Má, na kes últimu anu, lialdadi di povu di Jeová ki ta mora na kes lugar ki rei di sul ta manda na el podu na próva di otus manera. Pur izénplu, duránti kanpanhas di pulítika un sérvu di Jeová pode xinti tentadu na apoia un partidu ô un kandidatu. El pode ka txiga pontu di ba vota, má na se manera di pensa i na se korason el pode tene gana pa un partidu ganha. Nton, é inportanti nu kontinua ka ta mete na pulítika ka sô na kuzas ki nu ta faze, má tanbê na nos manera di pensa i na nos korason. — Juan 15:18, 19; 18:36.

18. Modi ki nu ta reaji óras ki nu odja kel géra entri ‘rei di nórti’ i ‘rei di sul’? (Odja fotus i dizenhus.)

¹⁸ Kes ki ka ten fé na profesias di Bíblia pode fika preokupadu dimás óras ki es odja ‘rei di sul’ ku ‘rei di nórti’ ‘ta pintxa kunpanheru.’ (Dan. 11:40, nóta di rodapé.) Tudu kes rei li ten armas ki pode kaba ku vida na téra. Má nu sabe ma Jeová ka ta dexa kel-li kontise. (Isa. 45:18) Nton, kel ódiu entri ‘rei di nórti’ i ‘rei di sul’ ka ta pô-nu ta fika preokupadu, má el ta poi nos fé ta bira más fórti. Kel-li ta prova ma fin di kel mundu li sta kuazi ta ben.

KONTINUA TA PRESTA ATENSON NA PROFESIAS

19. Kuzê ki nu debe rekonhese sobri profesias di Bíblia?

¹⁹ Nu ka sabe modi ki alguns profesia di Bíblia ta ben kunpri. Ti proféta Daniel ka intende siginifikadu di tudu kuza ki el skrebe. (Dan. 12:8, 9) Má sô pamodi nu ka ta intende dretu modi ki un profesia ta ben kunpri, kel-li ka krê fla ma el ka ta kunpri. Di serteza, nu pode kunfia ma Jeová ta djuda-nu intende kel ki nu meste na óra sértu sima el faze na pasadu. — Amós 3:7.

20. Ki profesias di Bíblia ka ta dura nu ta ben odja ta kunpri i kuzê ki nu debe kontinua ta faze?

²⁰ Kel avizu di ‘pas i suguransa’ ta ben fazedu. (1 Tes. 5:3) Dipôs kes govérnu di mundu ta ben ataka relijion falsu i ta ben distrui-l. (Apo. 17:16, 17) Dipôs, es ta ben ataka povu di Deus. (Eze. 38:18, 19) I dipôs di kel-li, géra di Armajedon ta ben kumesa. (Apo. 16:14, 16) Nu pode ten serteza ma ka ta dura tudu kes kuza li ta ben kontise. Timenti kel-li ka kontise, nu kontinua ta mostra gratidon pa nos Pai ki sta na séu, ki ta ama-nu. Un manera di faze kel-li, é presta atenson na profesias di Bíblia i djuda otus faze mésmu kuza.