MODI KI NU PODE VENSE ÓDIU

1 | Trata tudu algen igual

Kuzê ki Bíblia ta fla:

‘Deus ta trata tudu algen igual, i na tudu nasons, el ta seta ken ki ta ruspeta-l i ki ta faze kel ki é dretu.’ — ATOS 10:34, 35.

Kuzê ki Atos 10:34, 35 krê fla:

Jeováa ta trata tudu algen igual, ka ta nporta di undi ki el ben, se rasa, se kor di péli ô se kultura. El ta konsentra na kel ki é más inportanti, ki é kel algen ki nos é di pa déntu. Bíblia tanbê ta fla ma ‘ómi ta odja kel ki ta parse, má Jeová ta odja korason.’ — 1 Samuel 16:7.

Kuzê ki bu pode faze:

Nbóra nu ka ta pode odja kuzê ki sta na korason di otus algen, nu pode imita Deus i trata tudu algen igual. Tanbê, nu debe lenbra ma kada algen é un algen. Si nu da kónta ma nu ten algun sentimentu kóntra pesoas di otu rasa ô país, nu debe faze orason i pidi Deus pa djuda-nu tra kel sentimentu di nos korason. (Salmo 139:23, 24) Si bu faze orason di korason i bu pidi Deus kel forsa ki bu meste pa bu trata tudu algen igual, bu pode ten sertéza ma el ta obi bu orason i ma el ta djuda-u. — 1 Pedro 3:12.

a Jeová é nómi di Deus. — Salmo 83:18.

“Nunka N ka xintaba pa N pâpia na pas ku un algen branku. . . Gósi, N ta faze párti di un família di irmons na mundu interu ki ta ama kunpanheru di verdadi.” — TITUS

Stória di vida — TITUS

El konsigi vense ódiu

Titus ta fazeba párti di un grupu violéntu ki staba xatiadu ku kes lei di se país ki ta diskriminaba algen di otus rasa. El fla: “Nu ta baba sidadi, na kes lugar ki es ka ta kreba pa algen prétu staba la, sima bar i otel, sô pa nu ranjaba géra.” Titus staba xeiu di ódiu i kel-li pô-l ta bira un algen violéntu. El fla: “Sénpri ki N ta diskutiba ku un algen, ka ta nporta si éra ómi ô mudjer, éra mi ki ta daba el primeru.”

Titus kumesa ta studa Bíblia ku Tistimunhas di Jeová. Kes kuza ki el lé na Bíblia muda se manera di pensa. Kuza ki más mexe ku el é kel promésa di Bíblia sobri un mundu ki ‘ka ta ten más mórti, tristéza, txoru i nen dór.’ — Apocalipse 21:3, 4.

Na komésu, ka foi fásil pa Titus kaba ku kel ódiu ki el ta xintiba. El fla: “Foi txeu difísil muda nha manera di pensa i di aji.” Má, kel testu di Bíblia na Atos 10:34, 35, ki ta fla ma Deus ta trata tudu algen igual, djuda-l txeu.

Kal ki foi rezultadu? Titus fla: “N fika ku sertéza ma Tistimunhas di Jeová é relijion verdaderu kantu N odja ma es ta mostra amor pa kunpanheru, ka ta nporta ses rasa ô ses kor di péli. Tanbê, antis di N batiza, un Tistimunha di Jeová branku konvida-m pa N ba kume na se kaza. N xinti sima si N staba ta sunha. Nunka N ka xintaba pa N pâpia na pas ku un algen branku, inda más pa N ba kumeba na se kaza. Gósi, N ta faze párti di un família di irmons na mundu interu ki ta ama kunpanheru di verdadi.”