Tzolom 18
Choowanq choʼq ramiiw li Yos chi junelik
Tento naq tqakʼe qachʼool re naq teʼwanq qamiiw. Naq naqakʼe qachʼool chi wank choʼq ramiiw li Yos tqakʼul naabʼal qosobʼtesihom. Li Jesus kixye rehebʼ li keʼpaabʼank re: «Li yaal taaʼachʼabʼanq eere» (Juan 8:32). Kʼaru naraj xyeebʼal li aatin aʼin?
Anaqwan naru toowanq chisa saʼ qachʼool. Naru tookoleʼq chiru li xbʼalaqʼil naʼlebʼ laj Tza ut chiru li xtikʼtiʼ. Joʼ ajwiʼ chiru li rahil chʼoolejil li nekeʼreekʼa naabʼalebʼ li poyanam li inkʼaʼ nekeʼxnaw ru li Jehobʼa (Romanos 8:22). Ebʼ li ramiiw li Yos moko nekeʼxuwak ta chiru li kamk (Hebreos 2:14, 15).
Sa chik toowanq saʼ li xʼakʼil ruuchichʼochʼ li Yos. Kʼajoʼaq xsahil qachʼool saʼ li kutan chaalel! Naq li Ruuchichʼochʼ kʼuubʼanbʼilaq chik choʼq sahilal naʼajej, maakʼaʼaq chik li yalok u, chi moko li yajel chi moko li maaʼusilal. Maakʼaʼaq chik li nebʼaʼil chi moko li weʼej. Tookoleʼq chiru li tiixilal, li kamk, li kaw taqlank ut inkʼaʼ chik tooxuwaq. Li Santil Hu naxye chirix li Yos: «Kaʼajwiʼ nakayeʼ laawuqʼ, ut kʼajoʼ nakakʼojobʼ xchʼool chixjunilebʼ» (Salmo 145:16).
Ebʼ li ramiiw li Yos teʼwanq xyuʼam chi junelik. Li junelik yuʼam, aʼan jun loqʼlaj maatan li tixkʼe li Yos rehebʼ li nekeʼxsikʼ li wank choʼq ramiiw (Romanos 6:23). Chaakʼoxla li naraj xyeebʼal choʼq aawe li junelik yuʼam.
Twanq qahoonal re xbʼaanunkil chixjunil li kʼaru tqaj. Mare tqaj xtzolbʼal li wajbʼak, bʼonok, kʼanjelak joʼ aj peechʼ, xnawbʼal ru li kʼiila paay chi xul ut li cheʼkʼaam. Mare tqaj ajwiʼ xik saʼ jalan chik tenamit ut xnawbʼalebʼ ru li poyanam li wankebʼ aran. Xbʼaan naq wanq qayuʼam chi junelik, tooruhanq xbʼaanunkil chixjunil li kʼaʼaq re ru aʼin.
Twanq qahoonal re naq teʼwanq naabʼalebʼ qamiiw. Xbʼaan naq wanq qayuʼam chi junelik, naru tqanawebʼ ru naabʼalebʼ chik li ramiiw li Yos. Tqanaw kʼaru nekeʼxnaw xbʼaanunkil ut ebʼ li xchaabʼil naʼlebʼ ut toowanq ajwiʼ choʼq ramiiwebʼ. Tqarahebʼ ut ebʼ aʼan tooʼeʼxra (1 Corintios 13:8). Naru toowanq choʼq ramiiwebʼ li poyanam saʼ xbʼeen chixjunil li Ruuchichʼochʼ xbʼaan naq inkʼaʼ chik tookamq. Ut rajlal chihabʼ li qarahom chirix li Yos yooq chi kʼiik. Joʼkan naq choowanq choʼq ramiiw li Yos chi junelik!