Laj Jose Kixyalebʼ Rix li Ras

LAJ Jose kiraj xnawbʼal ma ak keʼxjal xnaʼlebʼ li 10 chi ras. Joʼkan naq kixye rehebʼ: ‹Laaʼex aj chʼuuk, xexchalk chi rilbʼal qatenamit›.

Keʼchaqʼok li ras: ‹Inkʼaʼ, moko yaal ta, laaʼo tiik qachʼool. Qiitzʼin qibʼ ut kabʼlajuho naq xoowank chaq. Jun rehebʼ li qiitzʼin maaʼani chik ut li jun chik wank rikʼin li qayuwaʼ›.

Laj Jose kixbʼaanu ribʼ naq inkʼaʼ kixpaabʼ rehebʼ. Joʼkan naq kixkanabʼ laj Simeon saʼ tzʼalam. Kixtaqlahebʼ li bʼeleebʼ saʼ rochoch li xyuwaʼ ut kixye rehebʼ naq teʼxkʼam li tzakahemq. Kixye ajwiʼ rehebʼ: ‹Naq texsutqʼiiq teekʼam chaq we leeriitzʼin, li toj saaj saʼ leeyanq›.

Naq keʼwulak Canaan, keʼxye re li xyuwaʼ li keʼxkʼul chaq. Joʼkan naq laj Jacob kirahoʼk saʼ xchʼool. Chirix chik aʼan laj Jacob kixye: ‹Maaʼani chik laj Jose ut maaʼani wiʼ chik laj Simeon. Moko tinkanabʼ ta naq teʼxkʼam laj Benjamin li xkachʼinal ru li walal›. Abʼan yook chi raqeʼk li tzakahemq joʼkan naq laj Jacob kixkanabʼ naq teʼxkʼam laj Benjamin re naq teʼxkʼam chaq xkomon li tzakahemq.

Naq laj Jose kiril naq yookebʼ chaq chi chalk li ras, kʼajoʼ naq kisahoʼk saʼ xchʼool xbʼaan naq kiril ru laj Benjamin. Abʼan maajun rehebʼ kixnaw naq li winq aʼin, aʼan laj Jose. Ma nakaanaw kʼaru kixbʼaanu laj Jose re xyalbʼalebʼ rix li ras?

Laj Jose kixye rehebʼ li xmoos naq teʼxnujobʼresi chi tzakahemq li xnaʼajebʼ li riiq. Laj Jose kixye ajwiʼ naq teʼxkʼe saʼ li riiq laj Benjamin, jun li sekʼ re plaat. Ak najt chik teʼwulaq li ras, naq laj Jose kixtaqlahebʼ li xmoos chirixebʼ. Naq koxeʼtaweʼk keʼyeheʼk re: ‹Kʼaʼut naq xeerelqʼa chaq li xsekʼ li awabʼej?›

Keʼchaqʼok ut keʼxye: ‹Maaʼani qe kiʼelqʼank re li sekʼ. Wi teetaw li sekʼ saʼ junaq rehebʼ li qiiq, aʼan tkamq›.

Joʼkan naq, ebʼ li moos keʼok xsikʼbʼal li sekʼ saʼebʼ li junjunq chi iiq. Keʼxtaw li sekʼ saʼ li riiq laj Benjamin, joʼ nakaawil saʼ li eetalil. Tojaʼ naq ebʼ li moos keʼxye: ‹Naru texxik, abʼan laj Benjamin txik chiqix›. Ma nakaanaw kʼaru keʼxbʼaanu ebʼ li ras laj Jose?

Chixjunilebʼ keʼsutqʼiik saʼ rochoch laj Jose. Laj Jose kixye rehebʼ: ‹Ayuqex saʼ leerochoch, abʼan laj Benjamin tkanaaq choʼq inmoos›.

Tojaʼ naq kixye laj Juda: ‹Wi tinwulaq saʼ ochoch ut inkʼaʼ tinkʼam li wiitzʼin tkamq linyuwaʼ, xbʼaan naq kʼajoʼ naxra. Bʼaanu usilal, kanaqin choʼq aamoos abʼan kanabʼ chi xik li wiitzʼin›.

Chi joʼkan kixkʼe reetal laj Jose naq ebʼ li ras, keʼxjal xnaʼlebʼ. Anaqwan, qilaq kʼaru kixbʼaanu laj Jose.