Li muqmuukil naʼlebʼ

Ma xeʼxye aawe junaq li naʼlebʼ li maaʼani chik nanawok re?...a Aʼin nawbʼil ru joʼ muqmuukil naʼlebʼ xbʼaan naq kaʼajwiʼ aawe xeʼxye. Li Santil Hu naʼaatinak ajwiʼ chirix jun «li muqmuukil naʼlebʼ». Abʼan aʼin nachalk rikʼin li Yos. Nayeemank re chi joʼkan xbʼaan naq maaʼani chik nanawok re chi moko ebʼ li anjel. Ma nakaanaw chanruhebʼ li anjel? Ebʼ li anjel inkʼaʼ nekeʼilmank ru. Ut keʼraj ajwiʼ xnawbʼal li muqmuukil naʼlebʼ aʼin. Ma twulaq raj chaawu xnawbʼal aʼin?...

Ak xnumeʼk naabʼal chihabʼ chalen chaq naq li Yos kixyobʼtesi jun winq ut jun ixq. Chanru xkʼabʼaʼebʼ?... Aʼan laj Adan ut xʼEva. Ut keʼkʼeheʼk chaq saʼ li naʼajej Eden. Li Yos kixyiibʼ chiʼus li naʼajej aʼin choʼq rehebʼ. Kiraj naq laj Adan, li xʼEva ut ebʼ li xkokʼal teʼxchʼinaʼusa chixjunil li Ruuchichʼochʼ joʼ li naʼajej Eden. Ut kiraj naq teʼwanq xyuʼam chi junelik saʼ li chʼinaʼusil naʼajej. Abʼan, kʼaʼut inkʼaʼ kikʼulmank aʼin?

Laj Adan ut xʼEva inkʼaʼ keʼabʼink chiru li Yos. Joʼkan naq, moko wanko ta saʼ li chʼinaʼusil naʼajej arin saʼ Ruuchichʼochʼ. Abʼan li Yos kixye naq saʼ junaq kutan tchʼinaʼusoʼq li Ruuchichʼochʼ. Chixjunilebʼ sahaqebʼ saʼ xchʼool ut teʼwanq xyuʼam chi junelik. Abʼan, chanru tixbʼaanu aʼin li Yos? Chiru naabʼal chihabʼ maajun rehebʼ li qas qiitzʼin kinawok chaq re aʼin. Muqmu chaq chiruhebʼ!

Abʼan timil timil kiʼok chi nawmank. Naq li Jesus kichalk saʼ Ruuchichʼochʼ, kixkʼut kʼaru li muqmuukil naʼlebʼ aʼin. Kixye naq aʼan li Xʼawabʼejilal li Yos. Naq nokootijok naqaye re li Yos: «Chichalq ta laanimajwal awabʼejihom». Kʼaʼut naqaye aʼin? Xbʼaan naq li Xʼawabʼejilal li Yos tixchʼinaʼusa chixjunil li Ruuchichʼochʼ.

Ma twulaq raj chaawu wank saʼ li chʼinaʼusil naʼajej aʼin?... Jultikoʼq aawe naq kaʼajwiʼ li nekeʼabʼink chiru li Yos teʼwanq saʼ li chʼinaʼusil naʼajej arin saʼ Ruuchichʼochʼ. Li Santil Hu naʼaatinak chirixebʼ winq ut ixq li keʼabʼink chaq chiru li Jehobʼa. Saʼ li tasal hu aʼin tqatzol anihebʼ chaq ut chanru tooruuq xkʼambʼal qe rikʼinebʼ. Ma twulaq raj chaawu xnawbʼalebʼ ru?...