LI JESUS wank saʼ li tzuul Olivo rikʼinebʼ li xtzolom. Aʼanebʼ laj Andres, laj Pedro laj Santiago ut laj Juan. Li ochoch li wank saʼ li eetalil, aʼan Rochoch li Yos, li wank Jerusalen.

Naq ebʼ laj tij keʼril li Jesus saʼ li Rochoch li Yos, keʼraj xkamsinkil. Abʼan, keʼxuwak xbʼaanunkil xbʼaan naq li tenamit naxra li Jesus. Chixjunil aʼin kikʼulmank saʼ li kutan Martes, naq ak wiibʼ kutan rokik li Jesus saʼ xbʼeen li bʼuur saʼ li tenamit Jerusalen.

Li Jesus kixye rehebʼ laj kʼamol bʼe saʼebʼ li paabʼal: ‹Laaʼex kʼantiʼ ut ralalex xkʼajol ebʼ li kʼantiʼ›. Kixye ajwiʼ naq li Yos tixkʼehebʼ chi xtojbʼal xmaak xbʼaan naq naabʼal li maaʼusilal keʼxbʼaanu. Naq li Jesus xko saʼ li tzuul Olivo, kʼaru keʼok xpatzʼbʼal re, ebʼ li xtzolom?

Ebʼ li xtzolom li Jesus keʼraj xnawbʼal chirix li kutan chaalel. Xbʼaan naq nekeʼxnaw naq li Jesus trisi chixjunil li maaʼusilal saʼ xbʼeen li Ruuchichʼochʼ. Joʼkan naq, keʼraj xnawbʼal joqʼe tkʼulmanq aʼin. Ma nakaanaw joqʼe tchalq wiʼ chik li Jesus joʼ awabʼej?

Ebʼ li xtzolom li wankebʼ saʼ li Ruuchichʼochʼ, inkʼaʼ teʼruuq chi rilbʼal li Jesus naq tchalq wiʼ chik, xbʼaan naq wanq saʼ choxa. Joʼkan naq li Jesus kiʼaatinak chirix ebʼ li eetalil li yooq chi kʼulmank saʼ Ruuchichʼochʼ, re naq ebʼ li xtzolom teʼxnaw naq ak yook chi awabʼejink. Ma nakaanaw kʼaru ebʼ li eetalil aʼin?

Li Jesus kixye naq twanq nimla yalok u, yajel, weʼej, kamsink ut ninqi hiik. Kixye ajwiʼ naq tpuktesimanq li chaabʼil esilal chirix li Xnimajwal Awabʼejilal li Yos saʼ chixjunil li Ruuchichʼochʼ. Ma yook chi kʼulmank aʼin saʼebʼ li qakutan? Chʼolchʼo chiqu naq li Jesus ak yook chi awabʼejink saʼ choxa, xbʼaan naq yook chi kʼulmank chixjunil aʼin. Li Jesus trisi ajwiʼ li maaʼusilal saʼ xbʼeen li Ruuchichʼochʼ.