Modi ki nu debe uza Ideias pa pâpia sobri Bíblia

Désdi janeru di 2018, ideias pa pâpia sobri Bíblia ta parse na Folhetu di studu pa runion Nos vida i nos trabadju di pregason. Modi ki nu debe uza-s?

Diziginasons di studanti: Bu debe uza kel pergunta, testu i pergunta pa revizita ki sta na ideias pa pâpia sobri Bíblia. Má kel-li ka krê fla ma bu ten ki uza kes mésmu palavra ki sta na kes vídiu di ideias pa pâpia sobri Bíblia. Bu pode uza un otu séna, otu intruduson, splika testu di manera diferenti, ô muda otus kuza. Tanbê, bu pode oferese un publikason di nos Feraméntas prinsipal pa inxina, mésmu si Folhetu di studu ka ta fla pa oferese un publikason.

Na pregason: Kel párti ideias pa pâpia sobri Bíblia ta da-nu ideias pa nu uza na pregason. Si un algen mostra interesi i krê sabe más, bu pode kontinua ta pâpia ku el i talvês bu pode uza kel ideia pa revizita. Bu pode muda alguns kuza na kel aprizentason ki sta na Folhetu di studu ô bu pode uza un otu aprizentason. Kes algen na bu tiritóriu ta fika ku más gana di obi si bu uza asuntu di un otu mês ô un otu testu? Es ta mostra más interesi si bu pâpia di un kuza ki txeu algen sta pâpia di el ô ki kontise na undi ki es ta mora? Ka ta nporta modi ki bu ta skodje uza kes ideia pa pâpia sobri Bíblia, bu obijetivu debe ser ‘faze tudu kuza pa notísias sábi, pa bu pode pâpia di es ku otus.’ — 1Co 9:22, 23.