TZOLOM 01
Chanru truuq aatenqʼankil li Santil Hu?
Chiqajunilo naqaj xnawbʼal chirix li yuʼam, li rahilal, li kamk ut li kutan chalkebʼ re. Naʼok ajwiʼ qakʼaʼuxl chirix li naqakʼul wulaj wulaj, joʼ xtawbʼal li naʼajmank saʼ li qayuʼam malaj re naq sahaq saʼ xchʼool li qajunkabʼal. Naabʼalebʼ li kristiʼaan nekeʼxkʼe reetal naq li Santil Hu naxsume ebʼ li xninqal ru patzʼom ut naxkʼe ajwiʼ li chaabʼil naʼlebʼ choʼq re li qayuʼam. Ma nakaakʼoxla naq li Santil Hu truuq xtenqʼankil junaq li kristiʼaan li nakaanaw ru?
1. Kʼaru ebʼ li junjunq chi patzʼom naxsume li Santil Hu?
Li Santil Hu naxsume ebʼ li xninqal ru patzʼom joʼ: ani kiyobʼtesink re chixjunil?, kʼaru aj e naq wanko arin?, kʼaʼut naqakʼul li rahilal?, ma wank kʼaru nakanaak chi yoʼyo naq nokookamk?, wi chiqajunilo naqaj wank saʼ tuqtuukilal, kʼaʼut naq wank li yalok u? ut, kʼaru tawiʼ tkʼulmanq rikʼin li Ruuchichʼochʼ? Saʼ li Santil Hu tatruuq xtawbʼal li xsumenkil ebʼ li patzʼom aʼin, chi miyon ebʼ li kristiʼaan ak keʼxbʼaanu chik aʼan ut keʼkʼojlaak xchʼool rikʼin li keʼxtaw.
2. Chanru nokooxtenqʼa li Santil Hu re naq sahaq saʼ li qachʼool?
Saʼ li Santil Hu natawmank li chaabʼil naʼlebʼ. Naxkʼut chiruhebʼ li junkabʼal chanru teʼxtaw li sahil chʼoolejil, naxye ajwiʼ qe kʼaru tqabʼaanu naq tnumtaaq li qakʼaʼuxl ut chanru tqayal xsahil li qakʼanjel. Naq yooqo xtzolbʼal li tasal hu aʼin, taatzol kʼaru naxye li Santil Hu chirix aʼin ut chirix jalan chik li naʼlebʼ. Chʼolchʼooq chaawu naq «chixjunil [li naxye] li Santil Hu [...] nakʼanjelak» (2 Timoteo 3:16).
Li tasal hu aʼin moko reqaj ta li Santil Hu, tatxtenqʼa bʼan chi xtzolbʼal chiʼus li Santil Hu. Us raj naq taasikʼ chixjunil xraqal li Santil Hu li wank saʼ li tzolom ut juntaqʼeeta rikʼin li yookat xtzolbʼal.
QASIKʼAQ XCHAMAL LI NAʼLEBʼ
Qilaq chanru li Santil Hu ak kixtenqʼa naabʼal li kristiʼaan, kʼaru tqabʼaanu re naq sahaq saʼ qachʼool chi rilbʼal xsaʼ ut kʼaru rusilal naqataw naq nokooʼeʼxtenqʼa chi xtzʼilbʼal rix.
3. Li Santil Hu naxkʼut qabʼe
Li Santil Hu chanchan jun li lochlokil malaj li lechlokil xaml li naxkutanobʼresi li qabʼe. Nokooxtenqʼa chi xnawbʼal kʼaru tqabʼaanu saʼ li qayuʼam ut re xnawbʼal kʼaru tkʼulmanq saʼ li kutan chalkebʼ re.
Cheeyaabʼasi Salmo 119:105 ut chexʼaatinaq chirix ebʼ li patzʼom aʼin:
Kʼaru kixkʼoxla chirix li Santil Hu li kitzʼiibʼank chaq re li Salmo aʼin?
Ut laaʼat, kʼaru nakaakʼoxla chirix li Santil Hu?
4. Li Santil Hu naxsume ebʼ li qapatzʼom
Jun li ixq kixtaw saʼ li Santil Hu xsumenkil ebʼ li patzʼom li junxil naʼok xkʼoxlankil. Cheerilaq li BʼIDEO ut chexʼaatinaq chirix ebʼ li patzʼom aʼin:
Kʼaru ebʼ li patzʼom kixbʼaanu li ixq?
Kʼaru rusilal kixtaw naq kixtzol li Santil Hu?
Li Santil Hu naxye qe naq us raj naq toopatzʼoq. Cheeyaabʼasi Mateo 7:7 ut chexʼaatinaq chirix li patzʼom aʼin:
Bʼar wank junjunq laapatzʼom li naru tixsume li Santil Hu?
5. Twulaq chaawu rilbʼal xsaʼ li Santil Hu
Naabʼalebʼ li kristiʼaan nekeʼwulak chiru rilbʼal xsaʼ li Santil Hu ut nekeʼxtaw rusilal. Cheerilaq li BʼIDEO ut chexʼaatinaq chirix ebʼ li patzʼom aʼin:
Kʼaru nekeʼxye ebʼ li saaj chirix xyaabʼasinkil junaq li hu?
Kʼaʼut naq nawulak chiruhebʼ xyaabʼasinkil li Santil Hu?
Li naxye li Santil Hu naxkʼojobʼ qachʼool ut naxkʼe qoybʼenihom. Cheeyaabʼasi Romanos 15:4 ut chexʼaatinaq chirix li patzʼom aʼin:
Ma taawaj xnawbʼal bʼayaq chik chirix li kʼojobʼank chʼoolej ut li naxyeechiʼi li Santil Hu?
6. Re naq tqataw ru li naxye li Santil Hu aajel ru naq tooʼeʼxtenqʼa
Maare nakaayaabʼasi li Santil Hu aajunes abʼan wankebʼ nekeʼxtaw rusilal naq nekeʼtenqʼaak. Cheeyaabʼasi Hechos 8:26-31 ut chexʼaatinaq chirix li patzʼom aʼin:
Kʼaru naʼajmank re xtawbʼal ru li naxye li Santil Hu? (Teeril li raqal 30 ut 31).
Kiʼajmank chiru li winq aj Etiopía naq ttenqʼaaq re naq tixtaw ru li naxye li Santil Hu. Saʼebʼ li qakutan naabʼalebʼ nekeʼxtaw rusilal xtzolbʼal li Santil Hu naq nekeʼtenqʼaak.
WIIBʼ OXIBʼ NEKEʼXYE: «Xtzolbʼal li Santil Hu, aʼan sachok hoonal».
Ma joʼkan nakaakʼoxla laaʼat? Kʼaʼut?
LI AK XQATZOL
Li Santil Hu naxkʼe qanaʼlebʼ choʼq re li qayuʼam, naxsume ebʼ li xninqal ru patzʼom, naxkʼojobʼ qachʼool ut naxkʼe qoybʼenihom.
Qajultikaq
Kʼaru ebʼ li naʼlebʼ naqataw saʼ li Santil Hu?
Kʼaru ebʼ li junjunq chi patzʼom naxsume li Santil Hu?
Kʼaru twulaq raj chaawu xtzolbʼal saʼ li Santil Hu?
SIKʼ XKOMON LI NAʼLEBʼ
Tzol chanru li xnaʼlebʼ li Santil Hu nakʼanjelak saʼebʼ li qakutan.
«Li choxahil naʼlebʼ li wank saʼ li Santil Hu maakʼaʼ rosoʼjik» (Laj Kʼaakʼalehom, ajl 1 2018)
Kʼe reetal chanru naq li Santil Hu kixtenqʼa jun li winq li naxkʼoxla chaq naq maakʼaʼ rusil li xyuʼam.
Sikʼ li naʼlebʼ li naxkʼe li Santil Hu re naq sahaq saʼ xchʼool laajunkabʼal.
«Tzol 12 li naʼlebʼ re naq sahaq saʼ xchʼool li junkabʼal» (Ajsi aawu!, ajl 2 2018)
Kʼe reetal chanru naq li Santil Hu naxchʼolobʼ ani tzʼaqal najolomink re li ruuchichʼochʼ.
Kʼaʼut us naq tattzoloq chirix li Santil Hu? (Chixjunil) (3:14)