Kixsahobʼresi xchʼool li Jehobʼa ut li xyuwaʼ

Ma nakaanaw ani li chʼina ixqaʼal wank saʼ li eetalil?... Li Santil Hu inkʼaʼ naxye xkʼabʼaʼ, abʼan naxye naq aj Jefte xkʼabʼaʼ li xyuwaʼ. Li Jehobʼa ut laj Jefte keʼsahoʼk saʼ xchʼool xbʼaan jun li naʼlebʼ kixbʼaanu. Ma taawaj xnawbʼal xkomon li naʼlebʼ chirix laj Jefte ut li xrabʼin?

Chaabʼil winq laj Jefte. Kixkʼe chaq xhoonal re xtzolbʼal li xrabʼin chirix li Jehobʼa. Ut kaw ribʼ ut naxnaw chaq xbʼeresinkil li tenamit Israel. Joʼkan naq, ebʼ laj Israel keʼxye re: «Ma nakaawaj xkʼambʼal qabʼe saʼ li yalok?».

Laj Jefte kixpatzʼ xtenqʼankil re li Jehobʼa. Kixye re wi us t-elq saʼ li yalok, tixqʼaxtesi re li t-elq chaq xbʼeenwa saʼ rochoch chi xkʼulbʼal. Kʼaru kiraj xyeebʼal rikʼin aʼin? Li t-elq chaq xbʼeenwa txik chi kʼanjelak ut chi kanaak chi junajwa saʼ rochoch li Yos. Saʼ li ochoch aʼin nekeʼwulak chaq xloqʼoninkil li Jehobʼa. Ma us kiʼelk saʼ li yalok? Heeheʼ. Ut naq kisutqʼiik laj Jefte saʼ rochoch, ma nakaanaw ani kiʼelk chaq xbʼeenwa?...

Aʼ li xrabʼin! Jun ajwiʼ xrabʼin, ut anaqwan tento tixtaqla chi junajwa saʼ rochoch li Yos. Laj Jefte kirahoʼk saʼ xchʼool, abʼan kixkʼe li raatin re li Jehobʼa, ma jultik aawe? Joʼkan naq, li xrabʼin kixye re: «At inyuwaʼ, xaakʼe laawaatin re li Jehobʼa ut tento taabʼaanu».

Kirahoʼk ajwiʼ saʼ xchʼool li xrabʼin! Kʼaʼut? Xbʼaan naq saʼ rochoch li Yos inkʼaʼ truuq chi sumlaak chi moko twanq ta xkokʼal. Abʼan kiraj xbʼaanunkil li kixye chaq li xyuwaʼ. Ut kiraj ajwiʼ naq li Jehobʼa sahaq saʼ xchʼool rikʼin. Aʼin tzʼaqal wank chaq xwankil choʼq re, chiru naq tsumlaaq malaj naq twanq xkokʼal. Joʼkan naq, xkoho saʼ rochoch li Yos ut aran kikanaak chi junajwa.

Ma sa chaq saʼ xchʼool li Jehobʼa ut laj Jefte rikʼin?... Heeheʼ. Laaʼat naru ajwiʼ nakaakʼam aawe rikʼin. Wi nakaara ut nakat-abʼinq chiru li Jehobʼa, sahaq saʼ xchʼool aawikʼin. Ut sahaqebʼ ajwiʼ saʼ xchʼool laanaʼ laayuwaʼ.