Kʼaru ttenqʼanq aawe re naq inkʼaʼ taakanabʼ xtzolbʼal li Santil Hu?

Xtzolbʼal li Santil Hu chanchan xik chi bʼeek saʼ jun li chaabʼil naʼajej. Abʼan wank sut nachʼaʼajkoʼk. Maare nakaakʼoxla, ma toj tinruuq tawiʼ xtzolbʼal li Santil Hu? Kʼaʼut tento taayal aaqʼe re naq inkʼaʼ taakanabʼ xtzolbʼal? Kʼaru ttenqʼanq aawe re naq inkʼaʼ taakanabʼ tzolok usta wank aachʼaʼajkilal?

1. Kʼaʼut wank xwankil xtzolbʼal li Santil Hu?

«Yoʼyo li Raatin li Yos ut kaw ribʼ» (Hebreos 4:12). Kʼajoʼ rusilal li Santil Hu xbʼaan naq chisaʼ naxye li naxkʼoxla ut narekʼa li Yos chaawix. Li Santil Hu moko kaʼaj tawiʼ nakatxtenqʼa re naq wank aanawom naxkʼe bʼan laanaʼlebʼ ut chisaʼ taataw li naxyeechiʼi li Yos choʼq re li kutan chalk re. Ut li qʼaxal wank xwankil aʼan naq tatxtenqʼa re naq tatwanq choʼq ramiiw li Yos. Naq nakaatzol li Santil Hu nakaakanabʼ naq tixchaabʼilobʼresi laayuʼam.

2. Kʼaʼut aajel ru xkʼebʼal reetal naq wank xwankil li yaal li wank saʼ li Santil Hu?

Li yaal li natawmank saʼ li Santil Hu chanchan ebʼ li tertokil pek. Li Santil Hu naxye qe aʼin: «Sikʼ li yaal, ut maakʼayi» (Proverbios 23:23). Wi chʼolchʼo chiqu naq wank xwankil li naxye li Santil Hu tqayal qaqʼe re naq inkʼaʼ tqakanabʼ xtzolbʼal usta wanq li qachʼaʼajkilal (yaabʼasi Proverbios 2:4, 5).

3. Chanru tatxtenqʼa li Jehobʼa re naq inkʼaʼ taakanabʼ xtzolbʼal li Santil Hu?

Xbʼaan naq li Jehobʼa aʼan laj Yobʼtesinel aawe ut aawamiiw, naxnaw aawu chiʼus ut naraj aatenqʼankil re naq taataw xkomon aanaʼlebʼ chirix. Li Santil Hu naxye naq li Yos «naʼeekʼasink eere chi rahok ut chi kʼanjelak» (yaabʼasi Filipenses 2:13). Joʼkan bʼiʼ, wi wank sut nachʼaʼajkoʼk chaawu tzolok malaj xyuʼaminkil, aʼan naru nakatxtenqʼa. Naru ajwiʼ aatenqʼankil re xqʼaxbʼal ru junaq li chʼaʼajkilal malaj naq ebʼ li junchʼol inkʼaʼ nekeʼraj naq tattzoloq. Junelik tzʼaama re li Jehobʼa re naq tatxtenqʼa re naq inkʼaʼ taakanabʼ tzolok (1 Tesalonicenses 5:17).

QASIKʼAQ XCHAMAL LI NAʼLEBʼ

4. Misach saʼ aachʼool naq xtzolbʼal li Santil Hu wank xwankil

Wank sut kʼajoʼ qalaatzʼal ut nachʼaʼajkoʼk chiqu xtzolbʼal li Santil Hu. Kʼaru tatruuq xbʼaanunkil? Cheeyaabʼasi Filipenses 1:10 ut chexʼaatinaq chirix ebʼ li patzʼom aʼin:

• Kʼaru nakaaye laaʼat, kʼaru tawiʼ li naʼlebʼ li «qʼaxal chaabʼil»?

• Kʼaru tatruuq xbʼaanunkil re naq taakʼe xbʼeenwa saʼ laayuʼam xtzolbʼal li Santil Hu?

1. Wi nakaabʼutʼ chi samahibʼ jun li kubʼeet ut moqon taawaj xkʼebʼal jun tuubʼ chi pek chisaʼ moko t-oq ta chixjunil.

2. Abʼan wi taakʼe li pek xbʼeenwa ut moqon li samahibʼ t-oq chixjunil. Joʼkan ajwiʼ tkʼulmanq wi taakʼe chiʼubʼej li wank xwankil, wanq aahoonal re xbʼaanunkil chixjunil li nakaawaj.

Xtzolbʼal li Santil Hu naxkawresi qapaabʼal, aʼin naraj xyeebʼal xnawbʼal ut xloqʼoninkil ru li Yos. Cheeyaabʼasi Mateo 5:3 ut chexʼaatinaq chirix li patzʼom aʼin:

• Kʼaru rusilal tqataw wi naqakʼe chiʼubʼej saʼ li qayuʼam xtzolbʼal li Santil Hu?

5. Maakanabʼ xtzolbʼal li Santil Hu usta teʼraj xrambʼal chaawu

BʼIDEO: Xinʼosobʼtesiik xbʼaan naq xinkʼe inqʼe (5:22)

• Kʼaru xeʼxye li xjunkabʼal ut ebʼ li ramiiw laj Francesco naq kixye rehebʼ naq yook xtzolbʼal li Santil Hu?

• Chanru kiʼosobʼtesiik xbʼaan naq kixyal xqʼe?

Cheeyaabʼasi 2 Timoteo 2:24, 25 ut chexʼaatinaq chirix ebʼ li patzʼom aʼin:

• Kʼaru nekeʼxye laakomon ut ebʼ laawamiiw chirix li yookat xtzolbʼal?

• Joʼ naxye ebʼ li raqal aʼin, chanru tatnaʼlebʼaq naq junaq li kristiʼaan inkʼaʼ naraj naq taatzol li Santil Hu? Kʼaʼut?

6. Paabʼ chi anchal aachʼool naq li Jehobʼa tatxtenqʼa

BʼIDEO: Li Jehobʼa nokooxtenqʼa re xjalbʼal qayuʼam (3:56)

• Kʼaru li naʼlebʼ kixjal laj Jim saʼ li xyuʼam re xbʼaanunkil li naraj li Jehobʼa?

• Kʼaru naxtochʼ aachʼool chirix li xyuʼam laj Jim?

Cheeyaabʼasi Hebreos 11:6 ut chexʼaatinaq chirix ebʼ li patzʼom aʼin:

• Kʼaru tixbʼaanu li Jehobʼa chirixebʼ li «nekeʼsikʼok re», li naraj xyeebʼal li nekeʼxkʼe xqʼe chi xnawbʼal ru ut xsahobʼresinkil xchʼool?

• Kʼaru tawiʼ narekʼa li Jehobʼa naq naril naq nakaakʼe aaqʼe chi xtzolbʼal li Santil Hu?

LI AK XQATZOL

Usta tchʼaʼajkoʼq chaawu, xtzolbʼal li Santil Hu tatxtenqʼa re naq sahaq saʼ laachʼool chi junelik. Wi junelik nakaakʼojobʼ aachʼool rikʼin li Jehobʼa aʼan tatrosobʼtesi.

Qajultikaq

• Kʼaʼut oxloqʼ chaawu li yaal li wank saʼ li Santil Hu?

• Kʼaru raj taabʼaanu wi ak chʼolchʼo chaawu li wank xwankil?

• Kʼaʼut tento taapatzʼ re li Jehobʼa naq tatxtenqʼa re naq inkʼaʼ taakanabʼ tzolok?

SIKʼ XKOMON LI NAʼLEBʼ

Tzol kaahibʼ li naʼlebʼ li kitenqʼank re naabʼalebʼ li kristiʼaan re roksinkil chiʼus li hoonal.

«Chanru roksinkil chiʼus li hoonal» (Ajsi aawu!, febrero 2014)

Jun li ixq naraj xloqʼoninkil ru li Yos abʼan li xbʼeelom inkʼaʼ naxtaw ru. Il chanru kitenqʼaak xbʼaan li Jehobʼa.

Li Jehobʼa naxkʼe qametzʼew re xkuybʼal li chʼaʼajkilal (5:05)

Il chanru jun li winq kixtaw rusilal rikʼin li xkuyum li rixaqil.

Xintzʼili rix li yaal (6:30)

Wank sut nayeemank naq ebʼ laj testiiw re li Jehobʼa nekeʼxjach li junkabʼal. Ma yaal aʼin?

«Ma nekeʼxjach li junkabʼal ebʼ laj Testiiw malaj nekeʼxbʼaanu naq teʼwanq saʼ junajil?» (Li naʼlebʼ re jw.org)