Modi ki géra na mundu ta ben kaba?

DEUS TA BEN KABA KU GOVÉRNUS DI ÓMI

Deus ta ben kaba ku govérnus di ómi na un géra ki Bíblia ta txoma di Armajedon.a (Apokalipse 16:16) Na kel ténpu, “kes rei di téra interu” ta ben djuntadu “pa kel géra di kel grandi dia di Deus, kel Tudu-Poderozu.” (Apokalipse 16:14) Armajedon é géra di Deus pa kaba ku tudu géra.

Deus ta ben troka govérnus di ómi pa se Reinu, ô govérnu, ki ta ben governa la di séu i ki nunka ka ta distruídu. (Daniel 2:44) Deus skodje se Fidju, Jizus Kristu, pa ser Rei. (Isaías 9:6, 7; Mateus 28:18) Kel govérnu li é kel Reinub ki Jizus inxina ses sigidor ora pa el. (Mateus 6:9, 10) Tudu algen ta ben sta unidu, óras ki Jizus ben governa téra interu.

Diferenti di govérnus di ómi, Jizus ka ta uza se autoridadi pa se própi interesi. Pamodi el é justu i el ta trata tudu algen igual, ningen ka ta ben fika preokupadu si el ta tratadu di manera injustu pamodi se rasa, se país ô kultura. (Isaías 11:3, 4) I pesoas ka ta ben meste luta pa ses direitu. Pamodi? Pamodi Jizus ta ben kuida di nisisidadi di kada algen. ‘El ta ben salva kes algen póbri ki ta sta ta txora ta pidi ajuda, i tanbê kes algen umildi i tudu kes ki ka ten algen pa djuda-s. El ta libra-s di abuzu i di violénsia’. — Salmo 72:12-14.

Reinu di Deus ta ben kaba ku tudu arma na téra. (Miqueias 4:3) Tanbê el ta ben distrui kes algen mau ki ka krê para di luta ô ki ta tra otus algen ses pas. (Salmo 37:9, 10) Tudu ómi, mudjer i kriansa ta ben xinti suguru na kalker lugar ki es bai na téra. — Ezequiel 34:28.

Óras ki govérnu di Deus ben governa téra, tudu algen ta ben ten kel midjór vida ki ten. El ta ben kaba ku kes prubléma ki ta poi pesoas ta briga, sima pobréza, fómi i falta di kaza dretu pa mora na el. Tudu algen ta ben ten txeu kumida ki é bon pa saúdi i un lugar sábi pa mora na el. — Salmo 72:16; Isaías 65:21-23.

Reinu di Deus ta ben kaba ku tudu kes mau rezultadu ki géra ta traze. Kel-li ta inklui ka sô kes pankada ki pesoas ta panha na géra, má tanbê kel dór mental i emosional ki ta poi pesoas ta sufri pamodi kes kuza terível ki kontise na géra. Ti kes algen ki dja móre, ta ben resusitadu pa vive na téra otu bês. (Isaías 25:8; 26:19; 35:5, 6) Famílias ta ben fika djuntu otu bês i pesoas ka ta ben lenbra ninhun di kes kuza mariadu ki kontise na pasadu, pamodi “kes kuza ki tinha antis ka ta ben ten más.” — Apokalipse 21:4.

DEUS TA BEN KABA KU PEKADU

Óras ki Reinu di Deus ben governa téra, tudu algen ta ben adora kel úniku Deus verdaderu, Jeovác, ki é “kel Deus di amor i di pas”. (2 Koríntius 13:11) Pesoas ta ben prende modi ki es ta vive djuntu i na pas. (Isaías 2:3, 4; 11:9) Kes algen ki obi ku Deus, ka ta ser más pekador, má es ta bira perfeitu. — Romanus 8:20, 21.

DEUS TA BEN DISTRUI SATANÁS I SES DIMÓNI

Reinu di Deus ta ben distrui kes algen ki ta poi géra ta kontise, ki é Satanás ku ses dimóni. (Apokalipse 20:1-3, 10) Sen ses influénsia, téra ‘ta ben ten txeu pas’. — Salmo 72:7.

Bu pode ten serteza ma promésa di Deus di kaba ku géra ta ben kunpri. El ten kapasidadi i dizeju di kaba ku géra.

• Deus ten sabedoria i puder ki ta txiga pa kaba ku violénsia. (Jó 9:4) Ka ten nada ki é inposível pa el. — Jó 42:2.

• Deus ta ôdia odja pesoas ta sufri. (Isaías 63:9) Tanbê el ta ‘ôdia kenha ki ta gosta di violénsia.’ — Salmo 11:5.

• Deus sénpri ta kunpri se palavra. El ka pode konta mintira. — Isaías 55:10, 11; Titu 1:2.