Maaʼani naxkol ribʼ chiru li kamk

KʼOXLA naq yookebʼ xseeraqʼinkil aawe li xyuʼam jun laj bʼichanel li jwal nawno ru chiʼus, maare nawulak chaawu jun rehebʼ li xbʼich. Nekeʼxye aawe naq nawulak chiru bʼichank chalen chaq saʼ xkachʼinal, naxtzol ribʼ chiʼus ut timil timil naxtzol bʼichank. Chirix chik aʼan, naxik chi bʼichank saʼ jalan chik tenamit saʼebʼ li ninqʼe ut chi joʼkan nanaweʼk ru yalaq bʼar. Abʼan, nekeʼxye aawe naq natiixk ut nakamk.

Yaal li xeʼxseeraqʼi aawe, abʼan laj bʼichanel ak kamenaq chik. Joʼkan raj ajwiʼ tixkʼul junaq aj kʼutunel, aj bʼanonel malaj junaq chik li poyanam li nawbʼil ru chiʼus. Usta naabʼal xbʼaanu saʼ li xyuʼam, maare tqakʼoxla kʼaru chik xruuk raj xbʼaanunkil wi inkʼaʼ raj xkamk.

Ra xyeebʼal, abʼan aʼan li tqakʼul chiqajunilo (Eclesiastes 9:5). Usta naqayal qaqʼe, abʼan inkʼaʼ nokooruuk chi elelik chiru li tiixilal ut li kamk. Joʼkan ajwiʼ, naru nokookamk saʼ xkʼabʼaʼ li raxkamk malaj li nimla yajel. Joʼ naxye li Santil Hu, chanchano «li kʼajobʼ nakʼutunk jun kʼamokaq, ut chirix chik aʼan nasachk» (Santiago 4:14).

Wankebʼ li poyanam nekeʼxye naq inkʼaʼ nanawmank li tqakʼul wulaj kabʼej ut naq maakʼaʼ xyaalalil li qayuʼam, joʼkan naq nekeʼxye: «Tzekanqo, ukʼaqo xbʼaan naq wulaj tookamq» (1 Corintios 15:32). Abʼan, peʼyaal naq rikʼin xyeebʼal aʼin chʼolchʼo chiruhebʼ naq teʼkamq? Nawulak xhoonalil naq chiqajunilo naqakʼoxla kʼaru xyaalalil li qayuʼam, ut qʼaxal wiʼ chik naq yooko xnumsinkil junaq li rahilal. Bʼar tqataw xsumenkil?

Naabʼalebʼ li qas qiitzʼin nekeʼxsikʼ xtenqʼ rikʼinebʼ laj chamalnawom. Rikʼin li ak xeʼxbʼaanu ebʼ laj chamalnawom ut ebʼ laj bʼanonel xeʼruuk bʼayaq chik xnajtobʼresinkil roq li yuʼam ut wankebʼ chik toj yookebʼ xsikʼbʼal chanru xbʼaanunkil. Abʼan, aʼ yaal chanru, wank li patzʼom li toj maajiʼ natawmank xsumenkil, joʼ kʼaʼut nokootiixk ut nokookamk, ut ma tooruuq xqʼaxbʼal ru li kamk saʼ junaq kutan. Ebʼ li tzolom li ok qe rilbʼal tixtzʼil rix ebʼ li naʼlebʼ aʼin ut tixsume li patzʼom: kʼaru xyaalalil li qayuʼam?