Nu ta pode kaba ku géra?

DIZENVOLVIMENTU IKONÓMIKU

Méta: Midjora kualidadi di vida di pesoas. Kel-li pode kaba ô diminui kes difikuldadi ki ten pamodi alguns algen ten un bon situason ikonómiku i otus nau. Kel-li é un di kes kuza prinsipal ki ta poi géra ta kontise.

Pamodi ki kel-li é difísil: Govérnus tinha ki mudaba manera ki es ta uza dinheru. Un piskiza ki fazedu ta mostra ma na 2022, más ô ménus 34,1 bilhon di dóla gastadu pa insentiva i mante pas. Má kel-li é un valor pikinoti konparadu ku kuantidadi di dinheru ki gastadu na kuzas di géra na kel mésmu anu.

“Nu ta gasta mutu más dinheru i otus kuza na rezolve kes stragu ki géra ta faze di ki na inpidi kes géra i mante pas.” — António Guterres, sekretáriu jeral di Nasons Unidu.

Kuzê ki Bíblia ta fla: Govérnus di mundu i kes organizason di ómi pode djuda kes algen póbri, má nunka es ka ta konsigi kaba ku tudu pobréza. – Deuteronómiu 15:11; Mateus 26:11.

AKORDU ENTRI GOVÉRNUS

Méta: Es ta pâpia ku kunpanheru sobri un situason i es ta konkorda na faze kuzas ki ta djuda kes dôs ladu, má na pas.

Pamodi ki kel-li é difísil: Un ô más párti ki sta involvidu na kel asuntu ka sta dispostu na faze un konpromisu ô seta un akordu. I kes akordu di pas nen sénpri ka ta ruspetadu.

“Akordu entri govérnus nen sénpri ta da bons rezultadu. Un akordu ki ta fazedu pa kaba ku un géra pode ten txeu fadja ki el ta kaba pa leba pa más géra.” — Raymond F. Smith, American Diplomacy.

Kuzê ki Bíblia ta fla: Pesoas debe ‘buska pas’. (Salmo 34:14) Má txeu algen oji é “disleal, ... ka ta krê konkorda ku otus, ... traidoris”. (2 Timótiu 3:1-4) Pamodi kel manera di ser li ti mésmu kes xéfi di pulítika ki ten bon intenson ka ta konsigi rezolve kes prubléma.

TEN MÉNUS ARMA

Méta: Diminui ô kaba ku kes arma, prinsipalmenti kes arma nukliar, kímiku i biolójiku.

Pamodi ki kel-li é difísil: Kes nason ka sta dispostu na kaba ku ses arma pamodi es ta fika ku medu di perde puder i kapasidadi di difende ses kabésa. Mésmu si kes nason kaba ku tudu ses arma, es ka ta pode kaba ku kes razon ki ta poi géra ta kontise.

“Txeu di kes governanti ki promete kaba ku ses arma dipôs di 1991, ka faze kuzê ki es promete. Kel-li ta inklui faze kuzas pa diminui prigu i kes prubléma ki ta ten entri país, i asi pa djuda-nu ten un mundu más suguru i protejedu.” — “Ta proteje nos futuru: Un prugrama pa kaba ku arma”, na inglês.

Kuzê ki Bíblia ta fla: Pesoas debe bandona ses arma i ‘transforma ses spada na aradu’. (Isaías 2:4) Má pa kaba ku géra pesoas meste faze más di ki kel-li, pamodi violénsia ta kumesa na korason di algen. — Mateus 15:19.

AKORDU PA PROTEJE KUNPANHERU

Méta: Govérnus ta faze akordu pa proteje kunpanheru kóntra ses inimigu. Es ta pensa ma un govérnu ki é ses inimigu ka ta kumesaba un géra ku es, pamodi kel-li ta siginifikaba luta kóntra txeu nason omésmu ténpu.

Pamodi ki kel-li é difísil: Sô pamodi un país sabe ma si el ataka un otu país, otus país pode ataka-l tanbê, kel-li ka krê fla ma ta ten pas. Kes nason nen sénpri ka ta kunpri kuzê ki es promete i es pode ten opinions diferenti sobri modi i na ki ténpu ki es ta aji kóntra ses inimigu.

“Enbóra Liga di Nasons i Nasons Unidu trabadja duru pa djuda governantis faze kontratu ku kunpanheru, kes kontratu ka inpidi géra.” — “Enciclopédia Britânica.”

Kuzê ki Bíblia ta fla: Normalmenti é midjór óras ki pesoas ta trabadja djuntu. (Eclesiastes 4:12) Má kes govérnu i kes organizason di ómi ka ta konsigi traze pas i suguransa di verdadi. ‘Ka nhos kunfia na prínsipis nen na fidjus di ómi ki ka ta pode traze salvason. Se spritu ta sai, i el ta torna ba pa téra; na kel dia mê se pensamentus ta kaba.’ — Salmo 146:3, 4, Bíblia Traduson di Mundu Novu.