Tzolom 1
Li Yos nokooxbʼoq re naq toowanq choʼq ramiiw
Li Yos naraj naq toowanq choʼq ramiiw. Ma nakaanaw naq naru tatwanq choʼq ramiiw li qʼaxal nim xwankil saʼ li choxachʼochʼ? Laj Abʼrahan, li kiwank chaq najter qʼe kutan, ramiiw li Yos kixkʼabʼaʼin (Santiago 2:23). Li Santil Hu naʼaatinak chirixebʼ winq ut ixq li keʼwank choʼq ramiiw li Yos ut naabʼal rosobʼtesihom keʼxkʼul. Saʼebʼ qakutan, naabʼalebʼ li poyanam saʼ chixjunil li ruuchichʼochʼ wankebʼ choʼq ramiiw li Yos. Naru naq laaʼat ajwiʼ tatwanq choʼq ramiiw li Yos.
Qʼaxal us wank saʼ amiiwil rikʼin li Yos chiru li wank saʼ amiiwil rikʼin li qech poyanamil. Li Yos maajoʼqʼe tixkanabʼ xjunesebʼ li ramiiw, li tiikebʼ xchʼool (Salmo 18:25). Qʼaxal us wank choʼq ramiiw li Yos chiru li wank saʼ bʼihomal. Naq ebʼ li bʼihom nekeʼkamk jalanebʼ chik nekeʼkana rikʼin xtuminebʼ. Abʼanan, li wank saʼ amiiwil rikʼin li Yos aʼan jun li loqʼlaj maatan ut maaʼani naru tmaqʼoq re chiqu (Mateo 6:19).
Mare wankebʼ inkʼaʼ teʼraj naq yooqat chi xtzolbʼal li naxkʼut li Yos. Mare teʼxbʼaanu ebʼ laawamiiw malaj ebʼ laakomon (Mateo 10:36, 37). Wi tateʼxseʼe malaj teʼxyeechiʼi xbʼaanunkil aawe li maaʼusilal, kʼoxlan: «Ani nawaj xsahobʼresinkil xchʼool, ebʼ li winq malaj li Yos?». Kʼoxlan ajwiʼ chirix aʼin: wi teʼxye aawe naq taakanabʼ waʼak, ma taabʼaanu raj? Inkʼaʼ taabʼaanu peʼyaal? Xbʼaan naq tento naq toowaʼaq re naq yoʼyooqo. Li Yos naru tixkʼe aayuʼam chi junelik. Joʼkan naq maakanabʼ naq teʼxram chaawu laatzolom. Tzol chik xkomon chanru naru tatwanq choʼq ramiiw li Yos (Juan 17:3).