Pamodi ki Deus ten un organizason?

1. Pamodi ki Deus organiza Israel antigu?

Deus organiza fidjus di Abraon na un nason i el da-s lei. El txoma-s nason di ‘Israel’ i el da-s obrigason di proteje adorason verdaderu i se palavra. (Salmo 147:19, 20 ) Jeová krê uzaba Israel pa abensuaba mundu interu. — Lé Génesis 22:18.

Deus skodje israelitas pa ser se tistimunhas. Ses stória ta mostra modi ki algen ta tra pruvetu óras ki el ta obi ku lei di Deus. (Deuteronómio 4:6 ) Óras ki algen di mundu interu odjaba modi ki israelitas ta viveba es ta konxeba Deus verdaderu. — Lé Isaías 43:10, 12.

2. Pamodi ki kristons verdaderu sta organizadu?

Ku ténpu, nason di Israel perde benson di Deus, i Jeová troka-s pa kongregason di kristons. (Mateus 21:43; 23:37, 38 ) Gósi, na lugar di israelitas fika kristons verdaderu ki ta sirbi di tistimunhas di Jeová. — Lé Atos 15:14, 17.

Jizus organiza se sigidoris pa prega i faze disiplus na mundu interu. (Mateus 10:7, 11; 24:14; 28:19, 20 ) Gósi, na ténpu di fin di es sistéma, es trabadju sta ta fazedu di un manera ki nunka ka fazedu antis. Pa primeru bês na stória, Jeová dja uni milhons di algen di tudu Téra na adorason verdaderu. (Apocalipse 7:9, 10 ) Kristons verdaderu sta organizadu ku obijetivu di da koraji i djuda kunpanheru. Na ses runion, kel ki ta inxinadu na un lugar é kel mê ki ta inxinadu na mundu interu. — Lé Hebreus 10:24, 25.

3. Na nos ténpu modi ki organizason di Tistimunhas di Jeová kumesa?

Na dékada di 1870, un grupu pikinoti di studantis di Bíblia kumesa ta diskubri otu bês, verdadis di Bíblia ki dja staba skesedu txeu ténpu. Es sabeba ma Jizus organiza kongregason pa prega. Nton, es kumesa un kanpanha di pregason di Reinu na mundu interu. Na 1931, es pasa ta uza nómi Tistimunhas di Jeová. — Lé Atus 1:8; 2:1, 4, 11; 5:42, BPK.

4. Modi ki Tistimunhas di Jeová sta organizadu?

Dipôs di mórti di Kristu, kongregasons di txeu téra ta resebeba ajuda di un sô grupu di ómis maduru i apóstlus. Es ta setaba ma Jizus é Kabésa di kongregason. (Atos 16:4, 5 ) Di mésmu manera gósi, Tistimunhas di Jeová na mundu interu ta resebe ajuda di un Grupu Enkaregadu di ansions ki ten txeu spiriénsa. Es ta toma kónta di tudu filial di Tistimunhas di Jeová, ki ta traduzi, inprimi i distribui material pa studa Bíblia na más di 600 língua. Asi, Grupu Enkaregadu pode da koraji ku bazi na Bíblia i orientason pa más di 100 mil kongregason na mundu interu. Na kada kongregason, ten ansions, ô enkaregadus ki é ómis maduru. Es ta toma kónta di ribanhu di Deus ku amor. — Lé 1 Pedro 5:2, 3.

Tistimunhas di Jeová sta organizadu pa prega notísias sábi i faze disiplus. Sima apóstlus es ta prega di kaza en kaza. (Atus 20:20, BPK ) Tanbê es sta prontu pa studa Bíblia ku pesoas ki krê poi Deus fika kontenti i ki ta ama verdadi. Má, Tistimunhas di Jeová é ka sô un organizason. Es é un família ki ten un Pai xeiu di amor. Es é irmon ki ta preokupa ku kunpanheru. (2 Tessalonicenses 1:3 ) Dja ki povu di Jeová sta organizadu pa agrada Deus i djuda otus, es é família más filís di Téra. — Lé Salmo 33:12; Atus 20:35, BPK.