Lisons ki nu pode prende ku kel profesia di Jakó — Párti 1

1-2. Kuzê ki Jakó faze kantu el staba kuazi ta móre, i pamodi? (Odja imajen na kapa.)

DJA pasaba uns 17 anu désdi ki Jakó, ki éra un sérvu fiel di Jeová, viaja di Kanan ti Ijitu ku tudu algen di se kaza. (Jén. 47:28) Duránti kel ténpu, el xinti txeu alegria di sta djuntu ku se fidju Juzé ki el ta amaba txeu, i ti ki enfin el odja se família djuntu otu bês. Má, Jakó sabia ma el staba kuazi ta móre. Nton el faze un runion inportanti ku se família. — Jén. 49:28.

² Na kel ténpu, éra normal un xéfi di família djunta kes algen di se família pa da-s alguns instruson antis di el móre. (Isa. 38:1) Tanbê, pode ser ki na kel runion el ta flaba kenha ki ta ba sérba xéfi di família dipôs ki el móre.

3. Di akordu ku Jénezis 49:1, 2, pamodi ki kes kuza ki Jakó fla é inportanti?

³ Lé Jénezis 49:1, 2. Má kel runion li éra diferenti. Jakó éra un proféta. Duránti kel runion, Jeová poi se sérvu ta pâpia sobri kuzas inportanti ki ta ba kontiseba na futuru i ki ta ba afetaba se família txeu. Pur isu, kes kuza ki Jakó fla ses fidju antis di el móre éra un profesia.

4. Kuzê ki Jakó fla i kuzê ki nu ta prende ku kuzê ki el fla? (Odja kuadru “Família di Jakó”.)

⁴ Na kel studu li, nu sta ben odja kuzê ki Jakó fla pa kuatu di ses fidju: Ruben, Simion, Levi i Judá. Na kel otu studu, nu ta ben odja kuzê ki Jakó fla pa kes otu 8 fidju. Sima nu ta ben odja, Jakó fla kuzê ki ta ba kontiseba ku ses fidju i ku ses família, ki ku ténpu ta ba biraba nason di Israel. Óras ki nu ta odja kuzê ki kontise ku nason di Israel na pasadu, nu ta odja modi ki kel profesia di Jakó kunpri. I óras ki nu ta studa kuzê ki el fla, nu ta prende lisons inportanti ki pode djuda-nu agrada nos Pai, Jeová.

RUBEN

5. Ki priviléjiu talvês Ruben staba ta spera resebe di se pai?

⁵ Jakó pâpia ku Ruben primeru. El fla: “Abo é nha primeru fidju”. (Jén. 49:3) Pamodi Ruben éra primeru fidju, talvês el ta speraba ma el ta resebeba más eransa di se pai di ki ses irmon.

6. Pamodi ki Ruben ka resebe direitu di primeru fidju? (Jénezis 49:3, 4)

⁶ Má Ruben ka resebe eransa di primeru fidju. (1 Kró. 5:1) Pamodi? Pamodi algun ténpu dipôs ki Rakel móre, Ruben tevi relason seksual ku Bila, ki éra sérva di Rakel. Rakel daba Jakó, Bila pa ser se mudjer. (Jén. 35:19, 22) Pamodi ki Ruben tevi relason seksual ku Bila? Ruben éra fidju di Lia, irman di Rakel. Talvês el tevi relason seksual ku Bila asi pa Jakó pode disprezaba Bila i amaba se mai más txeu ô talvês Ruben paxona pa Bila i el ka konsigi kontrola se dizeju seksual. Ka ta inporta kal ki éra razon, kuzê ki el faze dizagrada Jeová i se pai tanbê. — Lé Jénezis 49:3, 4.

7. Kuzê ki kontise ku Ruben i ku se família? (Odja kuadru “Profesia ki Jakó faze kantu el staba ta móre”.)

⁷ Jakó fla Ruben: “Bu ka ta ser primeru ki bus irmon”. Kes palavra li kontise mê. Bíblia ka ta fla di ningen ki éra di família di Ruben ki bira rei, saserdóti ô proféta. Má simé, Jakó da Ruben un eransa, i se família bira un di kes tribu di Israel. (Juz. 12:6) Ruben mostra bons kualidadi na otus situason, i Bíblia ka ta fla ma el faze konportamentu seksual mariadu otu bês. — Jén. 37:20-22; 42:37.

8. Ki lisons nu ta prende ku izénplu di Ruben?

⁸ Kuzê ki nu ta prende? Nu meste sforsa pa nu kontrola nos kabésa i sta disididu na ka faze konportamentu seksual mariadu. Si nu xinti tentadu na faze un pekadu, nu debe para i pensa na modi ki kuzas ki nu ta faze ta magua Jeová, nos família i otus algen. Tanbê nu debe lenbra ma “kel ki un algen símia, é kel ki el ta kodje tanbê.” (Gál. 6:7) Má kel ki kontise ku Ruben ta lenbra-nu di mizerikórdia di Jeová. Enbóra Jeová ka ta libra-nu di ten maus rezultadu pamodi nos érus, si nu rapende i nu sforsa pa faze kel ki é dretu, Jeová ta purdua-nu i el ta bensua-nu.

SIMION I LEVI

9. Pamodi ki Jakó ka staba kontenti ku Simion i ku Levi? (Jénezis 49:5-7)

⁹ Lé Jénezis 49:5-7. Dipôs, Jakó pâpia ku Simion i Levi. Má kuzê ki el fla-s mostra ma el ka staba kontenti ku es. Uns anu antis, un ómi kananeu ki txomaba Sikén viola fidju-fémia di Jakó, ki txomaba Diná. Ta da pa intende ma tudu kes fidju di Jakó fika xatiadu ku kuzê ki kontise ku ses irman, má Simion ku Levi ka kontrola ses raiba. Es ingana Sikén i se povu i es fla-s ma si kes ómi fazeba sirkunsizon ta tinha pas entri es i família di Jakó. Kes ómi konkorda i es faze sirkunsizon. Timenti kes ómi inda staba ku dór pamodi sirkunsizon, Simion i Levi, “kada un di es panha ses spada i es bai ti sidadi. I la, kantu ningen ka staba ta spera, es mata tudu kes ómi.” — Jén. 34:25-29.

10. Modi ki kel profesia ki Jakó faze sobri Simon ku Levi kunpri? (Odja kuadru “Profesia ki Jakó faze kantu el staba ta móre”.)

¹⁰ Jakó fika txeu xatiadu pamodi ses dôs fidju mata txeu algen. El fla-s ma ses eransa ta ba fikaba spadjadu na diferentis párti di Israel. Kes palavra li kunpri más di 200 anu dipôs kantu nason di Israel entra na kel téra ki Deus prometeba es. Kel tribu di Simion resebe eransa na lugaris izoladu déntu di tiritóriu di tribu di Judá. (Juz. 19:1) Kel tribu di Levi resebe 48 sidadi di eransa spadjadu na tudu Israel. — Juz. 21:41.

11. Ki kuzas dretu tribu di Simion ku Levi faze?

¹¹ Família di Simion ku Levi ka ripiti mésmu éru ki es. Tribu di Levi mostra txeu lialdadi pa adorason verdaderu. Kantu Muizés resebe Lei di Jeová na monti Sinai txeu israelita adora imajen di un bizeru, má kes levita fika di ladu di Muizés i es djuda-l distrui kes algen ki adora kel bizeru. (Ézu. 32:26-29) Jeová skodje tribu di Levi i el da-s priviléjiu di ser saserdóti. (Ézu. 40:12-15; Nun. 3:11, 12) I dipôs, tribu di Simion djuda tribu di Judá luta kóntra kes kananeu pa toma ses tiritóriu na kel téra ki Deus prometeba es. — Juí. 1:3, 17.

12. Ki lisons nu pode prende ku izénplu di Simion ku Levi?

¹² Kuzê ki nu ta prende? Nunka nu ka debe dexa raiba kontrola-nu. Si bo ô un algen ki bu ta ama tratadu mariadu, é normal bu fika xatiadu. (Sal. 4:4) Má, nu meste lenbra ma Jeová ka ta fika kontenti si nu fla ô nu faze kuzas pa mágua kes algen ki ofende-nu. (Tia. 1:20) Nu ta lida ku injustisa ki nu ta pasa déntu ô fóra di kongregason di akordu ku prinsípius di Bíblia, pur isu nu ta ivita fla ô faze kuzas ki ta prujudika otus algen. (Rom. 12:17, 19; 1 Ped. 3:9) Si bo é jóven, sikrê bu pai ku bu mai ta faze kuzas ki ka ta agrada Jeová, lenbra ma bo é ka obrigadu na sigi ses izénplu. Ka bu pensa ma é inposível bu agrada Jeová. Jeová ta djuda-u faze kuzê ki é dretu i el ta rekonpensa-u si bu faze kel-li.

JUDÁ

13. Pamodi ki talvês Judá fika preokupadu kantu txiga bês di se pai pâpia ku el?

¹³ Dipôs Jakó pâpia ku se fidju Judá. Dipôs ki Judá obi kuzê ki Jakó fla ses irmon más grandi, talvês Judá fika preokupadu. El tanbê, el faze alguns éru gravi. Dipôs ki Simion ku Levi mata kes ómi di Sikén, Judá bai djuntu ku kes otu irmon pa sidadi i es leba tudu kes kuza ki kel povu tinha. (Jén. 34:27) El ku ses irmon es bende Juzé pa ser un skravu i es ingana ses pai sobri kuzê ki kontise. (Jén. 37:31-33) Dipôs, el tevi relason seksual ku Tamar, ki éra se nóra pamodi el pensaba ma el éra un prostituta. — Jén. 38:15-18.

14. Ki kuzas dretu Judá faze? (Jénezis 49:8, 9)

¹⁴ Má Jakó sô ilojia Judá i el promete-l kuzas bon ki ta ba kontiseba ku el i ku se família. (Lé Jénezis 49:8, 9.) Judá mostra ma el ta preokupaba txeu ku sentimentu di se pai ki dja staba algen di idadi. I tanbê el mostraba txeu konpaxon pa Benjamin, ki éra se irmon más novu. — Jén. 44:18, 30-34.

15. Di ki maneras Judá abensuadu?

¹⁵ Jakó fla ma Judá ta ba sérba líder di ses irmon. Má pasa uns 200 anu ti ki kel profesia kumesa ta kunpri. Dipôs ki kes israelita sai di Ijitu i es anda na dizértu ti kel téra ki Deus prometeba es, kel tribu di Judá foi primeru ki entra na kel téra. (Nun. 10:14) Uns anu dipôs, Jeová fla Judá pa ser primeru na luta kóntra kes kananeu pa es tomaba kel téra ki el prometeba es. (Juí. 1:1, 2) I Davidi foi primeru di kes txeu rei ki éra di tribu di Judá. Má tevi otus manera ki kel profesia sobri Judá kunpri.

16. Modi ki kel profesia ki sta na Jénezis 49:10 kunpri? (Odja kuadru “Profesia ki Jakó faze kantu el staba ta móre”.)

¹⁶ Jakó fla ma governanti di mundu interu ta ba sérba di família di Judá i el ta ba governaba pa tudu ténpu. (Lé Jénezis 49:10 i nóta di rodapé.) Kel governanti li é Jizus Kristu, ki Jakó txoma di Siló. Sobri Jizus, un anju fla: “Jeová Deus ta ben da-l tronu di Davidi, se pai”. (Luk. 1:32, 33) Jizus tanbê ta txomadu di “kel Lion di tribu di Judá”. — Apo. 5:5.

17. Modi ki nu pode imita Jeová na manera ki nu ta pensa di otus algen?

¹⁷ Kuzê ki nu ta prende? Jeová abênsua Judá enbóra el faze alguns pekadu gravi. Má talvês, irmons di Judá pergunta pamodi ki Jeová rekonpensa-l. Enbóra nu ka sabe kuzê ki ses irmon pensa, nu sabe ma Jeová odja kuzas bon na Judá i el abensua-l pamodi kel-li. Modi ki nu pode imita izénplu di Jeová? Óras ki un irmon resebe un priviléjiu spesial, talvês nu ta xinti tentadu na konsentra na inperfeisons di kel irmon. Má é bon nu lenbra ma Jeová di serteza odja bons kualidadi na el. Jeová ta odja kuzas bon na ses sérvu. Nu debe sforsa pa faze mésmu kuza.

18. Pamodi ki nu meste ten paxénxa?

¹⁸ Otu lison ki nu pode prende ku spiriénsia di Judá é ma nu meste ten paxénxa. Jeová sénpri ta kunpri ses promésa, má nen sénpri el ta faze-l di manera ô na óra ki nu ta spera. Kel primeru algen ki bira líder di nason di Israel ka ben di tribu di Judá. Má ku lialdadi es apoia kes algen ki Jeová skodje sima, Muizés ki éra di tribu di Levi, Juzué ki éra di tribu di Efrain, i rei Saul ki éra di tribu di Benjamin. Nos tanbê nu debe apoia kalker algen ki Jeová skodje pa orienta-nu oji. — Ebr. 6:12.

19. Kuzê ki nu pode prende sobri Jeová na kel profesia ki Jakó faze kantu el staba ta móre?

¹⁹ Kuzê ki nu ta prende ku kes últimu kuza ki Jakó fla pa ses primeru kuatu fidju? Kel-li ta mostra klaru ma “Deus ka ta odja kuzas sima ómi ta odja.” (1 Sam. 16:7) Jeová ten txeu paxénxa i el sta prontu pa púrdua. Enbóra el ka ta fika kontenti óras ki nu ta faze kuzas mariadu, el ka ta spera ma nu ta ser perfeitu. Ti el pode abênsua un algen ki faze érus gravi na pasadu si kel algen rapende di korason i el pasa ta faze kuzê ki é dretu. Na kel otu studu, nu ta ben odja kuzê ki Jakó fla pa kes otu 8 fidju.