Modi ki bu pode ten pas sikrê ku txeu géra na mundu?
Gary, ki sirbi na trópa, fla: “Antis di N studa Bíblia, N ka tinha ideia di pamodi ki tinha tantu maldadi, injustisa i prubléma na mundu. Má gósi N sta xinti na pas. N sabe ma Jeová Deus ta ben bira mundu un lugar suguru.”
É ka sô Gary ki ta xinti si. Odja modi ki Bíblia dja djuda otus algen.
BÍBLIA TA FLA: ‘Abo Jeová, bo é bon i bu sta sénpri prontu pa púrdua’. — Salmo 86:5.
MODI KI KEL-LI TA DJUDA: “Kel versiklu li da-m serteza ma Jeová ta mostra mizerikórdia. N sabe ma el sta prontu pa purdua-m pa tudu kuza ki N faze kantu N partisipa na géra.” — Wilmar, Kolónbia.
BÍBLIA TA FLA: ‘N sta ta kria un séu novu i un téra novu; i kes kuza ki tinha antis ka ta ben lenbradu más, i nen es ka ta ben pasa pa korason.’ — Isaías 65:17.
MODI KI KEL-LI TA DJUDA: “N ten trauma i depreson pamodi kes kuza ki N pasa na trópa. Má kel versiklu li ta lenbra-m ma já-já Jeová ta ben kaba ku kes pensamentu ki ta perturba-m i ku kes pezadélu ki N ta ten. Es ta ben kaba pa tudu ténpu. Fórti prezenti sábi!” — Zafirah, Mérka.
BÍBLIA TA FLA: ‘Na se ténpu, justu ta ben bira txeu, i ta ben ten txeu pas ti ki lua dexa di izisti.’ — Salmo 72:7.
MODI KI KEL-LI TA DJUDA: “Sénpri N ta lenbra di kes palavra li. Já-já, géra i tudu kes mau rezultadu di géra ta kaba. I nu ka meste fika preokupadu dimás ku suguransa di kes algen ki nu ta ama.” — Oleksandra, Ukránia.
BÍBLIA TA FLA: ‘Bus mortu ta ben vive. Nhos korda i nhos grita di alegria, nhos ki ta mora na téra!’ — Isaías 26:19.
MODI KI KEL-LI TA DJUDA: “Kuazi tudu nha família matadu duránti kel géra kóntra tribu di Tutsi. Má kes versiklu li ta da-m serteza ma N ta ben odja-s otu bês. N ten vontadi di obi ses vós óras ki es resusitadu!” — Marie, Ruanda.
BÍBLIA TA FLA: ‘Ka ta dura kes algen mau ta ben dexa di izisti. Má, kes algen mansu ta ben toma kónta di téra i es ta ben ten txeu alegria ku txeu pas.’ — Salmo 37:10, 11.
MODI KI KEL-LI TA DJUDA: “Enbóra géra dja tirmina na nha país, inda ten injustisa i pesoas mau. Kes versiklu li sta ta djuda-m txeu. Jeová ta odja tudu kuza i el ta intende nha situason. El promete ma ka ta dura tudu sufrimentu ta ben kaba i nu ta ben skese di es.” — Daler, Tajikiston.
Kes algen ki nu pâpia di es na kel revista li, sta entri kes milhon di Tistimunha di Jeová ki Bíblia djuda atxa pas. Es prende modi ki es ta lida ku ódiu pamodi rasa, país, tribu i manera di ser. (Efézius 4:31, 32) Tistimunhas di Jeová ka ta mete na asuntus di pulítika i nen es ka ta involve na kuzas ki ten violénsia. — Juan 18:36.
Tistimunhas di Jeová tanbê ta djuda kunpanheru sima un família na mundu interu. (Juan 13:35) Pur izénplu, Oleksandra, ki dja nu papiaba di el antis, tevi ki fuji djuntu ku se irman pa otu país pamodi géra. El fla: “Kantu nu pasa frontera, primeru kuza ki nu odja éra nos irmons ki staba la pa resebe-nu. Ses apoiu djuda-nu kustuma ku kel novu manera di vive na kel país sima rafujiadus.”
Nu ta konvida-u pa bu sisti nos runion undi bu ta ba prende modi ki bu pode atxa pas i sobri promésa di Bíblia di un mundu di pas ki sta pa ben. Entra na jw.org pa bu atxa un lugar pértu di bo ô pa pidi un studu di Bíblia di grasa ku un Tistimunha di Jeová na livru Vive filís pa tudu ténpu!.