Tzolom 17

Re naq teʼwanq qamiiw tento naq chaabʼilaqo rikʼinebʼ

Li amiiwil nachalk xbʼaan li rahok. Wi taatzol chik xkomon li naʼlebʼ chirix li Jehobʼa, laarahom chirix tkʼiiq; taawaj ajwiʼ kʼanjelak chiru li Yos ut taawaj wank choʼq xtzolom li Jesukriist (Mateo 28:19). Wi taajuni aawibʼ rikʼinebʼ laj testiiw re li Jehobʼa naru tatwanq choʼq ramiiw li Yos chi junelik. Abʼan, kʼaru tento taabʼaanu?

Chaakʼut naq nakaara li Yos rikʼin xpaabʼankil li xchaqʼrabʼ. «Xbʼaan naq aʼan aʼin li xraabʼal li Yos: naq chiqapaabʼ ebʼ li xchaqʼrabʼ. Ut ebʼ li xchaqʼrabʼ moko aalebʼ ta.» (1 Juan 5:3.)

Chaabʼaanu li yookat chi xtzolbʼal. Li Jesus kixseraqʼi jun li eetalil ut kixchʼolobʼ li naʼlebʼ aʼin. Jun li winq wank xnaʼlebʼ kikabʼlak saʼ xbʼeen li pek ut jun chik li winq maakʼaʼ xnaʼlebʼ kikabʼlak saʼ xbʼeen li samahibʼ. Naq kichalk jun li nimla kaqsut–iqʼ li ochoch li kʼojobʼanbʼil saʼ xbʼeen li pek inkʼaʼ kitʼaneʼk, abʼan li ochoch li kʼojobʼanbʼil saʼ xbʼeen li samahibʼ kijukʼluk xyaabʼ naq kitʼaneʼk. Li Jesus kixye naq chixjunilebʼ li nekeʼrabʼi li raatin chanchanebʼ li winq li wank xnaʼlebʼ, li kikabʼlak saʼ xbʼeen li pek. Joʼkan ajwiʼ kixye naq chixjunilebʼ li nekeʼrabʼi li raatin abʼan inkʼaʼ nekeʼxbʼaanu li naxye chanchanebʼ li winq li maakʼaʼ xnaʼlebʼ, li kikabʼlak saʼ xbʼeen li samahibʼ. Bʼar wank rehebʼ li wiibʼ chi winq aʼin taawaj xjuntaqʼeetankil aawibʼ? (Mateo 7:24-27.)

Chaaqʼaxtesi aawibʼ chiru li Yos. Naq tattijoq chiru li Jehobʼa taaye re, naq taawaj kʼanjelak chiru chi junelik. Wi taabʼaanu li naraj li Yos taakʼutbʼesi naq laaʼat xtzolom li Jesukriist (Mateo 11:29).

Subʼ aawibʼ saʼ haʼ. «Waklin ut [subʼ aawibʼ saʼ haʼ]. Chayaabʼa xkʼabʼaʼ li Qaawaʼ ut chʼajebʼ laamaak.» (Hechos 22:​16.)

Chatkʼanjelaq chiru li Yos chi anchal aachʼool. «Joʼchʼinal joʼnimal li teebʼaanu, bʼaanuhomaq chi anchal eechʼool, choʼq re li [Jehobʼa] ut maawaʼ choʼq rehebʼ li winq.» (Colosenses 3:23.)