TASAL 6
Laj Job Inkʼaʼ Kixtzʼeqtaana li Yos
Laj Tza kixkʼas rix laj Job chiru li Yos, abʼan laj Job inkʼaʼ kixtzʼeqtaana li Jehobʼa
MA WANKEBʼ aj paabʼanel teʼxkuy xnumsinkil naabʼal li chʼaʼajkilal ut inkʼaʼ teʼxtzʼeqtaana li Yos usta yeebʼilaq rehebʼ naq maakʼaʼ aj e li yookebʼ xbʼaanunkil? Joʼkan kixkʼul jun li winq xkʼabʼaʼ Job. Qilaq kʼaru kikʼulmank.
Laj Job rech alal laj Abrahan ut kiwank chaq saʼ jun li naʼajej li naxkʼabʼaʼi Arabia saʼebʼ li qakutan, naq ebʼ laj Israel keʼwank chaq Egipto. Saʼ jun kutan naq li Jehobʼa kixbʼaanu jun li nimla chʼutam rikʼinebʼ li anjel saʼ choxa keʼok chi aatinak chirix laj Job. Ut saʼ li hoonal aʼan wank chaq laj Tza. Saʼ xkʼabʼaʼ xtiikilal xchʼool laj Job, li Jehobʼa kixkʼe xloqʼal chiruhebʼ chixjunilebʼ, chi joʼkan kixkʼutbʼesi naq maakʼaʼ chik junaq winq joʼ aʼan. Abʼan laj Tza kixye naq laj Job naxloqʼoni li Yos xbʼaan naq naxkʼe re chixjunil ut naxkol. Kixye ajwiʼ naq laj Job tixmaajewa li Yos wi tmaqʼeʼq chiru chixjunil.
Li Yos kixkanabʼ naq laj Tza tixmaqʼ chiru laj Job li xjunkabʼlal, li ralal xkʼajol ut naq tixkʼe chirix jun li nimla yajel. Saʼ xkʼabʼaʼ naq laj Job inkʼaʼ kixnaw naq laj Tza yook chaq chi bʼaanunk re aʼin, inkʼaʼ kixtaw ru kʼaʼut naq li Yos kixkanabʼ naq tixkʼul naabʼal li rahilal. Usta kixkʼul chixjunil aʼin, maajunwa kixtzʼeqtaana li Jehobʼa.
Naq oxibʼ rehebʼ li ramiiw koleʼilok re, keʼok xchoqinkil. Saʼ li tasal hu Job wank chixjunil li aatin li keʼxye chaq li oxibʼ chi winq ut naq keʼok xchʼikbʼal saʼ li xkʼaʼuxl naq li Yos yook chi kʼehok re chi xtojbʼal chixjunil li xmaak li kixbʼaanu chaq saʼ muqmu. Moko yaal ta chixjunil li keʼxye re! Keʼxye ajwiʼ naq li Yos maakʼaʼ naraj rehebʼ li nekeʼkʼanjelak chiru chi moko naril ta li nekeʼxbʼaanu. Laj Job inkʼaʼ kixpaabʼ li keʼxye re. Kixye rehebʼ li winq naq inkʼaʼ tixtzʼeqtaana li Yos usta tkamq.
Laj Job kipaltoʼk xbʼaan naq kiʼok xyeebʼal naabʼal li aatin re xkolbʼal ribʼ. Ut laj Elihu jun li saaj al kirabʼi chixjunil li yook chi yeemank. Joʼkan naq kixqʼus laj Job xbʼaan xkʼeebʼal xwankil, chiru xkʼeebʼal xwankil li Jehobʼa ut li xkʼabʼaʼ. Joʼkan ajwiʼ, kixqʼusebʼ chi kaw li keʼweechʼink re laj Job.
Chirix chik aʼan, li Jehobʼa kixqʼus laj Job. Kiroksi li xnimal ru li xyoobʼtesihom re xkʼutbʼal chiru laj Job naq li winq jwal kachʼin naq najuntaqʼeetaak rikʼin xwankil li Yos. Laj Job kixkubʼsi xwankil ut kixkʼulubʼa li xqʼusbʼal. Saʼ xkʼabʼaʼ naq li Jehobʼa «aj toqʼobʼanel u ut aj uxtaan», kixkʼirtasi laj Job, ut kirosobʼtesi rikʼin xkaʼsutil xkʼihal li xbʼihomal ut lajeebʼ chik xtzʼaqobʼ li ralal xkʼajol (Santiago 5:11). Naq laj Job inkʼaʼ kixtzʼeqtaana li Jehobʼa kiruuk xsumenkil li kixye chaq laj Tza ut kixkʼutbʼesi ajwiʼ naq ebʼ li qas qiitzʼin teʼruuq xloqʼoninkil li Jehobʼa usta yooqebʼ xkʼulbʼal li nimla chʼaʼajkilal.
(Isinbʼil chaq saʼ xhuhil laj Job.)