Naq saaj chaq li Jesus

Laj Jose ut xMaria wankebʼ chaq Nazaret rikʼin li Jesus ut ebʼ li jun siir li xyum ut ebʼ li xkoʼ. Laj Jose kikʼanjelak choʼq aj peechʼ re xweenteninkil li xjunkabʼal. Joʼkan ajwiʼ, naxkʼut chaq chiruhebʼ chirix li Jehobʼa ut li Xchaqʼrabʼ. Joʼ junkabʼal kʼaynaqebʼ chi xik saʼ li chʼutlebʼaal re xloqʼoninkil li Yos ut chi xik Jerusalen re xnimankil li Paswa rajlal chihabʼ.

Naq li Jesus wank 12 chihabʼ re, joʼ junkabʼal xkohebʼ Jerusalen, joʼ kʼaynaqebʼ xbʼaanunkil. Li tenamit nujenaq chi poyanam xbʼaan naq keʼwulak ajwiʼ chi xnimankil li Paswa. Naq kiraqeʼk li ninqʼe aʼin, laj Jose ut xMaria keʼxchap xbʼe re xik saʼ rochoch ut keʼxkʼoxla naq li Jesus yook chi chalk saʼ xyanqebʼ li xkomon. Abʼan, naq keʼxsikʼ saʼ xyanq li komonil, inkʼaʼ keʼxtaw.

Joʼkan naq, keʼsutqʼiik Jerusalen ut chiru oxibʼ kutan keʼxsikʼ wiʼ li Jesus. Tojaʼ naq, keʼxtaw saʼ rochoch li Yos. Aran chunchu saʼ xyanqebʼ laj kʼutunel, yook xkʼebʼal xchʼool chi rabʼinkilebʼ ut xbʼaanunkil ebʼ li xninqal ru patzʼom. Ebʼ laj kʼutunel sachso xchʼool keʼkanaak rikʼin li yook xyeebʼal chaq li Jesus, joʼkan naq, keʼok chi patzʼok re. Keʼxkʼe reetal naq naxtaw ru chiʼus li Xchaqʼrabʼ li Jehobʼa.

Laj Jose ut xMaria jwal yookebʼ xkʼaʼuxl. Li xMaria kixye: «Waʼ, yalaq bʼar xatqasikʼ. Bʼar wankat chaq?». Ut li Jesus kisumenk re: «Ma inkʼaʼ nekeenaw naq tento tinwanq saʼ rochoch Linyuwaʼ?».

Li Jesus kisutqʼiik rikʼin li xnaʼ xyuwaʼ aran Nazaret. Laj Jose kixkʼut chiru li Jesus kʼanjelak joʼ aj peechʼ. Kʼaru nakaakʼoxla? Chan tawiʼ ru li Jesus naq saaj chaq? Li Jesus kiʼok chi kʼiik ut inkʼaʼ kixkanabʼ xtawbʼal xnaʼlebʼ? Joʼkan naq, li Yos ut ebʼ li poyanam inkʼaʼ keʼxkanabʼ xraabʼal.