Modi ki nu pode uza folhetus pa kumesa pâpia na pregason

Désdi janeru di 2018, primeru pájina di Folhetu di studu pa runion Vida i pregason ten ideias pa pâpia sobri Bíblia. Nu insentivadu pa nu konsentra na pâpia ku pesoas envês di sô dexa-s ku publikasons. Pa djuda publikadoris pâpia ku algen, vídius di ideias pa pâpia sobri Bíblia ta mostra modi ki nu pode uza sô Bíblia pa nu kumesa ta pâpia na pregason. Má, kel-li krê fla ma nu ka debe dexa publikason óras ki nu sta ta prega di kaza en kaza? Nau! Pur izénplu, uza folhetus pode ser un bon manera di kumesa un konbérsu. Nu pode sigi kes orientason li óras ki nu sta dexa kalker folhetu:

1. Faze kel pergunta ki sta na frenti di folhetu.

2. Mostra respósta di Bíblia ki sta na kel testu ô testus ki sta na komésu di pájina dôs. Si ténpu ta da, lé i pâpia di alguns informason ki sta na folhetu.

3. Da kel algen kel folhetu i insentiva-l pa el tirmina di le-l óras ki el atxa ténpu.

4. Antis di bai, mostra kel pergunta na párti “Pensa na kel pergunta li” i konbina pa pâpia di respósta di Bíblia na otu dia.

Na revizita, pâpia sobri respósta i dexa un otu pergunta pa otu bês. Bu pode skodje un pergunta ki sta na nos site ô na kel publikason ki ta parse na últimu pájina di kel folhetu. Duránti konbérsu, skodje un bon momentu pa bu mostra bruxura Notísias sábi di Deus pa bo! ô otu publikason di studu ki ta faze párti di nos Feraméntas prinsipal pa inxina.