Keʼxkʼe Xloqʼal li Jesus

LI JESUS ak kixkʼirtasihebʼ li wiibʼ chi mutzʼ, naq kiwulak saʼ jun li kʼalebʼaal nachʼ chiru Jerusalen. Aran wankebʼ naq kixtaqlahebʼ wiibʼ rehebʼ li xtzolom ut kixye rehebʼ: ‹Ayuqex saʼ li kʼalebʼaal ut naq teetaw jun li bʼuur, teejit ut teekʼam chaq we›.

Naq keʼxkʼe li bʼuur re li Jesus, kitaqeʼk saʼ xbʼeen ut xko saʼ li tenamit Jerusalen. Naq li Jesus yook chaq chi nachʼok, li kʼiila tenamit kichalk chi xkʼulbʼal. Wankebʼ keʼxjel li xtʼikr chiru chʼochʼ. Ut wankebʼ keʼxkʼe xaq li cheʼ saʼ bʼe, tojaʼ naq keʼxye: ‹Li Yos t-osobʼtesinq re li awabʼej li kichalk saʼ xkʼabʼaʼ li Jehobʼa›.

Saʼ li qʼe kutan ebʼ li keʼkanaak choʼq awabʼej, keʼok saʼ xbʼeenebʼ li bʼuur saʼ li tenamit Jerusalen, re naq teʼileʼq xbʼaanebʼ li tenamit. Chi joʼkan kixbʼaanu li Jesus. Ut ebʼ li qas qiitzʼin keʼxkʼutbʼesi naq keʼraj naq li Jesus t-awabʼejinq rehebʼ. Abʼan moko chixjunilebʼ ta keʼraj li Jesus choʼq awabʼej. Aʼin naqanaw rikʼin li kixkʼul li Jesus naq kiwulak saʼ Rochoch li Yos.

Li Jesus kixkʼirtasihebʼ li mutzʼ ut ebʼ li sik saʼ li Rochoch li Yos. Naq ebʼ li kokʼal keʼril aʼin, keʼxkʼe xloqʼal li Jesus. Joʼkan naq ebʼ laj tij keʼchalk xjosqʼil ut keʼxye re li Jesus: ‹Ma nakaawabʼi li yookebʼ xyeebʼal li kokʼal?›

Li Jesus kixye rehebʼ: ‹Ma inkʼaʼ eerilom saʼ li Santil Hu, naq li Yos tixbʼaanu naq rikʼin xtzʼuumal rehebʼ li kokʼal tkʼeemanq xloqʼal li awabʼej?› Ebʼ li kokʼal inkʼaʼ keʼxkanabʼ xloqʼoninkil li awabʼej li kixtaqla chaq li Yos.

Us raj naq tqakʼam qe rikʼinebʼ li kokʼal aʼin! Peʼyaal? Wankebʼ nekeʼraj naq tqakanabʼ xkʼeebʼal resil li Xnimajwal Awabʼejilal li Yos. Abʼan laaʼo inkʼaʼ tqakanabʼ aatinak chirix li osobʼtesink li tixkʼam chaq li Jesus saʼ li Ruuchichʼochʼ.

Naq li Jesus kikʼulunk saʼ Ruuchichʼochʼ, toj maajiʼ xkutankil naq t-awabʼejinq. Ebʼ li xtzolom keʼraj xnawbʼal joqʼe t-awabʼejinq. Anaqwan qatzolaq chirix aʼin.