Jun li nimla qʼolok

LI JESUS ak kixye chaq naq ebʼ li teʼtaqenq re, teʼxxok jun li nimla qʼolom saʼ xqʼehil li rosoʼjik (Mat. 9:37; 24:14). Ebʼ li aatin aʼin yook chi tzʼaqlok ru chiʼus saʼ jun li teep re Transcarpatia (Ucrania). Kaʼajwiʼ saʼ oxibʼ li kʼalebʼaal li rechkabʼalebʼ ribʼ, wank 50 li chʼuut ut numenaq 5.400 aj puktesinel.a Joʼkan bʼiʼ, wi naqachʼutubʼ ebʼ li poyanam re li oxibʼ chi kʼalebʼaal aʼin, 1 saʼ xyanq li 4 wank choʼq aj Testiiw re li Jehobʼa.

Chanruhebʼ li poyanam re li teep aʼin? «Ebʼ li poyanam li wankebʼ arin nekeʼroxloqʼi li Santil Hu, oxloqʼ chiruhebʼ li tiikilal, ebʼ li junkabʼal wankebʼ saʼ junajil ut nekeʼxkʼe xchʼool chi xtenqʼankil ribʼebʼ», naxye jun li qech aj paabʼanel Vasile xkʼabʼaʼ. Joʼkan ajwiʼ kixye: «Moko junelik ta nekeʼxkʼulubʼa li naqapaabʼ, abʼan naq nakaakʼut jun raqal li Santil Hu nekeʼxkʼe xchʼool chaawabʼinkil».

Relik chi yaal, naq tatpuktesinq saʼ junaq li teep bʼarwiʼ naabʼalebʼ laj puktesinel, ebʼ li qech aj paabʼanel nekeʼxtaw wiibʼ oxibʼ li chʼaʼajikilal chirix aʼin. Jun eetalil, saʼ jun li chʼuut wank 134 aj puktesinel ut kaʼajwiʼ 50 li ochoch wank re puktesink. Kʼaru nekeʼxbʼaanu naq nakʼulmank aʼin?

Naabʼalebʼ li qech aj paabʼanel, usta chʼaʼaj chiruhebʼ, nekeʼxik saʼ jalan chik li teep bʼarwiʼ naʼajmank aj puktesinel. Laj Ionash, li wank 90 chihabʼ re, naxye: «Saʼ li qachʼuut wank 2 li ochoch choʼq re 1 aj puktesinel. Anaqwan ninpuktesink chik saʼ tenamit, abʼan naq toj maajiʼ nanimank linyajel, ninxik ajwiʼ saʼ junaq li teep li moko wank ta saʼ ajl, li xnajtil 160 kilometros (100 millas) re puktesink saʼ Hungaro». Nachʼaʼajkoʼk bʼayaq chiruhebʼ laj puktesinel xik saʼebʼ li naʼaj aʼin. Laj Ionash naxye: «Re naq tinruuq chi xik saʼ tren, tento naq tinwakliiq kaahibʼ hoonal re eqʼla. Ut ninraqeʼk chi puktesink toj waqibʼ hoonal re ewu naq nasutqʼiik chaq li bʼelebʼaal chʼiichʼ. Ninbʼaanu chaq aʼin wiibʼ malaj oxibʼ sut chiru li xamaan». Ma narekʼa li qech aj paabʼanel aʼin naq wank rusilal li xkʼanjel? Laj Ionash naxye: «Li puktesink chi joʼkan jwal kixkʼe xsahil linchʼool. Ut xinruuk xkʼutbʼal li yaal chiru jun li junkabʼal li jwal najt nakanaak li rochoch».

Natawmank ru naq wankebʼ li qech aj paabʼanel rehebʼ li chʼuut aʼan li inkʼaʼ nekeʼruuk chi xik chi najt, abʼan chixjunilebʼ, joʼ cheek, nekeʼxkʼe xchʼool chi xtawbʼalebʼ li poyanam saʼ xteepebʼ. Saʼ xkʼabʼaʼ aʼin, chiru li chihabʼ 2017 li oxibʼ chi teep aʼin li xeʼwulak chi xnimankil li xkamik li Jesus, kachʼin chik ma xeʼxtaw xkabʼ sutil li xkʼihalilebʼ laj puktesinel, malaj, xyiijachil ebʼ li poyanam. Joʼ naqakʼe reetal, maakʼaʼ naxye bʼar toopuktesinq, toj «naabʼal naʼajmank saʼ li xkʼanjel li Qaawaʼ» (1 Cor. 15:58, TNM).