Múzikas ki ta pô-nu bira más amigu di Deus

Múzika é un grandi prezenti di Jeová. El pode muda nos manera di pensa, muda modi ki nu sta xinti i motiva-nu pa aji. Di sertéza é kel-li ki nu ta xinti óras ki nu ta obi múzikas di Broadcasting. Na verdadi, kes múzika li ta faze más di ki sô kel-li. Es ta pô-nu bira más amigu di Jeová.

Désdi 2014, dja fazedu más di 70 múzika di Broadcasting i peloménus un di kes múzika li sta na más di 500 língua! Má talvês dja bu pergunta: ‘Kenha ki ta trabadja pa faze kes múzika li? Modi ki kel trabadju li ta fazedu?’

Prende modi ki irmons ta faze kes múzika li

É ekipa di múzika ki ta trabadja na Sirvisus di Son i Vídiu ki ta faze kes múzika di Broadcasting. É Kumison di Ensinu di Grupu Enkaregadu di Óbra ki ta orienta kel ekipa li. Kel ekipa di múzika é formadu pa 13 irmon ku irmans. Alguns di kes irmon li ta trabadja na faze múzika, otus é enjinheru di son i inda otus ta trabadja na kes data ki kes prujétu ten ki sta i na otus trabadju ki ta meste. Tanbê, Kumison di Ensinu aprova pa alguns irmon na mundu interu ki ta kolabora di lonji djuda na kel trabadju li. Alguns é konpositor, múziku i kantor. Kes irmon ku irmans li ta uza ses taléntu di manera umildi, sen txoma atenson pa ses kabésa.

Modi ki un múzika orijinal ta fazedu? Primeru, Kumison di Ensinu ta disidi ki testu di Bíblia ki ta sirbi di bazi pa kel múzika i modi ki el ta poi kes algen ki sta bai obi-l ta xinti. Dipôs, ekipa di múzika ta skodje kenha ki sta faze kel melodia i létra di kel múzika. Nton, ta fazedu kel primeru gravason di múzika. Es ta manda-l pa Kumison di Ensinu ki ta djobe-l i ta da otus sujiston. Nton, ekipa di múzika ta faze kes mudansa i es ta faze kel últimu gravason di kel múzika. Kes múzika ta gravadu na txeu lugar sima na filial i na kaza di irmons.

Irmons ta uza txeu prugrama di konputador diferenti pa pode faze i grava kes múzika di Broadcasting. Kel trabadju li ta iziji txeu ekipamentu diferenti sima instrumentus di toka múzika, méza di mistura di son, anplifikador di son, kolunas i mikrofónis. Kada mikrofóni pode kusta uns 10 kontu ti más di 100 kontu. Na 2020, nu gasta 116 mil dóla (uns 13 mil kontu na dinheru di Kabu Verdi) na ekipamentus pa grava múzika.

Ki sforsu ki nu ta faze pa nu uza dretu kes kontribuison ki nu ta resebe? Envês di nu ten un ekipa di múzika grandi na Betel, nu ta konta ku ajuda di txeu irmon ki ta kolabora di lonji. Envês di txeu algen bai grava tudu djuntu, nos irmons ta kustuma skrebe i faze múzika ku ajuda di prugramas di konputador.

“Kes múzika li ta poi nha fé bira más fórti”

Irmons ku irmans gosta txeu di obi kes múzika di Broadcasting. Tara ki ta vive na Alimanha fla: “Kes múzika ta djuda-m relaxa óras ki N sta preokupadu. Obi-s na nha língua ta pô-m xinti sima ki Jeová sta da-m un abrasu.” Un irmon di Kazakiston ki txoma Dimitri, fla: “N gosta di obi kes múzika li pamodi N ka meste fika ta preokupa si sta di akordu ku prinsípius di Bíblia. Tanbê, kes múzika li ta djuda-m mante konsentradu na kuzas spritual.”

Delia, di Áfrika di Sul fla modi ki el ta xinti ku kes múzika di Broadcasting: “Kes múzika li ta poi nha fé bira más fórti. Óras ki N sta tristi ô N sta pasa pa algun difikuldadi, ten sénpri un múzika ki é izatamenti kel ki N sta meste pa djuda-m lida ku nha situason. Txeu bês, sô obi son di kes múzika ta pô-m xinti midjór!”

Algun di kes múzika di Broadcasting bira prifiridu di txeu algen. Lerato, ki tanbê ta vive na Áfrika di Sul fla: “Kes múzika ‘Sta kuazi ta kontise’ i ‘Kel mundu novu ki sta ben’ ta djuda-m imajina kel dia ki N ta ben odja otu bês nha mai ki N krê txeu. Tudu bês ki N obi kes múzika li, N ta odja nha mai ta kóre pa ben brasa-m.”

Ten un múzika di Broadcasting ki djuda txeu un jóven di Sri Lanka. El fla: “Nha profesóra di siênsia sanha na mi na frenti di otus koléga pamodi mi é Tistimunha di Jeová. N fika ku medu i N ka sabia kuzê ki N ta flaba. Kantu N txiga kaza, nha mai insentiva-m pa N obi kel múzika ‘Studa é rei di bon’. Kel múzika djuda-m ntende ma N mesteba faze un piskiza i pripara un respósta. Kel otu dia N ba pâpia ku nha profesóra. El obi-m i el fla ma gósi el ta ntende midjór kes kuza ki Tistimunhas di Jeová ta kridita na el. N ta agradese organizason di Jeová txeu pamodi es ta da-nu kes múzika li ki ta nkoraja.”

Di undi ki ta ben dinheru pa faze kes múzika di Broadcasting? El ta ben di kes kontribuison ki ta fazedu pa trabadju na mundu interu. Txeu di kes kontribuison ta fazedu através di site donate.jw.org. Obrigadu pa kes kontribuison ki nhos ta faze di korason.