Tzolom 10
Chanru xtawbʼal li tzʼaqal paabʼal
Wi naqaj wank choʼq ramiiw li Yos, tento naq tooloqʼoninq joʼ chanru nawulak chiru li Yos. Li Jesus kixye naq «ebʼ li tzʼaqal aj loqʼoninel» teʼloqʼoninq re li Yos rikʼin li «yaal» (Juan 4:23, 24). Jun ajwiʼ li tzʼaqal loqʼonink chiru li Yos (Efesios 4:4-6). Li tzʼaqal paabʼal nakʼamok saʼ li junelik yuʼam ut li bʼalaqʼil paabʼal nakʼamok saʼ li kamk (Mateo 7:13, 14).
Naru tqanaw bʼar wank re li tzʼaqal paabʼal rikʼin rilbʼalebʼ laj loqʼoninel. Li Jehobʼa chaabʼil ut ebʼ li nekeʼloqʼonink re tento naq chaabʼilaqebʼ ajwiʼ. Joʼ li chaabʼil cheʼel chiin chaabʼil li ru naxkʼe, li tzʼaqal paabʼal chaabʼilebʼ poyanam ajwiʼ naxkʼe (Mateo 7:15-20).
Ebʼ li ramiiw li Jehobʼa nekeʼroxloqʼi li Santil Hu. Nekeʼxnaw naq li Santil Hu musiqʼanbʼil xbʼaan li Yos. Joʼkan naq nekeʼxkanabʼ naq aʼan tixbʼeresihebʼ xyuʼam, tixtuqubʼ ru li xchʼaʼajkilalebʼ ut tixtenqʼahebʼ chi xnawbʼal ru li Yos (2 Timoteo 3:16). Joʼkan ajwiʼ nekeʼxkʼe xqʼe chi xbʼaanunkil li nekeʼxkʼut.
Ebʼ li ramiiw li Jehobʼa nekeʼxra ribʼ chiribʼilebʼ ribʼ. Li Jesus kixkʼutbʼesi naq kixrahebʼ li poyanam naq kixkʼut chiruhebʼ chirix li Yos ut naq kixkʼirtasihebʼ li yaj. Li nekeʼloqʼonink saʼ li tzʼaqal paabʼal nekeʼxra li rech poyanamil. Joʼ li Jesus, inkʼaʼ nekeʼxtzʼeqtaana ebʼ li nebʼaʼ chi moko li wankebʼ saʼ jalan chik teepal malaj tenamit. Li Jesus kixye naq tkʼutunq anihebʼ li xtzolom xbʼaan naq teʼxra ribʼ chi ribʼilebʼ ribʼ (Juan 13:35).
Ebʼ li ramiiw li Yos nekeʼroxloqʼi li xKʼabʼaʼ: Jehobʼa. Wi junaq li poyanam inkʼaʼ naraj xyaabʼasinkil li qakʼabʼaʼ, ma naru tqaye naq tzʼaqal qamiiw? Tzʼaqal yaal naq inkʼaʼ. Naq wank jun qamiiw naqayaabʼasi xkʼabʼaʼ ut us nokooʼaatinak chirix. Joʼkan bʼi, li nekeʼraj wank choʼq ramiiw li Yos tento naq teʼxyaabʼasi li xKʼabʼaʼ ut teʼxkʼe chi naweʼk. Li Jehobʼa naraj naq chi joʼkan tqabʼaanu (Mateo 6:9; Romanos 10:13, 14).
Joʼ li Jesus, ebʼ li ramiiw li Yos nekeʼxkʼut xyaalal li xNimajwal Awabʼejilal li Yos. Li xNimajwal Awabʼejilal li Yos aʼan li choxahil awabʼejilal li tixyiibʼ li Ruuchichʼochʼ choʼq sahilal naʼajej. Ebʼ li ramiiw li Yos nekeʼxpuktesi li chaabʼil esilal chirix li xNimajwal Awabʼejilal li Yos (Mateo 24:14).
Ebʼ laj testiiw re li Jehobʼa nekeʼxkʼe xqʼe chi wank choʼq ramiiw li Yos. Nekeʼroxloqʼi li Santil Hu ut nekeʼxra ribʼ chiribʼilebʼ ribʼ. Nekeʼxyaabʼasi ut nekeʼroxloqʼi ajwiʼ li xkʼabʼaʼ li Yos; nekeʼxkʼut xyaalal li xNimajwal Awabʼejilal li Yos. Saʼebʼ qakutan, ebʼ laj Testiiw re li Jehobʼa, aʼanebʼ li nekeʼloqʼonink saʼ li tzʼaqal paabʼal arin saʼ li Ruuchichʼochʼ.