Li Yos Kixkolebʼ laj Israel

CHIRU naabʼal chihabʼ ebʼ laj Israel sa keʼwank chaq Egipto ut numtajenaqebʼ xkʼihal. Abʼan naq kiʼok chi jolomink jun chik laj Faraon, moko sa ta chik keʼwank xbʼaan naq maaʼus xnaʼlebʼ. Laj Faraon aʼin moko kixnaw ta ru laj Jose. Naq kixkʼe reetal naq naabʼalebʼ xkʼihal ebʼ laj Israel, kixkʼehebʼ choʼq xmoos ut kixtaqla xkutbʼalebʼ saʼ Nimaʼ Nilo ebʼ li kokʼ chʼinaʼal li tojaʼ teʼyoʼlaaq. Jun li ixq aj Israel kixkʼe li xchʼina yum saʼ jun li chakach ut kixmuq chaq saʼ pim. Li xrabʼin laj Faraon kixtaw li kʼuulaʼal aʼin, aj Moises kixkʼe choʼq xkʼabʼaʼ ut kixkʼirisi saʼ rochoch li awabʼej.

Ak 40 chihabʼ wank re laj Moises naq kixkamsi jun rehebʼ laj Egipto li nataqlank chaq saʼ xbʼeenebʼ li moos, xbʼaan naq yook xteninkil jun li moos aj Israel. Joʼkan naq laj Moises kiʼelelik ut xkoho chi najt. Naq wank 80 chihabʼ re, kisutqʼiik Egipto xbʼaan naq kiyeheʼk re xbʼaan li Yos naq tixye re laj Faraon naq tixkanabʼebʼ chi xik ebʼ laj Israel.

Li Yos kixtaqla lajeebʼ li rahilal saʼ xbʼeen li tenamit Egipto xbʼaan naq laj Faraon inkʼaʼ kixkanabʼebʼ chi xik ebʼ laj Israel. Toj maajiʼ ajwiʼ nawulak li xbʼeen rahilal naq laj Moises naʼaatinak chaq rikʼin laj Faraon re naq inkʼaʼ tchalq li rahilal. Abʼan laj Faraon qʼetqʼet aj winq, naxpoqʼ chaq xjosqʼil li Jehobʼa ut laj Moises. Saʼ xlaje li rahilal, li Yos kixtaqla jun li anjel re xkamsinkilebʼ li xbʼeen alalbʼejil li wank chaq Egipto. Abʼan li anjel inkʼaʼ kixchʼeʼ ebʼ li ochoch li keʼabʼink chiru li Jehobʼa ut li keʼxbʼon roqechal li rochoch rikʼin xkikʼel xral li karneer. Joʼkan naq ebʼ laj Israel jun sut chiru li chihabʼ keʼok xnimankil li Paswa re xjultikankil aʼin.

Naq laj Faraon kiril naq kikamk li xbʼeen ralal, kixye re laj Moises ut rehebʼ laj Israel naq xxikaqebʼ. Naq ebʼ laj Israel keʼrabʼi aʼin, saʼ junpaat keʼxkʼuubʼ ribʼ ut keʼxseebʼa ribʼ chi elk saʼ li tenamit. Moqon chik laj Faraon kixjal xkʼaʼuxl ut kixtaqlahebʼ laj puubʼ saʼebʼ li bʼelebʼaal chʼiichʼ re xsutqʼisinkilebʼ laj Israel. Naq keʼwulak chiru li Kaqi Palaw, chanchan tawiʼ maabʼar teʼxkol ribʼebʼ xbʼaan naq chiruhebʼ wank li Palaw ut chirixebʼ wankebʼ chaq laj puubʼ. Abʼan, li Jehobʼa kixte saʼ xyi li palaw re naq li xtenamit tnumeʼq saʼ chaqi bʼe. Naq ebʼ laj puubʼ kohebʼ chirixebʼ laj Israel, li Yos kirachʼabʼ chaq li haʼ saʼ xbʼeen laj Faraon ut ebʼ laj puubʼ ut aran keʼkamk.

Naq keʼnumeʼk li chihabʼ, ebʼ laj Israel keʼxkʼojobʼ rochoch chixkʼatq li tzuul Sinai ut aran wankebʼ naq li Jehobʼa kixbʼaanu jun li sumwank rikʼinebʼ. Li Yos kiroksi laj Moises joʼ aj numsihom Raatin: kixkʼe li chaqʼrabʼ li tbʼeeresinq ut tkoloq rehebʼ saʼebʼ li xyuʼam. Wi maajunwa raj keʼxtzʼeqtaana li Yos ut yookebʼ raj chi abʼink chiru, li Yos kiwank raj rikʼinebʼ ut aʼanebʼ raj keʼoksiik re rosobʼtesinkilebʼ li tenamit.

Naabʼalebʼ laj Israel keʼxkʼutbʼesi naq moko kʼojkʼookebʼ ta xchʼool chirix li Yos. Joʼkan naq, li Yos kixbʼaanu naq teʼxbʼeeni ribʼ saʼ li chaqichʼochʼ chiru 40 chihabʼ. Chirix chik aʼan laj Moises kixxaqabʼ jun laj Israel aj Josue xkʼabʼaʼ choʼq ruuchil. Tojaʼ naq kiwulak xqʼehil naq ebʼ laj Israel teʼoq saʼ li chʼochʼ li kixyeechiʼi chaq li Yos re laj Abrahan.

(Isinbʼil chaq saʼ Exodo, saʼ Levitico, saʼ Numeros, saʼ Deuteronomio, saʼ Salmo 136:10-15 ut saʼ Hechos 7:17-36.)